फलटण (प्रतिनिधी): फलटण येथील नगरपरिषदेचे उपमुख्याधिकारी म्हणून दीर्घकाळ कार्यभार सांभाळणारे मुश्ताक अहमद अब्दुललतिफ महात (महात साहेब) काल शासकीय सेवेतून सेवानिवृत्त झाले. त्यांच्या निवृत्तीनिमित्त नगरपरिषदेत भावपूर्ण सत्कार समारंभाचे आयोजन करण्यात आले होते.
समारंभात मुख्याधिकारी निखिल जाधव यांनी महात साहेबांना स्वतःच्या खुर्चीवर बसवून विशेष सन्मान केला. लोकनियुक्त नगराध्यक्ष समशेरसिंह नाईक निंबाळकर यांनीही त्यांचा गौरव करत नगरपालिकेतील अनेक जुने प्रसंग व त्यांच्या कार्यकाळातील आठवणींना उजाळा दिला.
महात साहेबांच्या सेवाजिवनातील एक अत्यंत हृदयस्पर्शी क्षण यावेळी अनुभवायला मिळाला. ज्या आई-वडिलांच्या उपस्थितीत त्यांनी शासकीय सेवेत पहिले पाऊल ठेवले होते, त्याच आई-वडिलांच्या साक्षीने त्यांनी निवृत्तीचा सत्कार स्वीकारला. या प्रसंगी महात साहेब आणि त्यांच्या आई-वडिलांच्या डोळ्यांत आनंदाश्रू तरळले. कार्यक्रमाला त्यांच्या नातवंडांचीही उपस्थिती लाभल्याने वातावरण अधिकच भावनिक झाले.
नगरपरिषदेतील अधिकारी व कर्मचाऱ्यांनीही त्यांचा विशेष सत्कार करत आपल्या भावना व्यक्त केल्या. प्रत्येकाने त्यांच्या संयमी, कर्तव्यदक्ष आणि सर्वसमावेशक कार्यशैलीचे कौतुक केले. अनेक वर्षे प्रशासनाचा कारभार सुरळीत आणि प्रभावीपणे सांभाळताना त्यांनी दाखवलेली कार्यतत्परता, प्रामाणिकपणा आणि समन्वयक वृत्ती यांचा विशेष उल्लेख करण्यात आला.
महात साहेबांच्या निवृत्तीमुळे नगरपरिषदेतील एक अनुभवी आणि समर्पित अधिकारी कार्यमुक्त झाला असला, तरी त्यांच्या कार्याचा ठसा आणि प्रशासनातील योगदान दीर्घकाळ स्मरणात राहील, अशी भावना उपस्थितांनी व्यक्त केली.

फलटण – शहरातील फलटण नगर परिषद यांच्या अखत्यारीतील शंकर मार्केट येथील दवाखान्याची वीज थकीत बिलामुळे तोडण्यात आल्याची घटना समोर आली आहे. ही बाब अत्यंत गंभीर आणि लज्जास्पद असून तात्काळ वीज बिल भरून दवाखाना पूर्ववत सुरू करावा, अशी मागणी माजी नगरसेवक अनुप शहा यांनी केली आहे.
मिळालेल्या माहितीनुसार, शंकर मार्केट परिसरातील नगरपालिकेचा दवाखाना याचे वीज बिल थकले असल्याने महाराष्ट्र राज्य वीज वितरण कंपनी मर्यादित (महावितरण) यांच्या वतीने वीज जोडणी खंडित करण्यात आली. परिणामी, दवाखान्याचे कामकाज पूर्णपणे ठप्प झाले असून नागरिकांना आरोग्य सेवेसाठी अडचणींचा सामना करावा लागत आहे.
दरम्यान, नगरपालिकेतील काही कर्मचाऱ्यांमध्ये दबक्या आवाजात चर्चा सुरू आहे की वीज बिल भरण्यासाठी लागणाऱ्या रकमेवर एका ज्येष्ठ नगरसेवकाने ‘किती मलिदा मिळू शकतो?’ अशी विचारणा केली होती. संबंधित रकमेवर टक्केवारी देण्याची अपेक्षा व्यक्त झाल्यानेच बिल भरण्यास विलंब झाल्याची चर्चा रंगली आहे. मात्र, या चर्चेबाबत अधिकृत दुजोरा मिळालेला नाही.
या पार्श्वभूमीवर नागरिकांमध्ये तीव्र नाराजी व्यक्त होत असून, “वीज बिलावरही टक्केवारीची अपेक्षा केली जात असेल, तर नगरपालिकेचा कारभार नेमका कोणाच्या हातात आहे?” असा सवाल उपस्थित केला जात आहे. नगरपालिका प्रशासनाने तातडीने याची दखल घेऊन वीज बिल अदा करावे आणि दवाखाना त्वरित सुरू करावा, अशी मागणी जोर धरत आहे.
नागरिकांच्या आरोग्याशी संबंधित सेवा कोणत्याही कारणास्तव बंद पडणे ही गंभीर बाब असून प्रशासनाने पारदर्शकता ठेवून जबाबदारी निश्चित करावी, अशी अपेक्षा व्यक्त होत आहे.

