Sunday, November 22, 2026
Home Blog Page 19

‘दादा असते तर अशी यादी दिली असती का?’; जय पवारांचा पुरुषोत्तम जगतापांना थेट सवाल

0
‘दादा असते तर अशी यादी दिली असती का?’; जय पवारांचा पुरुषोत्तम जगतापांना थेट सवाल

सोमेश्वर कारखाना निवडणुकीच्या प्रचारात राजकीय वातावरण तापले; अजित पवारांच्या आठवणींना उजाळा

बारामती, प्रतिनिधी : श्री सोमेश्वर सहकारी साखर कारखान्याच्या पंचवार्षिक निवडणुकीची रणधुमाळी आता अंतिम टप्प्यात पोहोचली असून, प्रचारसभांमधून आरोप-प्रत्यारोपांना धार आली आहे. राष्ट्रवादी काँग्रेसचे युवा नेते जय पवार यांनी कारखान्याचे विद्यमान अध्यक्ष पुरुषोत्तम जगताप यांच्या भूमिकेवर थेट प्रश्न उपस्थित करत निवडणुकीतील राजकीय संघर्ष अधिक तीव्र केला आहे.

पुरंदर तालुक्यातील जवळार्जुन येथे झालेल्या प्रचारसभेत जय पवार यांनी सोमेश्वर कारखान्याची निवडणूक सर्वांनी एकत्र येऊन बिनविरोध करण्यासाठी झालेल्या चर्चेचा संदर्भ दिला. उमेदवारांची यादी आणि जागावाटपावरून मतभेद निर्माण झाल्याचे सांगताना, “दादा असते तर तुम्ही अशी यादी दिली असती का?” असा थेट सवाल त्यांनी पुरुषोत्तम जगताप यांना केला.

अजित पवारांच्या आठवणीने जय पवार भावूक

प्रचारसभेत जय पवार यांनी दिवंगत अजित पवार यांच्या आठवणींना उजाळा दिला. “दादांचा फोटो बघून मन भरून येतं,” अशी भावना व्यक्त करत अजित पवार यांच्या मार्गदर्शनाखाली सर्वांना सोबत घेऊन निर्णय घेतले जात असल्याचे त्यांनी सांगितले.

नाझरे-सुपे परिसरातील प्रचारसभेत बोलताना, “दादा नसताना अशा प्रचारसभा घ्याव्या लागतील, असे आयुष्यात कधीच वाटले नव्हते,” असे म्हणत जय पवार भावूक झाले. अजित पवार यांच्या निधनानंतर सुनेत्रा पवार आणि कुटुंबावर मोठे दुःख कोसळले असतानाही जबाबदारी स्वीकारून निवडणुकीच्या मैदानात उतरावे लागल्याचे त्यांनी नमूद केले.

‘सोमेश्वर कारखाना कोणाचीही वैयक्तिक मालमत्ता नाही’

सोमेश्वर सहकारी साखर कारखाना हा कोणत्याही एका व्यक्तीची किंवा कुटुंबाची वैयक्तिक मालमत्ता नसून हजारो सभासद आणि ऊस उत्पादक शेतकऱ्यांच्या कष्टातून उभा राहिलेला सहकाराचा वारसा आहे, अशी भूमिका जय पवार यांनी मांडली.

कारखान्याचा विकास, आर्थिक शिस्त, सभासदांचे हित आणि ऊस उत्पादक शेतकऱ्यांना न्याय देणे हेच केंद्रस्थानी असले पाहिजे, असेही त्यांनी स्पष्ट केले.

अजित पवारांच्या नावावरूनही वाद

दरम्यान, सोमेश्वर कारखाना निवडणुकीच्या प्रचारात दिवंगत अजित पवार यांच्या नावाचा आणि छायाचित्राचा वापर करण्यावरूनही वाद निर्माण झाला आहे. जय पवार यांच्या तक्रारीनंतर निवडणूक निर्णय अधिकाऱ्यांनी पुरुषोत्तम जगताप यांच्या पॅनेलला प्रचार साहित्यामध्ये अजित पवारांचे नाव व छायाचित्र वापरण्याबाबत निर्देश दिल्याचे वृत्त आहे. या निर्णयावर जगताप यांनी पुनर्विचाराची मागणी केली आहे.

