सातारा, पुढारी वृत्तसेवा: दत्ता जाधव यांचा मुलगा लल्लन व त्याच्या सहा साथीदारांनी भंगार व्यावसायिक विक्रम वाघमारे उर्फ विक्रम पैलवान याच्यावर धारदार शस्त्राने जीवघेणा हल्ला केला. ही घटना शनिवारी (दि.३) रात्री कोरेगाव – प्रतापसिंहनगर मार्गावर घडली. यात सुदैवाने विक्रम पैलवान बचावला. त्याच्यावर साताऱ्यातील खासगी रूग्णालयात उपचार सुरू आहेत. हल्ल्यामागचे कारण अद्याप अस्पष्ट असले तरी जुनी भांडणे आणि वर्चस्ववादातून हा हल्ला झाला असल्याची परिसरात दबक्या आवाजात चर्चा सुरू आहे.

कोल्हापूर येथील कळंबा जेलमध्ये ३ ते ४ वर्षापासून संघटीत गुन्हेगारी कायदा मोक्का अंतर्गत कैदेत असलेल्या लल्लनला एक महिन्यापूर्वी जामीन मिळाला. तो बाहेर येण्याआधीच त्याच्या साथीदारांनी त्याचे सोशल मीडियावर स्टेटस् व्हायरल केले होते.
शनिवारी रात्री विक्रम पैलवान प्रतापसिंहनगरकडे जात असताना लल्लन व त्याच्या सहा साथिदारांनी विक्रमला अडविले. दोघांमध्ये शाब्दिक बाचाबाची झाली त्यातून लल्लन व त्याच्या साथिदारांनी विक्रम पैलवानच्या मानेवर, हातावर, पाठीत कोयत्याने वार केले. त्यानंतर लल्लन व त्याचे साथीदारांनी तेथून पळ काढला. दरम्यान, विक्रमने ही घटना मित्रांना सांगितली. मित्रांनी त्याला उपचारासाठी खाजगी रुग्णालयात दाखल केले. सातारा शहर पोलिसांनी लल्लन व त्याच्या साथीदारांवर गुन्हा दाखल केला आहे. तो व त्याचे साथीदार फरार आहेत. पोलीस त्याचा शोध घेत आहेत. प्रतापसिंहनगर मध्ये सद्या पोलीस बंदोबस्त तैनात करण्यात आला आहे.

तत्कालीन पोलीस अधीक्षक संदीप पाटील यांनी दत्ता जाधव व त्याचा मुलगा लल्लन याची दहशत मोडीत काढत त्यांच्यावर मोक्का अंतर्गत कारवाई केली होती. त्यानंतर प्रतापसिंहनगर व परिसरात शांतता होती. या घटनेनंतर प्रतापसिंहनगर मध्ये शांतता रहावी, अशी मागणी सामाजिक संघटनेच्या कार्यकर्त्यांनी केली आहे.

हेही वाचा 

पाचगणी; पुढारी वृत्तसेवा : राष्ट्रवादी पक्षात असणारी गद्दारी व अंतर्गत असणारे मतभेद, समन्वयाचा अभाव व गतवेळच्या जिल्हा परिषद निवडणुकीत माझा पक्षांतर्गतच कुरघोड्यांमुळे जाणीवपूर्वक केलेला पराभव. या पार्श्वभूमीवर मी शिवसेनेत प्रवेश केला आहे, असा खुलासा राष्ट्रवादीचे नेते, माथाडी कामगारांचे ज्येष्ठ नेते ऋषिकांत शिंदे (Rushikant Shinde) यांनी ‘दैनिक पुढारी’शी बोलताना केला.

राष्ट्रवादीचे नेते ऋषिकांत शिंदे (Rushikant Shinde) हे आमदार शशिकांत शिंदे यांचे ज्येष्ठ बंधू आहेत. राष्ट्रवादी पक्षाची स्थापना झाल्यापासून पक्षाचे अध्यक्ष शरद पवार यांच्याबरोबर आमदार शशिकांत शिंदे यांच्या पाठीशी खंबीरपणे पडद्यामागचे अदृश्य शक्ती म्हणून उभे राहिलेले ऋषिकांत शिंदे यांची सातारा जिल्ह्यातील व नवी मुंबई राष्ट्रवादी पक्षात ओळख आहे.

राष्ट्रवादी पक्षाच्या अनेक लढाया जिंकण्यामध्ये ऋषिकांत शिंदे यांचा वाटा आहे. यातच जावळी तालुक्यात शशिकांत शिंदेंना १० वर्षांपासून आमदार करण्यात ऋषिकांत शिंदे यांचा मोलाचा वाटा आहे. ऋषिकांत शिंदे यांनी अचानक राष्ट्रवादी पक्षाला रामराम करत मुख्यमंत्री एकनाथ शिंदे यांच्या नेतृत्वाखाली भगवा झेंडा खांद्यावर घेत जय महाराष्ट्रचा नारा दिला. या सर्व घडामोडीमुळे आमदार शशिकांत शिंदे व राष्ट्रवादीला जोरदार धक्का मानला जात आहे. आगामी काळातील राष्ट्रवादी पक्षासह व भविष्यातील सगळ्या निवडणुकीची समीकरणे बदल्याची शक्यता आहे.

दैनिक पुढारीने नव्याने शिवसेनेत प्रवेश केलेले ऋषिकांत शिंदे यांचे संपर्क साधला असता रूषिकांत शिंदे म्हणाले मी जिल्हा परिषद कुडाळ गटामध्ये राष्ट्रवादी पक्षाच्या तिकिटावर उभे होतो. मात्र, पक्षांतर्गत गद्दारीमुळे व कुरघोड्याचे राजकारणामुळे पराभव केला.
जिल्हा परिषद कुडाळ गटात राष्ट्रवादी पक्षाच्या तिकिटावर माझा पराभव झाल्यानंतर तेव्हापासून आजपर्यंत माझ्या कार्यकर्त्यांना न्याय दिला गेला नाही. जनतेला न्याय दिला गेला नाही. नवी मुंबईमध्ये अनेक कामे प्रलंबित आहेत. त्या कामांना न्याय देण्यासाठी माथाडी कामगारांना खऱ्या अर्थाने त्यांच्या आर्थिक उन्नतीसाठी त्यांनी पाहिलेल्या प्रत्येक स्वप्नपूर्तीसाठी मी शिवसेनेत प्रवेश केल्याचे ऋषिकांत शिंदे यांनी सांगितले.

जावळी तालुक्यातील याचे पडसाद उमटले आहेत. ऋषिकांत शिंदे यांच्या कार्यकर्त्यांना नवा पक्ष नवी दिशा मिळाल्यामुळे जावळी तालुक्यातील राजकीय वर्तुळात जोरदार चर्चा रंगली आहे. एकीकडे शशिकांत शिंदे यांचा शिंदे गटाच्या आमदार महेश शिंदे यांच्याशी कोरेगाव तालुक्यात संघर्ष सुरू आहे. आता त्याच गटात ज्येष्ठ बंधू ऋषिकांत शिंदे यांचा प्रवेश झाल्याने अनेक तर्कवितर्कांना उधाण आले आहे.

हेही वाचा