फलटण (प्रतिनिधी): फलटण येथील नगरपरिषदेचे उपमुख्याधिकारी म्हणून दीर्घकाळ कार्यभार सांभाळणारे मुश्ताक अहमद अब्दुललतिफ महात (महात साहेब) काल शासकीय सेवेतून सेवानिवृत्त झाले. त्यांच्या निवृत्तीनिमित्त नगरपरिषदेत भावपूर्ण सत्कार समारंभाचे आयोजन करण्यात आले होते.
समारंभात मुख्याधिकारी निखिल जाधव यांनी महात साहेबांना स्वतःच्या खुर्चीवर बसवून विशेष सन्मान केला. लोकनियुक्त नगराध्यक्ष समशेरसिंह नाईक निंबाळकर यांनीही त्यांचा गौरव करत नगरपालिकेतील अनेक जुने प्रसंग व त्यांच्या कार्यकाळातील आठवणींना उजाळा दिला.
महात साहेबांच्या सेवाजिवनातील एक अत्यंत हृदयस्पर्शी क्षण यावेळी अनुभवायला मिळाला. ज्या आई-वडिलांच्या उपस्थितीत त्यांनी शासकीय सेवेत पहिले पाऊल ठेवले होते, त्याच आई-वडिलांच्या साक्षीने त्यांनी निवृत्तीचा सत्कार स्वीकारला. या प्रसंगी महात साहेब आणि त्यांच्या आई-वडिलांच्या डोळ्यांत आनंदाश्रू तरळले. कार्यक्रमाला त्यांच्या नातवंडांचीही उपस्थिती लाभल्याने वातावरण अधिकच भावनिक झाले.
नगरपरिषदेतील अधिकारी व कर्मचाऱ्यांनीही त्यांचा विशेष सत्कार करत आपल्या भावना व्यक्त केल्या. प्रत्येकाने त्यांच्या संयमी, कर्तव्यदक्ष आणि सर्वसमावेशक कार्यशैलीचे कौतुक केले. अनेक वर्षे प्रशासनाचा कारभार सुरळीत आणि प्रभावीपणे सांभाळताना त्यांनी दाखवलेली कार्यतत्परता, प्रामाणिकपणा आणि समन्वयक वृत्ती यांचा विशेष उल्लेख करण्यात आला.
महात साहेबांच्या निवृत्तीमुळे नगरपरिषदेतील एक अनुभवी आणि समर्पित अधिकारी कार्यमुक्त झाला असला, तरी त्यांच्या कार्याचा ठसा आणि प्रशासनातील योगदान दीर्घकाळ स्मरणात राहील, अशी भावना उपस्थितांनी व्यक्त केली.
फलटण नगरपरिषदेत मुश्ताक महात यांनी आई-वडिलांच्या उपस्थितीत स्वीकारला सेवानिवृत्तीचा सत्कार; प्रशासनातील प्रदीर्घ सेवेला सलाम
