Sunday, November 22, 2026
Home Blog Page 20

दुष्काळी परिस्थितीत वृक्षसंवर्धनासाठी सरकारी कंत्राटदार,नागरिक सामाजिक संस्थांनी पुढाकार घ्यावा

0
दुष्काळी परिस्थितीत वृक्षसंवर्धनासाठी सरकारी कंत्राटदार,नागरिक सामाजिक संस्थांनी पुढाकार घ्यावा

पर्यावरण संवर्धनासाठी जिल्हा परिषद सदस्यांचा अभिनव पुढाकार

प्रत्येक शासकीय कामाच्या कंत्राटदाराने ग्रामपंचायतीला किमान १० झाडे देण्याचे आवाहन

बरड ::- बरड जिल्हा परिषद गटातील सध्याची दुष्काळी परिस्थिती आणि दिवसेंदिवस वाढत चाललेली पर्यावरणाची समस्या लक्षात घेता, शासकीय विकासकामांसोबत वृक्षसंवर्धनालाही प्राधान्य देण्याची गरज आहे. या पार्श्वभूमीवर बरड जिल्हा परिषद गटाच्या जिल्हा परिषद सदस्य सौ. वैशाली संदिप कांबळे यांनी शासकीय कामे करणाऱ्या कंत्राटदारांना महत्त्वपूर्ण आवाहन केले आहे.

बरड जिल्हा परिषद गटातील ज्या गावांमध्ये शासनाच्या विविध योजनांतर्गत शासकीय विकासकामे सुरू आहेत, त्या कामांचे सरकारी कंत्राटदारांनी सामाजिक बांधिलकी म्हणून संबंधित ग्रामपंचायतीला किमान १० झाडे उपलब्ध करून द्यावीत, असे आवाहन सौ. वैशाली संदिप कांबळे यांनी केले आहे.

ग्रामपंचायतीने या झाडांची लागवड शाळा परिसर, ग्रामपंचायत कार्यालय, सार्वजनिक ठिकाणे, रस्त्याच्या कडेला तसेच उपलब्ध मोकळ्या जागांमध्ये करून त्यांचे योग्य संगोपन करावे. केवळ वृक्षलागवड न करता झाडे जगविण्याची जबाबदारीही सामूहिकपणे स्वीकारणे गरजेचे आहे, असे त्यांनी स्पष्ट केले.

सध्या निर्माण झालेल्या दुष्काळी परिस्थितीत पाणी, पर्यावरण आणि भविष्यातील पिढ्यांचा विचार करून प्रत्येक घटकाने आपली सामाजिक जबाबदारी पार पाडणे आवश्यक आहे. शासकीय विकासकामे करणाऱ्या कंत्राटदारांनीही आपल्या कामासोबत पर्यावरण संवर्धनासाठी योगदान दिल्यास संपूर्ण मतदारसंघात मोठ्या प्रमाणावर वृक्षलागवड होऊ शकते.

“विकासकामे ही गावाच्या प्रगतीसाठी आवश्यक आहेत; मात्र विकासासोबत पर्यावरणाचे संवर्धनही तितकेच महत्त्वाचे आहे. प्रत्येक कंत्राटदाराने किमान दहा झाडे ग्रामपंचायतीला देऊन या उपक्रमाला हातभार लावावा. आज लावलेले एक झाड उद्याच्या पिढीसाठी मोठी संपत्ती ठरेल,” असे आवाहन जिल्हा परिषद सदस्य सौ. वैशाली संदिप कांबळे यांनी केले.

या उपक्रमाला ग्रामपंचायती, कंत्राटदार, नागरिक तसेच विविध सामाजिक संस्थांनी सहकार्य करून ‘विकासासोबत हरित विकास’ ही संकल्पना प्रत्यक्षात आणावी, असेही त्यांनी सांगितले.

बारामती तालुका शिक्षक सहकारी पतसंस्थेच्या चेअरमनपदी स्मिता संभाजी पवार

0
बारामती तालुका शिक्षक सहकारी पतसंस्थेच्या चेअरमनपदी स्मिता संभाजी पवार

बारामती तालुका शिक्षक सहकारी पतसंस्थेच्या चेअरमनपदी स्मिता संभाजी पवार

बारामती : बारामती तालुका शिक्षक सहकारी पतसंस्थेच्या चेअरमनपदी स्मिता संभाजी पवार यांची निवड झाल्याबद्दल त्यांचे विविध स्तरातून अभिनंदन होत आहे. शिक्षकांच्या आर्थिक गरजा, सहकाराच्या माध्यमातून सभासदांचे हित आणि संस्थेच्या सर्वांगीण विकासाच्या दृष्टीने ही निवड महत्त्वपूर्ण मानली जात आहे.

पतसंस्थेच्या संचालक मंडळाच्या बैठकीत चेअरमनपदाच्या निवडीची प्रक्रिया पार पडली. यावेळी संचालक मंडळाने स्मिता संभाजी पवार यांच्या नावावर विश्वास व्यक्त करत त्यांची चेअरमनपदी निवड केली. निवडीनंतर उपस्थित संचालक, शिक्षक सभासद आणि सहकार क्षेत्रातील मान्यवरांनी त्यांचे अभिनंदन करून पुढील वाटचालीस शुभेच्छा दिल्या.

स्मिता पवार यांना शिक्षक सभासदांच्या आर्थिक गरजा, पतसंस्थेच्या माध्यमातून उपलब्ध होणाऱ्या विविध कर्ज योजना, बचत व आर्थिक शिस्त तसेच संस्थेच्या कारभारात पारदर्शकता याबाबत काम करण्याची संधी मिळणार आहे. सभासदांना अधिक चांगल्या सेवा उपलब्ध करून देणे, संस्थेची आर्थिक क्षमता मजबूत करणे आणि आधुनिक पद्धतीने पतसंस्थेचा कारभार अधिक सक्षम करण्यावर आगामी काळात भर राहण्याची अपेक्षा व्यक्त होत आहे.

शिक्षकांच्या हितासाठी काम करणाऱ्या या संस्थेच्या माध्यमातून सभासदांच्या अडचणी सोडविण्यासाठी तसेच त्यांच्या आर्थिक गरजांना पाठबळ देण्यासाठी आपण प्रयत्नशील राहू, असा विश्वास स्मिता संभाजी पवार यांच्या निवडीनंतर व्यक्त करण्यात आला.

