समाजाची प्रगती आधुनिक शिक्षणातूनच!युवक-युवतींच्या उज्ज्वल भविष्यासाठी “उम्मूल हसनैन एकेडमी &. ट्रंनिंग सेंटर” शाही मस्जिद नातेपुते मध्ये प्रेरणादायी मोटिवेशनल कार्यक्रम उत्साहात संपन्न
नातेपुते : “आपला समाज, आपली जबाबदारी! शिक्षण प्राप्त करणे प्रत्येक मुस्लिम स्त्री-पुरुषावर अनिवार्य आहे,” ही प्रेषित हजरत मोहम्मद पैगंबर यांची शिकवण समाजापर्यंत पोहोचवत नातेपुते येथील आहले सुन्नी जमातच्या वतीने, शाही मस्जिदचे इमाम (इस्लामिक स्कॉलर) अलीम मोहम्मद मेराज शम्सी किब्ला यांच्या मार्गदर्शनाखाली शुक्रवार, दिनांक ६ नोव्हेंबर रोजी सायंकाळी मगरीबच्या नमाजानंतर शाही मस्जिद परिसरात भव्य मोटिवेशनल व शैक्षणिक मार्गदर्शन कार्यक्रमाचे आयोजन करण्यात आले होते.
या कार्यक्रमासाठी प्रमुख मार्गदर्शक म्हणून प्रो. इसहाक मुजावर (एज्युकेटर व मोटिवेशनल स्पीकर), प्रो. जमाल मुलानी (डायरेक्टर, नीती IAS अकॅडमी, पुणे) आणि प्रो. अब्दुलगणी तांबोळी (बिझनेस ट्रेनर व स्पीकर) उपस्थित होते.
यावेळी युवक-युवतींना मार्गदर्शन करताना प्रो. इसहाक मुजावर यांनी शिक्षणाचे महत्त्व, पालकांची जबाबदारी आणि मुलांच्या उज्ज्वल भविष्याची जडणघडण यावर प्रभावी विचार मांडले. ते म्हणाले की, आई हे स्वर्ग असून वडील स्वर्गाचा दरवाजा आहेत. प्रत्येक पालकाने आपल्या मुला-मुलींच्या भविष्यासाठी इयत्ता आठवीपासूनच नियोजनपूर्वक प्रयत्न सुरू केले पाहिजेत. समाजपरिवर्तनाची सुरुवात ही स्वतःच्या घरापासून झाली पाहिजे. आपण ज्या पद्धतीने राहतो, वागतो आणि समाजासमोर आपले आचरण ठेवतो, त्यावरूनच इतरांचा आपल्या धर्माकडे पाहण्याचा दृष्टिकोन तयार होत असतो, असेही त्यांनी सांगितले.
यानंतर प्रो. जमाल मुलानी यांनी स्पर्धा परीक्षा, ऑनलाइन कोचिंग क्लासेस, आधुनिक शिक्षणपद्धती आणि प्रशासकीय सेवांमधील करिअरच्या संधी याविषयी सविस्तर मार्गदर्शन केले. विद्यार्थ्यांनी काळानुसार बदल स्वीकारून तंत्रज्ञानाचा योग्य वापर करावा आणि मोठी स्वप्ने पाहून ती पूर्ण करण्यासाठी सातत्याने प्रयत्न करावेत, असे आवाहन केले.
प्रो. अब्दुलगणी तांबोळी यांनी व्यवसाय, उद्योजकता, आर्थिक स्वावलंबन आणि व्यावसायिक संधी याविषयी मार्गदर्शन करून युवकांना नोकरीच्या मागे धावण्याबरोबरच स्वतःचा व्यवसाय उभारण्याची प्रेरणा दिली.
कार्यक्रमादरम्यान समाजातील ज्येष्ठ शिक्षक आणि मान्यवरांचा पुष्पहार देऊन सन्मान करण्यात आला. विशेष म्हणजे या कार्यक्रमाला पुरुषांसोबतच महिला वर्गाचीही मोठ्या संख्येने उपस्थिती लाभली. शिक्षण, करिअर, स्पर्धा परीक्षा आणि व्यवसाय यांसारख्या विषयांवर झालेल्या या मार्गदर्शनामुळे उपस्थित युवक-युवतींमध्ये नवी ऊर्जा आणि आत्मविश्वास निर्माण झाला.
कार्यक्रमाच्या शेवटी मोहम्मद मेराज शम्सी यांनी उपस्थित मान्यवर, आयोजक आणि समाजबांधवांचे आभार मानले.
धर्मासोबत शिक्षण, संस्कारांसोबत विज्ञान आणि परंपरेसोबत आधुनिक विचारांची सांगड घालून समाजाच्या सर्वांगीण प्रगतीचा मार्ग निर्माण करण्याचा हा उपक्रम निश्चितच कौतुकास्पद ठरला.
नातेपुते येथील शाही मस्जिदमध्ये ‘उम्मूल हसनैन अकॅडमी अँड ट्रेनिंग सेंटर’च्या वतीने भव्य मोटिवेशनल व शैक्षणिक मार्गदर्शन कार्यक्रम उत्साहात संपन्न
७ नोव्हेंबर : डॉ. बाबासाहेब आंबेडकरांचा शाळा प्रवेश दिन आणि विद्यार्थी दिन – शिक्षणातून परिवर्तनाचा ऐतिहासिक संकल्प!
७ नोव्हेंबर : डॉ. बाबासाहेब आंबेडकरांचा शाळा प्रवेश दिन आणि विद्यार्थी दिन – शिक्षणातून परिवर्तनाचा ऐतिहासिक संकल्प!
साहस Times प्रतिनिधी :- भारतीय सामाजिक परिवर्तनाच्या इतिहासात काही दिवस असे आहेत, ज्यांचे महत्त्व केवळ दिनदर्शिकेतील एका तारखेपुरते मर्यादित राहत नाही, तर ते पुढील अनेक पिढ्यांना प्रेरणा देत राहतात. ७ नोव्हेंबर हा असाच एक ऐतिहासिक दिवस आहे. ७ नोव्हेंबर १९०० रोजी डॉ. बाबासाहेब आंबेडकर यांनी सातारा येथील तत्कालीन गव्हर्नमेंट हायस्कूलमध्ये (सध्याचे श्रीमंत छत्रपती प्रतापसिंह महाराज हायस्कूल) इयत्ता पहिलीमध्ये प्रवेश घेतला. त्यावेळी त्यांचे वय अवघे सहा वर्षे होते. शाळेच्या प्रवेश नोंदवहीत ‘भिवा रामजी आंबेडकर’ या नावाने त्यांची नोंद करण्यात आली होती. एका बालकाच्या शाळा प्रवेशाची ही घटना पुढे जगाच्या इतिहासावर आपल्या विचारांचा ठसा उमटवणाऱ्या महामानवाच्या ज्ञानप्रवासाची सुरुवात ठरली.
या घटनेकडे केवळ एका महापुरुषाच्या शालेय जीवनातील प्रारंभ म्हणून पाहणे पुरेसे ठरणार नाही. भारतीय समाजव्यवस्थेत शतकानुशतके शिक्षणाची दारे काही समाजघटकांसाठी बंद ठेवण्यात आली होती. जातिव्यवस्था, अस्पृश्यता, सामाजिक विषमता आणि धार्मिक रूढींच्या बेड्यांमध्ये माणसाच्या ज्ञानप्राप्तीच्या अधिकारालाच नकार दिला जात होता. अशा प्रतिकूल सामाजिक परिस्थितीत एका वंचित समाजातील बालकाने शिक्षणाच्या प्रवासाला सुरुवात केली. त्या बालकाने पुढे आपल्या असामान्य बुद्धिमत्तेच्या, कठोर परिश्रमाच्या आणि ज्ञानसाधनेच्या बळावर केवळ स्वतःचे आयुष्य बदलले नाही, तर कोट्यवधी वंचित, शोषित आणि उपेक्षित माणसांच्या मुक्तीचा मार्ग प्रशस्त केला. म्हणूनच ७ नोव्हेंबर हा दिवस शिक्षणाच्या अधिकाराचा, ज्ञानाच्या सामर्थ्याचा, सामाजिक समतेचा आणि मानवी स्वाभिमानाचा ऐतिहासिक दिवस आहे.
