फलटणमध्ये ब्राह्मण गल्लीतील पाईपलाईन व सिमेंट रस्त्याच्या कामाला सुरुवात; विकासकामात अडथळे

फलटणमध्ये ब्राह्मण गल्लीतील पाईपलाईन व सिमेंट रस्त्याच्या कामाला सुरुवात; विकासकामात अडथळे आणणाऱ्यांना नगरसेविका सिद्धाली शहा यांचा इशारा
फलटण : फलटण शहरातील ब्राह्मण गल्ली परिसरात सार्वजनिक पाण्याची टाकी (हौद) ते एरंडे घराच्या बाजूने नवीन पाण्याची पाईपलाईन टाकण्याचे तसेच सिमेंट काँक्रीट रस्ता करण्याचे महत्त्वपूर्ण विकासकाम नगरसेविका कु. सिद्धाली अनुप शहा यांच्या विशेष प्रयत्नातून मंजूर करण्यात आले असून प्रत्यक्ष कामाला सुरुवात झाली आहे.
या भागातील नागरिकांना नियमित आणि मुबलक पाणीपुरवठा मिळावा तसेच रस्त्याची समस्या कायमस्वरूपी मार्गी लागावी, या उद्देशाने हे काम हाती घेण्यात आल्याची माहिती देण्यात आली आहे. मात्र, नागरिकांच्या हिताचे असलेल्या या लोकोपयोगी कामात काही विघ्नसंतोषी प्रवृत्तींकडून जाणीवपूर्वक अडथळे निर्माण केले जात असल्याचा गंभीर आरोप नगरसेविका सिद्धाली शहा यांनी केला आहे.
या संदर्भात प्रसिद्धीपत्रकाद्वारे बोलताना माजी नगरसेवक अनुप शहा यांनी सांगितले की, काही स्वयंघोषित समाजसेवक आणि पगारदार कार्यकर्ते राजकीय हेतू डोळ्यासमोर ठेवून विकासकामात अडथळे आणण्याचा प्रयत्न करत आहेत. “नागरिकांच्या मूलभूत सुविधांसाठी सुरू असलेल्या विकासकामांत राजकारण आणणे अत्यंत दुर्दैवी आहे. जनतेच्या हिताच्या कामात अडथळे निर्माण करणाऱ्यांचा डाव कोणत्याही परिस्थितीत यशस्वी होऊ दिला जाणार नाही,” असा स्पष्ट इशारा त्यांनी दिला.
तसेच, नागरिकांच्या आग्रही मागणीनुसार हे काम पूर्णत्वास नेले जाईल, असा विश्वास व्यक्त करताना त्यांनी सांगितले की, फलटणचे लोकनियुक्त नगराध्यक्ष समशेरसिंह नाईक-निंबाळकर यांच्या नेतृत्वाखाली तसेच पाणीपुरवठा समितीचे सभापती राहुल निंबाळकर यांच्या सहकार्याने हे प्रलंबित काम यशस्वीरीत्या पूर्ण करण्यात येईल.
शहर आणि प्रभागाच्या विकासाशी कोणतीही तडजोड केली जाणार नसून, यापुढे विकासकामात अडथळे निर्माण करणाऱ्यांना ‘जशास तसे’ उत्तर दिले जाईल, असा खणखणीत इशाराही नगरसेविका कु. सिद्धाली अनुप शहा आणि माजी नगरसेवक अनुप शहा यांनी दिला आहे.
दरम्यान, या विकासकामामुळे परिसरातील नागरिकांमध्ये समाधानाचे वातावरण निर्माण झाले असून अनेक नागरिकांनी या कामाचे स्वागत केले असल्याची माहिती माजी नगरसेवक अनुप शहा यांनी दिली.

फलटण :- फलटणमध्ये मान्सूनपूर्व नालेसफाईला वेग; नगराध्यक्ष समशेरसिंह नाईक निंबाळकर यांची भर उन्हात पाहणी
फलटण शहरात मान्सूनपूर्व नालेसफाईच्या कामांना वेग आला असून, नगराध्यक्ष समशेरसिंह नाईक निंबाळकर यांनी स्वतः भर उन्हात विविध भागांची पाहणी करून कामांचा आढावा घेतला. शहरातील मारवाड पेठ आणि दगडी पूल परिसरात सुरू असलेल्या नाला स्वच्छता मोहिमेची त्यांनी प्रत्यक्ष भेट देऊन तपासणी केली.
गेल्या काही दिवसांपासून वाढलेल्या उकाड्यानंतर फलटणकर नागरिक आता मान्सूनच्या प्रतीक्षेत आहेत. दरवर्षी पावसाळ्यात नाल्यांमध्ये साचलेल्या घाणीमुळे दुर्गंधी आणि सांडपाण्याच्या समस्या निर्माण होतात. या पार्श्वभूमीवर फलटण नगरपरिषदेकडून पावसाळ्यापूर्वीच नालेसफाई मोहीम हाती घेण्यात आली आहे. विशेष म्हणजे नगराध्यक्ष समशेरसिंह नाईक निंबाळकर हे स्वतः रस्त्यावर उतरून कामांची पाहणी करत असल्याने नागरिकांमध्ये समाधानाचे वातावरण आहे.
यावेळी माजी नगरसेवक अनुप शहा यांनी नगराध्यक्षांच्या कार्यपद्धतीचे कौतुक केले. “पूर्वीचे सत्ताधारी नागरिकांच्या मूलभूत प्रश्नांकडे दुर्लक्ष करत होते. मात्र विद्यमान नगराध्यक्षांना जनतेच्या अडचणींची जाणीव असून ते स्वतः उन्हाची पर्वा न करता कामांची बारकाईने पाहणी करत आहेत,” असे अनुप शहा यांनी सांगितले.
नगराध्यक्षांनी प्रभाग क्रमांक ८ आणि १२ मधील नालेसफाईच्या कामांचा आढावा घेत संबंधित कर्मचाऱ्यांना आवश्यक सूचना दिल्या. शनिवार-रविवारची सुट्टी असतानाही त्यांनी दुपारच्या वेळेत प्रत्यक्ष भेट देत स्वच्छता मोहिमेवर लक्ष केंद्रित केले. त्यांच्या या कार्यतत्परतेमुळे स्थानिक नागरिकांनी समाधान व्यक्त केले आहे.
या पाहणी दौऱ्यावेळी नगरसेविका कु. सिद्धाली अनुप शहा तसेच परिसरातील नागरिक मोठ्या संख्येने उपस्थित होते.