शिवसेनेच्या हिरक महोत्सवी वर्धापन दिन सोहळ्यास फलटणच्या नगरसेवकांची उत्स्फूर्त उपस्थिती
मुंबई | प्रतिनिधी
शिवसेनेच्या हिरक महोत्सवी (६० व्या) वर्धापन दिनानिमित्त मुंबई येथील गोरेगाव परिसरातील नेस्को सेंटर येथे आयोजित करण्यात आलेल्या भव्य सोहळ्यास फलटण येथील विविध क्षेत्रातील मान्यवरांनी उत्स्फूर्त उपस्थिती दर्शविली.
या ऐतिहासिक कार्यक्रमास फलटण नगर परिषदेचे नगरसेवक विकास वसंतराव काकडे (सर), विशाल तेली, किशोर तारळकर, मुधोजी हायस्कूलचे माजी प्राचार्य सुधीर अहिवळे सर तसेच सिकंदर डांगे यांनी उपस्थित राहून शिवसेनेच्या ६० वर्षांच्या राजकीय, सामाजिक आणि जनहितकारी कार्याचा गौरव केला.
या वर्धापन दिन सोहळ्यात राज्यभरातून आलेल्या शिवसैनिकांचा मोठा जनसागर पाहायला मिळाला. पक्षाच्या स्थापनेपासून आजपर्यंतच्या वाटचालीचा आढावा घेण्यात आला. तसेच महाराष्ट्राच्या विकासासाठी आणि जनतेच्या प्रश्नांसाठी शिवसेना कटिबद्ध असल्याचा संदेश यावेळी देण्यात आला.
फलटणमधील मान्यवरांनी या सोहळ्यात सहभाग घेत पक्षाच्या विचारांप्रती आपली निष्ठा व्यक्त केली. कार्यक्रमात विविध सांस्कृतिक सादरीकरणांसह पक्षाच्या इतिहासावर आधारित विशेष कार्यक्रमांचे आयोजन करण्यात आले होते. राज्याच्या कानाकोपऱ्यातून आलेल्या कार्यकर्त्यांमुळे नेस्को सेंटर परिसर शिवसेनामय झाला होता.
शिवसेनेच्या हिरक महोत्सवी वर्धापन दिनानिमित्त आयोजित हा सोहळा उत्साह, जल्लोष आणि पक्षनिष्ठेचे दर्शन घडविणारा ठरला.