फलटण (प्रतिनिधी) – फलटण शहरातील शंकर मार्केट परिसरात झालेल्या भ्याड हल्ल्यात जखमी झालेल्या अनिल हिरणवाळे व संतोष हिरणवाळे या बंधूंना आज श्रीमंत अनिकेतराजे नाईक निंबाळकर यांनी रुग्णालयात जाऊन भेट देत त्यांच्या प्रकृतीची विचारपूस केली. यावेळी त्यांनी जखमींच्या कुटुंबीयांशी संवाद साधून त्यांना धीर दिला.
याप्रसंगी बोलताना अनिकेतराजे नाईक निंबाळकर म्हणाले, “फलटणचे राजघराणे तुमच्या पाठीशी खंबीरपणे उभे आहे.” या कठीण प्रसंगातून सावरण्यासाठी त्यांनी हिरणवाळे बंधूंना मानसिक आधार दिला तसेच कुटुंबीयांना आवश्यक ती मदत करण्याचे आश्वासन दिले.
हल्लेखोरांवर कठोर कारवाई व्हावी यासाठी संबंधित पोलीस प्रशासनाकडे ठोस मागणी करण्यात येणार असल्याचे त्यांनी स्पष्ट केले. गुन्हेगारांना कडक शासन व्हावे यासाठी सर्वतोपरी प्रयत्न करू, असेही त्यांनी सांगितले. जखमींना उपचारासाठी तसेच कुटुंबीयांना आवश्यक ती सर्व मदत उपलब्ध करून दिली जाईल, असे त्यांनी नमूद केले.
दरम्यान, शंकर मार्केट परिसरात वाढत्या दहशतीमुळे नागरिकांमध्ये तीव्र संताप व्यक्त होत आहे. शहरातील कायदा व सुव्यवस्था अबाधित राखण्यासाठी तातडीने प्रभावी उपाययोजना कराव्यात, अशी मागणी नागरिकांकडून जोर धरू लागली आहे.

फलटण (प्रतिनिधी) – फलटण नगर परिषद येथील विविध विषय समित्यांच्या सभापती पदांच्या निवडणुका आज बिनविरोध पार पडल्या. मात्र या निवडीदरम्यान सत्ताधारी गटामध्ये नाराजीचे वातावरण असल्याचे चित्र पाहायला मिळाले.
नगरपरिषदेच्या उपनगराध्यक्ष सौ. प्रियदर्शनी रणजितसिंह भोसले या समिती सभापती निवडीच्या बैठकीस गैरहजर राहिल्याचे समोर आले आहे. त्यांना शिक्षण व क्रीडा समितीचे सभापतीपद देण्यात आले असले, तरी ही समिती दुय्यम दर्जाची समजली जाते व कामकाज मर्यादित असल्याची चर्चा नगरवर्तुळात आहे. त्यामुळेच नाराजीपोटी त्यांनी निवडीवेळी अनुपस्थित राहिल्याची चर्चा रंगली आहे.
दरम्यान, माजी ज्येष्ठ नगरसेवक अनुप शहा यांच्या कन्या कुमारी सिद्धाली शहा यांनाही समिती सभापतीपदाची अपेक्षा होती, अशी माहिती विश्वसनीय सूत्रांनी दिली. मात्र त्यांची केवळ समिती सदस्य म्हणून निवड करण्यात आली. यानंतर त्यांनी सदस्यत्वाचा तात्काळ राजीनामा दिल्याचेही वृत्त आहे.
सभापती निवडी प्रक्रिया बिनविरोध झाली असली तरी अंतर्गत नाराजीमुळे सत्ताधारी गटात अस्वस्थता निर्माण झाल्याचे स्पष्ट होत आहे. पुढील काळात या घडामोडींमुळे राजकीय समीकरणांवर काय परिणाम होतो, याकडे सर्वांचे लक्ष लागले आहे.