आमदार सचिन कांबळे पाटील यांच्या नावाचा गैरवापर; अज्ञात व्यक्तीविरोधात कारवाईची मागणी
फलटण | प्रतिनिधी :- फलटण–कोरेगाव मतदारसंघाचे आमदार सचिन कांबळे पाटील यांच्या नावाचा गैरवापर करून नागरिकांना फोन करणाऱ्या अज्ञात व्यक्तीविरोधात कठोर कारवाई करण्याची मागणी करण्यात आली आहे. याबाबत फलटण नगरपरिषदेचे नगरसेवक तथा राष्ट्रवादी काँग्रेस (अजितदादा गट) शहराध्यक्ष राहुल अशोक निंबाळकर यांनी फलटण शहर पोलीस ठाण्यात लेखी तक्रार दाखल केली आहे.
तक्रारीनुसार, गेल्या दोन दिवसांपासून एक अज्ञात व्यक्ती स्वतःला “आमदारांचा पुतण्या” असल्याचे भासवत फलटण तालुक्यातील विविध नागरिकांना फोन करत आहे. संबंधित व्यक्ती आमदार सचिन कांबळे पाटील यांच्या नावाचा वापर करून नागरिकांशी संवाद साधत असल्याने त्यांच्या प्रतिमेला धक्का पोहोचविण्याचा प्रयत्न होत असल्याचा आरोप करण्यात आला आहे.
राहुल निंबाळकर यांनी दिलेल्या माहितीनुसार, संबंधित व्यक्तीने अनेक प्रतिष्ठित नागरिक तसेच महिलांनाही फोन करून अर्वाच्य भाषेचा वापर केल्याच्या तक्रारी समोर आल्या आहेत. काही महिलांनी या प्रकाराबाबत नाराजी व्यक्त करत तक्रारी नोंदवल्याचेही सांगण्यात आले आहे. त्यामुळे समाजात संभ्रमाचे वातावरण निर्माण होऊन कायदा व सुव्यवस्थेचा प्रश्न निर्माण होण्याची शक्यता व्यक्त करण्यात आली आहे.
तक्रारीत पुढे नमूद करण्यात आले आहे की, अज्ञात व्यक्तीचे हे कृत्य केवळ नागरिकांना त्रासदायक नसून आमदार सचिन कांबळे पाटील यांची जाणीवपूर्वक बदनामी करण्याचा प्रयत्न आहे. तसेच या प्रकारामागे एखादी व्यक्ती किंवा संघटित गट कार्यरत आहे का, याचीही सखोल चौकशी करण्यात यावी, अशी मागणी करण्यात आली आहे.
याप्रकरणी संबंधित मोबाईल क्रमांक व कॉल रेकॉर्डच्या आधारे तपास करून आरोपीचा शोध घ्यावा आणि दोषींवर कठोर कायदेशीर कारवाई करावी, अशी मागणी राहुल निंबाळकर यांनी पोलिस प्रशासनाकडे केली आहे.
दरम्यान, फलटण शहर पोलीस ठाण्याने तक्रार स्वीकारली असून या प्रकरणी पुढील चौकशी व आवश्यक कार्यवाही सुरू होण्याची शक्यता आहे.
