जि. प प्राथमिक शाळा सासकल येथे प्रवेशोत्सव आनंदात साजरा

जि. प प्राथमिक शाळा सासकल येथे प्रवेशोत्सव आनंदात साजरा

फलटण : सासकल येथील जिल्हा परिषद प्राथमिक शाळेत नवीन शैक्षणिक वर्षानिमित्त प्रवेशोत्सव, नवागत विद्यार्थ्यांचे स्वागत तसेच पाठ्यपुस्तक व गणवेश वाटप सोहळा १५ जून रोजी उत्साहपूर्ण वातावरणात संपन्न झाला. शैक्षणिक गुढी उभारून आणि बैलगाडीतून मिरवणूक काढून नव्या विद्यार्थ्यांचे शाळेत जल्लोषात स्वागत करण्यात आले.

बैलगाडीतून विद्यार्थ्यांची मिरवणूक
पहिलीत नव्याने प्रवेश घेतलेल्या विद्यार्थ्यांची गावातून बैलगाडीतून मिरवणूक काढण्यात आली. विद्यार्थ्यांच्या शैक्षणिक प्रवासाची सुरुवात संस्मरणीय व्हावी यासाठी त्यांच्या पायांचे ठसे उमटवून शाळेत प्रवेश देण्यात आला. या आगळ्यावेगळ्या उपक्रमामुळे विद्यार्थी आणि पालकांमध्ये विशेष उत्साहाचे वातावरण निर्माण झाले.

शालेय साहित्याचे वाटप
स्वरा स्टील फर्निचर उद्योग समूहाचे लहूराजे सावंत यांच्या पुढाकारातून शाळेतील सर्व विद्यार्थ्यांना स्कूल बॅग आणि पाण्याच्या बाटल्यांचे वाटप करण्यात आले. याशिवाय शासनाच्या वतीने विद्यार्थ्यांना मोफत पाठ्यपुस्तके आणि गणवेश वितरित करण्यात आले.

मान्यवरांची उपस्थिती
या कार्यक्रमाला ग्रामपंचायत प्रशासक सोनाली मदने, शाळा व्यवस्थापन समितीच्या अध्यक्षा दीपाली निलेश चांगण तसेच लहूराजे सावंत यांची प्रमुख उपस्थिती लाभली. यावेळी ग्रामपंचायत सदस्य हणमंत मुळीक, मंगेश मदने, सुधीर सोपान मुळीक, सोपान मुळीक, शंकर मुळीक, मोहन मुळीक, दिनेश मुळीक,उपाध्यक्ष, सदस्य निकिता घोरपडे, मुख्याध्यापक अरुण कांबळे,  संध्याकाळी जगदाळे यांच्यासह गावातील महिला व ग्रामस्थ मोठ्या संख्येने उपस्थित होते.

नवीन शैक्षणिक वर्षाची सुरुवात विद्यार्थ्यांसाठी आनंददायी, प्रेरणादायी आणि संस्मरणीय ठरावी या उद्देशाने आयोजित करण्यात आलेल्या या प्रवेशोत्सवाने शाळा, पालक आणि ग्रामस्थ यांच्यातील स्नेहबंध अधिक दृढ झाल्याचे दिसून आले.