बाबासाहेबांचे संपूर्ण जीवन म्हणजे प्रतिकूल परिस्थितीवर मात करून ज्ञानाच्या बळावर परिवर्तन घडवण्याचा विलक्षण प्रवास आहे. शालेय जीवनापासून उच्च शिक्षणापर्यंत त्यांना अनेक प्रकारच्या सामाजिक अपमानांना आणि भेदभावाला सामोरे जावे लागले. मात्र, त्यांनी शिक्षणाची कास कधीही सोडली नाही. साताऱ्यात सुरू झालेला हा प्रवास मुंबई, कोलंबिया विद्यापीठ आणि लंडन स्कूल ऑफ इकॉनॉमिक्सपर्यंत पोहोचला. जगातील नामांकित विद्यापीठांतून उच्च शिक्षण घेऊन त्यांनी अर्थशास्त्र, कायदा, राज्यशास्त्र, समाजशास्त्र आणि मानवमुक्तीच्या विचारविश्वात मोलाचे योगदान दिले. पुढे भारतीय राज्यघटनेच्या निर्मितीत त्यांनी बजावलेली भूमिका आणि भारतीय लोकशाहीला दिलेली समता, स्वातंत्र्य, बंधुता व न्यायाची मूल्ये ही त्यांच्या ज्ञानसाधनेची व्यापक फलश्रुती आहे.
बाबासाहेबांसाठी शिक्षण हे केवळ पदवी मिळवण्याचे किंवा नोकरी प्राप्त करण्याचे साधन नव्हते. शिक्षण म्हणजे माणसाला विचार करण्याची क्षमता प्राप्त करून देणारे, अन्यायाची जाणीव करून देणारे, शोषणाविरुद्ध उभे राहण्याचे बळ देणारे आणि स्वतःच्या अस्तित्वाचा स्वाभिमान जागवणारे परिवर्तनाचे साधन होते. म्हणूनच त्यांनी समाजाला ‘शिका, संघटित व्हा आणि संघर्ष करा’ हा मूलमंत्र दिला. त्यांच्या दृष्टीने शिक्षण हे वैयक्तिक उन्नतीबरोबरच सामूहिक मुक्तीचेही प्रभावी माध्यम होते. शिक्षणाच्या अभावामुळे समाजात अज्ञान, अंधश्रद्धा, विषमता आणि शोषण टिकून राहते; तर शिक्षणामुळे विवेक, चिकित्सक दृष्टी, आत्मभान आणि सामाजिक जबाबदारी विकसित होते, ही त्यांची ठाम भूमिका होती.
७ नोव्हेंबर या दिवसाचे आणखी एक महत्त्व म्हणजे बाबासाहेबांच्या शैक्षणिक प्रवासाची सुरुवात ज्या सातारा शहरात झाली, त्या शहराने त्यांच्या जीवनातील या ऐतिहासिक घटनेची स्मृती जपली आहे. मात्र, या घटनेचे महत्त्व साताऱ्यापुरते मर्यादित न राहता संपूर्ण महाराष्ट्रातील विद्यार्थ्यांपर्यंत पोहोचावे, या उद्देशाने सातारा येथील ज्येष्ठ पत्रकार अरुण जावळे यांनी अनेक वर्षे सातत्यपूर्ण प्रयत्न केले. एका ऐतिहासिक घटनेला व्यापक सामाजिक आणि शैक्षणिक ओळख मिळवून देण्याच्या त्यांच्या ध्यासातून ७ नोव्हेंबरचा शाळा प्रवेश दिन ‘विद्यार्थी दिन’ म्हणून साजरा करण्याची चळवळ उभी राहिली.
अरुण जावळे यांनी २००३ पासून सातारा येथे या दिवसाचे आयोजन आणि जनजागृती करण्यास सुरुवात केली. सुरुवातीला स्थानिक पातळीवर होणाऱ्या या उपक्रमाचे राज्यव्यापी स्वरूपात रूपांतर व्हावे, अशी त्यांची भूमिका होती. त्यासाठी त्यांनी ऐतिहासिक संदर्भांचा आधार घेतला, या दिवसाचे शैक्षणिक आणि सामाजिक महत्त्व समाजासमोर मांडले आणि शासनदरबारी सातत्याने पाठपुरावा केला. तत्कालीन सामाजिक न्यायमंत्री राजकुमार बडोले आणि शिक्षणमंत्री विनोद तावडे यांच्याकडे त्यांनी हा दिवस राज्यातील सर्व शाळा आणि कनिष्ठ महाविद्यालयांमध्ये साजरा करण्याची मागणी केली. निवेदने, भेटीगाठी, चर्चा आणि सातत्यपूर्ण पाठपुरावा अशा विविध मार्गांनी त्यांनी या विषयाला सार्वजनिक चर्चेच्या केंद्रस्थानी आणले. अखेर २७ ऑक्टोबर २०१७ रोजी महाराष्ट्र शासनाच्या शालेय शिक्षण विभागाने ७ नोव्हेंबर हा दिवस राज्यातील सर्व शाळा आणि कनिष्ठ महाविद्यालयांमध्ये ‘विद्यार्थी दिन’ म्हणून साजरा करण्याचा निर्णय घेतला. साताऱ्यातून सुरू झालेल्या एका प्रयत्नाला अशा प्रकारे राज्यव्यापी मान्यता मिळाली.
या निर्णयाचे महत्त्व केवळ एका दिवसाला अधिकृत नाव मिळाले एवढेच नाही. बाबासाहेबांच्या शाळा प्रवेशाच्या ऐतिहासिक घटनेला महाराष्ट्राच्या शैक्षणिक जीवनाशी जोडण्याचे काम या निर्णयामुळे झाले. आज राज्यातील शाळांमध्ये विद्यार्थी दिनानिमित्त बाबासाहेबांच्या जीवनावर आधारित उपक्रम, निबंध, वक्तृत्व, वाचन, चर्चासत्रे आणि विविध शैक्षणिक कार्यक्रम आयोजित केले जातात. या माध्यमातून विद्यार्थ्यांना बाबासाहेबांच्या जीवनातील संघर्ष, ज्ञानसाधना, शैक्षणिक योगदान आणि सामाजिक परिवर्तनाचा विचार समजून घेण्याची संधी मिळते. या दिवसामुळे सातारा शहरातील एका शाळेच्या प्रवेश नोंदवहीतील ऐतिहासिक नोंदीला राज्यातील लाखो विद्यार्थ्यांच्या प्रेरणेचा संदर्भ प्राप्त झाला आहे.
या संपूर्ण प्रक्रियेत ज्येष्ठ पत्रकार अरुण जावळे यांनी बजावलेली भूमिका विशेष उल्लेखनीय आहे. एखाद्या ऐतिहासिक घटनेचे महत्त्व ओळखणे ही एक गोष्ट असते; मात्र त्या घटनेला समाजमान्यता मिळवून देण्यासाठी वर्षानुवर्षे सातत्याने प्रयत्न करणे ही वेगळी गोष्ट असते. त्यांनी दुसरी भूमिका निभावली. पत्रकारितेच्या माध्यमातून समाजासमोर ऐतिहासिक विषय मांडण्याबरोबरच त्यासाठी प्रत्यक्ष कृती केली. शासनाचे लक्ष वेधले, संबंधित लोकप्रतिनिधी आणि मंत्र्यांपर्यंत विषय पोहोचवला आणि आपल्या मागणीचा सातत्याने पाठपुरावा केला. राज्यस्तरीय मान्यता मिळाल्यानंतरही हा दिवस देशभर साजरा व्हावा, यासाठी त्यांनी प्रयत्न सुरू ठेवले. एका पत्रकाराने आपल्या लेखणीच्या पलीकडे जाऊन सामाजिक इतिहासाच्या जतनासाठी आणि शैक्षणिक प्रबोधनासाठी केलेले हे कार्य निश्चितच कौतुकास्पद आहे. आज ७ नोव्हेंबरला विद्यार्थी दिन साजरा होत असताना या प्रयत्नांची आणि त्यामागील जिद्दीची कृतज्ञतापूर्वक आठवण ठेवणे आवश्यक आहे.