स्मिता संभाजी पवार यांच्या चेअरमनपदी निवडीबद्दल शिक्षक, सभासद, सहकारी संस्था क्षेत्रातील पदाधिकारी, मित्रपरिवार आणि हितचिंतकांकडून त्यांच्यावर अभिनंदनाचा वर्षाव होत आहे. त्यांच्या नेतृत्वाखाली बारामती तालुका शिक्षक सहकारी पतसंस्था अधिक सक्षम आणि सभासदाभिमुख पद्धतीने पुढे जाईल, अशी अपेक्षा व्यक्त केली जात आहे.

टाकळवाडे येथे ऊसतोडणी मजुरांवरून वाद; शेतमालकास बेदम मारहाण

0
टाकळवाडे येथे ऊसतोडणी मजुरांवरून वाद; शेतमालकास बेदम मारहाण

पाच जणांविरुद्ध फलटण ग्रामीण पोलीस ठाण्यात गुन्हा दाखल; दगडाने मारल्याने डोळ्याला दुखापत

फलटण : टाकळवाडे (ता. फलटण) येथे ऊसतोडणीसाठी आलेल्या मजुरांनी शेतात शौचास जाऊ नये, या कारणावरून झालेल्या वादाचे रूपांतर मारामारीत झाल्याची घटना १ ऑक्टोबर रोजी सायंकाळी घडली. या प्रकरणी सोपान रंगराव मिंड यांना मारहाण केल्याच्या आरोपावरून पाच जणांविरुद्ध फलटण ग्रामीण पोलीस ठाण्यात गुन्हा दाखल करण्यात आला आहे.

याबाबत अलका सोपान मिंड यांनी दिलेल्या फिर्यादीवरून मिळालेल्या माहितीनुसार, १ ऑक्टोबर रोजी सायंकाळी सातच्या सुमारास टाकळवाडे ते फुलेवस्ती जाणाऱ्या रस्त्याजवळ केशव शिवाजी इवरे व हरिभाऊ केरबा इवरे हे शेतात उभे होते. यावेळी केशव इवरे हे शिवीगाळ करत असल्याचे लक्षात आल्याने अलका मिंड व त्यांचे पती सोपान मिंड यांनी त्यांच्याकडे जाऊन शिवीगाळ करण्याचे कारण विचारले.

त्यावेळी, मिंड यांच्या शेतात आलेले ऊसतोडणी मजूर शेतात शौचास जात असल्याने त्यांना तसे करण्यास मनाई करावी, असे सांगण्यात आल्याचे फिर्यादीत नमूद आहे. त्यावर सोपान मिंड यांनी मजुरांना शेतात शौचास जाऊ नये, असे सांगितले. यानंतर केशव इवरे यांनी सोपान मिंड यांना शिवीगाळ केल्याचे फिर्यादीत म्हटले आहे.

यानंतर केशव इवरे हे मोटारसायकलवरून निघून गेले. काही वेळाने ते अविनाश संपत मिंड व संपत साहेबराव मिंड यांना सोबत घेऊन पुन्हा घटनास्थळी आले. यावेळी अविनाश मिंड यांनी सोपान मिंड यांचा गचूर धरून खाली पाडले व छातीवर बुक्क्यांनी मारहाण केल्याचा आरोप आहे.

दरम्यान, शितल शिवाजी इवरे यांनी दगडाने सोपान मिंड यांच्या डाव्या डोळ्यावर मारल्याने त्यांच्या डोळ्याला दुखापत झाल्याचे फिर्यादीत नमूद आहे. संपत साहेबराव मिंड यांनी हाताने, तर संदेश केशव इवरे यांनी लाथेने मारहाण केल्याचा आरोप करण्यात आला आहे. तसेच संबंधित पाच जणांनी शिवीगाळ केल्याचेही फिर्यादीत म्हटले आहे.

घटनेदरम्यान सोपान मिंड यांचा नातू शौर्य नानासाहेब मिंड व नात सिध्दी नानासाहेब मिंड हे घटनास्थळी आले असता त्यांनाही मारहाण करण्यात आल्याचा आरोप फिर्यादीत करण्यात आला आहे.

मारहाणीनंतर सोपान मिंड यांना त्यांचा मुलगा नानासाहेब मिंड यांनी फलटण ग्रामीण पोलीस ठाण्यात आणले. पोलिसांनी वैद्यकीय उपचारासाठी पाठवल्यानंतर उपजिल्हा रुग्णालय, फलटण येथे प्राथमिक उपचार करण्यात आले. पुढील उपचारासाठी त्यांना फलटण येथील सुविधा मल्टिस्पेशालिटी हॉस्पिटलमध्ये दाखल करण्यात आले असून उपचार सुरू असल्याचे फिर्यादीत नमूद आहे.

या प्रकरणी केशव शिवाजी इवरे, अविनाश संपत मिंड, संपत साहेबराव मिंड, शितल शिवाजी इवरे आणि संदेश केशव इवरे यांच्याविरुद्ध फलटण ग्रामीण पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास पोलीस सागर अभंग करीत आहेत.

सोमेश्वर कारखाना निवडणुकीत जय पवारांची हरकत; अजित पवारांचे नाव-फोटो वापरण्यास मनाई

0
सोमेश्वर कारखाना निवडणुकीत जय पवारांची हरकत; अजित पवारांचे नाव-फोटो वापरण्यास मनाई

सोमेश्वर कारखाना निवडणुकीत जय पवारांची हरकत; अजित पवारांचे नाव-फोटो वापरण्यास मनाई

बारामती : श्री सोमेश्वर सहकारी साखर कारखान्याच्या पंचवार्षिक निवडणुकीच्या प्रचारात अजित पवार यांचे नाव, छायाचित्र व प्रतिमा वापरल्याप्रकरणी जय अजितदादा पवार यांनी हरकत नोंदवली आहे. त्यांच्या हरकतीनंतर निवडणूक निर्णय अधिकारी दिग्विजय आहेर यांनी पुरुषोत्तम रामराजे जगताप यांच्या पॅनेलला संबंधित प्रचार साहित्य हटविण्याचे आदेश दिले आहेत.

जय पवार यांनी ३० सप्टेंबर २०२६ रोजी हरकत अर्ज दाखल केल्याचे आदेशात नमूद करण्यात आले आहे. संबंधित पॅनेलकडून प्रचारासाठी अजितदादा पवार अथवा अजित पवार यांचे नाव, फोटो आणि प्रतिमा असलेले फ्लेक्स, बॅनर, पोस्टर्स, स्टिकर्स, पत्रके तसेच अन्य प्रचार साहित्य वापरले जात असल्याचा आक्षेप त्यांनी घेतला होता.

