Sunday, November 22, 2026
Home Blog Page 5

गिरवीच्या सुपुत्राची सामाजिक कार्याची भरारी थेट आंतरराष्ट्रीय व्यासपीठावर!

0
गिरवीच्या सुपुत्राची सामाजिक कार्याची भरारी थेट आंतरराष्ट्रीय व्यासपीठावर!

ॲड. सुजित निकाळजे यांच्या नवी मुंबईतील झोपडपट्टीवासीयांच्या पाणीहक्कावरील अभ्यासपूर्ण केस स्टडीची जागतिक पुरस्काराच्या अंतिम सातमध्ये निवड; भारताचे एकमेव प्रतिनिधित्व

फलटण प्रतिनिधी : शहरांच्या विकासाचा डंका वाजत असताना त्याच शहरातील झोपडपट्ट्यांमध्ये राहणाऱ्या नागरिकांना पिण्याच्या पाण्यासारख्या मूलभूत सुविधेसाठी संघर्ष करावा लागत असेल, तर हा केवळ पाणीटंचाईचा प्रश्न राहत नाही, तर तो सामाजिक विषमता आणि मानवी हक्कांचा प्रश्न ठरतो. याच दुर्लक्षित वास्तवाला जागतिक व्यासपीठावर मांडण्याचे महत्त्वपूर्ण काम गिरवी गावचे सुपुत्र ॲड. सुजित शांताबाई आनंदा निकाळजे यांनी केले आहे. त्यांच्या नवी मुंबईतील झोपडपट्ट्यांमधील पाणीहक्क आणि शाश्वत पाणीपुरवठ्यावरील अभ्यासपूर्ण केस स्टडीची पाचव्या आंतरराष्ट्रीय शाश्वत विकास धोरण पुरस्कार २०२६ च्या अंतिम सात केस स्टडींमध्ये निवड झाली आहे. विशेष उल्लेखनीय बाब म्हणजे, या अंतिम सातमध्ये स्थान मिळवणारी भारतातील एकमेव केस स्टडी ठरली आहे.

पाणी हा सुविधेचा नव्हे, तर प्रत्येक नागरिकाच्या जगण्याचा हक्क!

पाणी ही मानवी जीवनाची मूलभूत गरज असून, सुरक्षित आणि पुरेसे पाणी मिळणे हा प्रत्येक नागरिकाचा अधिकार आहे. मात्र, शहरीकरण आणि विकासाच्या प्रक्रियेत झोपडपट्ट्यांमधील नागरिकांच्या मूलभूत गरजांकडे अनेकदा दुर्लक्ष होते. शहरांमध्ये मोठ्या इमारती, विस्तीर्ण रस्ते आणि आधुनिक सुविधा उभ्या राहत असताना दुसरीकडे अनेक वस्त्यांमधील कुटुंबांना नियमित आणि सुरक्षित पाणीपुरवठ्यासाठी संघर्ष करावा लागतो.

या समस्येकडे केवळ नळजोडणी किंवा पाणीपुरवठ्याच्या तांत्रिक व्यवस्थेच्या दृष्टीने न पाहता सामाजिक न्याय, समान नागरी हक्क आणि प्रशासनाची जबाबदारी या व्यापक दृष्टिकोनातून पाहण्याची गरज ॲड. सुजित निकाळजे यांनी आपल्या अभ्यासातून अधोरेखित केली आहे.

‘नवी मुंबईतील झोपडपट्ट्यांमध्ये पाणी उपलब्धतेचा हक्क आणि शाश्वत पाणीपुरवठा सक्षम करणे’ या विषयावरील त्यांच्या केस स्टडीमध्ये वंचित वस्त्यांमधील नागरिकांच्या पाणीप्रश्नाचा सखोल अभ्यास करण्यात आला आहे. पाणीपुरवठ्याच्या नियोजनात झोपडपट्टीवासीयांनाही समान संधी मिळावी आणि कोणताही नागरिक मूलभूत सुविधांपासून वंचित राहू नये, हा या अभ्यासाचा केंद्रबिंदू आहे.

‘सर्वांसाठी पाणी’ धोरणाला प्रत्यक्ष कामाची जोड

YUVA (Youth for Unity and Voluntary Action) या सामाजिक संस्थेच्या माध्यमातून ॲड. सुजित निकाळजे नवी मुंबई परिसरात कार्यरत आहेत. ‘सर्वांसाठी पाणी’ या संकल्पनेच्या अनुषंगाने त्यांनी झोपडपट्ट्यांमधील नागरिकांच्या समस्या, त्यांच्या पाणीविषयक गरजा आणि शाश्वत पाणीपुरवठ्याच्या उपाययोजनांवर काम केले आहे.

त्यांच्या कार्याचे वैशिष्ट्य म्हणजे, वंचित समुदायांच्या समस्या केवळ मांडण्यापुरते मर्यादित न राहता त्या धोरणात्मक पातळीवर पोहोचविण्याचा प्रयत्न. शहराच्या विकासाचे मूल्यमापन केवळ उंच इमारती, रस्ते आणि आधुनिक सुविधांवरून न करता सर्वसामान्य आणि दुर्लक्षित नागरिकांना मूलभूत सुविधा कितपत उपलब्ध झाल्या आहेत, यावरूनही झाले पाहिजे, हा महत्त्वाचा संदेश त्यांच्या अभ्यासातून पुढे आला आहे.

जगभरातील १०० हून अधिक अभ्यासांमधून अंतिम सातमध्ये स्थान

सिटीनेट (CityNet) आणि सहयोगी आंतरराष्ट्रीय संस्थांच्या वतीने आयोजित पाचव्या आंतरराष्ट्रीय शाश्वत विकास धोरण पुरस्कार २०२६ साठी जगभरातून १०० हून अधिक केस स्टडी सादर करण्यात आल्या होत्या. त्यातून परीक्षणानंतर अंतिम फेरीसाठी केवळ सात केस स्टडींची निवड करण्यात आली.

या सात निवडक केस स्टडींमध्ये नवी मुंबईतील झोपडपट्टीवासीयांच्या पाणीहक्कावर आधारित ॲड. सुजित निकाळजे यांच्या अभ्यासाचा समावेश झाला. त्यामुळे त्यांच्या कार्याला आंतरराष्ट्रीय स्तरावर व्यासपीठ मिळाले असून, भारतातील शहरी पाणीप्रश्न आणि सामाजिक विषमतेचा मुद्दा जागतिक चर्चेत पोहोचला आहे.

४ नोव्हेंबर २०२६ रोजी इंडोनेशियातील जकार्ता येथे या पुरस्काराचा कार्यक्रम पार पडला. या आंतरराष्ट्रीय कार्यक्रमात अंतिम फेरीतील संस्था आणि प्रतिनिधींनी सहभाग घेतला. विविध देशांतील शहरांमध्ये शाश्वत विकासासाठी राबविण्यात येणारे उपक्रम, अनुभव आणि धोरणात्मक उपाययोजनांवर चर्चा झाली. या व्यासपीठावर नवी मुंबईतील कार्याची मांडणी आणि भारताचे प्रतिनिधित्व करण्यासाठी ॲड. सुजित निकाळजे यांची निवड झाली होती.

कायद्याचे ज्ञान, सामाजिक अभ्यास आणि क्षेत्रकार्याचा प्रभावी संगम

ॲड. सुजित निकाळजे यांच्या कार्यामागे कायदा, सामाजिक शास्त्र आणि प्रत्यक्ष क्षेत्रातील अनुभव यांचा समन्वय दिसून येतो. त्यांनी बी.ए., एलएल.बी., एम.एस.डब्ल्यू. तसेच टाटा सामाजिक विज्ञान संस्थेतून (TISS) एम.फिल.पर्यंत शिक्षण पूर्ण केले आहे.

सध्या ते YUVA संस्थेमध्ये प्रोजेक्ट लीड म्हणून कार्यरत असून, घर हक्क संघर्ष समितीचे सल्लागार म्हणूनही योगदान देत आहेत. घराचा अधिकार, नागरी हक्क, मूलभूत सुविधांची उपलब्धता आणि वंचित घटकांचे प्रश्न या विषयांवर ते सातत्याने काम करीत आहेत.

कायद्याचा अभ्यास, सामाजिक प्रश्नांची जाण आणि प्रत्यक्ष क्षेत्रातील अनुभव यांच्या आधारे दुर्लक्षित समुदायांचे प्रश्न धोरणकर्त्यांसमोर प्रभावीपणे मांडण्याचा त्यांचा प्रयत्न या आंतरराष्ट्रीय निवडीच्या निमित्ताने विशेष चर्चेत आला आहे.

गिरवी गावाच्या शिरपेचात मानाचा तुरा!

ग्रामीण भागातून पुढे येऊन सामाजिक क्षेत्रात कार्यरत असलेल्या तरुणाने आपल्या अभ्यासपूर्ण कामाच्या बळावर आंतरराष्ट्रीय व्यासपीठावर भारताचे प्रतिनिधित्व करणे, ही गिरवी गावासह फलटण तालुक्यासाठी अभिमानाची बाब आहे.