२१ जागांसाठी ११ ऑक्टोबरला मतदान

सोमेश्वर सहकारी साखर कारखान्याच्या २१ संचालक जागांसाठी निवडणूक होत असून ११ ऑक्टोबर रोजी मतदान, तर १२ ऑक्टोबर रोजी मतमोजणी होणार आहे. निवडणुकीच्या अंतिम टप्प्यात विविध पॅनेलच्या प्रचाराला वेग आला असून पवार कुटुंबाशी संबंधित राजकीय समीकरणांमुळे या निवडणुकीकडे संपूर्ण बारामती तालुक्याचे लक्ष लागले आहे.

जय पवार यांच्या ताज्या वक्तव्यामुळे पुरुषोत्तम जगताप यांच्या नेतृत्वाखालील गट आणि राष्ट्रवादी काँग्रेस पुरस्कृत पॅनेलमधील संघर्ष आणखी तीव्र होण्याची शक्यता व्यक्त केली जात आहे. त्यामुळे मतदानाच्या अंतिम टप्प्यात सभासद कोणाच्या बाजूने कौल देतात, याकडे सर्वांचे लक्ष लागले आहे.

साताऱ्यात किरकोळ वादाचा दुर्दैवी अंत; बॅटच्या मारहाणीत अल्पवयीन मुलीचा मृत्यू

0
साताऱ्यात किरकोळ वादाचा दुर्दैवी अंत; बॅटच्या मारहाणीत अल्पवयीन मुलीचा मृत्यू

गोडोलीतील धक्कादायक घटना; शिक्षक वडिलांना अटक, न्यायालयाकडून तीन दिवसांची पोलिस कोठडी

सातारा, प्रतिनिधी : घरातील किरकोळ वादाचे रूपांतर टोकाला जाऊन अल्पवयीन मुलीच्या मृत्यूपर्यंत पोहोचल्याची धक्कादायक घटना सातारा शहरातील गोडोली परिसरात घडली. या प्रकरणी शाहूपुरी पोलिसांनी मुलीचे वडील पुरुषोत्तम कदम यांना अटक केली असून, न्यायालयाने त्यांना तीन दिवसांची पोलिस कोठडी सुनावली आहे. या घटनेने परिसरात खळबळ उडाली आहे.

पोलिसांकडून मिळालेल्या प्राथमिक माहितीनुसार, घरामध्ये टीव्ही आणि मोबाईल बंद करण्यास सांगितल्यावर वडील आणि मुलीमध्ये वाद झाला. या वादातून घरातील वातावरण तणावपूर्ण झाले. याचदरम्यान मुलीकडून तिच्या लहान बहिणीलाही मारहाण झाल्याचे तिच्या आईने पोलिसांकडे दिलेल्या तक्रारीत नमूद केले आहे.

लहान मुलीला मारहाण झाल्यानंतर आई तिला घेऊन बेडरुममध्ये गेली आणि दरवाजा बंद केला. त्यामुळे त्यानंतर घरातील इतर भागात नेमके काय घडले, याची माहिती आईला मिळाली नसल्याचे तक्रारीत नमूद करण्यात आले आहे.

पहाटेच्या सुमारास आईला जाग आल्यानंतर तिला अल्पवयीन मुलगी निपचित अवस्थेत आढळून आली. मुलीला बॅटने मारहाण झाल्याने तिचा मृत्यू झाल्याचा आरोप आईने पोलिसांकडे दिलेल्या तक्रारीत केला आहे. घटनेची माहिती मिळताच शाहूपुरी पोलिसांनी तातडीने घटनास्थळी धाव घेतली आणि तपासाला सुरुवात केली.

या प्रकरणी पोलिसांनी खुनाचा गुन्हा दाखल करून मुलीचे वडील पुरुषोत्तम कदम यांना अटक केली. त्यांना न्यायालयात हजर करण्यात आले असता न्यायालयाने तीन दिवसांची पोलिस कोठडी सुनावली.

नेमके कारण काय? पोलिसांकडून तपास सुरू

दरम्यान, मुलीला मारहाण करण्यामागील नेमके कारण काय होते, मारहाण किती वेळ झाली, कोणत्या प्रकारच्या दुखापती झाल्या आणि तिचा मृत्यू नेमका कोणत्या कारणामुळे झाला, याचा तपास पोलिसांकडून करण्यात येत आहे.