आजच्या काळात ७ नोव्हेंबरच्या ऐतिहासिक महत्त्वाचा विचार करताना शिक्षणासमोरील वर्तमान आव्हानांचाही विचार करणे गरजेचे आहे. शिक्षण सर्वांसाठी उपलब्ध असणे, प्रत्येक बालकाला गुणवत्तापूर्ण शिक्षण मिळणे, सामाजिक आणि आर्थिक परिस्थितीमुळे कोणत्याही विद्यार्थ्याचे शिक्षण थांबू नये, मुलींना शिक्षणाच्या समान संधी मिळाव्यात आणि शाळांमध्ये जात, धर्म, भाषा, लिंग किंवा आर्थिक स्थितीच्या आधारावर कोणताही भेदभाव होऊ नये, ही बाबासाहेबांच्या विचारांशी सुसंगत भूमिका आहे. केवळ शाळेत प्रवेश मिळणे म्हणजे शिक्षणाचा अधिकार पूर्ण होणे नव्हे; तर प्रत्येक विद्यार्थ्याला सन्मानाने शिकता येईल, प्रश्न विचारता येतील, स्वतंत्रपणे विचार करता येईल आणि आपल्या क्षमतांचा विकास करता येईल असे वातावरण निर्माण होणे आवश्यक आहे.
विद्यार्थी दिन साजरा करताना बाबासाहेबांचे छायाचित्र पूजन, भाषणे किंवा औपचारिक कार्यक्रम यांच्यापुरते आपण मर्यादित राहता कामा नये. प्रत्येक शाळेत वाचनसंस्कृती विकसित होणे, ग्रंथालये समृद्ध होणे, विद्यार्थ्यांमध्ये वैज्ञानिक दृष्टिकोन निर्माण होणे, संविधानिक मूल्यांची जाणीव वाढणे आणि शिक्षणातील विषमता दूर करण्यासाठी प्रयत्न होणे, ही या दिवसाची खरी फलश्रुती ठरावी. विद्यार्थ्यांनी बाबासाहेबांच्या जीवनाचा अभ्यास करताना त्यांच्या संघर्षातून प्रेरणा घ्यावी; त्याचबरोबर त्यांच्या विचारातील विवेकवाद, चिकित्सक दृष्टी, ज्ञाननिष्ठा आणि सामाजिक बांधिलकी आत्मसात करावी.
७ नोव्हेंबर १९०० रोजी साताऱ्यातील शाळेत प्रवेश घेतलेल्या सहा वर्षांच्या भिवा रामजी आंबेडकरांचा प्रवास पुढे एका राष्ट्राच्या वैचारिक आणि घटनात्मक जडणघडणीचा महत्त्वपूर्ण भाग बनला. त्या ऐतिहासिक घटनेला २०१७ मध्ये महाराष्ट्र शासनाने विद्यार्थी दिनाची मान्यता दिली. या दोन घटनांमधील दुवा म्हणजे शिक्षणातून घडणारे परिवर्तन आणि त्याचे महत्त्व समाजापर्यंत पोहोचवण्यासाठी केलेले सातत्यपूर्ण प्रयत्न. या संदर्भात अरुण जावळे यांचे योगदान आवर्जून स्मरणात ठेवले पाहिजे.
एका बालकाच्या शाळा प्रवेशाची घटना इतिहास बनली; त्या इतिहासातून एका पिढीला प्रेरणा मिळाली आणि त्या प्रेरणेला राज्यव्यापी मान्यता मिळवून देण्यासाठी एका पत्रकाराने आपले प्रयत्न पणाला लावले. हा ७ नोव्हेंबरचा प्रेरणादायी प्रवास आहे.
आज विद्यार्थी दिनाच्या निमित्ताने डॉ. बाबासाहेब आंबेडकर यांच्या ज्ञानसाधनेला विनम्र अभिवादन करूया. शिक्षणाच्या माध्यमातून समताधिष्ठित, विवेकनिष्ठ आणि बंधुत्वावर आधारित समाज निर्माण करण्याचा संकल्प करूया. तसेच या ऐतिहासिक दिवसाला राज्यव्यापी ओळख मिळवून देण्यासाठी सातत्याने प्रयत्न करणारे साताऱ्याचे ज्येष्ठ पत्रकार अरुण जावळे यांच्या सामाजिक बांधिलकीला आणि जिद्दीला कृतज्ञतापूर्वक सलाम करूया.
७ नोव्हेंबर हा केवळ डॉ. बाबासाहेब आंबेडकर यांच्या शाळा प्रवेशाचा दिवस नाही; तो शिक्षणाच्या सार्वत्रिक अधिकाराचा, ज्ञानाच्या सामर्थ्याचा, सामाजिक समतेचा आणि परिवर्तनशील समाजनिर्मितीचा संकल्पदिन आहे.
शिका, संघटित व्हा आणि संघर्ष करा!
नमो बुद्धाय! जय भीम!
आयु. सोमीनाथ पोपट घोरपडे
भारतीय बौध्द महासभा, सातारा जिल्हा (पुर्व)
मोबाईल नं 9284658690
ईमेल : bhimai05@gmail.com
डीसीसी बँकेच्या निकालावरून फलटणमध्ये भाजप-शिवसेनेत आरोप-प्रत्यारोपांची लढाई!
‘३० ते ३५ मते फोडल्याचा भाजपचा दावा निराधार’; ठरावांच्या आकडेवारीचा दाखला देत शिवसेनेचे प्रत्युत्तर, राजे गटाच्या राजकीय कमबॅकचा दावा
फलटण प्रतिनिधी : सातारा जिल्हा मध्यवर्ती सहकारी बँकेच्या निवडणुकीतील निकालानंतर फलटण तालुक्यातील राजकीय वातावरण पुन्हा एकदा चांगलेच तापले आहे. फलटण तालुका सोसायटी मतदारसंघातून श्रीमंत संजीवराजे नाईक निंबाळकर यांनी ७१ मते मिळवत नगराध्यक्ष समशेरसिंह नाईक निंबाळकर यांचा ११ मतांनी पराभव केला. या निकालानंतर भाजपकडून विरोधकांची ३० ते ३५ मते आपल्या बाजूने वळवण्यात यश आल्याचा दावा करण्यात आल्याची चर्चा सुरू झाली. मात्र, हा दावा वस्तुस्थितीला धरून नसल्याचे सांगत शिवसेनेने प्रसिद्धीपत्रकाद्वारे भाजपच्या दाव्याला जोरदार प्रत्युत्तर दिले आहे.
डीसीसी बँकेच्या निवडणुकीतील मतांच्या आकडेवारीवरून सुरू झालेला हा वाद आता फलटण तालुक्यातील राजकीय वर्चस्वाच्या संघर्षाचे रूप घेताना दिसत आहे. शिवसेनेने केवळ मतांच्या गणितावर स्पष्टीकरण न देता विधानसभा, नगरपरिषद, जिल्हा परिषद, पंचायत समिती तसेच श्रीराम सहकारी साखर कारखान्याच्या मुद्द्यांचा संदर्भ देत राजे गटाची तालुक्यातील वाढती ताकद अधोरेखित करण्याचा प्रयत्न केला आहे.
८२ ठरावांचा दाखला; मतफुटीचा दावा फेटाळला
शिवसेनेने प्रसिद्धीपत्रकात दिलेल्या माहितीनुसार, फलटण तालुका सोसायटी मतदारसंघात शिवसेनेचे मूळचे ८२ ठराव होते. हे ठराव शिवसेनेच्या माध्यमातून करण्यात आले होते. दुसरीकडे भाजप, राष्ट्रीय समाज पक्ष, काँग्रेस, राष्ट्रवादी काँग्रेस आणि अन्य छोट्या-मोठ्या गटांचे मिळून ४९ ठराव होते. या आकडेवारीच्या आधारे शिवसेनेची ३० ते ३५ मते फुटल्याचा भाजपचा दावा चुकीचा असल्याचे शिवसेनेने म्हटले आहे.
अपेक्षित मतांपैकी काही मते कमी पडली असली, तरी मोठ्या प्रमाणावर मतांची फूट पडल्याचे चित्र निर्माण करणे योग्य नसल्याचेही पत्रकात स्पष्ट करण्यात आले आहे. त्यामुळे डीसीसी बँकेच्या निवडणुकीतील पराभव-यशापेक्षा मतांच्या आकडेवारीवरून दोन्ही पक्षांमध्ये राजकीय श्रेयवाद सुरू झाल्याचे दिसत आहे.
मतदारांवर दबाव आणल्याचा शिवसेनेचा गंभीर आरोप
निवडणूक प्रक्रियेदरम्यान काही मतदारांवर दबाव आणण्यात आल्याचा गंभीर आरोप शिवसेनेने केला आहे. काही मतदारांवर गुन्हे दाखल करण्यात आले, तर शिवसेनेच्या चार मतदारांविरोधात त्यांच्या नातेवाईकांकडून अपहरणाच्या तक्रारी दाखल करण्यात आल्याचे प्रसिद्धीपत्रकात नमूद करण्यात आले आहे.