या तक्रारीची दखल घेत निवडणूक निर्णय अधिकाऱ्यांनी अजित पवार यांच्या नावाचा किंवा प्रतिमेचा वापर असलेले प्रचार साहित्य तात्काळ वापरणे थांबवावे आणि यापूर्वी लावण्यात आलेले साहित्य काढून टाकावे, असे निर्देश दिले आहेत. तसेच केलेल्या कार्यवाहीचा लेखी अनुपालन अहवाल निवडणूक निर्णय अधिकारी कार्यालयात सादर करण्याचे आदेश देण्यात आले आहेत.

आदेशाचे पालन न झाल्यास कायदेशीर कारवाईचा इशाराही देण्यात आला आहे. त्यामुळे सोमेश्वर कारखाना निवडणुकीच्या प्रचारात या आदेशानंतर संबंधित पॅनेलकडून कोणती भूमिका घेतली जाते, याकडे लक्ष लागले आहे.

उजनीतील प्रस्तावित प्रकल्पाबाबत धैर्यशील मोहिते-पाटील यांची पत्रकार परिषद; पाणीवापराचा सविस्तर अहवाल जाहीर करण्याची मागणी

0
उजनीतील प्रस्तावित प्रकल्पाबाबत धैर्यशील मोहिते-पाटील यांची पत्रकार परिषद; पाणीवापराचा सविस्तर अहवाल जाहीर करण्याची मागणी

पाणी ताळेबंद, पर्यावरणीय परिणाम आणि स्थानिकांच्या हक्कांबाबत शासनाकडे मागितली सविस्तर माहिती

अकलूज : उजनी जलाशय परिसरात प्रस्तावित असलेल्या एआय कॅम्पस, डेटा सेंटर आणि ग्रीन हायड्रोजन प्रकल्पाच्या पार्श्वभूमीवर खासदार धैर्यशील  मोहिते-पाटील यांनी पत्रकार परिषद घेतली. या प्रकल्पासाठी उजनीच्या पाण्याचा किती वापर होणार, उपलब्ध पाणीसाठ्यावर त्याचा काय परिणाम होईल आणि स्थानिक शेतकरी, नागरिक, मच्छीमार व लाभक्षेत्रातील पाणीहक्कांवर त्याचा परिणाम काय होणार, याबाबत शासनाने स्पष्ट माहिती द्यावी, अशी भूमिका त्यांनी मांडली.

उजनी जलाशयावर सोलापूर जिल्ह्यासह लाभक्षेत्रातील पिण्याचे पाणी, शेती, सिंचन, मत्स्यव्यवसाय आणि स्थानिक उपजीविका मोठ्या प्रमाणात अवलंबून आहेत. त्यामुळे नवीन औद्योगिक प्रकल्पासाठी पाणी आरक्षित करण्यापूर्वी विद्यमान पाणीवापराचे हक्क आणि भविष्यातील गरजा सुरक्षित करणे आवश्यक असल्याचे मोहिते-पाटील यांनी स्पष्ट केले.

महाराष्ट्र शासन, जे.डब्ल्यू. ग्लोबल ग्रुप आणि द सीड कन्सोर्टियम यांच्यात १६ एप्रिल २०२६ रोजी झालेल्या सामंजस्य करारानुसार उजनी परिसरात हा प्रकल्प प्रस्तावित असल्याचे समोर आले आहे. प्रस्तावित प्रकल्पात सुमारे ६८० एकर क्षेत्रावर एआय कॅम्पस व डेटा सेंटर उभारण्याची तसेच ग्रीन हायड्रोजन निर्मितीची योजना असल्याचे त्यांच्या निवेदनात नमूद करण्यात आले आहे.

या प्रकल्पासाठी दररोज आणि वार्षिक किती पाणी लागणार, पाणी कुठून उपलब्ध होणार, दुष्काळी परिस्थितीत पाणीवाटपाचे निकष काय असतील, तसेच डेटा सेंटरच्या शीतकरणासाठी लागणाऱ्या पाण्याचा पुनर्वापर कसा केला जाणार, याची माहिती शासनाने सार्वजनिक करावी, अशी मागणी करण्यात आली आहे.

याशिवाय प्रकल्पाचा उजनी जलाशयाच्या पर्यावरणावर, मत्स्यव्यवसायावर, जैवविविधतेवर आणि पाणथळ क्षेत्रांवर होणारा परिणाम तपासण्यासाठी स्वतंत्र तांत्रिक व पर्यावरणीय अभ्यास करावा, अशी मागणीही मोहिते-पाटील यांनी केली आहे. स्थानिक शेतकरी, मच्छीमार, जमीनधारक आणि ग्रामस्थांशी झालेल्या सल्लामसलतीचा तपशीलही उपलब्ध करून देण्याची मागणी त्यांनी केली आहे.

प्रकल्पाच्या विविध घटकांची मंजुरी कोणत्या टप्प्यावर आहे, पाणी ताळेबंद काय आहे, जललेखा परीक्षण झाले आहे का आणि प्रकल्पासाठी पाणी आरक्षणाबाबत कोणता निर्णय घेण्यात आला आहे, याबाबत शासनाने अधिकृत माहिती द्यावी, अशी मागणी त्यांनी केली.

दरम्यान, उजनी परिसरातील प्रस्तावित प्रकल्पामुळे मोठ्या प्रमाणावर गुंतवणूक आणि रोजगारनिर्मितीची अपेक्षा व्यक्त केली जात असली, तरी स्थानिक नागरिकांच्या पाणीहक्कांना बाधा येणार नाही याची खात्री करणे आवश्यक असल्याचे मोहिते-पाटील यांनी म्हटले आहे.

श्री सोमेश्वर साखर कारखाना निवडणुकीत तिरंगी लढत; २१ जागांसाठी तीन पॅनल आमनेसामने

0
श्री सोमेश्वर साखर कारखाना निवडणुकीत तिरंगी लढत; २१ जागांसाठी तीन पॅनल आमनेसामने

श्री सोमेश्वर साखर कारखाना निवडणुकीत तिरंगी लढत; २१ जागांसाठी तीन पॅनल आमनेसामने

बारामती : बारामतीच्या सहकार आणि राजकारणाच्या दृष्टीने महत्त्वाच्या मानल्या जाणाऱ्या श्री सोमेश्वर सहकारी साखर कारखान्याच्या पंचवार्षिक निवडणुकीचे चित्र अखेर स्पष्ट झाले आहे. उमेदवारी अर्ज मागे घेण्याची अंतिम मुदत ३० सप्टेंबर रोजी संपल्यानंतर कारखान्याच्या २१ जागांसाठी तीन पॅनल मैदानात उतरल्याचे स्पष्ट झाले आहे. त्यामुळे यंदाची निवडणूक तिरंगी होणार आहे.

