फलटण प्रतिनिधी .: फलटण येथील नगरपरिषदेमधील कारभार सध्या तीव्र चर्चेचा विषय ठरत आहे. सत्ताधारी गटातील माजी नगरसेवक तथा विद्यमान नगरसेवकाच्या वडिलांनीच नगरपरिषदेच्या कामकाजाविरोधात उपोषणाचा इशारा दिल्याने प्रशासनाच्या कार्यक्षमतेवर गंभीर प्रश्न उपस्थित झाले आहेत.
अनुप शहा यांनी आज फलटण नगरपरिषद येथे उपोषणाचे पत्र सादर करत नगरपरिषदेच्या ढिसाळ, बेजबाबदार आणि मनमानी कारभारावर तीव्र नाराजी व्यक्त केली. सत्ताधारी गटाशी संबंधित व्यक्तीलाच असा इशारा द्यावा लागत असल्याने, नगरपरिषदेतील अंतर्गत विसंवाद आणि प्रशासकीय अकार्यक्षमता उघड झाली आहे.
स्थानिक पातळीवर चर्चा अशी की, ज्या ठिकाणी सत्ताधाऱ्यांचीच कामे प्रलंबित राहतात, तेथे सर्वसामान्य नागरिकांच्या तक्रारी आणि फाईलींचे काय होत असेल? विकासाच्या घोषणा आणि स्मार्ट शहराच्या दाव्यांमध्ये व वास्तवातील कामकाजात मोठी तफावत असल्याचे नागरिकांचे मत आहे.
ही घटना केवळ वैयक्तिक नाराजीपुरती मर्यादित नसून, नगरपरिषदेतील गटबाजी, सत्तासंघर्ष आणि प्रशासनातील शिथिलतेचे द्योतक मानली जात आहे. उपोषणाचा इशारा दिल्यानंतर राजकीय वर्तुळातही खळबळ उडाली असून, प्रशासनाने याची गंभीर दखल घ्यावी अशी मागणी होत आहे.
सध्या उपोषणाचा इशारा देण्यात आला असून, मागण्यांकडे दुर्लक्ष झाल्यास पुढील काळात आंदोलन तीव्र होण्याची शक्यता नाकारता येत नाही. त्यामुळे सत्ताधाऱ्यांनी आत्मपरीक्षण करून प्रलंबित प्रश्नांवर तातडीने कार्यवाही करणे गरजेचे असल्याचे मत व्यक्त होत आहे.

फलटण (जि. सातारा) – शहरात गेल्या अनेक दिवसांपासून बुलेट मोटारसायकलींच्या कर्कश ‘फट-फट’ आवाजामुळे नागरिक त्रस्त झाले होते. विशेषतः सायंकाळी व रात्रीच्या वेळी जोरदार सायलेन्सर बदलून ध्वनीप्रदूषण करणाऱ्या वाहनचालकांमुळे ज्येष्ठ नागरिक, महिला आणि लहान मुलांमध्ये भीतीचे वातावरण निर्माण झाले होते.
याशिवाय काही दुचाकी वाहने बिना नंबर प्लेट फिरत असल्याने चोरीच्या घटनांमध्ये वाढ होण्याची शक्यता व्यक्त केली जात होती. या पार्श्वभूमीवर फलटण पोलिसांनी अखेर ऍक्शन मोड स्वीकारत अशा वाहनांवर थेट जप्तीची कारवाई सुरू केली आहे.
 आरटीओ तपासणी व जप्तीची मागणी
पोलिसांकडून जप्त करण्यात आलेली वाहने प्रादेशिक परिवहन कार्यालयाकडे (RTO) तपासणीसाठी पाठविण्याची प्रक्रिया सुरू असून, नियमबाह्य सायलेन्सर, ध्वनीप्रदूषण आणि नंबर प्लेट नसलेल्या वाहनांवर कडक दंडात्मक कारवाई केली जाणार आहे. नागरिकांनीही या कारवाईचे स्वागत करत, “शहरातील शांतता राखण्यासाठी ही मोहीम सातत्याने राबवावी,” अशी मागणी केली आहे.
 ‘दबाव टाकण्याचा’ प्रयत्न?
दरम्यान, एका स्थानिक नगरसेवकाने पोलिस अधिकाऱ्यांना फोन करून “बुलेट तसेच बिना नंबर प्लेटची वाहने सोडून द्या” असा दबाव टाकण्याचा प्रयत्न केल्याची चर्चा शहरात रंगली आहे. संबंधित व्यक्ती स्वतःला मोठा नेता असल्याचा आव आणत असल्याचे बोलले जात आहे.