मात्र, ॲड. सुजित निकाळजे यांच्या या यशाचे महत्त्व केवळ पुरस्काराच्या अंतिम फेरीतील निवडीपुरते मर्यादित नाही. शहरांच्या विकासाच्या झगमगाटात दुर्लक्षित राहणाऱ्या झोपडपट्टीवासीयांच्या पाणीहक्काचा प्रश्न त्यांनी जागतिक पातळीवर पोहोचवला आहे. पाणी, घर आणि नागरी सुविधा या केवळ विकासकामांच्या यादीतील बाबी नसून त्या प्रत्येक नागरिकाच्या सन्मानाने जगण्याशी निगडित आहेत, हा विचार त्यांच्या कार्यातून पुढे आला आहे.

गिरवी गावचे सुपुत्र ॲड. सुजित शांताबाई आनंदा निकाळजे यांनी मिळविलेल्या या आंतरराष्ट्रीय स्तरावरील महत्त्वपूर्ण यशाबद्दल त्यांचे सर्व स्तरांतून अभिनंदन होत आहे. त्यांच्या सामाजिक कार्याची ही वाटचाल भविष्यातही वंचित आणि दुर्लक्षित घटकांना न्याय मिळवून देण्यासाठी प्रेरणादायी ठरो, अशा शुभेच्छा व्यक्त होत आहेत.

विद्यार्थ्यांच्या कल्पकतेला मिळाले आकाश! जिल्हा परिषद शाळा परतवडी येथे आकाशकंदील निर्मिती कार्यशाळा उत्साहात संपन्न

0
विद्यार्थ्यांच्या कल्पकतेला मिळाले आकाश! जिल्हा परिषद शाळा परतवडी येथे आकाशकंदील निर्मिती कार्यशाळा उत्साहात संपन्न

रंगीबेरंगी कागद, आकर्षक सजावट आणि विद्यार्थ्यांच्या कलात्मकतेचा सुंदर आविष्कार; कृतीतून शिक्षणासह पर्यावरणपूरक दिवाळीचा संदेश

परतवडी : विद्यार्थ्यांच्या अंगभूत कलागुणांना वाव मिळावा, त्यांच्यामध्ये सर्जनशीलता, कल्पकता आणि हस्तकौशल्य विकसित व्हावे, या उद्देशाने जिल्हा परिषद प्राथमिक शाळा, परतवडी येथे आकाशकंदील तयार करण्याच्या कार्यशाळेचे उत्साहपूर्ण वातावरणात आयोजन करण्यात आले.

या कार्यशाळेत शाळेतील विद्यार्थ्यांनी मोठ्या उत्साहाने सहभाग नोंदविला. रंगीबेरंगी कागद, आकर्षक सजावटीचे साहित्य, चमकदार पट्ट्या तसेच विविध कलात्मक वस्तूंचा वापर करून विद्यार्थ्यांनी सुंदर आणि मनमोहक आकाशकंदील तयार केले. शिक्षकांनी विद्यार्थ्यांना आकाशकंदील तयार करण्याच्या विविध पद्धतींचे मार्गदर्शन केले. विद्यार्थ्यांनी आपल्या कल्पकतेचा वापर करून विविध आकारांचे, आकर्षक रंगसंगतीचे आणि नवनवीन रचनांचे आकाशकंदील साकारले.

या उपक्रमातून विद्यार्थ्यांना प्रत्यक्ष कृतीद्वारे शिकण्याची अनोखी संधी मिळाली. कागदकाम, रंगसंगती, सजावट, अचूकता आणि कलात्मकता यांचा प्रत्यक्ष अनुभव घेताना विद्यार्थ्यांच्या चेहऱ्यावर आनंद आणि उत्साह ओसंडून वाहत होता. स्वतःच्या हाताने तयार केलेल्या आकाशकंदिलांमुळे विद्यार्थ्यांमध्ये आत्मविश्वास आणि स्वनिर्मितीचा आनंद निर्माण झाला.

विशेष म्हणजे, या कार्यशाळेच्या माध्यमातून दिवाळी सणाचे सांस्कृतिक महत्त्व विद्यार्थ्यांना समजावून सांगण्यात आले. तसेच पर्यावरणपूरक साहित्याचा वापर करून सण साजरा करण्याचा आणि कलात्मक वस्तू स्वतः तयार करण्याचा संदेशही देण्यात आला.

शालेय अभ्यासक्रमाबरोबरच विद्यार्थ्यांच्या सुप्त कलागुणांना प्रोत्साहन देणारे असे कार्यानुभवाधारित उपक्रम त्यांच्या सर्वांगीण विकासासाठी अत्यंत महत्त्वपूर्ण ठरतात. विद्यार्थ्यांमधील सर्जनशीलता, निरीक्षणशक्ती, कल्पकता आणि स्वावलंबन विकसित करण्यासाठी अशा उपक्रमांचे आयोजन आवश्यक असल्याचे शिक्षकांनी मत व्यक्त केले.

या कार्यशाळेच्या यशस्वी आयोजनाबद्दल शाळेच्या मुख्याध्यापिका स्वाती साळवे मॅडम, उपशिक्षिका पवार मॅडम आणि विषय शिक्षक सुस्तरफोड सर यांनी सहभागी विद्यार्थ्यांचे मनःपूर्वक अभिनंदन केले व त्यांच्या कलात्मक प्रयत्नांचे कौतुक केले.

फलटणच्या सहकारात रामराजेंचा पुन्हा दबदबा! संजीवराजेंचा दणदणीत विजय; समशेरसिंह नाईक निंबाळकरांना धक्का

0
फलटणच्या सहकारात रामराजेंचा पुन्हा दबदबा! संजीवराजेंचा दणदणीत विजय; समशेरसिंह नाईक निंबाळकरांना धक्का

फलटणच्या सहकारात रामराजेंचा पुन्हा दबदबा! संजीवराजेंचा दणदणीत विजय; समशेरसिंह नाईक निंबाळकरांना धक्का

सातारा जिल्हा मध्यवर्ती सहकारी बँकेच्या निवडणुकीत फलटण सोसायटी गटात संजीवराजे नाईक निंबाळकर यांना ७१ मते, तर समशेरसिंह नाईक निंबाळकर यांना ६० मते; रामराजे गटात जल्लोष, रणजितसिंह गटाच्या राजकीय वर्चस्वाला आव्हान!

फलटण : सातारा जिल्हा मध्यवर्ती सहकारी बँकेच्या निवडणुकीत फलटण सोसायटी मतदारसंघातील निकालाने जिल्ह्याच्या राजकीय आणि सहकार क्षेत्रात मोठी खळबळ उडवली आहे. शिवसेनेचे उमेदवार संजीवराजे नाईक निंबाळकर यांनी भाजपचे नेते तथा फलटणचे नगराध्यक्ष समशेरसिंह नाईक निंबाळकर यांचा ११ मतांनी पराभव करत विजय संपादन केला. या निकालामुळे फलटणच्या राजकारणात पुन्हा एकदा रामराजे नाईक निंबाळकर यांच्या गटाचे सहकार क्षेत्रातील वर्चस्व अधोरेखित झाले आहे.

फलटण सोसायटी गटातील या प्रतिष्ठेच्या लढतीत संजीवराजे नाईक निंबाळकर यांना ७१ मते मिळाली, तर समशेरसिंह नाईक निंबाळकर यांना ६० मते मिळाली. सुरुवातीपासूनच लक्षवेधी ठरलेल्या या निवडणुकीत संजीवराजे यांनी निर्णायक आघाडी घेत विजयावर शिक्कामोर्तब केले.

प्रत्यक्ष लढत दोन उमेदवारांची, पण प्रतिष्ठा दोन नेत्यांची!

या निवडणुकीचे वैशिष्ट्य म्हणजे मैदानात संजीवराजे आणि समशेरसिंह नाईक निंबाळकर आमनेसामने असले, तरी राजकीय पातळीवर ही लढत विधान परिषदेचे माजी सभापती रामराजे नाईक निंबाळकर आणि माजी खासदार रणजितसिंह नाईक निंबाळकर यांच्या गटांमधील प्रतिष्ठेची लढत म्हणून पाहिली जात होती.

फलटणच्या राजकारणात गेल्या काही काळापासून बदलती समीकरणे, सत्तासंघर्ष आणि स्थानिक नेतृत्वातील स्पर्धा सुरू आहे. अशा परिस्थितीत जिल्हा बँकेच्या निवडणुकीत संजीवराजे यांचा विजय रामराजे गटासाठी राजकीयदृष्ट्या महत्त्वाचा ठरला आहे. विधानसभा निवडणुकीनंतर राजकीय आव्हानांचा सामना करणाऱ्या या गटाला या निकालामुळे नवसंजीवनी मिळाल्याचे चित्र आहे.

रणजितसिंह गटाला धक्का; सहकारातील समीकरणे पुन्हा चर्चेत

समशेरसिंह नाईक निंबाळकर हे भाजपचे नेते आणि फलटणचे विद्यमान नगराध्यक्ष असल्याने त्यांच्या विजयाकडेही विशेष लक्ष लागले होते. मात्र, जिल्हा बँकेच्या निवडणुकीत त्यांना पराभव स्वीकारावा लागला. या निकालामुळे माजी खासदार रणजितसिंह नाईक निंबाळकर यांच्या गटाला राजकीय धक्का बसल्याचे मानले जात आहे.

या विजयातून रामराजे नाईक निंबाळकर यांनी सहकार क्षेत्रातील आपली संघटनात्मक ताकद अद्याप कायम असल्याचा संदेश दिला आहे. आगामी काळात फलटणच्या राजकारणात या निकालाचे पडसाद उमटण्याची शक्यता आहे.

