मुंबई | – राष्ट्रवादी काँग्रेस पक्षाच्या आमदारांची साप्ताहिक बैठक 28 जानेवारी रोजी देवगिरी येथे उपमुख्यमंत्री अजित पवार यांच्या प्रमुख उपस्थितीत पार पडली. यावेळी पक्षाचे राष्ट्रीय कार्याध्यक्ष खासदार प्रफुल्ल पटेल, प्रदेशाध्यक्ष खासदार सुनील तटकरे, मंत्री हसन मुश्रीफ, तसेच महाराष्ट्र विधान परिषदेचे माजी सभापती तथा आमदार श्रीमंत रामराजे नाईक निंबाळकर यांच्यासह अनेक ज्येष्ठ नेते उपस्थित होते.
या बैठकीत अजित पवार यांनी प्रत्येक आमदारांच्या मतदारसंघातील विकासकामांचा आढावा घेतला. स्थानिक पातळीवरील समस्या आणि अडीअडचणी समजून घेत तातडीने उपाययोजना करण्याचे निर्देश संबंधित मंत्र्यांना दिले.
बैठकीतील एक महत्त्वाचा क्षण म्हणजे माजी सभापती श्रीमंत रामराजे निंबाळकर यांची उपस्थिती. विशेष म्हणजे, ते पक्षाच्या प्रदेशाध्यक्ष खासदार सुनील तटकरे यांच्या शेजारील आसनावर होते. या उपस्थितीमुळे सातारा जिल्ह्यात, विशेषतः फलटण तालुक्यात राजकीय चर्चांना उधाण आले आहे. काही दिवसांपूर्वी, रामराजेंच्या राजकीय भूमिकेबाबत अनेक तर्कवितर्क लावले जात होते. या बैठकीतील त्यांची भूमिका पाहता, आगामी काळात ते राष्ट्रवादीत अधिक सक्रिय होतील का, याबाबत चर्चा सुरू झाली आहे.
सध्याच्या राजकीय घडामोडींमध्ये रामराजेंच्या राष्ट्रवादीतील स्थानाबाबत निश्चितता नसल्याने त्यांच्या प्रत्येक हालचालीकडे राजकीय वर्तुळाचे लक्ष आहे. आगामी विधानसभा निवडणुकीच्या पार्श्वभूमीवर त्यांच्या निर्णयाकडे अनेकांचे डोळे लागले आहेत.
