फलटण प्रतिनिधी :- सातारा-सांगली स्थानिक प्राधिकरण मतदारसंघाच्या विधान परिषद निवडणुकीसाठी फलटण येथील मतदान केंद्रावर गुरुवारी शांततापूर्ण आणि उत्साहपूर्ण वातावरणात मतदान प्रक्रिया पार पडली. केंद्रावरील नोंदणीकृत सर्व ३१ मतदारांनी मतदानाचा हक्क बजावल्याने येथे शंभर टक्के मतदानाची नोंद झाली.
फलटण तहसील कार्यालयातील मतदान केंद्रावर सकाळी ८ वाजता मतदानास सुरुवात झाली. निवडणूक प्रक्रिया सुरळीत पार पडावी यासाठी प्रशासनाकडून आवश्यक सर्व सुविधा उपलब्ध करून देण्यात आल्या होत्या.
दुपारी साडेबारा वाजण्याच्या सुमारास शिवसेनेचे १० नगरसेवक मतदार अनिकेतराजे नाईक निंबाळकर यांच्या समवेत मतदान केंद्रावर दाखल झाले. त्यांनी नियमानुसार मतदान करून आपला लोकशाही हक्क बजावला.
त्यानंतर दुपारी तीन वाजण्याच्या सुमारास भारतीय जनता पक्ष आणि राष्ट्रवादी काँग्रेस पक्षाचे २१ मतदार नगराध्यक्ष समशेरसिंह नाईक निंबाळकर यांच्या नेतृत्वाखाली मतदान केंद्रावर आले. त्यांनीही मतदान प्रक्रियेत सहभाग नोंदवत आपले मतदान केले.
फलटण मतदान केंद्रावर एकूण ३१ मतदारांची नोंद होती. विशेष म्हणजे सर्वच मतदारांनी मतदान केल्याने केंद्रावर शंभर टक्के मतदानाची नोंद झाली. संपूर्ण मतदान प्रक्रिया शांततेत आणि कोणताही अनुचित प्रकार न घडता पार पडल्याचे प्रशासनाने सांगितले.
कायदा व सुव्यवस्था अबाधित राखण्यासाठी फलटण शहर पोलीस ठाण्याचे पोलीस निरीक्षक अरविंद काळे यांच्या मार्गदर्शनाखाली कडक पोलीस बंदोबस्त तैनात करण्यात आला होता.
प्रांताधिकारी प्रियंका आंबेकर यांच्या मार्गदर्शनाखाली मतदान प्रक्रिया यशस्वीरीत्या पूर्ण झाली. यानंतर तहसीलदार डॉ. अभिजित जाधव यांनी फलटण केंद्रावर शंभर टक्के मतदान झाल्याची अधिकृत माहिती दिली.