जिल्हा बँकेच्या निवडणुकीत शिवसेनेची विजयी सुरुवात

सातारा जिल्हा मध्यवर्ती सहकारी बँकेच्या २१ जागांपैकी ९ जागा यापूर्वीच बिनविरोध झाल्या होत्या. उर्वरित १२ जागांसाठी १ नोव्हेंबर रोजी मतदान पार पडले. आज ३ नोव्हेंबर रोजी साताऱ्यात मतमोजणी सुरू असून सुरुवातीचे निकाल शिवसेनेसाठी उत्साहवर्धक ठरले आहेत.

पाटण सोसायटी मतदारसंघातून पालकमंत्री शंभूराज देसाई यांनी भाजपचे विद्यमान संचालक सत्यजित पाटणकर यांचा ५८ विरुद्ध ४६ मतांनी पराभव केला. त्यानंतर फलटणमध्ये संजीवराजे नाईक निंबाळकर यांनी मिळवलेल्या विजयामुळे शिवसेनेच्या गोटात उत्साहाचे वातावरण निर्माण झाले आहे.

फलटणमध्ये समर्थकांचा जल्लोष; पुढील राजकीय समीकरणांकडे लक्ष

संजीवराजे नाईक निंबाळकर यांच्या विजयाची बातमी समजताच रामराजे समर्थकांमध्ये आनंदाचे वातावरण निर्माण झाले असून फलटणमध्ये जल्लोषाला सुरुवात झाली आहे. या निकालामुळे केवळ जिल्हा बँकेतील प्रतिनिधित्वच नव्हे, तर फलटणच्या आगामी राजकीय वाटचालीतील शक्तिपरीक्षेलाही नवे वळण मिळाले आहे.

जिल्हा बँकेच्या निवडणुकीतून एक गोष्ट स्पष्ट झाली आहे की, स्थानिक राजकारणातील सत्तासमीकरणे आणि सहकार क्षेत्रातील संघटनात्मक ताकद यांची गणिते वेगवेगळी असू शकतात. फलटणमधील या निकालाने रामराजे गटाला आत्मविश्वास दिला असून आता जिल्हा बँकेतील उर्वरित निकालांकडे संपूर्ण जिल्ह्याचे लक्ष लागले आहे.

सातारा जिल्ह्यातील धरणांच्या पाणीवाटपाचे नव्याने नियोजन होणार! पिण्याच्या पाण्याला सर्वोच्च प्राधान्य; ६१ हजार हेक्टर क्षेत्राला रब्बी सिंचनाचा लाभ

0
सातारा जिल्ह्यातील धरणांच्या पाणीवाटपाचे नव्याने नियोजन होणार! पिण्याच्या पाण्याला सर्वोच्च प्राधान्य; ६१ हजार हेक्टर क्षेत्राला रब्बी सिंचनाचा लाभ

कोणत्याही तालुक्यावर अन्याय होऊ नये, पालकमंत्री शंभूराज देसाई यांचे निर्देश; कोयना धरणातील २० टक्के पाणी राखीव ठेवण्याचा प्रस्ताव, जानेवारीत उपलब्ध साठ्यानुसार पुन्हा आढावा

सातारा, दि. २ : जिल्ह्यात दुष्काळसदृश परिस्थिती निर्माण होण्याची शक्यता लक्षात घेऊन उपलब्ध पाणीसाठ्याचे काटेकोर नियोजन करण्याचे निर्देश पालकमंत्री शंभूराज देसाई यांनी दिले आहेत. जिल्ह्यातील कोणत्याही तालुक्यावर पाणीवाटपाच्या बाबतीत अन्याय होणार नाही, याची दक्षता घेत धरणांमधील पाण्याचे समन्यायी वाटप करावे. तसेच पिण्याच्या पाण्याला सर्वोच्च प्राधान्य देऊन त्यानंतर शेतीसाठी पाण्याचे नियोजन करावे, असे त्यांनी स्पष्ट केले.

जिल्हाधिकारी कार्यालयातील नियोजन भवनात धोम, बलकवडी, उरमोडी, कण्हेर आणि तारळी या प्रमुख प्रकल्पांच्या रब्बी हंगाम २०२६-२७ मधील कालवा सल्लागार समितीची बैठक पालकमंत्री शंभूराज देसाई यांच्या अध्यक्षतेखाली पार पडली. या बैठकीत जिल्ह्यातील उपलब्ध पाणीसाठा, रब्बी सिंचनाचे नियोजन, पिण्याच्या पाण्याची गरज आणि संभाव्य टंचाईच्या पार्श्वभूमीवर विविध महत्त्वपूर्ण निर्णय व सूचना करण्यात आल्या.

जानेवारीत पाणीवाटपाचा पुन्हा आढावा

पालकमंत्री देसाई यांनी पाण्याचा वापर अत्यंत काटकसरीने आणि नियोजनबद्ध पद्धतीने करण्याची आवश्यकता अधोरेखित केली. जानेवारी महिन्यात धरणांमधील प्रत्यक्ष उपलब्ध पाणीसाठ्याचा आढावा घेऊन पाणीवाटपाचे नव्याने नियोजन करण्यात यावे, अशी सूचना त्यांनी केली. यामुळे जिल्ह्यातील सर्व भागांना पिण्याच्या पाण्यासह शेतीसाठी आवश्यक पाणी उपलब्ध करून देणे शक्य होणार आहे.

कोयना धरणाच्या पाणी नियोजनाचे अधिकार सातारा समितीला मिळणार?

कोयना धरणातील २० टक्के पाणी सिंचन आणि पिण्याच्या वापरासाठी राखीव ठेवण्याचा प्रस्ताव शासनाकडे सादर करण्याचे निर्देश पालकमंत्र्यांनी दिले. याशिवाय कोयना धरणातील पाणी वापराचे नियोजन करण्याचे अधिकार सातारा जिल्हा कालवा सल्लागार समितीला देण्यात यावेत, अशी मागणीही शासनाकडे मांडण्यात येणार आहे.

ग्रामविकास व पंचायतराज मंत्री जयकुमार गोरे यांनीही यासंदर्भात ठराव मांडून तो शासनाकडे पाठविण्याची सूचना केली. त्यामुळे कोयना धरणाच्या पाणी नियोजनात सातारा जिल्ह्याला अधिक अधिकार मिळण्याच्या दृष्टीने हा विषय महत्त्वाचा ठरणार आहे.

बंधाऱ्यांमधील गाळ काढण्यासह गळती रोखण्याचे निर्देश

जिल्ह्यातील कोल्हापूर पद्धतीच्या बंधाऱ्यांमधील तसेच तलावांमधील गाळ काढण्यासाठी आवश्यक प्रस्ताव तातडीने सादर करावेत. उपसा सिंचन योजनांमधील पाण्याची गळती रोखण्यासाठी त्वरित कार्यवाही करावी, असे निर्देशही पालकमंत्र्यांनी दिले.

सार्वजनिक बांधकाम मंत्री शिवेंद्रसिंहराजे भोसले यांनी पिण्याच्या पाण्याच्या योजनांना प्राधान्य देण्याची भूमिका मांडली. जिल्ह्यातील सर्व कोल्हापूर पद्धतीचे बंधारे सुस्थितीत ठेवून पाणीपुरवठा सुरळीत राहील, याची दक्षता घेण्याची सूचना त्यांनी केली.

शेतकऱ्यांना दिलासा देण्यासाठी वीजबिलांबाबत मागणी

मदत व पुनर्वसन मंत्री मकरंद पाटील यांनी बलकवडी धरणातून खरीप हंगामातील शिल्लक पाणी सोडण्याची मागणी केली. त्यामुळे भात पिकांना त्याचा फायदा होऊ शकतो. तसेच उपसा सिंचन योजनांची वीज देयके शेतकऱ्यांकडून वसूल न करता त्यांची दुष्काळ निधीतून समायोजन करण्याबाबत विचार व्हावा, अशी भूमिका त्यांनी मांडली. पिण्याच्या पाण्याच्या योजनांचा वीजपुरवठा कोणत्याही परिस्थितीत खंडित करू नये, असेही त्यांनी स्पष्ट केले.

६१ हजार हेक्टर क्षेत्रासाठी रब्बी सिंचनाचे नियोजन

जलसंपदा विभागाचे अधीक्षक अभियंता जयंत शिंदे यांनी बैठकीत दिलेल्या माहितीनुसार, सातारा जिल्ह्यात रब्बी हंगामासाठी सुमारे ६१ हजार हेक्टर क्षेत्राला सिंचनाचा लाभ देण्याचे नियोजन करण्यात आले आहे. यामध्ये गहू, ज्वारी आणि चारा पिकांना प्राधान्य देण्यात येणार आहे. तसेच पिण्याच्या पाण्यासाठी ११ टीएमसी पाणी राखीव ठेवण्यात आल्याची माहिती देण्यात आली.

या बैठकीस जलसंपदा मंत्री राधाकृष्ण विखे-पाटील यांनी दूरदृश्य प्रणालीद्वारे सहभाग घेतला. ग्रामविकास मंत्री जयकुमार गोरे, सार्वजनिक बांधकाम मंत्री शिवेंद्रसिंहराजे भोसले, मदत व पुनर्वसन मंत्री मकरंद पाटील, जिल्हा परिषद अध्यक्षा प्रिया शिंदे, आमदार अरुण लाड, धैर्यशील कदम, महेश शिंदे, मनोज घोरपडे, डॉ. अतुल भोसले, सुहास बाबर, जिल्हाधिकारी संतोष पाटील, मुख्य कार्यकारी अधिकारी याशनी नागराजन, जलसंपदा विभागाचे अधीक्षक अभियंता जयंत शिंदे यांच्यासह संबंधित अधिकारी उपस्थित होते.