मात्र, पोलिस प्रशासनाने स्पष्ट केले आहे की कायद्यापुढे सर्व समान आहेत आणि कोणाच्याही दबावाला बळी न पडता नियमबाह्य वाहनांवर कारवाई सुरूच राहील.
सूत्रांच्या माहितीनुसार, जर कारवाई थांबविण्यासाठी कोणताही राजकीय दबाव आणला गेला, तर संबंधिताचे नाव व त्यांचे उद्योग पत्रकारांमार्फत उघड केले जाणार असल्याचीही चर्चा आहे.
नागरिकांना दिलासा
पोलिसांच्या या मोहिमेमुळे शहरातील नागरिकांना मोठा दिलासा मिळाला असून, “बिना नंबर प्लेट आणि कर्कश आवाजाच्या बुलेटला आता निश्चितच चाप बसणार,” असा विश्वास व्यक्त केला जात आहे.
फलटणमध्ये कायदा व सुव्यवस्था अबाधित राखण्यासाठी प्रशासनाने ही कारवाई सातत्याने ठेवावी, अशी सर्वसामान्यांची अपेक्षा आहे.

फलटण | प्रतिनिधी :- फलटण शहर व परिसरात वाढत्या चोरी, जबरी गुन्हे, मारहाण तसेच रोडरोमिओंच्या वाढत्या प्रकारांविरोधात फलटण व्यापारी संघटना आक्रमक झाली आहे. शहरातील कायदा व सुव्यवस्था बिघडत असल्याच्या पार्श्वभूमीवर व्यापाऱ्यांनी मोठ्या संख्येने फलटण शहर पोलीस स्टेशन येथे उपस्थित राहून निषेध नोंदवला. संघटनेच्या वतीने पोलीस प्रशासनाला सविस्तर निवेदन देत तात्काळ व कायमस्वरूपी उपाययोजना करण्याची मागणी करण्यात आली.
सलग घटनांनी व्यापारी वर्ग संतप्त
रविवार, दि. २२ फेब्रुवारी २०२६ रोजी शंकर मार्केट परिसरात हीरणवाळे बंधूंवर झालेल्या मारहाणीच्या घटनेने व्यापाऱ्यांमध्ये संतापाची लाट उसळली. त्यानंतर मंगळवार, दि. २४ फेब्रुवारी २०२६ रोजी रविवार पेठ येथील हिंदुस्तान हार्डवेअरचे व्यापारी श्री. पटेल बंधूंना दहशत निर्माण करून मारहाण करण्यात आल्याची घटना घडली.
या सलग प्रकारांमुळे शहरातील व्यापारी तसेच नागरिकांमध्ये भीतीचे वातावरण पसरले असून, सुरक्षिततेबाबत गंभीर प्रश्न निर्माण झाले आहेत.
निवेदनातील प्रमुख मागण्या
२५ फेब्रुवारी २०२६ रोजी सादर करण्यात आलेल्या निवेदनात पुढील मुद्द्यांवर भर देण्यात आला आहे :
शहर व परिसरात चोरीच्या घटनांमध्ये लक्षणीय वाढ
जबरी गुन्हे व मारहाणीचे वाढते प्रकार
महिला व नागरिकांना रोडरोमिओंकडून होणारा त्रास
गस्त पथक प्रभावीपणे कार्यरत नसल्याची तक्रार
व्यापारी व नागरिकांमध्ये वाढलेली असुरक्षिततेची भावना
शहरात कायमस्वरूपी पोलीस बंदोबस्ताची मागणी
निवेदनात नमूद करण्यात आले आहे की, व्यापारी वर्ग प्रामाणिकपणे व्यवसाय करून शासनाला कररूपाने मोठे योगदान देतो. अशा परिस्थितीत सुरक्षित वातावरण उपलब्ध करून देणे ही प्रशासनाची नैतिक जबाबदारी आहे.
वरिष्ठ स्तरावर पाठपुरावा
या निवेदनाची प्रत राज्यातील वरिष्ठ मान्यवर व अधिकाऱ्यांनाही पाठविण्यात आली आहे. या प्रकरणाची उच्च पातळीवर दखल घेऊन ठोस कारवाई व्हावी, अशी अपेक्षा संघटनेने व्यक्त केली आहे.