कारखान्याच्या निवडणुकीसाठी ५१४ वैध उमेदवारी अर्ज दाखल झाले होते. अर्ज माघारीनंतर तीन प्रमुख पॅनलमधील उमेदवार निश्चित झाले असून, आता गावागावातील स्थानिक राजकीय समीकरणे, शेतकरी गटांचे प्रभावक्षेत्र आणि व्यक्तिगत संबंध यामुळे निवडणुकीला मोठी रंगत आली आहे.

निवडणूक कार्यक्रमानुसार ११ ऑक्टोबर २०२६ रोजी मतदान, तर १२ ऑक्टोबर रोजी मतमोजणी होणार आहे.

तीन पॅनलमध्ये थेट सामना

१) श्री सोमेश्वर शेतकरी विकास पॅनल

युगेंद्र पवार आणि राजेंद्र जगताप यांच्या नेतृत्वाखाली राष्ट्रवादी काँग्रेस शरदचंद्र पवार पक्षाच्या भूमिकेशी संबंधित युगेंद्र पवार आणि तालुकाध्यक्ष राजेंद्र जगताप यांनी श्री सोमेश्वर शेतकरी विकास पॅनलची घोषणा केली आहे. या पॅनलमध्ये अनुभवी सहकार नेते तसेच स्थानिक पातळीवर प्रभाव असलेल्या उमेदवारांचा समावेश करण्यात आला आहे.

सतीश खोमणे, दत्ताजीराव चव्हाण आणि पोपट पानसरे यांसारख्या अनुभवी नेत्यांचा या पॅनलमध्ये समावेश असल्याने निवडणुकीत त्यांच्या अनुभवाला महत्त्व प्राप्त झाले आहे.

गट क्र. १ – निंबूत-खंडाळा दत्ताजीराव रामराव चव्हाण शंभूराजे सूर्यकांत काकडे सुभाषराव नामदेव कोळेकर डॉ. मैत्रेयी शशिकांत काकडे – महिला सोमनाथ कृष्णा मदने

गट क्र. २ – मुरूम-वाल्हा राजेंद्रकुमार तुकाराम जगताप प्रवीण शिवाजीराव भोसले संदीप सदाशिव चव्हाण सुरेखा बाबुराव गायकवाड – महिला

गट क्र. ३ – होळ-मोरगाव अनिलकुमार चंदूलाल शहा दत्तात्रय भिवा ढोले सुनीता शिवाजी कारंडे – महिला हर्षद अशोक होळकर

गट क्र. ४ – कोऱ्हाळे-सुपा सतीश नामदेव खोमणे पोपट गणपतराव पानसरे शिवराज उर्फ प्रवीण तानाजी पवार गोविंद कृष्णा पवार

गट क्र. ५ – मांडकी-जवळा-अर्जुन संतोष एकनाथराव जगताप संदीप रामचंद्र देवकर अंकुश मुरलीधर जगताप

२) श्री सोमेश्वर विकासपुरुष अजितदादा पवार पॅनल

सुनेत्रा पवार आणि जय पवार यांच्या नेतृत्वाखाली श्री सोमेश्वर विकासपुरुष अजितदादा पवार पॅनल मैदानात आहे. सुनेत्रा पवार यांच्या नेतृत्वाखाली आणि जय पवार यांच्या उपस्थितीत या पॅनलची घोषणा करण्यात आली. या पॅनलला शिवसेना शिंदे गटाच्या स्थानिक राजकीय पाठिंब्याचाही संदर्भ दिला जात आहे.

गट क्र. १ – निंबूत-खंडाळा अभिजित सतीशराव काकडे प्रमोद भगवानराव काकडे डॉ. वसंतराव रामराव दगडे शैलेश पंढरीनाथ रासकर – इमाव अशोक चंद्रकांत धायगुडे – भज-विमुक्त

गट क्र. २ – मुरूम-वाल्हा विकास आनंदराव भोसले ऋषिकेश शिवाजीराव गायकवाड राजवर्धन शिवाजीराव शिंदे संग्राम तानाजी सोरटे – ब वर्ग

गट क्र. ३ – होळ-मोरगाव रवींद्र जयवंतराव भापकर मकरंद चंद्रकांत सस्ते मनिषा आनंदकुमार होळकर द्वारकोजी गुलाब साळवे – अनुसूचित प्रवर्ग

गट क्र. ४ – कोऱ्हाळे-सुपा राजेंद्र हरिभाऊ बोरकर अक्षय धनंजय खलाटे सुनील नारायण भगत प्रणिता मनोज खोमणे – महिला राखीव

गट क्र. ५ – मांडकी-जवळा-अर्जुन सतीश संपत जगताप सुधाकर ज्ञानोबा टेकवडे उत्तम महादेव धुमाळ छबुबाई अंकुश नाझीरकर – महिला राखीव

३) लोकनेते अजितदादा सोमेश्वर विकास पॅनल

पुरुषोत्तम जगताप यांच्या नेतृत्वाखाली स्वतंत्र पॅनल

कारखान्याचे विद्यमान अध्यक्ष पुरुषोत्तम रामराजे जगताप यांनी स्वतंत्र भूमिका घेत तिसरे पॅनल उभे केले आहे. सुमारे १३ वर्षांच्या नेतृत्वानंतर त्यांनी स्वतंत्रपणे निवडणूक लढविण्याचा निर्णय घेतला आहे. या पॅनलला भाजपचे नेते संजय जगताप तसेच काही स्थानिक राजकीय पदाधिकाऱ्यांचा पाठिंबा असल्याचे सांगितले जात आहे.

वाणेवाडी येथे झालेल्या शेतकरी मेळाव्यात पुरुषोत्तम जगताप यांनी या पॅनलची घोषणा केली.