मात्र, संबंधित मतदार दबावाला बळी पडले नसल्याचा दावाही शिवसेनेने केला आहे. सत्तेचा गैरवापर करून काही मतदारांना प्रभावित करण्याचा प्रयत्न झाल्याचा आरोप करत विरोधकांनी निवडणुकीतील संपूर्ण परिस्थिती लक्षात घ्यावी, असे आवाहन करण्यात आले आहे. या आरोपांबाबत भाजपची अधिकृत भूमिका समोर येणे महत्त्वाचे ठरणार आहे.
जिल्हा परिषद-पंचायत समितीच्या निकालांचा आधार
फलटण तालुक्यात विधानसभा आणि नगरपरिषद निवडणुकांनंतर राजे गटाने पुन्हा राजकीय ताकद निर्माण केल्याचा दावा शिवसेनेने केला आहे. जिल्हा परिषद निवडणुकीत आठपैकी पाच जागांवर शिवसेनेचे सदस्य निवडून आल्याचे, तर पंचायत समितीच्या १६ पैकी आठ जागांवर शिवसेनेच्या उमेदवारांनी विजय मिळवल्याचे प्रसिद्धीपत्रकात नमूद करण्यात आले आहे.
या निवडणुकांनंतर जिल्हा परिषद आणि पंचायत समितीमध्ये सत्तास्थापनेच्या प्रक्रियेत सत्तेचा गैरवापर झाल्याचाही आरोप शिवसेनेने केला आहे. भाजपचे काही नेते अधिकाऱ्यांच्या माध्यमातून तालुक्यात चुकीच्या पद्धतीने कारभार करत असल्याचा आरोप करत जनतेचे या सर्व घडामोडींवर लक्ष असल्याचेही पत्रकात म्हटले आहे.
श्रीराम कारखान्याच्या मुद्द्यावरूनही विरोधकांवर निशाणा
श्रीराम सहकारी साखर कारखाना बंद पडावा यासाठी विरोधकांनी वरिष्ठ पातळीवर प्रयत्न केल्याचा तसेच कारखान्याच्या कामकाजात अडथळे निर्माण केल्याचा आरोप शिवसेनेने केला आहे.
या अडचणींवर मात करत विधान परिषदेचे माजी सभापती श्रीमंत रामराजे नाईक निंबाळकर, माजी आमदार दिपकराव चव्हाण, सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर आणि फलटण कृषी उत्पन्न बाजार समितीचे सभापती श्रीमंत रघुनाथराजे नाईक निंबाळकर यांच्या प्रयत्नांतून कारखान्याचा गळीत हंगाम सुरू करण्यात यश आल्याचे पत्रकात म्हटले आहे.
शेतकऱ्यांनी कोट्यवधी रुपयांचे शेअर्स खरेदी करून कारखान्यावरील आणि राजे गटावरील विश्वास व्यक्त केल्याचा दावाही शिवसेनेने केला आहे.
१७ हजारांच्या आघाडीचा उल्लेख; राजकीय समीकरणे बदलल्याचा दावा
विधानसभा निवडणुकीत राजे गटाला १७ हजार मतांची आघाडी मिळाल्याचा संदर्भ देत शिवसेनेने आगामी राजकीय समीकरणांबाबत आपली भूमिका मांडली आहे. त्यानंतर झालेल्या जिल्हा परिषद, पंचायत समिती आणि नगरपरिषद निवडणुकांतील मतांची एकत्रित आकडेवारी विचारात घेतल्यास भाजपपेक्षा शिवसेनेला अधिक मते मिळाल्याचा दावा प्रसिद्धीपत्रकातून करण्यात आला आहे.
या सर्व निवडणुकांचे निकाल आणि डीसीसी बँकेतील विजय हा राजे गटाच्या वाढत्या राजकीय ताकदीचा पुरावा असल्याचे शिवसेनेचे म्हणणे आहे.
एकनाथ शिंदे यांच्या नेतृत्वाचा उल्लेख; दोन संचालक निवडून आल्याने कार्यकर्त्यांचा उत्साह
सातारा जिल्हा मध्यवर्ती सहकारी बँकेच्या निवडणुकीत राज्याचे उपमुख्यमंत्री एकनाथ शिंदे, पालकमंत्री शंभूराज देसाई आणि श्रीमंत रामराजे नाईक निंबाळकर यांच्या नेतृत्वाखाली श्रीमंत संजीवराजे नाईक निंबाळकर आणि माजी आमदार दिपकराव चव्हाण यांच्या रूपाने दोन संचालक निवडून आल्याने राजे गटाच्या कार्यकर्त्यांचे मनोबल वाढल्याचे शिवसेनेने म्हटले आहे.
जिल्हा परिषद आणि पंचायत समितीच्या निवडणुकांनंतर डीसीसी बँकेतील यशामुळे राजे गटाचा आत्मविश्वास अधिक बळावला असून आगामी राजकीय वाटचालीसाठी हा विजय महत्त्वाचा ठरणार असल्याचे संकेतही पत्रकातून देण्यात आले आहेत.
फलटणच्या राजकारणात नव्या संघर्षाची चाहूल!
एकीकडे भाजपकडून विरोधकांची मते आपल्या बाजूने वळविल्याचा दावा केला जात असल्याची चर्चा, तर दुसरीकडे शिवसेनेकडून ८२ ठरावांची आकडेवारी, स्थानिक स्वराज्य संस्थांमधील निवडणूक निकाल आणि श्रीराम कारखान्याच्या यशाचा दाखला देत जोरदार प्रत्युत्तर दिले जात आहे.
डीसीसी बँकेच्या निवडणुकीतील ७१ विरुद्ध ६० या निकालाने केवळ एका संचालकपदाचा फैसला केला नसून फलटण तालुक्यातील राजकीय वर्चस्वाच्या लढाईला नवी दिशा दिली आहे. भाजप आणि शिवसेना यांच्यातील आरोप-प्रत्यारोपांमुळे आगामी काळात तालुक्यातील राजकीय वातावरण आणखी तापण्याची चिन्हे आहेत.
एकंदरीत, डीसीसी बँकेतील विजयाचे राजकीय भांडवल करण्यासाठी शिवसेनेने राजे गटाच्या पूर्वीच्या निवडणूक यशाचा आधार घेत भाजपच्या मतफुटीच्या दाव्याला आव्हान दिले आहे. आता या आरोपांना भाजपकडून काय प्रत्युत्तर दिले जाते आणि फलटणच्या राजकारणात पुढील काळात कोणाची सरशी होते, याकडे राजकीय वर्तुळाचे लक्ष लागले आहे.
खासदार रणजितसिंह नाईक निंबाळकर, आमदार सचिन पाटील आणि नगराध्यक्ष समशेरसिंह नाईक निंबाळकर यांचा पुढाकार; कर्मचाऱ्यांच्या कष्टांचा सन्मान करत जपला माणुसकीचा दिवाळी स्नेह
फलटण नगरपरिषदेच्या कर्मचाऱ्यांची दिवाळी गोड; फराळासह महिला कर्मचाऱ्यांना साडीची अनोखी भेट!
फलटण प्रतिनिधी : दिवाळीचा आनंद केवळ घराघरांत दिवे लावण्यात किंवा फराळ वाटण्यात नसतो, तर आपल्या सोबत काम करणाऱ्या माणसांच्या चेहऱ्यावर आनंद फुलविण्यातही असतो. याच भावनेचा प्रत्यय फलटण नगरपरिषदेत पाहायला मिळाला. नगरपरिषदेतील कर्मचाऱ्यांची दिवाळी अधिक आनंददायी व्हावी आणि त्यांच्या योगदानाप्रती कृतज्ञता व्यक्त व्हावी, या उद्देशाने खासदार रणजितसिंह नाईक निंबाळकर, आमदार सचिन पाटील आणि नगराध्यक्ष समशेरसिंह नाईक निंबाळकर यांच्या पुढाकारातून विशेष दिवाळी स्नेहभेट उपक्रम राबविण्यात आला.