घटनास्थळावरील परिस्थिती, उपलब्ध पुरावे तसेच संबंधित व्यक्तींचे जबाब यांची पोलिसांकडून पडताळणी केली जात आहे. शवविच्छेदन अहवाल आणि तपासातून मृत्यूचे नेमके कारण स्पष्ट होण्याची शक्यता आहे.

या प्रकरणाचा तपास शाहूपुरी पोलिसांकडून सुरू असून, उपअधीक्षक विपुल पाटील यांनी पत्रकार परिषदेत या घटनेच्या तपासाबाबत माहिती दिली. पोलिसांकडून विविध शक्यता तपासल्या जात असून, उपलब्ध पुराव्यांच्या आधारे पुढील कारवाई करण्यात येत आहे.

या घटनेमुळे गोडोली परिसरात हळहळ व्यक्त होत असून, एका कौटुंबिक वादाचा इतका गंभीर परिणाम कसा झाला, याबाबत परिसरात चर्चा सुरू आहे. पोलिस तपास पूर्ण झाल्यानंतर घटनेमागील संपूर्ण सत्य स्पष्ट होणार आहे.

फलटणमध्ये आजपासून शिवाजी विद्यापीठाचा ४६ वा मध्यवर्ती युवा महोत्सव

0
फलटणमध्ये आजपासून शिवाजी विद्यापीठाचा ४६ वा मध्यवर्ती युवा महोत्सव

४२ कलाप्रकारांच्या स्पर्धांतून विद्यार्थ्यांच्या कलागुणांना मिळणार व्यासपीठ; ९ ऑक्टोबरला समारोप

फलटण, प्रतिनिधी : शिवाजी विद्यापीठ, कोल्हापूर यांच्या ४६ व्या मध्यवर्ती युवा महोत्सवाचे आयोजन फलटण एज्युकेशन सोसायटीच्या मुधोजी महाविद्यालय, फलटण येथे ६ ते ९ ऑक्टोबर २०२६ या कालावधीत करण्यात आले आहे. कला, साहित्य, संगीत, नृत्य, नाट्य आणि सर्जनशीलतेचा सुरेख संगम घडवून आणणाऱ्या या महोत्सवासाठी फलटण नगरी सज्ज झाली आहे.

महोत्सवाचे उद्घाटन मंगळवार, ६ ऑक्टोबर रोजी सायंकाळी ४ वाजता मुख्य व्यासपीठावर शिवाजी विद्यापीठाच्या प्र-कुलगुरू प्रा. डॉ. श्रीमती जे. पी. जाधव यांच्या हस्ते होणार आहे. फलटण एज्युकेशन सोसायटीचे अध्यक्ष श्रीमंत रामराजे नाईक निंबाळकर कार्यक्रमाच्या अध्यक्षस्थानी राहणार आहेत.

उद्घाटन सोहळ्यास संस्थेचे चेअरमन श्रीमंत रघुनाथराजे नाईक निंबाळकर, सेक्रेटरी श्रीमंत संजीवराजे नाईक निंबाळकर, विद्यापीठाच्या व्यवस्थापन परिषद सदस्य प्रा. डॉ. आर. व्ही. गुरव, प्रा. डॉ. बी. एस. सातपुते, विद्यार्थी विकास विभागाचे प्रभारी संचालक प्रा. डॉ. एस. जी. घाणे यांच्यासह विविध मान्यवर उपस्थित राहणार आहेत.

४२ कलाप्रकारांत रंगणार स्पर्धा

चार दिवस चालणाऱ्या या युवा महोत्सवात तब्बल ४२ कलाप्रकारांच्या स्पर्धा आयोजित करण्यात आल्या आहेत. लोकसंगीत वाद्यवृंद, भारतीय समूहगीत, लोककला, लोकनृत्य, शास्त्रीय नृत्य, सुगम गायन, शास्त्रीय गायन, नाट्यसंगीत, एकपात्री अभिनय, मूकनाट्य, नकला, पथनाट्य, वक्तृत्व, वादविवाद, प्रश्नमंजुषा, लघुपट, छायाचित्रण, रांगोळी, मेहंदी, मातीकाम, कातरकाम, व्यंगचित्र, स्थळचित्रण तसेच सर्जनशील रचनाकृती अशा विविध कलाप्रकारांमध्ये विद्यार्थी आपली कला व कौशल्य सादर करणार आहेत.