गट क्र. १ महेश काशिनाथ काकडे संतोष पोपटराव थोपटे राजेंद्र जगन्नाथ साळुंके

गट क्र. २ पुरुषोत्तम रामराजे जगताप सतीश रामचंद्र सकुंडे वैभव अशोक गायकवाड

गट क्र. ३ अमर आनंदराव होळकर राहुल दत्तात्रय भापकर संतोष ज्ञानदेव दरेकर

गट क्र. ४ सचिन जवाहर खलाटे गोरख बाबुराव खोमणे अनिल नारायण जगताप

गट क्र. ५ विश्वास लक्ष्मण जगताप शामराव तुकाराम धुमाळ अरविंद शिवाजी शेंडकर

राखीव प्रवर्गातील उमेदवार मंजिरी दीपक निगडे वंदना संभाजी गरूड – महिला मिलिंद बळवंत कांबळे – अनुसूचित प्रवर्ग निलेश हरिभाऊ केदारी – इमाव धनंजय बाबुराव गडदरे – भटका विमुक्त महेश महादेव राणे – ब वर्ग

बंडखोरीमागे उमेदवारीचा मुद्दा?

पुरुषोत्तम जगताप यांच्या स्वतंत्र पॅनलमागे उमेदवारीवरून निर्माण झालेली नाराजी महत्त्वाची ठरल्याचे सांगितले जात आहे. शेतकरी कृती समितीचे अध्यक्ष सतीश काकडे यांचे पुत्र अभिजित काकडे, तसेच शैलेश राजकर आणि संग्राम जगताप यांच्या उमेदवारीबाबत पुरुषोत्तम जगताप यांची भूमिका वेगळी असल्याची चर्चा होती.

पक्ष नेतृत्वाने संबंधित उमेदवारांना संमती दिल्यानंतर स्थानिक पातळीवरील मतभेद वाढल्याचे सांगितले जाते. या पार्श्वभूमीवर समेट घडवून आणण्यासाठी पृथ्वीराज जाचक यांनी मध्यस्थी करण्याचा प्रयत्न केल्याची चर्चा झाली; मात्र अंतिम मुदतीपर्यंत तोडगा निघाला नाही.

बिनविरोध निवडणुकीचा प्रयत्न निष्फळ?

निवडणूक बिनविरोध करण्यासाठी ज्येष्ठ नेते शरद पवार यांच्या पातळीवरही प्रयत्न झाल्याची चर्चा आहे. मुंबईतील सिल्व्हर ओक येथे सुप्रिया सुळे, पार्थ पवार, जय पवार आणि युगेंद्र पवार यांच्यात बैठक झाल्याचे सांगितले जाते.

मात्र ३० सप्टेंबरपर्यंत उमेदवारीबाबत अंतिम तोडगा निघाला नसल्याने आता तीन पॅनल निवडणुकीच्या रिंगणात उतरले आहेत.

स्थानिक समीकरणे ठरणार महत्त्वाची

श्री सोमेश्वर सहकारी साखर कारखाना हा बारामती परिसरातील सहकार क्षेत्रातील महत्त्वाचा कारखाना मानला जातो. कारखान्याकडून शेतकऱ्यांना मिळणारा ऊसदर, कारखान्याचे आर्थिक व्यवहार, सभासदांचे हित आणि भविष्यातील विकासकामे हे निवडणुकीतील प्रमुख मुद्दे ठरण्याची शक्यता आहे.

कारखान्याची वार्षिक उलाढाल एक हजार कोटी रुपयांपेक्षा अधिक असल्याचा दावा केला जात आहे. तसेच राज्यातील ऊस उत्पादकांना तुलनेने चांगला ऊसदर देणारा कारखाना म्हणूनही त्याचा उल्लेख केला जातो.

यंदाची निवडणूक केवळ तीन पॅनलमधील सामना न राहता गावनिहाय स्थानिक समीकरणे, सभासदांचे व्यक्तिगत संबंध, शेतकरी गट आणि स्थानिक नेतृत्वाची ताकद यावर मोठ्या प्रमाणात अवलंबून राहणार आहे.

११ ऑक्टोबरला होणाऱ्या मतदानानंतर १२ ऑक्टोबरला मतमोजणी होणार असल्याने सोमेश्वरच्या सत्तेची सूत्रे कोणाच्या हातात जातात, याकडे बारामतीसह संपूर्ण पुणे जिल्ह्याचे लक्ष लागले आहे.

साताऱ्यात ‘जलसेवा संकल्प अभियान २०२६’ला प्रारंभ; पुढील पावसाळ्यापर्यंत पाण्याचे काटेकोर नियोजन करण्याचे जिल्हाधिकाऱ्यांचे निर्देश

0
साताऱ्यात ‘जलसेवा संकल्प अभियान २०२६’ला प्रारंभ; पुढील पावसाळ्यापर्यंत पाण्याचे काटेकोर नियोजन करण्याचे जिल्हाधिकाऱ्यांचे निर्देश

साताऱ्यात ‘जलसेवा संकल्प अभियान २०२६’ला प्रारंभ; पुढील पावसाळ्यापर्यंत पाण्याचे काटेकोर नियोजन करण्याचे जिल्हाधिकाऱ्यांचे निर्देश

सातारा : यंदाच्या पावसाळ्यात पावसाचे असमान वितरण आणि दीर्घ खंड यामुळे जिल्ह्यातील जलव्यवस्थापनासमोर नवे आव्हान उभे राहिले आहे. अनेक धरणांमध्ये समाधानकारक पाणीसाठा असला, तरी त्याचा नियोजनबद्ध वापर न झाल्यास आगामी काळात पाणीटंचाईची परिस्थिती निर्माण होऊ शकते. त्यामुळे उपलब्ध जलसाठ्याचे काटेकोर नियोजन करून पुढील पावसाळ्यापर्यंत पाणी पुरेल, अशा पद्धतीने नियोजन करावे, असे निर्देश जिल्हाधिकारी संतोष पाटील यांनी प्रशासनाला दिले.

जलसंपदा विभाग, महाराष्ट्र कृष्णा खोरे विकास महामंडळ, पुणे आणि सातारा पाटबंधारे प्रकल्प मंडळ यांच्या संयुक्त विद्यमाने ‘जलसेवा संकल्प अभियान २०२६’चा शुभारंभ जिल्हा नियोजन समिती सभागृहात करण्यात आला. यावेळी जिल्हाधिकारी संतोष पाटील, मुख्य कार्यकारी अधिकारी यशनी नागराजन, निवासी उपजिल्हाधिकारी नागेश पाटील, अधीक्षक अभियंता जयंत शिंदे, जिल्हा अधीक्षक कृषी अधिकारी भाग्यश्री फरांदे यांच्यासह विविध विभागांचे अधिकारी उपस्थित होते.