पाणी नियोजनाच्या निर्णयांकडे शेतकरी आणि नागरिकांचे लक्ष

दुष्काळाच्या पार्श्वभूमीवर सातारा जिल्ह्यातील धरणांच्या पाणीवाटपाचा प्रश्न अत्यंत संवेदनशील बनला आहे. एका बाजूला नागरिकांच्या पिण्याच्या पाण्याची गरज, तर दुसऱ्या बाजूला रब्बी हंगामातील पिके व जनावरांसाठी चाऱ्याची उपलब्धता हे मोठे आव्हान आहे. अशा परिस्थितीत ११ टीएमसी पाणी पिण्यासाठी राखीव ठेवण्याचे नियोजन आणि ६१ हजार हेक्टर क्षेत्रासाठी सिंचनाचे उद्दिष्ट महत्त्वपूर्ण ठरणार आहे.

मात्र, जानेवारीतील पाणीसाठ्याचा आढावा, कोयना धरणाच्या पाणी नियोजनाचे अधिकार आणि शासनाकडे पाठविण्यात येणाऱ्या प्रस्तावांवर पुढील कार्यवाही काय होते, याकडे संपूर्ण जिल्ह्याचे लक्ष लागले आहे. प्रत्यक्षात समन्यायी पाणीवाटपाची अंमलबजावणी झाल्यास पिण्याच्या पाण्याबरोबरच शेतकऱ्यांनाही मोठा दिलासा मिळू शकतो.

फलटणकरांनो, पाणी जपून वापरा! उद्या संपूर्ण शहराचा पाणीपुरवठा बंद

0
फलटणकरांनो, पाणी जपून वापरा! उद्या संपूर्ण शहराचा पाणीपुरवठा बंद

जलशुद्धीकरण केंद्राच्या दुरुस्तीमुळे ३ नोव्हेंबर रोजी पाणीपुरवठा राहणार बंद; ४ नोव्हेंबरपासून पुरवठा पूर्ववत होणार

फलटण : फलटण शहरातील जलशुद्धीकरण केंद्राच्या दुरुस्तीचे काम हाती घेण्यात येणार असल्याने मंगळवार, दि. ३ नोव्हेंबर रोजी संपूर्ण फलटण नगरपरिषद हद्दीतील पाणीपुरवठा बंद ठेवण्यात येणार आहे. या पार्श्वभूमीवर नागरिकांनी उपलब्ध पाण्याचा साठा जपून ठेवावा आणि पाण्याचा वापर अत्यंत काटकसरीने करावा, असे आवाहन फलटण नगरपरिषद प्रशासनाच्या वतीने करण्यात आले आहे.

दुरुस्तीच्या कामासाठी पाणीपुरवठा बंद

शहराला पाणीपुरवठा करणाऱ्या जलशुद्धीकरण केंद्राच्या देखभाल व दुरुस्तीचे काम सुरळीतपणे पूर्ण करण्यासाठी हा निर्णय घेण्यात आला आहे. त्यामुळे मंगळवारी शहरातील सर्व भागांतील नागरिकांना पाणीपुरवठा होणार नाही. विशेषतः दैनंदिन घरगुती वापर, पिण्याचे पाणी आणि इतर आवश्यक कामांसाठी नागरिकांनी एक दिवस आधीच पाण्याची आवश्यक व्यवस्था करून ठेवणे गरजेचे आहे.

बुधवारपासून पाणीपुरवठा पूर्ववत

जलशुद्धीकरण केंद्राच्या दुरुस्तीचे काम पूर्ण झाल्यानंतर बुधवार, दि. ४ नोव्हेंबरपासून शहरातील पाणीपुरवठा पूर्ववत सुरू करण्यात येणार असल्याचे नगरपरिषद प्रशासनाने स्पष्ट केले आहे. मात्र, दुरुस्तीच्या कामादरम्यान किंवा त्यानंतर तांत्रिक अडचणी उद्भवल्यास पुरवठ्याच्या वेळापत्रकावर परिणाम होण्याची शक्यता नाकारता येत नाही.

नागरिकांनी सहकार्य करण्याचे आवाहन

पाणीपुरवठा बंद राहणार असल्याने नागरिकांची काही प्रमाणात गैरसोय होण्याची शक्यता आहे. त्यामुळे पिण्याच्या पाण्याला प्राधान्य देऊन अनावश्यक पाणीवापर टाळावा, पाण्याचा अपव्यय होणार नाही याची काळजी घ्यावी आणि उपलब्ध साठ्याचे योग्य नियोजन करावे, असे आवाहन फलटण नगरपरिषदेचे मुख्याधिकारी निखिल जाधव यांनी जाहीर प्रकटनाद्वारे केले आहे.

पाणी ही प्रत्येकाची मूलभूत गरज असून त्याचा काटकसरीने वापर करणे ही सामूहिक जबाबदारी आहे. दुरुस्तीचे काम पूर्ण होऊन शहराचा पाणीपुरवठा सुरळीत होण्यासाठी नागरिकांनी नगरपरिषद प्रशासनास सहकार्य करावे, असे आवाहन करण्यात आले आहे.

महत्त्वाची सूचना :

  • मंगळवार, दि. ३ नोव्हेंबर : संपूर्ण शहराचा पाणीपुरवठा बंद.
  • बुधवार, दि. ४ नोव्हेंबर : पाणीपुरवठा पूर्ववत सुरू होणार.

बारामतीच्या शिक्षण क्षेत्राचा गौरव! प्रिया नाळे-बोराटे यांची राज्यस्तरीय ‘आयडॉल शिक्षक’ म्हणून निवड

0
बारामतीच्या शिक्षण क्षेत्राचा गौरव! प्रिया नाळे-बोराटे यांची राज्यस्तरीय ‘आयडॉल शिक्षक’ म्हणून निवड

जिल्हा परिषद प्राथमिक शाळा, गोजूबावी येथील उपक्रमशील व तंत्रस्नेही शिक्षिका यांच्या शैक्षणिक कार्याची राज्यस्तरावर दखल; सर्व स्तरांतून अभिनंदनाचा वर्षाव!

गोजूबावी, ता. बारामती (प्रतिनिधी) : महाराष्ट्र राज्य शैक्षणिक संशोधन व प्रशिक्षण परिषद (एससीईआरटी), पुणे यांच्या वतीने देण्यात येणाऱ्या राज्यस्तरीय ‘आयडॉल शिक्षक’ या सन्मानासाठी जिल्हा परिषद प्राथमिक शाळा, गोजूबावी, तालुका बारामती, जिल्हा पुणे येथील उपक्रमशील व तंत्रस्नेही शिक्षिका सौ. प्रिया अमोल नाळे-बोराटे (मॅडम) यांची निवड झाली आहे. त्यांच्या या उल्लेखनीय निवडीमुळे बारामती तालुक्याच्या शैक्षणिक क्षेत्रात आनंदाचे वातावरण निर्माण झाले असून, त्यांच्यावर सर्व स्तरांतून अभिनंदनाचा वर्षाव होत आहे.

शिक्षण क्षेत्रात विद्यार्थ्यांचा सर्वांगीण विकास घडविण्यासाठी शिक्षकांची भूमिका अत्यंत महत्त्वाची असते. बदलत्या शैक्षणिक प्रवाहानुसार अध्यापन पद्धतीत नवनवीन प्रयोग करणे, आधुनिक तंत्रज्ञानाचा प्रभावी वापर करणे आणि विद्यार्थ्यांना आनंददायी व गुणवत्तापूर्ण शिक्षण देणे ही आजच्या काळाची गरज आहे. या दृष्टीने सौ. प्रिया नाळे-बोराटे यांनी आपल्या अध्यापन कार्यातून उपक्रमशीलता आणि तंत्रज्ञानाची सांगड घालत शैक्षणिक क्षेत्रात वेगळी ओळख निर्माण केली आहे.

विद्यार्थ्यांच्या शैक्षणिक प्रगतीबरोबरच त्यांच्यातील सुप्त कलागुणांना वाव देणे, अध्ययन-अध्यापन प्रक्रिया अधिक प्रभावी करणे आणि शिक्षणाकडे पाहण्याचा सकारात्मक दृष्टिकोन विकसित करणे, अशा उद्दिष्टांसाठी शिक्षकांनी सातत्याने प्रयत्नशील राहणे आवश्यक असते. अशा शैक्षणिक कार्याची राज्यस्तरावर दखल घेतली जाणे ही निश्चितच अभिमानाची बाब आहे.

राज्यस्तरीय ‘आयडॉल शिक्षक’ म्हणून झालेली निवड ही त्यांच्या शैक्षणिक कार्याची आणि शिक्षक म्हणून असलेल्या समर्पणभावनेची पोचपावती मानली जात आहे. या सन्मानामुळे जिल्हा परिषद प्राथमिक शाळा, गोजूबावी तसेच बारामती तालुक्याच्या शैक्षणिक लौकिकात भर पडली आहे.