शांततापूर्ण पण ठाम भूमिका
पोलीस ठाण्याबाहेर मोठ्या संख्येने व्यापारी उपस्थित होते. सर्वांनी शांततेच्या मार्गाने निषेध नोंदवत प्रशासनाकडून सकारात्मक प्रतिसादाची अपेक्षा व्यक्त केली.
दरम्यान, पोलीस प्रशासनाने घटनांचा गांभीर्याने तपास सुरू असून शहरात गस्त वाढविण्यात येईल, असे आश्वासन दिल्याची माहिती समजते.
थोडक्यात
फलटण शहरातील वाढत्या गुन्हेगारी घटनांमुळे व्यापारी वर्गात अस्वस्थता निर्माण झाली आहे. व्यापारी संघटनेच्या एकजुटीमुळे हा प्रश्न आता ऐरणीवर आला असून, चोरी, मारहाण व रोडरोमिओंच्या प्रकारांवर तात्काळ अंकुश न लावल्यास परिस्थिती गंभीर होऊ शकते, असा इशारा देण्यात आला आहे. प्रशासनाने तातडीने ठोस पावले उचलावीत, अशी सर्वसामान्यांची अपेक्षा आहे.

फलटण | प्रतिनिधी :-  फलटण शहरात अलीकडील काळात घडलेल्या दोन मारहाणीच्या घटनांमुळे व्यापारी वर्गात तीव्र संताप आणि भीतीचे वातावरण निर्माण झाले आहे. या पार्श्वभूमीवर फलटण व्यापारी संघटना यांच्या वतीने बुधवार, दि. २५ फेब्रुवारी २०२६ रोजी सकाळी १० वाजता फलटण शहर पोलीस स्टेशन येथे जाऊन निवेदन देण्याचे आवाहन करण्यात आले आहे.
रविवार, दि. २२ फेब्रुवारी २०२६ रोजी शंकर मार्केट परिसरात हीरणवाळे बंधूंवर मारहाण झाल्याची घटना घडली. या घटनेनंतर व्यापारी वर्गात अस्वस्थता पसरली असतानाच मंगळवार, दि. २४ फेब्रुवारी २०२६ रोजी रविवार पेठ येथील हिंदुस्तान हार्डवेअरचे व्यापारी श्री. पटेल बंधूंना विनाकारण दहशत निर्माण करून मारहाण करण्यात आल्याची दुसरी घटना घडली. सलग दोन दिवसांत घडलेल्या या प्रकारांमुळे शहरातील व्यापाऱ्यांमध्ये भीतीचे वातावरण निर्माण झाले आहे.
या घटनांचा निषेध नोंदवून भविष्यात अशा प्रकारांना आळा बसावा, संबंधितांवर कडक कारवाई व्हावी आणि शहरात सुरक्षित व निर्भय व्यावसायिक वातावरण निर्माण व्हावे, या मागण्यांसाठी व्यापारी संघटनेने एकत्र येण्याचे आवाहन केले आहे.
सर्व व्यापारी बांधवांनी बुधवार, दि. २५ फेब्रुवारी रोजी सकाळी १० वाजता फलटण शहर पोलीस स्टेशन येथे मोठ्या संख्येने उपस्थित राहून एकजूट दाखवावी व पोलीस प्रशासनाला निवेदन सादर करावे, अशी नम्र विनंती संघटनेतर्फे करण्यात आली आहे.

फलटण प्रतिनिधी :- फलटण शहरातील गजबजलेल्या शंकर मार्केट परिसरात वेगात गाडी चालवू नका, अशी समज दिल्याच्या किरकोळ कारणावरून दोन भावांवर सत्तूर व लाकडी दांडक्याने जीवघेणा हल्ला केल्याची धक्कादायक घटना घडली आहे. या प्रकरणी फलटण शहर पोलिसांनी दोन संशयित आरोपींना अटक केली असून न्यायालयाने त्यांना 26 फेब्रुवारी 2026 पर्यंत पोलीस कोठडी सुनावली आहे.
थरारक घटना कशी घडली?
दि. 22 फेब्रुवारी रोजी रात्री सुमारे 9.30 वाजण्याच्या सुमारास अनिल विठ्ठल हिरणवाळे हे आपले गॅरेज बंद करून बाहेर उभे होते. त्यावेळी गोसावी वस्तीतून आलेल्या 7 ते 8 तरुणांनी त्यांच्या गॅरेजसमोरून मोठ्या आवाजात आणि वेगात दुचाकी चालवल्या.