कृष्णा-कोयना, वेण्णा, उरमोडी आणि तारळी या नद्यांच्या पाण्याचे कलशपूजन करून अभियानाची सुरुवात करण्यात आली. २ ते १७ ऑक्टोबरदरम्यान जिल्ह्यात जलसंवर्धन, पाणी बचत, सिंचन व्यवस्थापन आणि जलजागृतीशी संबंधित विविध उपक्रम राबविण्यात येणार आहेत.

शेतकऱ्यांच्या शेतापर्यंत पाणी पोहोचविण्यावर भर

उपलब्ध पाणीसाठ्याची नोंद केवळ कागदोपत्री न राहता त्याचा प्रत्यक्ष लाभ शेतकऱ्यांना मिळणे आवश्यक आहे, असे जिल्हाधिकारी संतोष पाटील यांनी स्पष्ट केले. सिंचनाची क्षमता वाढविण्यासोबतच उपलब्ध पाण्याचे न्याय्य वाटप, शेवटच्या टोकापर्यंत पाणी पोहोचविणे आणि पाण्याचा अनावश्यक अपव्यय रोखणे आवश्यक असल्याचे त्यांनी सांगितले.

धरणांमध्ये पुरेसा साठा असला तरी भविष्यातील पाण्याची गरज लक्षात घेऊन त्याचा वापर करणे गरजेचे आहे. त्यासाठी जलसाठा, सिंचनाचे क्षेत्र, पाण्याची मागणी आणि आगामी पावसाळ्यापर्यंतची संभाव्य गरज यांचा समन्वय साधून जलव्यवस्थापनाचे नियोजन करण्याच्या सूचना देण्यात आल्या.

‘प्रति थेंब अधिक पीक’साठी आधुनिक तंत्रज्ञानाचा वापर

कृषी क्षेत्रात पाण्याचा कार्यक्षम वापर वाढविण्यासाठी ‘प्रति थेंब अधिक पीक’ या संकल्पनेला प्रोत्साहन देण्यात येणार आहे. कमी पाण्यात अधिक उत्पादन घेण्यासाठी पीक पद्धतीत आवश्यक बदल, अचूक सिंचन नियोजन तसेच बागायती क्षेत्रात आधुनिक आणि कृत्रिम बुद्धिमत्ता आधारित तंत्रज्ञानाचा वापर करण्याबाबत शेतकऱ्यांना मार्गदर्शन केले जाणार आहे.

मुख्य कार्यकारी अधिकारी यशनी नागराजन यांनी जलसंधारण आणि पाणी बचतीच्या उपक्रमांमध्ये नागरिकांचा सक्रिय सहभाग वाढविण्याचे आवाहन केले. पाणी वाचविणे ही केवळ शासनाची जबाबदारी नसून समाजातील प्रत्येक घटकाची सामूहिक जबाबदारी असल्याचे अधीक्षक अभियंता जयंत शिंदे यांनी नमूद केले.

कालवे, धरणे आणि सिंचन व्यवस्थेची पाहणी

अभियानाच्या माध्यमातून सिंचन व्यवस्थापन अधिक प्रभावी करण्यावर भर देण्यात येणार आहे. सिंचन ई-प्रणाली, पाणी दर, पाणीपट्टी आकारणी व वसुली, तक्रार निवारण, पाणी वापर संस्थांचे सक्षमीकरण तसेच उपसा सिंचनाच्या परवानगीसाठी विशेष शिबिरांचे आयोजन केले जाणार आहे.

धरणे, कालवे आणि वितरण व्यवस्थेची प्रत्यक्ष पाहणी करून आवश्यक दुरुस्तीची कामे निश्चित केली जाणार आहेत. श्रमदानाच्या माध्यमातून कालवे व धरण परिसरातील झाडे-झुडपे हटविणे, पुनर्वसित गावांतील प्रकल्पबाधितांच्या समस्या जाणून घेणे आणि त्यावर आवश्यक कार्यवाही करणे, असे विविध उपक्रमही राबविले जाणार आहेत.

उपलब्ध पाण्यानुसार पीक नियोजनाची गरज

जलसंपदा आणि कृषी विभागाच्या संयुक्त सहभागातून शेतकऱ्यांना उपलब्ध पाण्यानुसार पीक नियोजन करण्याबाबत मार्गदर्शन केले जाणार आहे. पिकांच्या पद्धतीत बदल, उत्पादनवाढ आणि पाण्याचा कार्यक्षम वापर यासाठी बैठका, कार्यशाळा, प्रदर्शने आणि मार्गदर्शन कार्यक्रम आयोजित करण्यात येणार आहेत.

महिला शेतकऱ्यांसाठी विशेष उपक्रम, लाभधारक मेळावे आणि चर्चासत्रांच्या माध्यमातूनही जलव्यवस्थापनाबाबत जनजागृती केली जाणार आहे.

विद्यार्थी आणि नागरिकांमध्ये जलजागृती

शाळा आणि महाविद्यालयांमध्ये पाणी बचत, पाण्याची गुणवत्ता, स्थानिक जलस्रोत, सिंचन प्रकल्प आणि जलव्यवस्थापन या विषयांवर विद्यार्थ्यांमध्ये जागृती निर्माण करण्यासाठी विविध स्पर्धा व उपक्रम घेण्यात येणार आहेत.

कीर्तन, भजन, भारूड आणि पथनाट्याच्या माध्यमातून जलसंवर्धनाचा संदेश सर्वसामान्यांपर्यंत पोहोचविण्याचेही नियोजन करण्यात आले आहे.

अभियानाच्या अंमलबजावणीकडे शेतकरी-कृषकांचे लक्ष

जलसाठ्याचे नियोजन, पाणी बचत आणि न्याय्य पाणीवाटप याबाबत प्रशासनाने निश्चित केलेली उद्दिष्टे प्रत्यक्षात कितपत साध्य होतात, याकडे आता शेतकरी आणि नागरिकांचे लक्ष राहणार आहे. धरणांमधील उपलब्ध जलसाठा आणि प्रत्यक्ष शेतकऱ्यांच्या शेतापर्यंत पोहोचणारे पाणी यातील अंतर कमी करणे, ही अभियानाच्या यशाची महत्त्वाची बाब ठरणार आहे.

जलसंपदा विभागाच्या सेवा अधिक पारदर्शक आणि नागरिकाभिमुख करण्यासोबतच पाणीवाटप व्यवस्था, पाणी वापर संस्थांचे सक्षमीकरण आणि धरण-कालवा व्यवस्थेची सुरक्षितता यावर ‘जलसेवा संकल्प अभियान २०२६’मध्ये विशेष भर देण्यात आला आहे.