शोभायात्रेने होणार महोत्सवाला सुरुवात

मंगळवारी सकाळी ८ ते दुपारी १ या वेळेत सहभागी विद्यार्थ्यांची नोंदणी होणार आहे. त्यानंतर संघ व्यवस्थापकांची बैठक घेऊन विविध स्पर्धांमधील सादरीकरणाचा क्रम निश्चित केला जाणार आहे.

दुपारी २ वाजता मुधोजी महाविद्यालयाच्या मैदानापासून मुख्य व्यासपीठापर्यंत भव्य शोभायात्रा काढण्यात येणार आहे. त्यानंतर उद्घाटन सोहळा पार पडेल. लोकसंगीत वाद्यवृंदाच्या सादरीकरणाने महोत्सवातील सांस्कृतिक कार्यक्रमांना प्रारंभ होणार आहे.

दोन दिवस विविध ठिकाणी स्पर्धांचा जल्लोष

बुधवार, ७ ऑक्टोबर आणि गुरुवार, ८ ऑक्टोबर रोजी महाविद्यालयाच्या मुख्य व्यासपीठासह प्राचार्य शिवाजीराव भोसले सभागृह आणि विविध कक्षांमध्ये एकाचवेळी विविध स्पर्धा पार पडणार आहेत. त्यामुळे संपूर्ण महाविद्यालय परिसरात कला आणि सांस्कृतिक कार्यक्रमांची रंगत पाहायला मिळणार आहे.

शुक्रवार, ९ ऑक्टोबर रोजी सकाळी प्रश्नमंजुषा स्पर्धेची अंतिम फेरी होणार आहे. त्यानंतर दुपारी १ वाजता शिवाजी विद्यापीठाचे कुलगुरू प्रा. डॉ. आर. के. कामत यांच्या प्रमुख उपस्थितीत समारोप व पारितोषिक वितरण समारंभ होणार आहे. या कार्यक्रमाच्या अध्यक्षस्थानी श्रीमंत रामराजे नाईक निंबाळकर राहणार आहेत.

कलागुणांसोबत व्यक्तिमत्त्व विकासालाही चालना

युवा महोत्सव हा केवळ स्पर्धांचा कार्यक्रम नसून विद्यार्थ्यांच्या कलात्मक अभिव्यक्तीला, नेतृत्वगुणांना, संघभावनेला आणि व्यक्तिमत्त्व विकासाला चालना देणारे महत्त्वपूर्ण व्यासपीठ आहे. विविध महाविद्यालयांतील विद्यार्थी एकत्र आल्यामुळे सांस्कृतिक देवाणघेवाण, सर्जनशीलता आणि निकोप स्पर्धेची भावना अधिक दृढ होण्यास मदत होणार आहे.

महोत्सवाच्या यशस्वी आयोजनासाठी प्राचार्य डॉ. पी. एच. कदम यांच्या मार्गदर्शनाखाली प्रा. एल. सी. वेळेकर, प्रा. डॉ. ए. एन. शिंदे, प्रा. डॉ. टी. पी. शिंदे, श्री. आर. वाय. गायकवाड, कु. ए. एस. आडके यांच्यासह महाविद्यालयातील प्राध्यापक, शिक्षकेतर कर्मचारी आणि विद्यार्थी परिश्रम घेत आहेत.

फलटण राष्ट्रवादी काँग्रेस पार्टी (शरदचंद्र पवार ) शहराध्यक्षपदी आमिरभाई शेख

0
फलटण राष्ट्रवादी काँग्रेस पार्टी (शरदचंद्र पवार ) शहराध्यक्षपदी आमिरभाई शेख

फलटण : सर्वसामान्य नागरिकांच्या अडचणी, गरजूंचे प्रश्न आणि अन्यायाच्या घटनांविरोधात सातत्याने आवाज उठविणारे सामाजिक व राजकीय कार्यकर्ते आमिरभाई शेख यांची राष्ट्रवादी काँग्रेस पार्टी (शरदचंद्र पवार) पक्षाच्या फलटण शहराध्यक्षपदी नियुक्ती करण्यात आली आहे.

