भक्त निवास परिसरातील सार्वजनिक विहिरीला संरक्षण; लोखंडी जाळी बसवून स्वच्छता मोहीम पूर्ण
अकलूज | प्रतिनिधी : अकलूज नगर परिषदेच्या प्रभाग क्रमांक २ मधील नागरिकांच्या आरोग्याचा व सुरक्षिततेचा प्रश्न लक्षात घेऊन करण्यात आलेल्या मागणीची दखल घेत अकलूज नगरपरिषदेच्या वतीने भक्त निवासच्या पाठीमागे असलेल्या सार्वजनिक विहिरीवर लोखंडी जाळी बसविण्याचे तसेच परिसरातील स्वच्छतेचे काम पूर्ण करण्यात आले आहे. उपनगराध्यक्ष शिवतेजसिंह मोहिते-पाटील यांच्या मार्गदर्शनाखाली नगरसेविका सौ. प्रियंका लखन गायकवाड व नगरसेवक सचिन रामचंद्र देशमुख यांच्या पाठपुराव्यामुळे ही कामे मार्गी लागली.
सदर विहिरीचे पाणी परिसरातील अनेक नागरिक पिण्यासाठी तसेच दैनंदिन वापरासाठी घेतात. मात्र विहिरीच्या शेजारी असलेल्या झाडांमधून मोठ्या प्रमाणात पाला-पाचोळा विहिरीत पडत होता. याशिवाय काही समाजकंटकांकडून परिसरात कचरा टाकणे, जुने कपडे फेकणे तसेच इतर घाण टाकण्याचे प्रकार घडत असल्याने विहिरीचे पाणी दूषित होण्याचा धोका निर्माण झाला होता. याबाबत नागरिकांनी वारंवार तक्रारी केल्यानंतर नगरपरिषदेकडे निवेदन देण्यात आले होते.
या निवेदनाची दखल घेत अकलूज नगरपरिषदेने तातडीने कार्यवाही करत विहिरीवर लोखंडी जाळी बसविली. तसेच परिसरातील कचरा हटवून स्वच्छता मोहीम राबविण्यात आली. झाडांच्या आवश्यक फांद्यांची छाटणी करून परिसर अधिक सुरक्षित व स्वच्छ करण्यात आला.
या कामामुळे विहिरीचे पाणी दूषित होण्याचा धोका कमी झाला असून परिसरातील नागरिकांना स्वच्छ व सुरक्षित पाणी उपलब्ध होण्यास मदत होणार आहे. तसेच विहिरीमध्ये कचरा टाकण्याचे प्रकारही आळा बसण्यास मदत होणार आहे.
नगरसेविका सौ. प्रियंका लखन गायकवाड यांनी सांगितले की, नागरिकांना स्वच्छ व सुरक्षित वातावरण उपलब्ध करून देणे ही स्थानिक स्वराज्य संस्थेची जबाबदारी आहे. नगरपरिषदेने तातडीने कार्यवाही करून जाळी बसविणे व स्वच्छतेची कामे पूर्ण केल्याबद्दल त्यांनी समाधान व्यक्त केले.
या उपक्रमामुळे प्रभाग क्रमांक २ मधील नागरिकांमध्ये आनंदाचे वातावरण असून नगरपरिषदेच्या या तत्पर कार्यवाहीचे नागरिकांकडून स्वागत करण्यात येत आहे.