सातारा जिल्हा बँक निवडणुकीसाठी महायुतीत खलबते; जागावाटपाच्या चर्चेला वेग

0
सातारा जिल्हा बँक निवडणुकीसाठी महायुतीत खलबते; जागावाटपाच्या चर्चेला वेग

सातारा : सातारा जिल्हा मध्यवर्ती सहकारी बँकेच्या निवडणुकीची प्रक्रिया निर्णायक टप्प्यात पोहोचली असून, महायुतीतील प्रमुख नेत्यांच्या बैठकांमुळे जिल्ह्यातील सहकार आणि राजकीय वर्तुळातील हालचालींना वेग आला आहे. साताऱ्यातील हॉटेल प्रीती एक्झिक्युटिव्ह येथे झालेल्या बैठकांमध्ये निवडणूक महायुतीच्या माध्यमातून समन्वयाने लढविणे, मतदारसंघनिहाय उमेदवारी आणि जागावाटपाच्या शक्यतांवर चर्चा झाल्याचे वृत्त आहे.

सार्वजनिक बांधकाम मंत्री शिवेंद्रसिंहराजे भोसले, मंत्री मकरंद पाटील, माजी सभापती श्रीमंत रामराजे नाईक-निंबाळकर, खासदार नितीन पाटील, माजी आमदार प्रभाकर घार्गे, जिल्हा बँकेचे उपाध्यक्ष अनिल देसाई यांच्यासह विविध नेत्यांच्या भेटीगाठींकडे सध्या लक्ष लागले आहे. मंत्री जयकुमार गोरे आणि माजी खासदार रणजितसिंह नाईक-निंबाळकर यांच्यासोबतच्या चर्चांनाही या पार्श्वभूमीवर महत्त्व प्राप्त झाले आहे.

११ सोसायटी मतदारसंघांत मैत्रीपूर्ण लढतीचा पर्याय?

महायुतीतील जागावाटपाचा तिढा सोडविण्यासाठी ११ सोसायटी मतदारसंघांत प्रत्येक घटकाने आपापल्या ताकदीवर निवडणूक लढवावी आणि उर्वरित १० जागांवर परस्पर चर्चेतून जागावाटप करावे, असा प्राथमिक प्रस्ताव चर्चेत असल्याचे वृत्त आहे. मात्र हा अंतिम निर्णय नसून चर्चेतील फॉर्म्युला असल्याचे उपलब्ध वृत्तांवरून स्पष्ट होते.

राखीव मतदारसंघ, स्थानिक सहकार संस्थांचे समीकरण आणि विविध गटांकडून दाखल झालेले उमेदवारी अर्ज यामुळे अंतिम तोडगा काढताना आणखी चर्चा होण्याची शक्यता आहे.

रामराजे, मकरंद पाटील, जयकुमार गोरे आणि रणजितसिंह यांच्या भूमिकेकडे लक्ष

जिल्हा बँकेच्या निवडणुकीत फलटण तालुक्याचे सहकार क्षेत्रातील समीकरण महत्त्वाचे मानले जात आहे. रामराजे नाईक-निंबाळकर, संजीवराजे नाईक-निंबाळकर आणि रणजितसिंह नाईक-निंबाळकर यांच्या संभाव्य भूमिकेकडे जिल्ह्याचे लक्ष आहे.

त्याचबरोबर मकरंद पाटील आणि जयकुमार गोरे यांची भूमिकाही महायुतीतील व्यापक समन्वयाच्या चर्चेत महत्त्वाची ठरत आहे. मात्र कोणत्या मतदारसंघात कोणाला अधिकृत उमेदवारी देण्यात आली आहे किंवा कोणत्या उमेदवाराने माघार घ्यावी, याबाबत अद्याप अंतिम अधिकृत घोषणा झालेली नाही.

महायुती म्हणून एकत्र लढण्याचा प्रयत्न

शिवेंद्रसिंहराजे भोसले यांनी जिल्हा बँकेची निवडणूक महायुती म्हणून एकत्र लढविण्याबाबत चर्चा सुरू असल्याचे यापूर्वी स्पष्ट केले आहे. बँकेचा कारभार राजकारणापेक्षा संस्थेच्या हिताला प्राधान्य देऊन पुढे नेण्याची भूमिका असल्याचेही त्यांनी सांगितले आहे.

दरम्यान, जागावाटपाबाबत सन्मानजनक तोडगा निघाल्यास निवडणूक बिनविरोध करण्याच्या शक्यतेचाही शिवेंद्रसिंहराजे यांनी उल्लेख केला आहे. मात्र प्रत्यक्ष उमेदवारी आणि माघारीनंतरच याबाबतचे चित्र स्पष्ट होणार आहे.

५ ऑक्टोबरच्या छाननीनंतर चित्र अधिक स्पष्ट

सातारा जिल्हा मध्यवर्ती सहकारी बँकेच्या २१ संचालक पदांसाठी उमेदवारी अर्ज दाखल करण्याची प्रक्रिया १ ऑक्टोबर रोजी पूर्ण झाली. ५ ऑक्टोबर रोजी अर्जांची छाननी होणार असून ६ ऑक्टोबरला वैध उमेदवारांची यादी प्रसिद्ध होणार आहे. उमेदवारी अर्ज मागे घेण्याची मुदत ६ ते २१ ऑक्टोबर असून २२ ऑक्टोबरला अंतिम उमेदवार यादी व निवडणूक चिन्हांचे वाटप होणार आहे. मतदान १ नोव्हेंबर रोजी, तर मतमोजणी ३ नोव्हेंबर रोजी होणार आहे.

अंतिम दिवशी २१ जागांसाठी मोठ्या संख्येने अर्ज दाखल झाल्याने सध्या विविध मतदारसंघांतील संभाव्य लढतींचे चित्र गुंतागुंतीचे आहे. छाननी आणि त्यानंतरच्या माघारीच्या टप्प्यात अनेक मतदारसंघांतील समीकरणे बदलण्याची शक्यता आहे.

फलटणच्या उमेदवारीकडे जिल्ह्याचे लक्ष

जिल्हा बँकेच्या निवडणुकीत फलटण तालुक्यातील उमेदवारी आणि स्थानिक सहकार राजकारणाची भूमिका महत्त्वाची ठरणार आहे. महायुतीतील चर्चेचा फलटणमधील उमेदवारीवर नेमका काय परिणाम होतो, हे पुढील बैठका आणि माघारीनंतर स्पष्ट होईल.