कोणाला अपघात होऊ नये या उद्देशाने अनिल यांनी संबंधित तरुणांना, “गाडी इतक्या वेगात व आवाजात का चालवता? कोणाला धडक लागली तर मोठा अपघात होईल,” अशी समज दिली.
या समजुतीचा राग मनात धरून काही वेळाने तेच टोळके पुन्हा तेथे आले. त्यांनी अनिल हिरणवाळे आणि त्यांचे भाऊ संतोष हिरणवाळे (रा. ब्राम्हण गल्ली, फलटण) यांच्यावर लाकडी दांडके, हाताने मारहाण करत लोखंडी सत्तूरने सपासप वार केले. या हल्ल्यात दोन्ही भाऊ गंभीर जखमी झाले असून ते रक्ताच्या थारोळ्यात कोसळले. हल्लेखोर त्यानंतर घटनास्थळावरून फरार झाले.
शहरात संतापाची लाट
घटनेनंतर संपूर्ण फलटण शहरात संताप व्यक्त करण्यात आला. सर्वपक्षीय नेते व विविध सामाजिक मंडळांनी पोलीस निरीक्षक अरविंद काळे यांची भेट घेऊन गुन्हेगारांना तातडीने अटक करून कठोर कारवाई करण्याची मागणी केली होती.
दोन आरोपींना अटक
घटनेचे गांभीर्य लक्षात घेऊन पोलिसांनी तत्काळ तपास सुरू केला. त्यात खालील दोन संशयितांना अटक करण्यात आली आहे –
संदीप विठ्ठल जाधव (वय 20, रा. स्वामी समर्थ मंदिराजवळ, मलठण, ता. फलटण)
सुनिल ऊर्फ सतिश राजू मोरे (वय 20, रा. कुंभारभट्टी, मलठण, ता. फलटण)
अटक करण्यात आलेल्या दोन्ही आरोपींना दि. 24 फेब्रुवारी रोजी फलटण येथील प्रथम वर्ग न्यायदंडाधिकारी न्यायालयात हजर करण्यात आले. न्यायालयाने गुन्ह्याचे गांभीर्य लक्षात घेऊन त्यांना 26 फेब्रुवारी 2026 पर्यंत पोलीस कोठडी (PC) मंजूर केली आहे.
पुढील तपास सुरू
या प्रकरणातील इतर काही संशयित आरोपी अद्याप फरार असून फलटण शहर पोलीस त्यांचा शोध घेत आहेत. या गुन्ह्याचा पुढील तपास पोलीस उपनिरीक्षक दिनेश शिंदे करीत आहेत.

बौध्द धम्माच्या प्रचार-प्रसारासाठी संघटित प्रयत्नांची गरज : डॉ. भीमराव यशवंतराव आंबेडकर

सातारा, दि.२४ : १४ ऑक्टोबर १९५६ रोजी धम्मक्रांती झाली. दुसऱ्या दिवशी डॉ. बाबासाहेब आंबेडकर यांनी अनुयायांना मार्गदर्शन केले. तदनंतर पत्रकार परिषदेत पत्रकारांनी विचारलेल्या प्रश्नांना सडेतोड उत्तरे देत, “यापुढे उर्वरित आयुष्य धम्म परिवर्तनासाठी समर्पित करणार आहे,” असा दाखला त्यांनी दिला.
भारतीय बौद्ध महासभेतर्फे, राष्ट्रीय कार्याध्यक्ष तथा समता सैनिक दल प्रमुख डॉ. भीमराव यशवंतराव आंबेडकर यांच्या प्रमुख मार्गदर्शनाखाली नगरपंचायत मैदान, पाटण येथे पाटण तालुका महिला व पुरुष कार्यकारिणीच्यावतीने भव्य धम्म परिषदेचे आयोजन करण्यात आले होते. अध्यक्षस्थानी तालुकाध्यक्ष आनंदा गुजर होते.