या यशाबद्दल सौ. प्रिया अमोल नाळे-बोराटे यांचे शिक्षण क्षेत्रातील अधिकारी, शिक्षकवृंद, सहकारी, मित्रपरिवार, ग्रामस्थ आणि पालकांकडून अभिनंदन करण्यात येत आहे. त्यांच्या पुढील शैक्षणिक वाटचालीस मनःपूर्वक शुभेच्छा व्यक्त केल्या जात आहेत.

उपक्रमशीलता, तंत्रज्ञानाची जोड आणि गुणवत्तापूर्ण शिक्षणाची धडपड यांचा गौरव करणारी ही निवड निश्चितच इतर शिक्षकांसाठी प्रेरणादायी ठरणार आहे.

सातारा जिल्हा बँकेच्या सत्तासमीकरणाचा उद्या फैसला! सहा टेबलांवर दोन फेऱ्यांत मतमोजणी; निकालाकडे संपूर्ण जिल्ह्याचे लक्ष

0
सातारा जिल्हा बँकेच्या सत्तासमीकरणाचा उद्या फैसला! सहा टेबलांवर दोन फेऱ्यांत मतमोजणी; निकालाकडे संपूर्ण जिल्ह्याचे लक्ष

९७ टक्के विक्रमी मतदानामुळे निवडणुकीची उत्सुकता शिगेला; कोरेगाव, खंडाळा आणि वाईमध्ये शंभर टक्के मतदानाची नोंद

सातारा (प्रतिनिधी) : सातारा जिल्हा मध्यवर्ती सहकारी बँकेच्या संचालक मंडळाच्या निवडणुकीचा आता अंतिम टप्पा जवळ आला असून, मंगळवार, दि. ३ नोव्हेंबर रोजी होणाऱ्या मतमोजणीकडे संपूर्ण जिल्ह्याचे लक्ष लागले आहे. जिल्ह्यात सुमारे ९७ टक्के मतदान झाल्याने या निवडणुकीतील चुरस अधिकच वाढली आहे. सहा टेबलांवर दोन फेऱ्यांमध्ये मतमोजणी होणार असून, त्यातून जिल्हा बँकेच्या आगामी संचालक मंडळाचे चित्र स्पष्ट होणार आहे.

जिल्हा बँकेची निवडणूक ही केवळ संचालक निवडीपुरती मर्यादित नसून, जिल्ह्यातील सहकार क्षेत्रातील राजकीय आणि संस्थात्मक प्रभावाच्या दृष्टीनेही महत्त्वाची मानली जाते. त्यामुळे मतदानानंतर आता कोणाच्या बाजूने मतदारांनी कौल दिला आहे, याबाबत राजकीय व सहकार क्षेत्रात तर्कवितर्कांना उधाण आले आहे.

उच्च मतदानामुळे निकालाबाबत उत्सुकता

रविवार, दि. १ नोव्हेंबर रोजी जिल्ह्यातील विविध मतदान केंद्रांवर शांततेत मतदान पार पडले. एकूण मतदानाची टक्केवारी सुमारे ९७ टक्क्यांपर्यंत पोहोचली. विशेष म्हणजे कोरेगाव, खंडाळा आणि वाई या तीन तालुक्यांमध्ये शंभर टक्के मतदान झाले. या उच्च मतदानामुळे मतदारांनी निवडणूक प्रक्रियेत मोठ्या प्रमाणावर सहभाग नोंदविल्याचे स्पष्ट झाले आहे.

मात्र, केवळ मतदानाची टक्केवारी पाहून निकालाचा अंदाज बांधणे शक्य नसल्याने प्रत्यक्ष मतमोजणीनंतरच उमेदवारांचे राजकीय भवितव्य स्पष्ट होणार आहे. कोणत्या मतदारसंघात कोणाला आघाडी मिळते आणि कोणत्या गटाचे पारडे जड ठरते, याची उत्सुकता निर्माण झाली आहे.

सहा टेबलांवर मतमोजणी; दोन टप्प्यांत प्रक्रिया

मंगळवारी सकाळी ८ वाजता सातारा जिल्हा नागरी सहकारी बँक असोसिएशन लि., जरंडेश्वर नाका, हनुमान मंदिराजवळ, सातारा येथील सभागृहात मतमोजणीला सुरुवात होणार आहे.

मतमोजणीसाठी सहा टेबलांची व्यवस्था करण्यात आली आहे. संपूर्ण प्रक्रिया दोन फेऱ्यांमध्ये पार पडणार आहे. पहिल्या फेरीत विविध कार्यकारी सेवा सहकारी संस्था मतदारसंघातील मतांची मोजणी केली जाईल. त्यानंतर राखीव व औद्योगिक मजूर मतदारसंघातील मतमोजणी होणार आहे.

या नियोजनामुळे मतमोजणीची प्रक्रिया निर्धारित पद्धतीने पूर्ण करण्याचे प्रशासनाचे नियोजन आहे.

मतपेट्यांवर सीसीटीव्हीची नजर; कडेकोट पोलीस बंदोबस्त

मतदान प्रक्रिया पूर्ण झाल्यानंतर जिल्ह्यातील सर्व मतदान केंद्रांवरील मतपेट्या मतमोजणी केंद्रातील सुरक्षित कक्षात ठेवण्यात येणार आहेत. या कक्षावर सीसीटीव्हीच्या माध्यमातून देखरेख ठेवली जाणार असून, मतमोजणी केंद्राच्या परिसरात पोलीस बंदोबस्त तैनात करण्यात आला आहे.

मतदानाच्या दिवशीही जिल्हा प्रशासन आणि पोलीस यंत्रणेने चोख व्यवस्था ठेवली होती. जिल्हाधिकारी संतोष पाटील, पोलीस अधीक्षक निखिल पिंगळे यांनी निवडणूक प्रक्रियेवर लक्ष ठेवले. निवडणूक निर्णय अधिकारी संजयकुमार सुद्रिक तसेच सहाय्यक निवडणूक निर्णय अधिकारी अभिमान थोरात व राहुल देशमुख यांनी विविध मतदान केंद्रांना भेटी देऊन पाहणी केली.

उमेदवार आणि अधिकृत प्रतिनिधींनाच प्रवेश

मतमोजणी प्रक्रियेत शिस्त आणि पारदर्शकता राखण्यासाठी प्रवेशाबाबत विशेष नियम लागू करण्यात आले आहेत. मतमोजणी केंद्रात केवळ निवडणूक लढविणारे उमेदवार आणि त्यांचे अधिकृत प्रतिनिधी यांनाच प्रवेश दिला जाणार आहे.

प्रतिनिधी नियुक्त करण्यासाठी नमुना आठ-अ मधील अर्ज मतमोजणीपूर्वी दाखल करणे आवश्यक आहे. तसेच संबंधित प्रतिनिधींनी आपले ओळखपत्र सोबत ठेवणे बंधनकारक आहे.

सहकार क्षेत्रातील पुढील समीकरणे ठरणार!

जिल्हा बँकेच्या या निवडणुकीकडे सहकार क्षेत्रातील भविष्यातील नेतृत्वाच्या दृष्टीनेही पाहिले जात आहे. ९७ टक्के मतदानाने निवडणुकीतील चुरस अधोरेखित केली असून, आता मतपेट्यांमधून कोणाच्या बाजूने कौल बाहेर पडतो, यावर अनेक राजकीय आणि सहकारी संस्थांच्या पुढील वाटचालीची दिशा अवलंबून राहणार आहे.

तीन तालुक्यांतील शंभर टक्के मतदान, जिल्ह्यातील उच्च मतदानाची टक्केवारी आणि सहा टेबलांवरील मतमोजणी या पार्श्वभूमीवर ३ नोव्हेंबरचा दिवस सातारा जिल्ह्याच्या सहकार क्षेत्रासाठी निर्णायक ठरणार आहे. आता सर्वांचे लक्ष मतमोजणीकडे आणि अंतिम निकालाकडे लागले आहे.

समतानगरमध्ये ‘दर रविवारी चला बुद्धविहारी’ उपक्रमाला उत्स्फूर्त प्रतिसाद!

0
समतानगरमध्ये ‘दर रविवारी चला बुद्धविहारी’ उपक्रमाला उत्स्फूर्त प्रतिसाद!

न्यू पंचशील तरुण मित्र मंडळाच्या पुढाकाराने बुद्धवंदना, सूत्रपठण आणि वैचारिक मंथनास प्रारंभ

विडणी (समतानगर) : डॉ. बाबासाहेब आंबेडकर यांनी दिलेल्या ‘दर रविवारी चला बुद्धविहारी’ या विचाराला कृतीची जोड देत मौजे समतानगर (विडणी) येथील न्यू पंचशील तरुण मित्र मंडळाने नियमित बुद्धवंदना आणि धम्मविचारांच्या मंथनाचा उपक्रम सुरू केला आहे.

समतानगर येथील पंचशील बुद्धविहारात बुद्धमूर्तीच्या प्रतिष्ठापनेनंतर मंडळाच्या सर्व पदाधिकाऱ्यांनी, कार्यकर्त्यांनी तसेच बौद्ध उपासक-उपासिकांनी हा उपक्रम नियमितपणे राबविण्याचा संकल्प केला आहे. त्यानुसार आज रविवारी बुद्धविहारात अत्यंत उत्साहपूर्ण वातावरणात बुद्धपूजेचे आयोजन करण्यात आले. यावेळी बौद्ध उपासक, उपासिका, बालक-बालिका आणि मंडळाचे कार्यकर्ते मोठ्या संख्येने उपस्थित होते. सामूहिक बुद्धवंदना व सूत्रपठणानंतर भगवान बुद्धांच्या विचारांसह महात्मा फुले, राजर्षी शाहू महाराज आणि डॉ. बाबासाहेब आंबेडकर यांच्या समतावादी विचारांचे मंथन करण्यात आले.