या उपक्रमांतर्गत नगरपरिषदेच्या सर्व कर्मचाऱ्यांना दिवाळी फराळाचे वाटप करण्यात आले, तर महिला कर्मचाऱ्यांना फराळासोबत साडी भेट देऊन त्यांचा विशेष सन्मान करण्यात आला. या भेटवस्तूंचे वितरण मनिषा समशेरसिंह नाईक निंबाळकर आणि जिजामाला रणजितसिंह नाईक निंबाळकर यांच्या हस्ते करण्यात आले. खासदार रणजितसिंह नाईक निंबाळकर, आमदार सचिन पाटील आणि नगराध्यक्ष समशेरसिंह नाईक निंबाळकर यांच्या सहकार्याने व स्वखर्चातून हा उपक्रम आयोजित करण्यात आला होता.
शहराच्या सेवेत झटणाऱ्या हातांना कृतज्ञतेची भेट!
शहर स्वच्छ, सुंदर आणि आरोग्यदायी ठेवण्यापासून नागरिकांना पाणीपुरवठा करणे, रस्ते व सार्वजनिक ठिकाणांची देखभाल, पथदिव्यांची व्यवस्था, स्वच्छता आणि विविध नागरी सुविधा सुरळीत ठेवण्यापर्यंत नगरपरिषदेचे कर्मचारी महत्त्वाची भूमिका बजावत असतात. अनेकदा सण-उत्सवांच्या काळातही नागरिकांच्या सुविधांसाठी त्यांना कर्तव्य बजावावे लागते.
शहराच्या दैनंदिन व्यवस्थेचा गाडा सुरळीत चालविण्यामध्ये या कर्मचाऱ्यांचे योगदान मोलाचे आहे. त्यांच्या कामाची दखल घेऊन दिवाळीसारख्या आनंदाच्या सणात त्यांच्याशी आपुलकीचे नाते अधिक दृढ करण्याचा प्रयत्न या उपक्रमातून करण्यात आला. कर्मचाऱ्यांच्या मेहनतीचा सन्मान करणे आणि त्यांच्या आनंदात सहभागी होणे, हीच या उपक्रमामागील भावना असल्याचे मनिषा समशेरसिंह नाईक निंबाळकर यांनी सांगितले.
महिला कर्मचाऱ्यांना साडी भेट; कार्याचा गौरव!
नगरपरिषदेच्या विविध विभागांमध्ये कार्यरत असलेल्या महिला कर्मचाऱ्यांनाही या उपक्रमात विशेष महत्त्व देण्यात आले. दैनंदिन कौटुंबिक जबाबदाऱ्या सांभाळतानाच कार्यालयीन आणि नागरी सेवांच्या कामात योगदान देणाऱ्या महिला कर्मचाऱ्यांना साडी व दिवाळी फराळ भेट देण्यात आला.
सणाच्या निमित्ताने दिलेली साडी ही केवळ भेटवस्तू नसून महिला कर्मचाऱ्यांप्रती व्यक्त केलेला आदर, सन्मान आणि जिव्हाळ्याचे प्रतीक ठरली. आपल्या कामाची दखल घेतली जात आहे, आपल्यालाही या परिवाराचा महत्त्वाचा भाग मानले जात आहे, ही भावना कर्मचाऱ्यांसाठी आनंददायी असल्याचे जिजामाला रणजितसिंह नाईक निंबाळकर यांनी व्यक्त केले.
भेटवस्तूंपेक्षा आपुलकीचा भाव ठरला महत्त्वाचा!
संस्थेच्या यशामध्ये तेथील प्रत्येक कर्मचाऱ्याचा वाटा महत्त्वाचा असतो. पद, जबाबदारी अथवा कामाचे स्वरूप वेगवेगळे असले, तरी प्रत्येकाच्या योगदानातूनच संस्थेची कार्यक्षमता आणि विश्वासार्हता निर्माण होत असते. त्यामुळे कर्मचाऱ्यांच्या कष्टांची जाणीव ठेवून त्यांना सन्मानाची वागणूक देणे, ही प्रत्येक संस्थेची सामाजिक जबाबदारी आहे.
फलटण नगरपरिषदेतील या दिवाळी स्नेहभेट उपक्रमाने कर्मचाऱ्यांच्या आनंदात भर घालण्याबरोबरच अधिकारी, लोकप्रतिनिधी आणि कर्मचारी यांच्यातील आपुलकीचे नाते अधिक दृढ करण्याचा संदेश दिला. दिवाळीचा खरा प्रकाश हा केवळ रोषणाईत नसून माणसांच्या चेहऱ्यावर उमटणाऱ्या समाधानात असतो, याची जाणीव करून देणारा हा उपक्रम ठरला.
कर्मचाऱ्यांच्या कष्टांचा सन्मान, महिला कर्मचाऱ्यांप्रती आदर आणि दिवाळीच्या निमित्ताने जपलेली माणुसकीची भावना यामुळे फलटण नगरपरिषदेतील हा स्नेहभेट उपक्रम विशेष चर्चेचा ठरला.
मुधोजी हायस्कूलच्या मुलींचा हॉकीमध्ये सलग पाचव्यांदा विजयाचा पंच!
कोल्हापूर विभागीय स्पर्धेत निर्विवाद वर्चस्व; बुलढाणा येथे होणाऱ्या राज्यस्तरीय हॉकी स्पर्धेसाठी संघ पात्र
फलटण प्रतिनिधी : क्रीडा क्षेत्रात फलटणच्या शिरपेचात मानाचा आणखी एक तुरा रोवणारी अभिमानास्पद कामगिरी मुधोजी हायस्कूल व ज्युनिअर कॉलेजच्या मुलींच्या हॉकी संघाने केली आहे. कोल्हापूर येथे सुरू असलेल्या कोल्हापूर विभागीय हॉकी स्पर्धेत मुधोजी हायस्कूलच्या मुलींच्या संघाने सलग पाचव्या वर्षी विजेतेपदावर आपले नाव कोरले. या दैदीप्यमान विजयामुळे बुलढाणा येथे होणाऱ्या राज्यस्तरीय हॉकी स्पर्धेसाठी या संघाने दिमाखात पात्रता मिळवली आहे.
सलग पाच वर्षे विभागीय स्पर्धेत विजय मिळवणे ही केवळ एक क्रीडा कामगिरी नसून संघातील खेळाडूंची जिद्द, चिकाटी, मेहनत, शिस्त आणि सातत्यपूर्ण सराव यांचे प्रतीक आहे. मैदानावरील उत्कृष्ट समन्वय, सांघिक भावना, आत्मविश्वास आणि विजयासाठीची प्रबळ इच्छाशक्ती यांच्या जोरावर मुधोजीच्या मुलींनी पुन्हा एकदा आपले वर्चस्व सिद्ध केले आहे.
या यशामुळे फलटणच्या शैक्षणिक व क्रीडा क्षेत्रात आनंदाचे आणि अभिमानाचे वातावरण निर्माण झाले आहे. ग्रामीण भागातील विद्यार्थिनींनाही योग्य मार्गदर्शन, प्रशिक्षण आणि संधी मिळाल्यास त्या राज्य व राष्ट्रीय स्तरावर आपली गुणवत्ता सिद्ध करू शकतात, हे या संघाने आपल्या कामगिरीतून दाखवून दिले आहे.
मान्यवरांकडून खेळाडूंचे अभिनंदन
या उल्लेखनीय विजयानंतर मुधोजी हायस्कूल व ज्युनिअर कॉलेजच्या सर्व खेळाडूंचे, प्रशिक्षकांचे, क्रीडा शिक्षकांचे तसेच संघाच्या यशासाठी प्रत्यक्ष आणि अप्रत्यक्ष योगदान देणाऱ्या सर्वांचे विधान परिषदेचे माजी सभापती तथा विद्यमान आमदार श्रीमंत रामराजे नाईक निंबाळकर, कृषी उत्पन्न बाजार समितीचे सभापती रघुनाथराजे नाईक निंबाळकर, सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर आणि फलटण-कोरेगाव विधानसभा मतदारसंघाचे माजी आमदार दीपक चव्हाण यांनी कौतुक करून मनःपूर्वक अभिनंदन केले आहे.
आता राज्यस्तरावर विजयाची मोहीम!
विभागीय स्तरावर सलग पाचव्या वर्षी मिळविलेल्या या यशानंतर मुधोजीच्या मुलींचे पुढील लक्ष्य बुलढाणा येथे होणारी राज्यस्तरीय हॉकी स्पर्धा हे आहे. या स्पर्धेतही संघाने आपली सर्वोत्तम कामगिरी करावी आणि राज्यात फलटणचे नाव उज्ज्वल करावे, अशा अपेक्षा व्यक्त होत आहेत.