सध्या हॉटेल प्रीती एक्झिक्युटिव्हमधील बैठका आणि त्यानंतरच्या नेत्यांच्या भेटीगाठींमुळे जागावाटपाबाबत उत्सुकता वाढली आहे. मात्र अंतिम पॅनेल, मतदारसंघनिहाय उमेदवार किंवा जागावाटपाचा अधिकृत फॉर्म्युला अद्याप जाहीर झालेला नसल्याने पुढील काही दिवस जिल्हा बँकेच्या निवडणुकीच्या दृष्टीने निर्णायक ठरणार आहेत.

फलटण शहरात ८ ठिकाणी अत्याधुनिक सार्वजनिक स्वच्छतागृहांची उभारणी

0
फलटण शहरात ८ ठिकाणी अत्याधुनिक सार्वजनिक स्वच्छतागृहांची उभारणी

फलटण शहरात ८ ठिकाणी अत्याधुनिक सार्वजनिक स्वच्छतागृहांची उभारणी

फलटण, दि. २ (प्रतिनिधी) : शहरातील सार्वजनिक ठिकाणी स्वच्छतागृहांची पुरेशी सुविधा उपलब्ध नसल्यामुळे नागरिक, महिला, ज्येष्ठ नागरिक तसेच शहरात येणाऱ्या नागरिकांची मोठी गैरसोय होत होती. ही समस्या लक्षात घेऊन फलटण नगरपरिषदेच्या वतीने शहरातील विविध प्रमुख ठिकाणी अत्याधुनिक सार्वजनिक स्वच्छतागृहे उभारण्याचे काम हाती घेण्यात आले आहे.

माजी खासदार रणजितसिंह नाईक निंबाळकर आणि आमदार सचिन पाटील यांच्या मार्गदर्शनाखाली, तसेच नगराध्यक्ष समशेरसिंह नाईक निंबाळकर यांच्या पुढाकारातून शहरात तब्बल ८ ठिकाणी अत्याधुनिक मुताऱ्या व सार्वजनिक स्वच्छतागृहे उभारण्यात येत आहेत. महात्मा गांधी जयंतीचे औचित्य साधून या उपक्रमाला सुरुवात करण्यात आली.

या उपक्रमांतर्गत अहिल्यादेवी शॉपिंग सेंटर आणि महात्मा फुले चौक येथे सार्वजनिक स्वच्छतागृहांची उभारणी करण्यात आली असून, लवकरच इतर ठिकाणीही ही सुविधा उपलब्ध करून देण्यात येणार आहे. शहरातील नागरिकांना स्वच्छ, सुरक्षित आणि सुलभ स्वच्छतागृहांची सुविधा मिळावी, तसेच सार्वजनिक ठिकाणी स्वच्छता राखण्यास मदत व्हावी, हा या उपक्रमामागील प्रमुख उद्देश आहे.

उभारण्यात येणाऱ्या या स्वच्छतागृहांमुळे बाजारपेठ, प्रमुख चौक आणि सार्वजनिक वर्दळीच्या ठिकाणी येणाऱ्या नागरिकांची गैरसोय दूर होण्यास मदत होणार आहे. विशेषतः महिला व ज्येष्ठ नागरिकांसाठी ही सुविधा उपयुक्त ठरणार असून, शहराच्या स्वच्छतेच्या दृष्टीनेही या उपक्रमाचे महत्त्व अधोरेखित होत आहे.

दरम्यान, आरोग्य समितीचे सभापती सचिन अहिवळे यांनी अहिल्यादेवी शॉपिंग सेंटर व महात्मा फुले चौक येथे उभारण्यात आलेल्या स्वच्छतागृहांची पाहणी करून कामाची माहिती घेतली. स्वच्छतागृहांची नियमित स्वच्छता, पाणीपुरवठा आणि देखभाल व्यवस्थित ठेवण्याच्या दृष्टीने आवश्यक बाबींवरही यावेळी चर्चा करण्यात आली.

यावेळी गटनेते रोहित नागटिळे, पाणीपुरवठा समितीचे सभापती राहुल निंबाळकर, नियोजन समितीचे सभापती संदीप चोरमले, नगरसेवक अशोकराव जाधव, किरण राऊत, माजी नगरसेवक अजय माळवे आदी उपस्थित होते.

शहरातील नागरिकांना मूलभूत सुविधा उपलब्ध करून देतानाच स्वच्छ व सुंदर फलटण घडविण्यासाठी सार्वजनिक स्वच्छतागृहांचा हा उपक्रम महत्त्वपूर्ण ठरणार असल्याचे यावेळी उपस्थितांनी सांगितले.

महात्मा गांधी जयंतीनिमित्त फलटण नगरपरिषदेच्या वतीने अभिवादन

0
महात्मा गांधी जयंतीनिमित्त फलटण नगरपरिषदेच्या वतीने अभिवादन

महात्मा गांधी जयंतीनिमित्त फलटण नगरपरिषदेच्या वतीने अभिवादन

फलटण : राष्ट्रपिता महात्मा गांधी यांच्या जयंतीनिमित्त फलटण नगरपरिषदेच्या वतीने गजानन चौक येथे महात्मा गांधी यांच्या पूर्णाकृती पुतळ्यास पुष्पहार अर्पण करून अभिवादन करण्यात आले.

महात्मा गांधी यांच्या जयंतीनिमित्त आयोजित या कार्यक्रमात नगरपरिषदेच्या पदाधिकारी, नगरसेवक, अधिकारी व कर्मचाऱ्यांनी महात्मा गांधी यांच्या स्मृतींना अभिवादन केले. सत्य, अहिंसा, स्वच्छता आणि सामाजिक एकोपा या गांधीजींच्या विचारांचे स्मरण यावेळी करण्यात आले.

या कार्यक्रमास गटनेते रोहित नागटिळे, आरोग्य समितीचे सभापती सचिन अहिवळे, पाणीपुरवठा समितीचे सभापती राहुल निंबाळकर, नियोजन समितीचे सभापती संदीप चोरमले, नगरसेवक किरण राऊत, नगरसेवक अशोकराव जाधव, माजी नगरसेवक अजय माळवे, नगरपरिषदेचे अधिकारी विनोद जाधव, कर्मचारी सचिन घोलप आदी उपस्थित होते.

महात्मा गांधी यांच्या विचारांमधून समाजात स्वच्छता, शांतता, बंधुभाव आणि सामाजिक जबाबदारीची भावना निर्माण करण्याचा संदेश मिळतो. त्यांच्या जयंतीनिमित्त फलटण नगरपरिषदेच्या वतीने अभिवादन करून त्यांच्या कार्याला उजाळा देण्यात आला.