या वेळी भारतीय बौद्ध महासभा, फलटण तालुका शाखेचे माजी प्रचार व पर्यटन उपाध्यक्ष आयु. रामचंद्र मोरे यांनी बुद्धवंदना व सूत्रपठणाचे संचलन केले.

बुद्धमूर्तीचे दान करणारे सुरवडी गावचे सुपुत्र तथा समाजभूषण आयु. तुषार मोहिते सर यांनी बुद्धमूर्ती प्रतिष्ठापनेच्या वेळी बुद्धविहारात नियमित कार्यक्रम आयोजित करण्याचे आवाहन केले होते. त्यांच्या या आवाहनाला सकारात्मक प्रतिसाद देत न्यू पंचशील तरुण मित्र मंडळाने ‘दर रविवारी चला बुद्धविहारी’ हा उपक्रम प्रत्यक्षात सुरू केला आहे.

विशेष म्हणजे, पुढील रविवारपासून बुद्धविहारात बौद्ध धम्मातील विविध ग्रंथांचे क्रमशः वाचन सुरू करण्यात येणार आहे. या माध्यमातून धम्माचे आकलन, वैचारिक जागृती, सामूहिक अध्ययन आणि नव्या पिढीमध्ये बुद्धविचारांची रुजवणूक करण्याचा मंडळाचा प्रयत्न आहे.

बुद्धविहार हे केवळ धार्मिक उपासनेचे केंद्र न राहता ते ज्ञान, प्रबोधन, समता, बंधुता आणि सामाजिक परिवर्तनाचे केंद्र बनावे, या भावनेतून सुरू झालेला हा उपक्रम निश्चितच कौतुकास्पद आहे. ‘दर रविवारी चला बुद्धविहारी’ या संकल्पनेतून समतानगरमध्ये नियमित धम्मसंस्कार आणि वैचारिक चळवळीची नवी सुरुवात होत आहे.

बापूंच्या मार्गदर्शनामुळेच समाजसेवेची प्रेरणा मिळाली’ ; स्मृतिदिनानिमित्त सौ. वैशाली कांबळे यांच्याकडून कृतज्ञतापूर्वक अभिवादन

0
बापूंच्या मार्गदर्शनामुळेच समाजसेवेची प्रेरणा मिळाली’ ; स्मृतिदिनानिमित्त सौ. वैशाली कांबळे यांच्याकडून कृतज्ञतापूर्वक अभिवादन

‘बापूंच्या मार्गदर्शनामुळेच समाजसेवेची प्रेरणा मिळाली’ ; स्मृतिदिनानिमित्त सौ. वैशाली कांबळे यांच्याकडून कृतज्ञतापूर्वक अभिवादन

फलटण प्रतिनिधी :- निंबळक गावाच्या सामाजिक, राजकीय आणि सहकार क्षेत्रात आपल्या कार्याचा ठसा उमटविणारे स्वर्गीय मोहनराव विठ्ठलराव नाईक निंबाळकर (बापू) यांच्या प्रथम स्मृतिदिनानिमित्त त्यांच्या कार्याचा आणि आठवणींचा गौरवपूर्ण उजाळा देण्यात आला. बापूंच्या मार्गदर्शनामुळेच आम्हाला समाजसेवेची प्रेरणा मिळाली. त्यांनी दिलेले संस्कार, सामाजिक भान आणि जनसेवेचा विचार हीच आमच्या पुढील वाटचालीची खरी शिदोरी असल्याची भावना सातारा जिल्हा परिषद सदस्या सौ. वैशाली संदीप कांबळे यांनी व्यक्त केली.
स्वभावाने शांत, संयमी, मनमिळाऊ आणि दूरदृष्टी असलेले मोहनबापू हे निंबळक गावाच्या सर्वांगीण विकासातील महत्त्वाचे मार्गदर्शक होते. राजकारणाकडे केवळ सत्तेचे साधन म्हणून न पाहता समाजकारण आणि जनसेवेचे माध्यम म्हणून त्यांनी त्याचा उपयोग केला. सर्व जाती-धर्मांतील नागरिकांना सोबत घेऊन काम करण्याची त्यांची भूमिका नेहमीच प्रेरणादायी राहिली.
सहकार क्षेत्रातून विकासाला चालना
गावाच्या आणि परिसराच्या आर्थिक विकासासाठी सहकार क्षेत्राचे महत्त्व ओळखून बापूंनी १९९१ मध्ये निंबळक येथे श्री संत ज्ञानेश्वर नागरी सहकारी पतसंस्थेची स्थापना केली. या संस्थेच्या माध्यमातून गरजू नागरिकांना आर्थिक सहकार्य, सुशिक्षित बेरोजगारांना व्यवसायासाठी प्रोत्साहन, तसेच बचतगटातील महिलांना आर्थिक पाठबळ देत रोजगारनिर्मितीला चालना दिली. आज या संस्थेचा विस्तार निंबळक, फलटण आणि पवारवाडीपर्यंत झाला आहे.
अनेक कुटुंबांच्या उभारणीत मोलाचा वाटा
बापूंच्या सामाजिक कार्यातील सर्वाधिक उल्लेखनीय योगदान म्हणजे त्यांनी परिसरातील अनेक तरुणांना विविध संस्थांमध्ये रोजगाराच्या संधी उपलब्ध करून दिल्या. एका तरुणाला नोकरी मिळणे म्हणजे संपूर्ण कुटुंबाला आधार मिळणे, या उदात्त भावनेतून त्यांनी अनेक कुटुंबांच्या जीवनात स्थैर्य निर्माण केले. युवकांपासून ज्येष्ठांपर्यंत प्रत्येकाशी जिव्हाळ्याचे नाते जपणारे बापू सर्वसामान्यांच्या सुख-दुःखात नेहमी सहभागी होत असत.
सहकार, राजकारण, शिक्षण, कृषी, सामाजिक आणि सांस्कृतिक क्षेत्रांत त्यांनी सक्रिय योगदान दिले. श्रीमंत मालोजीराजे सहकारी बँक, श्रीमंत रामराजे सहकारी वाहतूक संस्था आणि श्रीराम सहकारी साखर कारखाना अशा संस्थांमध्ये त्यांनी विविध जबाबदाऱ्या सांभाळल्या. जायंट्स ग्रुप ऑफ फलटणच्या माध्यमातूनही त्यांनी सामाजिक उपक्रमांना हातभार लावला.
बापूंचे मार्गदर्शन हीच आमच्या कार्याची प्रेरणा
सौ. वैशाली संदीप कांबळे यांनी आपल्या भावना व्यक्त करताना सांगितले की, माझे पती संदीप सावळा कांबळे आणि मला आज समाजासाठी जे काही कार्य करता येत आहे, त्यामागे बापूंचे मार्गदर्शन, प्रोत्साहन आणि त्यांनी दिलेले संस्कार आहेत. माझ्या सार्वजनिक जीवनातील वाटचालीत बापूंचे स्थान पितृतुल्य मार्गदर्शकाचे राहिले आहे. जिल्हा परिषद सदस्य म्हणून काम करताना त्यांनी दिलेली शिकवण आणि जनतेशी नाते जोडण्याची त्यांची कार्यपद्धती कायम प्रेरणा देत राहील. त्यांच्या ऋणातून मुक्त होणे शक्य नाही, अशा भावना त्यांनी व्यक्त केल्या.
आठवणी कायम, विचारांचा वारसा पुढे नेण्याचा संकल्प
बापूंचे जाणे हे निंबळक गावासह संपूर्ण परिसरासाठी मोठे नुकसान आहे. त्यांचे शांत स्मितहास्य, सर्वांना सोबत घेऊन जाण्याची वृत्ती, अडचणीच्या काळात मदतीला धावून जाण्याचा स्वभाव आणि समाजासाठी झटण्याची तळमळ आजही अनेकांच्या स्मरणात आहे.
त्यांनी निर्माण केलेल्या सामाजिक जिव्हाळ्याच्या नात्यांची आणि जनसेवेच्या विचारांची जपणूक करणे, हाच त्यांना खरा आदरांजली ठरेल. त्यांच्या प्रथम स्मृतिदिनानिमित्त बापूंनी दिलेला समाजसेवेचा वारसा पुढे नेण्याचा संकल्प सौ. वैशाली संदीप कांबळे यांनी व्यक्त केला.
स्वर्गीय मोहनराव नाईक निंबाळकर (बापू) यांच्या प्रथम स्मृतिदिनानिमित्त त्यांच्या पवित्र स्मृतीस भावपूर्ण श्रद्धांजली अर्पण करण्यात आली.