फलटणच्या क्रीडा क्षेत्रासाठी अभिमानाचा क्षण!
मुधोजी हायस्कूल व ज्युनिअर कॉलेजच्या मुलींच्या हॉकी संघातील सर्व खेळाडू, प्रशिक्षक, मार्गदर्शक, क्रीडा शिक्षक आणि या यशासाठी योगदान देणाऱ्या सर्वांचे सातारा जिल्ह्यासह महाराष्ट्रातील हॉकीप्रेमींकडून अभिनंदन होत आहे.
सलग पाच वर्षांचा विजय, जिद्दीची परंपरा आणि आता राज्यस्तरावर विजयाचे नवे स्वप्न!
मुधोजीच्या या चॅम्पियन मुलींना राज्यस्तरीय आणि आगामी राष्ट्रीय स्पर्धेसाठी मनःपूर्वक शुभेच्छा!
अभिनंदन चॅम्पियन्स! फलटणचा अभिमान, मुधोजीच्या मुलींचा सन्मान!
फलटण न्यायालय परिसरात लाचलुचपत विभागाचा सापळा! चार हजारांच्या लाचप्रकरणी पॅनल विधीज्ञासह खासगी वकील जाळ्यात
न्यायालयीन जामीन प्रक्रियेत मदत करण्याच्या नावाखाली लाचेची मागणी; एसीबीची कारवाई, दोघांना ताब्यात घेतल्याने फलटणमध्ये खळबळ
फलटण प्रतिनिधी : न्याय मिळवण्यासाठी न्यायालयाची पायरी चढणाऱ्या सर्वसामान्य नागरिकांची आर्थिक परिस्थिती लक्षात घेऊन त्यांना मोफत कायदेशीर मदत मिळावी, यासाठी विधी सेवा समिती कार्यरत असते. मात्र, याच व्यवस्थेतील पॅनल विधीज्ञावर जामीनाच्या कामात मदत करण्यासाठी लाचेची मागणी केल्याचा आरोप झाल्याने फलटणच्या न्यायालयीन वर्तुळात मोठी खळबळ उडाली आहे. चार हजार रुपयांच्या लाचेच्या प्रकरणात लाचलुचपत प्रतिबंधक विभागाने (एसीबी) पॅनल विधीज्ञ नितीन विलासराव भोईटे आणि खासगी वकील अजीम सलीम मेटकरी यांना रंगेहाथ पकडले.
मिळालेल्या माहितीनुसार, तक्रारदाराविरुद्ध लोणंद पोलीस ठाण्यात गुन्हा दाखल असून, या प्रकरणाचे आरोपपत्र फलटण न्यायालयात दाखल झाले आहे. तक्रारदाराची आर्थिक परिस्थिती हलाखीची असल्याने फलटण तालुका विधी सेवा समितीच्या माध्यमातून नितीन विलासराव भोईटे यांची पॅनल विधीज्ञ म्हणून नियुक्ती करण्यात आली होती.
दरम्यान, संबंधित प्रकरणात न्यायालयीन जामीन मिळविण्याच्या कामात मदत करण्यासाठी न्यायालयातील क्लार्कच्या नावाने चार हजार रुपयांची मागणी करण्यात आल्याचा आरोप आहे. या मागणीबाबत तक्रारदाराने २ नोव्हेंबर २०२६ रोजी सातारा लाचलुचपत प्रतिबंधक विभागाकडे धाव घेत तक्रार नोंदवली.
तक्रारीची पडताळणी केल्यानंतर लाच मागितल्याचे निष्पन्न झाल्याने एसीबीने सापळा रचण्याचे नियोजन केले. त्यानुसार ५ नोव्हेंबर २०२६ रोजी फलटण येथील जेएमएफसी न्यायालय परिसरात सापळा लावण्यात आला.
या कारवाईदरम्यान पॅनल विधीज्ञ नितीन विलासराव भोईटे (वय ४५, रा. लक्ष्मीनगर, फलटण) यांनी लाचेची रक्कम न्यायालयातील खासगी वकील अजीम सलीम मेटकरी (वय ३४, रा. गोळीबार मैदान, फलटण) यांच्याकडे देण्यास सांगितल्याचे तपासात समोर आले. त्यानुसार पंचांसमक्ष चार हजार रुपयांची रक्कम स्वीकारताना अजीम मेटकरी यांना एसीबीच्या पथकाने रंगेहाथ पकडले. याप्रकरणी नितीन भोईटे यांनाही ताब्यात घेण्यात आले.
ही कारवाई सातारा लाचलुचपत प्रतिबंधक विभागाच्या पोलीस उपअधीक्षक शैला कोरडे यांच्या मार्गदर्शनाखाली करण्यात आली. कारवाईनंतर फलटण शहर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू होती.
भ्रष्टाचाराविरोधात तक्रार करण्याचे आवाहन
दरम्यान, कोणत्याही लोकसेवकाने शासकीय कामासाठी लाचेची मागणी केल्यास नागरिकांनी न घाबरता लाचलुचपत प्रतिबंधक विभागाशी संपर्क साधावा, असे आवाहन विभागाने केले आहे. नागरिकांनी WhatsApp क्रमांक ७०५७५७१०६४, दूरध्वनी क्रमांक ०२१६२-२३८१३९ किंवा टोल फ्री क्रमांक १०६४ वर तक्रार नोंदवावी.
या कारवाईमुळे न्यायालयीन कामकाजाच्या नावाखाली होणाऱ्या कथित गैरप्रकारांवर पुन्हा एकदा प्रश्नचिन्ह निर्माण झाले असून, पुढील पोलीस तपासाकडे फलटणकरांचे लक्ष लागले आहे.
वाठार निंबाळकरमध्ये चोरट्यांचा धुमाकूळ! विहिरीवरील विद्युत मोटारींच्या केबल चोरीने शेतकरी त्रस्त
दुष्काळाच्या अस्मानी संकटात चोरट्यांचे सुलतानी संकट; शेतकऱ्यांचा संतप्त सवाल – आमच्या शेतीचे आणि पाण्याच्या साधनांचे रक्षण करणार कोण?
वाठार निंबाळकर, ता. फलटण | प्रतिनिधी फलटण तालुक्यातील वाठार निंबाळकर परिसरात विहिरीवरील विद्युत मोटारींच्या वायर आणि केबल चोरीच्या घटनांमुळे शेतकरी हवालदिल झाले आहेत. आधीच पाणीटंचाई आणि दुष्काळी परिस्थितीमुळे अडचणीत सापडलेल्या शेतकऱ्यांना आता चोरट्यांच्या उपद्रवाचा सामना करावा लागत आहे. विहिरीवरील मोटारींच्या विद्युत तारा चोरून नेण्याच्या प्रकारांमुळे शेतकऱ्यांचे आर्थिक नुकसान होत असून शेतीला पाणी देण्याचे कामही अडचणीत येत आहे.
शेतीसाठी विहिरीतील पाणी हा अनेक शेतकऱ्यांचा महत्त्वाचा आधार आहे. पिकांना पाणी देण्यासाठी शेतकरी विद्युत मोटारी, केबल आणि इतर साहित्यावर मोठा खर्च करतात. मात्र, रात्रीच्या वेळी चोरटे शेतातील विहिरींवरील विद्युत वायर आणि केबल चोरून नेत असल्याने शेतकऱ्यांना पुन्हा नव्याने खर्च करावा लागत आहे. आधीच आर्थिक संकटात असलेल्या शेतकऱ्यांच्या अडचणी त्यामुळे अधिकच वाढल्या आहेत.
दुष्काळाचे अस्मानी संकट, चोरट्यांचे सुलतानी संकट!
निसर्गाच्या लहरीपणामुळे पावसाचे अनिश्चित स्वरूप, पाणीटंचाई, शेतीचा वाढता खर्च आणि पिकांच्या उत्पादनाबाबतची अनिश्चितता अशा अनेक संकटांचा सामना शेतकरी करत आहेत. त्यातच विद्युत मोटारींच्या केबल चोरीच्या घटना घडत असल्याने शेतकऱ्यांना दुहेरी संकटाचा सामना करावा लागत आहे.
‘चोरांची दिवाळी, शेतकऱ्यांचा शिमगा’ अशी संतप्त भावना परिसरातील शेतकऱ्यांमधून व्यक्त होत आहे. शेतकऱ्यांनी कष्टाने उभ्या केलेल्या शेतीचे आणि सिंचन व्यवस्थेचे संरक्षण करणार कोण, असा सवाल उपस्थित केला जात आहे.
