श्रीराम सहकारी साखर कारखान्याची उद्या विशेष सर्वसाधारण सभा; भागीदारी करार रद्द व EOI प्रक्रियेवर महत्त्वपूर्ण निर्णय अपेक्षित
फलटण :- श्रीराम सहकारी साखर कारखान्याची उद्या विशेष सर्वसाधारण सभा; भागीदारी करार रद्द व EOI प्रक्रियेवर महत्त्वपूर्ण निर्णय अपेक्षित
श्रीराम सहकारी साखर कारखान्याच्या वतीने विशेष सर्वसाधारण सभेची नोटीस जाहीर करण्यात आली असून ही सभा सोमवार, दि. १८ मे २०२६ रोजी दुपारी १ वाजता आयोजित करण्यात आली आहे. कारखान्याचे चेअरमन मा. डॉ. बाळासाहेब शेंडे यांच्या अध्यक्षतेखाली ही सभा पार पडणार असल्याची माहिती प्रशासनाने दिली आहे.
सभेत हातकणंगले, जि. कोल्हापूर येथील कल्लाप्पाणा आवाडे जवाहर शेतकरी सहकारी साखर कारखाना लिमिटेड यांच्यासोबत दि. १ मार्च २०२२ रोजी करण्यात आलेल्या भागीदारी कराराच्या रद्दबातल करण्याबाबत सविस्तर चर्चा होणार असून त्यावर अंतिम निर्णय घेतला जाणार आहे.
याशिवाय महाराष्ट्र शासनाच्या दि. ८ जानेवारी २०२० रोजीच्या शासन निर्णयानुसार ‘Expression of Interest (EOI)’ प्रक्रियेद्वारे कारखाना, अर्कशाळा तसेच देशी-विदेशी मद्य विभाग सहकारी अथवा खासगी तत्वावर चालविण्याच्या प्रस्तावावरही सभेत निर्णय होणार असल्याचे नोटिशीत नमूद करण्यात आले आहे.
कारखान्याचे कार्यकारी संचालक चंद्रकांत तळेकर यांनी सर्व सभासदांना सभेस उपस्थित राहण्याचे आवाहन केले आहे. सभासद असलेल्या प्रत्येक सहकारी संस्थेने आपल्या अधिकृत प्रतिनिधीचे नाव पंचकमिटीकडे लेखी स्वरूपात दि. १५ मे २०२६ पर्यंत सादर करण्याच्या सूचना देण्यात आल्या होत्या.
दरम्यान, ही विशेष सभा केवळ सभासदांसाठी मर्यादित ठेवण्यात आली असून सभासदांव्यतिरिक्त इतर कोणालाही प्रवेश दिला जाणार नसल्याचे प्रशासनाने स्पष्ट केले आहे. सभास्थळी कायदा व सुव्यवस्था अबाधित राहावी यासाठी पोलीस प्रशासनाकडे बंदोबस्ताची मागणी करण्यात आली असून संबंधित पत्रही देण्यात आले आहे. विनापरवाना प्रवेश करण्याचा प्रयत्न करणाऱ्यांवर कायदेशीर कारवाई करण्यात येईल, असा इशाराही प्रशासनाने दिला आहे.
विशेष सूचनेनुसार, गणपूर्ती अभावी सभा तहकूब झाल्यास त्याच दिवशी अर्ध्या तासाने त्याच ठिकाणी सभा पुन्हा घेण्यात येणार असून त्यावेळी गणपूर्तीची आवश्यकता राहणार नसल्याचेही नोटिशीत स्पष्ट करण्यात आले आहे.