डॉ. भीमराव यशवंतराव आंबेडकर म्हणाले, “बाबासाहेबांनी दिलेली धम्मक्रांती देशात उत्साहवर्धक अनुयायी पुढे घेऊन चालले आहेत. अनेक लोक धम्मात येत आहेत. वारंवार शिबिरे झाली पाहिजेत. प्रशिक्षणाच्या माध्यमातूनच धम्म चळवळ वाढणार आहे. उत्तरप्रदेशमध्ये ७५ जिल्ह्यांत चार राज्य निर्माण झाल्याने धम्मचळवळ गतिमान होत आहे. सत्ताधारी आंबेडकरवाद्यांना त्रास देण्याचा प्रयत्न करीत आहेत. जगविख्यात महाविहार लढ्यासाठी एक वर्ष झाले तरी यश मिळाले नाही. विविध मोर्चे, आंदोलने झाली. देश संविधानावर विज्ञानवादी आहे. स्वातंत्र्यामध्ये भाग न घेणारे आरएसएस शंभरावा उत्सव प्रयागराजमध्ये करतात. मात्र, त्यांनी भेदाभेद केलेला आढळतो. तिथेही योगी सरकार विरोधात धम्माचे काम सुरू आहे. इप्सित साध्य करण्यासाठी प्रत्येक ठिकाणी संघर्ष करावा लागेल. सन २००० पासून देशात क्रांती सुरू झाली आहे. शिक्षण महत्त्वपूर्ण काम करते. पिढ्यांचे भवितव्य घडविण्यासाठी संघटित राहून वाटचाल करावी लागेल. भारतीय बौद्ध महासभेची ताकद वाढत आहे. धम्माची पताका सर्वत्र फडकत आहे. धम्मच राजकीय चित्र बदलू शकतो. शस्त्राने भूभाग जिंकणारा महान राजा सम्राट अशोक शेवटी बुद्धांच्या चरणी लीन झाला. त्यांचीही प्रतिमा महापुरुषांबरोबर कार्यक्रमात असली पाहिजे.”
यावेळी महाराष्ट्र राज्य अध्यक्ष यु. जी. बोराडे, ट्रस्टी अरुण पोळ व तालुकाध्यक्ष आनंदा गुजर यांनी मनोगत व्यक्त केले.
वंदना, सूत्रपठण व ध्वजारोहण माजी जिल्हा उपाध्यक्ष आबासाहेब भोळे यांच्या हस्ते संपन्न झाले. धम्म रॅली बोधिसत्व बुद्ध विहारपासून निघाली होती. तिचा मार्ग बाळासाहेब देसाई कॉलेज मैदान – पाटणकर लायब्ररी चौक – मेन रोड – झेंडा चौक – नगरपंचायत असा होता. तालुकाध्यक्षा कमलताई मिलिंद-बापू कांबळे यांनी प्रास्ताविक केले. मुंबई कमिटीचे अध्यक्ष भगवान भोळे यांनी स्वागत केले. सचिव घनश्याम कांबळे व सुरेखाताई गायकवाड यांनी सूत्रसंचालन केले. तालुका कोषाध्यक्ष ॲड. राहुल भोळे यांनी आभार मानले.
सदर कार्यक्रमास मुंबई प्रदेश कोषाध्यक्ष राजेंद्र सत्वधीर, जिल्हाध्यक्षा संगीताताई मंगेश डावरे, जिल्हा पर्यटन उपाध्यक्ष सुनील सपकाळ, राज्य उपाध्यक्ष उत्तम मगरे, मुंबई प्रदेश पर्यटन सचिव शहाजी मगरे, जिल्हा सरचिटणीस नेहाताई विजयकुमार गायकवाड, कराड तालुकाध्यक्ष यशवंत (आप्पा) अडसुळे, माजी केंद्रीय महासचिव नाथा ममता आगाणे (काका), जिल्हाध्यक्ष अशोक भालेराव, कोषाध्यक्षा प्रतीक्षा कांबळे, संघटक राजाराम पडवळ, महाविहार बांधकाम समितीचे अध्यक्ष व्ही. आर. थोरवडे, संस्कार सचिव मिलिंद कांबळे, कराड तालुका कोषाध्यक्ष नंदकुमार भोळे, जिल्हा कोषाध्यक्ष रुपेश सावंत, जिल्हा सरचिटणीस यशपाल बनसोडे, संघटक चंद्रकांत कांबळे, माजी सरचिटणीस उदय भंडारे, मुंबई कमिटीचे माजी अध्यक्ष एन. बी. गायकवाड, जिल्हा संघटक उत्तम पवार, माजी पर्यटन सचिव रामचंद्र कांबळे (मामा), जावली तालुका सचिव बाळकृष्ण उर्फ तात्या गाडे, जिल्हा उपाध्यक्षा अनिता कांबळे, दगडू तांदळे, राजाराम पाटणकर, श्रीधर सवाखंडे, मंगेश डावरे, वर्षा सवाखंडे तसेच विविध क्षेत्रातील मान्यवर, राजकीय व संघटनांचे पदाधिकारी, पत्रकार, उपासक व उपासिका मोठ्या संख्येने उपस्थित होते.