पोलिस प्रशासन आणि लोकप्रतिनिधींनी लक्ष घालण्याची मागणी
वाठार निंबाळकर परिसरात सातत्याने होत असलेल्या केबल व विद्युत मोटार चोरीच्या घटनांना आळा घालण्यासाठी पोलिस प्रशासनाने तातडीने लक्ष घालावे, अशी मागणी शेतकरी करत आहेत. रात्रीची गस्त वाढविणे, संशयितांवर लक्ष ठेवणे, चोरीच्या घटनांचा तपास करून चोरट्यांचा शोध घेणे आणि चोरीचे साहित्य खरेदी-विक्री करणाऱ्यांवरही कारवाई करणे आवश्यक आहे.
स्थानिक लोकप्रतिनिधींनीदेखील या गंभीर प्रश्नाची दखल घेऊन शेतकऱ्यांना दिलासा देण्यासाठी पुढाकार घ्यावा, अशी अपेक्षा व्यक्त होत आहे.
शेतकऱ्यांचा प्रशासनाला थेट सवाल आहे – दुष्काळामुळे आधीच शेती संकटात असताना आता विहिरीवरील मोटारींच्या वायरही सुरक्षित राहिलेल्या नाहीत. मग शेतकऱ्यांनी न्याय कोणाकडे मागायचा?
वाठार निंबाळकर परिसरातील या चोरीच्या घटनांना कायमचा आळा बसणार का? पोलिस प्रशासन आणि लोकप्रतिनिधी याची गांभीर्याने दखल घेणार का? याकडे परिसरातील शेतकऱ्यांचे लक्ष लागले आहे.
सोमेश्वर सहकारी साखर कारखान्याच्या चेअरमनपदी राजवर्धन शिंदे; व्हाइस चेअरमनपदी संग्राम सोरटे यांची निवड!
निरा-बारामती सहकार क्षेत्रात महत्त्वाची घडामोड; अजित पवार गटाचे वर्चस्व अधोरेखित, सोमेश्वरनगरमध्ये कार्यकर्त्यांचा जल्लोष
सोमेश्वरनगर (ता. बारामती) | प्रतिनिधी :-पुणे जिल्ह्याच्या सहकार क्षेत्रात महत्त्वाचे स्थान असलेल्या श्री सोमेश्वर सहकारी साखर कारखान्याच्या नेतृत्व निवडीची प्रक्रिया पार पडली असून, कारखान्याच्या चेअरमनपदी राजवर्धन शिवाजीराव शिंदे, तर व्हाइस चेअरमनपदी संग्राम सोरटे यांची निवड करण्यात आली आहे. या निवडीमुळे सोमेश्वर सहकारी साखर कारखान्याच्या सत्ताकारणात राष्ट्रवादी काँग्रेस (अजित पवार गट) यांनी आपले वर्चस्व पुन्हा एकदा अधोरेखित केले आहे.
बारामती, पुरंदर आणि निरा परिसरातील हजारो ऊस उत्पादक शेतकऱ्यांच्या अर्थकारणाशी जोडलेल्या या कारखान्याच्या नेतृत्व निवडीकडे संपूर्ण जिल्ह्याचे लक्ष लागले होते. अखेर चेअरमन आणि व्हाइस चेअरमन पदांवरील निवडी जाहीर झाल्यानंतर समर्थकांमध्ये उत्साहाचे वातावरण निर्माण झाले आहे.
राजवर्धन शिंदे यांच्या खांद्यावर चेअरमनपदाची धुरा
चेअरमनपदी निवड झालेले राजवर्धन शिवाजीराव शिंदे यांनी आपल्या राजकीय आणि सहकार क्षेत्रातील वाटचालीत स्वतंत्र ओळख निर्माण केली आहे. शिवाजीराव शिंदे यांच्या राजकीय वारशाला पुढे नेत त्यांनी संघटनात्मक पातळीवर आपली ताकद दाखवून दिली आहे.
उपमुख्यमंत्री सुनेत्राताई पवार यांच्या नेतृत्वाखाली आणि मार्गदर्शनाखाली झालेली ही निवड राष्ट्रवादी काँग्रेससाठी महत्त्वपूर्ण मानली जात आहे. त्यांच्या नेतृत्वाखाली सोमेश्वर कारखान्याच्या विकासाला नवी दिशा मिळेल, अशी अपेक्षा व्यक्त होत आहे.
व्हाइस चेअरमनपदी संग्राम सोरटे यांची निवड
कारखान्याच्या व्हाइस चेअरमनपदी संग्राम सोरटे यांची निवड झाल्याने कारखान्याच्या आगामी कामकाजात त्यांची भूमिका महत्त्वाची ठरणार आहे. चेअरमन राजवर्धन शिंदे आणि व्हाइस चेअरमन संग्राम सोरटे यांच्या नेतृत्वाखाली कारखान्याचा कारभार अधिक सक्षमपणे पुढे जाईल, अशी अपेक्षा सभासद आणि शेतकरी वर्गातून व्यक्त केली जात आहे.
शेतकरी हित आणि विकासाची मोठी जबाबदारी
सोमेश्वर सहकारी साखर कारखाना हा परिसरातील शेतकरी, कामगार आणि ग्रामीण अर्थव्यवस्थेचा महत्त्वाचा आधार आहे. त्यामुळे नव्या नेतृत्वासमोर अनेक आव्हाने असणार आहेत. ऊस उत्पादक शेतकऱ्यांना योग्य मोबदला, वेळेत ऊसबिले, कारखान्याची आर्थिक स्थिती मजबूत करणे, उत्पादन क्षमता वाढविणे, आधुनिक तंत्रज्ञानाचा वापर आणि कामगारांचे प्रश्न सोडविणे या विषयांना प्राधान्य द्यावे लागणार आहे.
नव्या नेतृत्वाकडून कारखान्याच्या कामकाजात पारदर्शकता, आर्थिक शिस्त आणि शेतकरीकेंद्रित निर्णयांची अपेक्षा व्यक्त होत आहे.
आगामी राजकीय समीकरणांच्या दृष्टीनेही निवड महत्त्वाची
या निवडीकडे आगामी जिल्हा परिषद आणि पंचायत समिती निवडणुकांच्या पार्श्वभूमीवरही पाहिले जात आहे. बारामती-पुरंदर परिसरातील सहकार क्षेत्रावर असलेला प्रभाव ग्रामीण राजकारणात महत्त्वाची भूमिका बजावत असतो. त्यामुळे सोमेश्वर कारखान्याच्या नेतृत्व निवडीमुळे राष्ट्रवादी काँग्रेस (अजित पवार गट) यांच्या संघटनात्मक ताकदीला बळ मिळाल्याचे राजकीय जाणकारांचे मत आहे.
सोमेश्वरनगरमध्ये फटाक्यांची आतषबाजी; कार्यकर्त्यांचा जल्लोष
राजवर्धन शिंदे यांच्या चेअरमनपदी आणि संग्राम सोरटे यांच्या व्हाइस चेअरमनपदी निवडीची घोषणा होताच सोमेश्वरनगर परिसरात कार्यकर्त्यांनी आनंदोत्सव साजरा केला. ठिकठिकाणी फटाक्यांची आतषबाजी, ढोल-ताशांचा गजर आणि घोषणाबाजीने परिसर दुमदुमून गेला. समर्थकांनी नवनिर्वाचित पदाधिकाऱ्यांचे अभिनंदन करून पुढील वाटचालीस शुभेच्छा दिल्या.
एकंदरीत, राजवर्धन शिंदे आणि संग्राम सोरटे यांच्या निवडीमुळे सोमेश्वर सहकारी साखर कारखान्याच्या नेतृत्वाला नवी दिशा मिळाली आहे. आता नव्या पदाधिकाऱ्यांच्या नेतृत्वाखाली कारखाना शेतकरी हित, आर्थिक प्रगती आणि सहकार क्षेत्रातील विश्वासार्हता अधिक मजबूत करण्यासाठी कोणती पावले उचलतो, याकडे सर्वांचे लक्ष लागले आहे.
नवनिर्वाचित चेअरमन राजवर्धन शिवाजीराव शिंदे आणि व्हाइस चेअरमन संग्राम सोरटे यांचे हार्दिक अभिनंदन व पुढील वाटचालीस मनःपूर्वक शुभेच्छा!
