फलटण : छत्रपती संभाजी महाराज यांच्या विषयी भावना दुखावणारी ऑडिओ क्लिप आणि सोशल मीडियावरील पोस्ट व्हायरल झाल्यानंतर फलटण शहरात तीव्र प्रतिक्रिया उमटल्या आहेत. या प्रकरणी संबंधित आरोपीविरुद्ध गुन्हा दाखल करण्यात आला असून त्याचा शोध सुरू असल्याची माहिती पोलीस उपविभागीय अधिकारी विशाल खांबे यांनी दिली.
या पार्श्वभूमीवर फलटणचे तहसीलदार डॉ. अभिजित जाधव यांच्या अध्यक्षतेखाली तहसील कार्यालयात शांतता समितीची बैठक आयोजित करण्यात आली होती. बैठकीस शहरातील पदाधिकारी, आजी-माजी नगरसेवक, सामाजिक कार्यकर्ते तसेच शांतता समिती सदस्य उपस्थित होते.
डीवायएसपी विशाल खांबे यांनी सांगितले की, संबंधित ऑडिओ क्लिप आणि पोस्ट व्हायरल झाल्यानंतर नागरिकांच्या भावना दुखावल्या गेल्या असून अनेक नागरिकांनी फलटण शहर पोलीस ठाण्यात धाव घेतली. पोलिसांनी तत्काळ परिस्थितीचा आढावा घेत आरोपीविरुद्ध गुन्हा दाखल केला आहे.
तसेच दोन समाजांमध्ये द्वेष निर्माण करण्याचा प्रयत्न करणाऱ्या समाजकंटकांविरुद्ध कठोर कायदेशीर कारवाई करण्यात येईल, असा इशाराही त्यांनी दिला. नागरिकांनी अफवांवर विश्वास न ठेवता शांतता व संयम राखून पोलिस प्रशासनाला सहकार्य करावे, असे आवाहनही यावेळी करण्यात आले.
फलटणमध्ये शांतता राखण्याचे आवाहन; समाजकंटकांवर कठोर कारवाईचा इशारा