राजकीय, सामाजिक, शैक्षणिक आणि सहकार क्षेत्रात ठसा उमटविणारे स्व. मोहनराव नाईक निंबाळकर (बापू) यांच्या प्रथम पुण्यस्मरणानिमित्त कृतज्ञतापूर्वक स्मरण
काही माणसे जन्माला येतात ती केवळ स्वतःचे आयुष्य घडवण्यासाठी नव्हे, तर असंख्य कुटुंबांच्या जीवनात आशेचा किरण निर्माण करण्यासाठी!
समाजातील गोरगरीब, कष्टकरी, सर्वसामान्य कुटुंबांतील तरुणांना आधार देत त्यांच्या आयुष्याला नवी दिशा देणारे, राजकीय, सामाजिक, शैक्षणिक आणि सहकार क्षेत्रात आपल्या कार्याचा ठसा उमटविणारे निंबळक गावचे सुपुत्र स्वर्गीय मोहनराव विठ्ठलराव नाईक निंबाळकर (बापू) यांच्या प्रथम पुण्यस्मरणानिमित्त त्यांच्या कार्याचा आणि जीवनप्रवासाचा मागोवा घेताना अनेक आठवणी मनात दाटून येतात.
जन्म आणि कौटुंबिक संस्कार
दि. 17 सप्टेंबर 1950 रोजी निंबळक येथील प्रतिष्ठित नाईक निंबाळकर घराण्यात बापूंचा जन्म झाला. सहकारमहर्षी कै. विठ्ठलराव राजेजीराव नाईक निंबाळकर यांचे सुपुत्र म्हणून त्यांना लहानपणापासूनच सामाजिक कार्य, सहकार, राजकारण आणि लोकसेवेचे संस्कार लाभले.
वडिलांकडून मिळालेला समाजकारणाचा वारसा त्यांनी केवळ जपला नाही, तर आपल्या कर्तृत्वातून तो अधिक व्यापक केला. कुटुंबातील संस्कार, माणसांशी जिव्हाळ्याचे संबंध आणि सर्वसामान्यांच्या प्रश्नांविषयी असलेली संवेदनशीलता ही त्यांच्या व्यक्तिमत्त्वाची वैशिष्ट्ये होती.
राजकीय प्रवास : सत्तेपेक्षा माणसांना महत्त्व
बापूंचा राजकीय प्रवास हा पद आणि प्रतिष्ठेपेक्षा माणसे जोडण्याचा प्रवास होता. विधान परिषदेचे सभापती श्रीमंत रामराजे नाईक निंबाळकर, स्व. श्रीमंत दादाराजे खर्डेकर, जिल्हा परिषदेचे माजी अध्यक्ष श्रीमंत संजीवराजे नाईक निंबाळकर आणि कृषी उत्पन्न बाजार समितीचे सभापती श्रीमंत रघुनाथराजे नाईक निंबाळकर यांच्याशी त्यांचे निकटचे संबंध होते. त्यांच्या मार्गदर्शनाखाली बापूंनी राजकीय आणि सामाजिक क्षेत्रात काम केले.
श्रीमंत मालोजीराजे सहकारी बँक, श्रीमंत रामराजे सहकारी वाहतूक संस्था यांसारख्या सहकारी संस्थांच्या संचालकपदाची जबाबदारी त्यांनी सांभाळली. श्रीराम सहकारी साखर कारखान्याच्या संचालक मंडळावरही त्यांनी काम केले. त्यानंतर स्वीकृत तज्ज्ञ संचालक म्हणून त्यांची पुनर्नियुक्ती झाली.
राजकीय क्षेत्रात सक्रिय असतानाही त्यांनी गावातील सर्वसामान्य नागरिकांशी असलेली नाळ कधीही तुटू दिली नाही. प्रत्येकाला सोबत घेऊन जाणे, कार्यकर्त्यांच्या अडचणी समजून घेणे आणि गावाच्या विकासाच्या निर्णयात सहभाग घेणे ही त्यांची कार्यपद्धती होती.
सामाजिक कार्य : गोरगरीब कुटुंबांच्या आयुष्यात परिवर्तन
बापूंच्या संपूर्ण जीवनप्रवासातील सर्वांत महत्त्वाचा आणि भावनिक पैलू म्हणजे त्यांचे सामाजिक कार्य.
समाजातील गोरगरीब, आर्थिकदृष्ट्या दुर्बल आणि सर्वसामान्य कुटुंबांतील मुलांच्या भविष्याचा त्यांनी नेहमी विचार केला. एखाद्या घरातील मुलगा शिकून तयार झाला, पण आर्थिक परिस्थितीमुळे त्याला नोकरी मिळत नसेल, तर अशा तरुणाला योग्य मार्गदर्शन करून रोजगाराची संधी उपलब्ध करून देण्यासाठी ते प्रयत्नशील असत.
शैक्षणिक संस्थांमध्ये तसेच विविध खासगी आस्थापना, उद्योग आणि संस्थांमध्ये तरुणांना नोकरीच्या संधी मिळवून देण्यासाठी त्यांनी पुढाकार घेतला. अनेक तरुणांना त्यांच्या शैक्षणिक पात्रतेनुसार काम मिळवून देण्याचे प्रयत्न केले. त्यामुळे अनेक कुटुंबांना आर्थिक स्थैर्य मिळाले आणि त्यांच्या जीवनात सकारात्मक बदल घडला.
त्यांची भूमिका केवळ नोकरी मिळवून देण्यापुरती मर्यादित नव्हती. तरुणांना स्वतःच्या पायावर उभे राहता यावे, त्यांच्या कुटुंबाची परिस्थिती सुधारावी आणि पुढील पिढीचे भविष्य सुरक्षित व्हावे, ही त्यामागची भावना होती.
एका तरुणाला नोकरी मिळवून देणे म्हणजे एका संपूर्ण कुटुंबाला आर्थिक आधार देणे, एका घरात आनंद निर्माण करणे आणि एका कुटुंबाच्या भविष्याला दिशा देणे, ही त्यांची विचारसरणी होती.
आज अनेक कुटुंबे स्वावलंबी झाली आहेत. त्यांच्या घरातील चूल पेटती राहिली, मुलांचे शिक्षण सुरू राहिले आणि संसाराला आर्थिक आधार मिळाला. या सर्वांच्या आठवणींमध्ये बापूंच्या मदतीचा आणि मार्गदर्शनाचा वाटा कायम स्मरणात राहील.
सहकार क्षेत्रातील योगदान : एका रोपट्याचा वटवृक्ष
ग्रामीण भागाच्या आर्थिक विकासासाठी सहकार क्षेत्र किती महत्त्वाचे आहे, याची जाणीव बापूंना होती. याच विचारातून त्यांनी 1991मध्ये निंबळक येथे श्री संत ज्ञानेश्वर नागरी सहकारी पतसंस्थेची स्थापना केली.
गरजू नागरिकांना आर्थिक मदत, लघुउद्योजकांना प्रोत्साहन, सुशिक्षित बेरोजगारांना अर्थसहाय्य आणि बचतगटातील महिलांना व्यवसायासाठी संधी उपलब्ध करून देण्याचे काम संस्थेच्या माध्यमातून करण्यात आले.
आज या संस्थेने निंबळक येथील मुख्य कार्यालयासह फलटण येथे स्वमालकीच्या प्रशस्त इमारतीत कार्यालय सुरू केले असून पवारवाडी येथेही शाखा कार्यरत आहे.
एका छोट्याशा रोपट्याचे वटवृक्षात रूपांतर होणे ही बापूंच्या दूरदृष्टीची, कष्टाची आणि सहकारावरील विश्वासाची साक्ष आहे.
शैक्षणिक आणि सांस्कृतिक क्षेत्रातील योगदान
पूर्व फलटण भागातील शैक्षणिक, सामाजिक, कृषी, कला, साहित्य, योगाभ्यास आणि सांस्कृतिक क्षेत्राच्या विकासासाठी बापूंनी सातत्याने प्रयत्न केले.
शिक्षण हेच समाजपरिवर्तनाचे प्रभावी माध्यम आहे, या जाणिवेतून विद्यार्थ्यांना आणि शिक्षित तरुणांना योग्य संधी मिळावी यासाठी ते प्रयत्नशील असत. शिक्षण पूर्ण केलेल्या तरुणांना त्यांच्या पात्रतेनुसार शैक्षणिक संस्थांमध्ये तसेच खासगी क्षेत्रात रोजगार मिळवून देण्यासाठी त्यांनी केलेले प्रयत्न अनेकांच्या जीवनात महत्त्वपूर्ण ठरले.
जायंट्स ग्रुप ऑफ फलटणचे अध्यक्ष म्हणून त्यांनी सामाजिक उपक्रमांना चालना दिली. जायंट्स सहेली शाखेच्या स्थापनेतही त्यांचा पुढाकार होता.
माणसे जोडणारे व्यक्तिमत्त्व
बापूंच्या व्यक्तिमत्त्वातील आणखी एक महत्त्वाचा गुण म्हणजे माणसे जोडण्याची कला. युवकांपासून ज्येष्ठ नागरिकांपर्यंत प्रत्येकाशी आपुलकीने संवाद साधणे, मित्रत्वाचे संबंध जपणे आणि अडचणीच्या काळात मदतीला धावून जाणे ही त्यांची ओळख होती.
शांत, संयमी, नम्र आणि दूरदृष्टी असलेले नेतृत्व म्हणून त्यांनी निंबळक परिसरात विश्वासाचे नाते निर्माण केले. त्यांच्या शब्दाला मान होता आणि त्यांच्या मार्गदर्शनावर अनेकांचा विश्वास होता.
आमच्या जीवनातील मार्गदर्शक आणि आधारवड
माझे पती श्री. संदीप सावळा कांबळे आणि मला सार्वजनिक जीवनात काम करताना बापूंचे मोलाचे मार्गदर्शन लाभले. आज मी जिल्हा परिषद सदस्य म्हणून समाजातील विविध प्रश्नांवर काम करत असताना त्यांनी दिलेली शिकवण आणि जनसेवेचे संस्कार माझ्यासाठी दिशादर्शक ठरत आहेत.
आमच्या व्यक्तिगत तसेच सामाजिक आणि राजकीय जीवनात बापूंचे स्थान पितृतुल्य होते. त्यांनी दिलेला आधार, वेळोवेळी केलेले मार्गदर्शन आणि आमच्यावर दाखवलेला विश्वास आम्ही कधीही विसरू शकणार नाही.
माझ्यासारखी अनेक कुटुंबे आज प्रगतीच्या वाटेवर आहेत, त्यामागे बापूंनी दिलेली प्रेरणा, संधी आणि आधार आहे. त्यांच्या ऋणातून मुक्त होणे आम्हाला कधीही शक्य नाही.
जीवनप्रवासाचा शेवट; कार्याचा वारसा मात्र कायम
दि. 17 सप्टेंबर 1950 रोजी सुरू झालेला बापूंचा जीवनप्रवास 15 ऑक्टोबर 2025 त्यांच्या निधनाने संपला; मात्र त्यांनी निर्माण केलेली माणसे, उभ्या केलेल्या संस्था, रोजगाराच्या माध्यमातून सक्षम झालेली कुटुंबे आणि समाजासाठी केलेले कार्य आजही त्यांच्या अस्तित्वाची साक्ष देत आहे.
त्यांच्या प्रथम पुण्यस्मरणानिमित्त त्यांच्या कार्याचा विचार करताना एक गोष्ट प्रकर्षाने जाणवते की, माणसाचे आयुष्य किती वर्षांचे होते यापेक्षा त्या आयुष्यात त्याने किती माणसांच्या जीवनात आनंद निर्माण केला, किती कुटुंबांना आधार दिला आणि समाजासाठी काय योगदान दिले, हे अधिक महत्त्वाचे असते.
बापूंनी आपल्या आयुष्यात अनेकांना मदतीचा हात दिला. त्यांच्या मार्गदर्शनातून अनेक तरुणांना रोजगार मिळाला, अनेक कुटुंबे उभी राहिली आणि अनेकांना सामाजिक कार्याची प्रेरणा मिळाली.
आज बापू आपल्यात नाहीत, ही जाणीव मनाला वेदना देणारी असली तरी त्यांनी दिलेले संस्कार, त्यांनी जोडलेली माणसे आणि त्यांनी उभा केलेला जनसेवेचा वारसा सदैव जिवंत राहील.
बापू, तुम्ही केवळ निंबळक गावाचे नेतृत्व नव्हता, तर अनेक कुटुंबांच्या जीवनातील आशेचा किरण होता. तुमच्या कार्याचा सुगंध पिढ्यान्‌पिढ्या दरवळत राहील.
स्वर्गीय मोहनराव विठ्ठलराव नाईक निंबाळकर (बापू) यांच्या प्रथम पुण्यस्मरणानिमित्त विनम्र अभिवादन व भावपूर्ण श्रद्धांजली!