फलटणकरांनो लक्ष द्या! शनिवारी शहराचा पाणीपुरवठा बंद राहणार; मुख्य जलवाहिनीच्या दुरुस्तीचे काम हाती
मेन रायझिंग मेन वितरण नलिकेतील गळती काढण्यासाठी नगर परिषदेचा निर्णय; नागरिकांनी पाण्याचा पुरेसा साठा करून सहकार्य करण्याचे आवाहन
📍 फलटण | साहस Times प्रतिनिधी :-फलटण शहरातील नागरिकांसाठी महत्त्वाची सूचना असून, शनिवार, दिनांक ७ नोव्हेंबर २०२६ रोजी शहराचा पाणीपुरवठा बंद राहणार आहे. फलटण नगर परिषदेच्या पाणीपुरवठा विभागामार्फत शहरातील मुख्य रायझिंग मेन वितरण जलवाहिनीवरील गळती काढण्याचे काम हाती घेण्यात येणार आहे. या दुरुस्तीच्या कामामुळे शनिवारी होणारा नियमित पाणीपुरवठा पूर्णपणे बंद ठेवण्यात येणार असल्याची माहिती नगर परिषदेच्या वतीने जाहीर आवाहनाद्वारे देण्यात आली आहे.
शहरातील पाणीपुरवठा सुरळीत आणि नियमित राहण्यासाठी मुख्य वितरण जलवाहिनीवरील गळती दुरुस्त करणे आवश्यक आहे. त्यानुसार नगर परिषदेने शनिवार, ७ नोव्हेंबर रोजी दुरुस्तीचे काम करण्याचे नियोजन केले आहे. या कामादरम्यान नागरिकांना पाणीपुरवठा करता येणार नसल्याने शहरातील सर्व नागरिकांनी याची गांभीर्याने नोंद घ्यावी, असे आवाहन करण्यात आले आहे.
या पार्श्वभूमीवर नागरिकांनी शनिवारच्या पाणीपुरवठ्याच्या दृष्टीने शुक्रवारपासूनच आवश्यक तेवढा पाणीसाठा करून ठेवावा. पिण्याचे पाणी, स्वयंपाक तसेच दैनंदिन वापरासाठी पाण्याचे योग्य नियोजन करावे. पाण्याचा अपव्यय टाळून उपलब्ध पाण्याचा काटकसरीने वापर करावा, असेही आवाहन करण्यात येत आहे.
मुख्य जलवाहिनीच्या दुरुस्तीचे काम पूर्ण झाल्यानंतर पाणीपुरवठा पूर्ववत करण्याबाबत नगर परिषदेकडून कार्यवाही करण्यात येईल. नागरिकांची गैरसोय होऊ नये आणि पाणीपुरवठा व्यवस्था अधिक सक्षम राहावी, यासाठी हे काम आवश्यक असल्याने सर्व फलटणकरांनी नगर परिषद प्रशासनास सहकार्य करावे, असे आवाहन फलटण नगर परिषदेच्या मुख्याधिकाऱ्यांनी केले आहे.
— मुख्याधिकारी, फलटण नगर परिषद, फलटण
विद्यार्थ्यांच्या कल्पकतेला मिळाले आकाश! परतवडीच्या चिमुकल्यांनी साकारले आकर्षक आकाशकंदील अन् सुंदर ऐतिहासिक किल्ला!
आकाशकंदील निर्मितीसह किल्ला उभारणीतून विद्यार्थ्यांच्या कलागुणांचा अविष्कार; दिवाळी आणि शिवकालीन इतिहासाची सांगड घालत कृतीतून शिक्षणाचा अनोखा उपक्रम
परतवडी : विद्यार्थ्यांच्या अंगभूत कलागुणांना वाव मिळावा, त्यांच्यामध्ये सर्जनशीलता, कल्पकता आणि हस्तकौशल्य विकसित व्हावे, तसेच भारतीय सण-उत्सव आणि ऐतिहासिक परंपरांची ओळख व्हावी, या उद्देशाने जिल्हा परिषद प्राथमिक शाळा, परतवडी येथे आकाशकंदील निर्मिती आणि किल्ला तयार करण्याचा उपक्रम उत्साहपूर्ण वातावरणात राबविण्यात आला.
या उपक्रमात शाळेतील विद्यार्थ्यांनी मोठ्या उत्साहाने सहभाग घेतला. रंगीबेरंगी कागद, आकर्षक सजावटीचे साहित्य, चमकदार पट्ट्या आणि विविध कलात्मक वस्तूंचा वापर करून विद्यार्थ्यांनी स्वतःच्या कल्पकतेतून सुंदर आणि आकर्षक आकाशकंदील तयार केले. विविध आकार, मनमोहक रंगसंगती आणि नावीन्यपूर्ण रचनांमधून विद्यार्थ्यांच्या कलात्मक कौशल्याचे दर्शन घडले.
या उपक्रमाचे विशेष आकर्षण म्हणजे विद्यार्थ्यांनी एकत्रितपणे तयार केलेला सुंदर आणि आकर्षक किल्ला! विद्यार्थ्यांनी आपल्या कल्पकतेचा वापर करून किल्ल्याची प्रतिकृती साकारली. किल्ल्याची रचना, सजावट आणि त्यामधील विविध ऐतिहासिक वैशिष्ट्ये यांमधून विद्यार्थ्यांनी आपल्या कलागुणांसोबतच इतिहासाविषयीची आवडही व्यक्त केली. छत्रपती शिवाजी महाराजांच्या गड-किल्ल्यांच्या परंपरेची ओळख करून देणारा हा उपक्रम विद्यार्थ्यांसाठी आनंददायी आणि ज्ञानवर्धक ठरला.
शिक्षकांनी विद्यार्थ्यांना आकाशकंदील तयार करण्याच्या विविध पद्धती समजावून सांगितल्या. तसेच किल्ला निर्मितीसाठी आवश्यक असणारे साहित्य, नियोजन, रचना आणि सजावट याबाबत मार्गदर्शन केले. विद्यार्थ्यांनी एकमेकांच्या सहकार्याने आणि स्वतःच्या कल्पनाशक्तीच्या जोरावर हा उपक्रम यशस्वी केला.
या कार्यशाळेमुळे विद्यार्थ्यांना प्रत्यक्ष कृतीतून शिकण्याची संधी मिळाली. कागदकाम, रंगसंगती, कलात्मकता, अचूकता, नियोजन, संघभावना आणि सहकार्य अशा विविध गुणांचा विकास होण्यास मदत झाली. स्वतःच्या हातांनी तयार केलेले आकाशकंदील आणि सुंदर किल्ला पाहून विद्यार्थ्यांच्या चेहऱ्यावर आनंद आणि समाधान झळकत होते.
या उपक्रमातून दिवाळी सणाचे सांस्कृतिक महत्त्व, पर्यावरणपूरक पद्धतीने सण साजरा करण्याचा संदेश तसेच छत्रपती शिवाजी महाराजांच्या गड-किल्ल्यांविषयी आदर आणि ऐतिहासिक वारशाचे जतन करण्याची प्रेरणा विद्यार्थ्यांना मिळाली.
शालेय अभ्यासक्रमाबरोबरच विद्यार्थ्यांच्या सुप्त कलागुणांना वाव देणारे असे कार्यानुभवाधारित उपक्रम त्यांच्या सर्वांगीण विकासासाठी महत्त्वपूर्ण ठरतात. विद्यार्थ्यांमधील सर्जनशीलता, आत्मविश्वास, स्वावलंबन आणि सांघिक कार्याची भावना विकसित करण्यासाठी अशा उपक्रमांचे आयोजन आवश्यक असल्याचे शिक्षकांनी मत व्यक्त केले.
या उपक्रमाच्या यशस्वी आयोजनाबद्दल शाळेच्या मुख्याध्यापिका स्वाती साळवे मॅडम, उपशिक्षिका रुपाली पवार मॅडम आणि विषय शिक्षक सूर्यकांत सुस्तरफोड सर यांनी विद्यार्थ्यांचे मनःपूर्वक अभिनंदन केले व त्यांच्या कलात्मक प्रयत्नांचे कौतुक केले.
आकाशकंदीलांच्या रंगीबेरंगी प्रकाशासोबतच विद्यार्थ्यांनी साकारलेल्या सुंदर किल्ल्याने परतवडी शाळेच्या परिसरात दिवाळीचा उत्साह आणि ऐतिहासिक वैभवाची अनोखी अनुभूती निर्माण केली!