सातारा जिल्हा बँकेच्या निवडणुकीत मतदानाचा उच्चांक! जिल्ह्यात ९६.०९ टक्के मतदान; कोरेगावमध्ये शंभर टक्के प्रतिसाद!

0
सातारा जिल्हा बँकेच्या निवडणुकीत मतदानाचा उच्चांक! जिल्ह्यात ९६.०९ टक्के मतदान; कोरेगावमध्ये शंभर टक्के प्रतिसाद!

२,०२१ मतदारांपैकी १,९४२ मतदारांनी बजावला मतदानाचा हक्क; फलटणमध्ये ९५.८२ टक्के मतदान, जावळीमध्ये सर्वांत कमी प्रतिसाद; आता निकालाकडे जिल्ह्याचे लक्ष

सातारा | साहस Times  सातारा जिल्हा मध्यवर्ती सहकारी बँकेच्या संचालक मंडळाच्या निवडणुकीसाठी रविवारी (दि. १ नोव्हेंबर) पार पडलेल्या मतदानात मतदारांनी उत्स्फूर्त प्रतिसाद नोंदविला. जिल्ह्यातील एकूण २,०२१ मतदारांपैकी १,९४२ मतदारांनी आपला मतदानाचा हक्क बजावला. त्यामुळे जिल्ह्याची एकूण मतदानाची टक्केवारी ९६.०९ इतकी झाली आहे. सहकार क्षेत्रातील प्रतिष्ठेची मानली जाणारी ही निवडणूक अत्यंत चुरशीची ठरली असून, विक्रमी मतदानामुळे आता निकालाबाबत राजकीय आणि सहकार क्षेत्रात उत्सुकता निर्माण झाली आहे.

दुपारी ४ वाजेपर्यंतच्या अधिकृत आकडेवारीनुसार जिल्ह्यातील ११ मतदान केंद्रांवरील मतदानाची प्रक्रिया पूर्ण झाली. एकूण मतदानामध्ये १,७८६ पुरुष आणि १५६ महिला मतदारांनी सहभाग घेतला. एकूण मतदारांपैकी केवळ ७९ मतदारांनी मतदान केले नसल्याचे आकडेवारीवरून स्पष्ट होते. त्यामुळे जिल्ह्यातील मतदारांनी निवडणूक प्रक्रियेला मोठ्या प्रमाणात प्रतिसाद दिल्याचे दिसून येते.

कोरेगावमध्ये शंभर टक्के मतदान; वाईमध्येही मोठा प्रतिसाद!

मतदारसंघनिहाय मतदानाच्या आकडेवारीत कोरेगाव मतदारसंघाने विशेष लक्ष वेधून घेतले आहे. येथे पात्र सर्व मतदारांनी मतदानाचा हक्क बजावत शंभर टक्के मतदानाची नोंद केली. त्याखालोखाल वाई मतदारसंघात ९९.३० टक्के, खंडाळा येथे ९८.८६ टक्के, पाटण येथे ९८.४९ टक्के आणि कराड येथे ९७.९२ टक्के मतदान झाले.

फलटण मतदारसंघातही ९५.८२ टक्के मतदानाची नोंद झाली. येथील एकूण २६३ मतदारांपैकी २५२ मतदारांनी मतदान केले. यामध्ये ३४ महिला आणि २१८ पुरुष मतदारांचा समावेश आहे. फलटणमधील मतदानाची टक्केवारी जिल्ह्याच्या सरासरी मतदानाच्या तुलनेत किंचित कमी असली, तरी ९५ टक्क्यांहून अधिक मतदान झाल्याने मतदारांचा उत्स्फूर्त सहभाग दिसून आला.

जावळीमध्ये सर्वांत कमी मतदान; सातारा आणि इतर मतदारसंघांतही चांगला प्रतिसाद!

जिल्ह्यात सर्वाधिक मतदान कोरेगावमध्ये झाले असताना सर्वांत कमी मतदानाची नोंद जावळी मतदारसंघात झाली. येथे ८२.६१ टक्के मतदान झाले. महाबळेश्वरमध्ये ९०.२० टक्के, खटावमध्ये ९२.६७ टक्के, सातारा येथे ९५.१४ टक्के आणि माण मतदारसंघात ९५.९३ टक्के मतदान झाले.

या आकडेवारीवरून जिल्ह्यातील बहुतांश मतदारसंघांमध्ये ९० टक्क्यांपेक्षा अधिक मतदान झाल्याचे स्पष्ट होते. विशेषतः कोरेगाव, वाई, खंडाळा, पाटण आणि कराड या मतदारसंघांतील उच्च मतदानाची टक्केवारी निवडणुकीतील मतदारांचा सक्रिय सहभाग अधोरेखित करते.

९६ टक्क्यांहून अधिक मतदानामुळे निकालाची उत्सुकता वाढली!

सातारा जिल्हा मध्यवर्ती सहकारी बँक ही जिल्ह्याच्या सहकार क्षेत्रातील महत्त्वाची आर्थिक संस्था आहे. त्यामुळे या बँकेच्या संचालक मंडळाच्या निवडणुकीला केवळ सहकार क्षेत्रापुरते मर्यादित महत्त्व नसून जिल्ह्यातील राजकीय समीकरणांच्या दृष्टीनेही विशेष महत्त्व प्राप्त झाले आहे.

या निवडणुकीत झालेल्या ९६.०९ टक्के मतदानामुळे उमेदवारांचे राजकीय गणित, मतदारांचा कल आणि विविध गटांची ताकद याबाबत चर्चा सुरू झाली आहे. मात्र, केवळ मतदानाची टक्केवारी पाहून कोणत्या गटाला किंवा उमेदवाराला किती यश मिळेल, याचा निष्कर्ष काढणे योग्य ठरणार नाही. प्रत्यक्ष निकालानंतरच मतदारांनी कोणाच्या बाजूने कौल दिला आहे, हे स्पष्ट होणार आहे.

एकंदरीत, सातारा जिल्हा बँकेच्या निवडणुकीत झालेला विक्रमी मतदानाचा प्रतिसाद ही या निवडणुकीतील महत्त्वाची बाब ठरली आहे. आता सर्वांचे लक्ष मतमोजणी आणि अंतिम निकालाकडे लागले असून, जिल्हा बँकेच्या सत्तेची सूत्रे कोणाच्या हाती जाणार, याबाबत सहकार क्षेत्रासह संपूर्ण जिल्ह्यात उत्सुकता निर्माण झाली आहे.