फलटण शहरातील सामाजिक आणि राजकीय क्षेत्रात सक्रिय असलेल्या आमिरभाई शेख यांनी विविध प्रश्नांवर नागरिकांच्या बाजूने भूमिका घेतली आहे. सामान्य नागरिकांच्या अडचणी समजून घेऊन त्या प्रशासनापर्यंत पोहोचविणे, संबंधित प्रश्नांचा पाठपुरावा करणे तसेच अन्यायग्रस्तांना न्याय मिळवून देण्यासाठी प्रयत्न करणे, या माध्यमातून त्यांनी शहरात आपली कार्यशैली निर्माण केली आहे.

नागरिकांशी सातत्याने संपर्क ठेवत त्यांच्या प्रश्नांना प्राधान्य देण्याचा प्रयत्न त्यांच्या सामाजिक कार्यातून दिसून येतो. त्यामुळे शहराध्यक्षपदाची जबाबदारी त्यांच्याकडे सोपविण्यात आल्याने पक्षाच्या स्थानिक संघटनात्मक कामाला नवी दिशा मिळण्याची अपेक्षा व्यक्त होत आहे.

नियुक्तीनंतर बोलताना आमिरभाई शेख यांनी पक्ष संघटना अधिक मजबूत करण्यावर भर देणार असल्याचे स्पष्ट केले. शहरातील विविध भागांमध्ये कार्यकर्त्यांचे जाळे अधिक प्रभावी करणे, कार्यकर्त्यांना एकत्र घेऊन पक्षाचे संघटनात्मक उपक्रम राबविणे आणि नागरिकांच्या मूलभूत प्रश्नांना पक्षाच्या माध्यमातून योग्य व्यासपीठ उपलब्ध करून देणे, यासाठी प्रयत्न करण्याचा निर्धार त्यांनी व्यक्त केला.

शहरातील सर्वसामान्य नागरिकांच्या प्रश्नांवर सातत्याने पाठपुरावा करण्यासोबतच पक्षाच्या विचारधारा आणि संघटनात्मक भूमिका नागरिकांपर्यंत पोहोचविण्यावरही आगामी काळात भर दिला जाणार असल्याचे सांगण्यात आले.

आमिरभाई शेख यांच्या नियुक्तीचे राष्ट्रवादी काँग्रेस (शरदचंद्र पवार) पक्षातील पदाधिकारी, कार्यकर्ते, समर्थक आणि त्यांच्या सहकाऱ्यांकडून स्वागत करण्यात आले. शहराध्यक्ष म्हणून मिळालेली नवी जबाबदारी स्वीकारताना नागरिकांच्या प्रश्नांना केंद्रस्थानी ठेवून काम करण्याचे आव्हान त्यांच्यासमोर असणार आहे.

अकलूजकरांनो, प्रत्येक थेंब मोलाचा! पाणी जपून वापरा; नगरपरिषदेकडून नागरिकांना आवाहन

0
अकलूजकरांनो, प्रत्येक थेंब मोलाचा! पाणी जपून वापरा; नगरपरिषदेकडून नागरिकांना आवाहन

अकलूज : सोलापूर जिल्ह्यात यावर्षी पावसाचे प्रमाण अल्प राहिल्याने पाणीटंचाईची परिस्थिती निर्माण झाली असून, धरणातील पाणीसाठ्याची पातळी दिवसेंदिवस कमी होत आहे. या पार्श्वभूमीवर अकलूज नगरपरिषद प्रशासनाने शहरातील नागरिकांना पाणी काटकसरीने व जपून वापरण्याचे आवाहन केले आहे.

अकलूज नगरपरिषद हद्दीतील नागरिकांना उपलब्ध करून देण्यात येणाऱ्या पाण्याचा गरजेपुरताच वापर करून पाणी बचतीस प्राधान्य द्यावे, असे आवाहन करण्यात आले आहे. सध्याच्या परिस्थितीत पाण्याचा प्रत्येक थेंब महत्त्वाचा असून, नागरिकांनी पाणी वाया जाणार नाही याची विशेष काळजी घेणे आवश्यक आहे.

दरम्यान, शहरातील काही ठिकाणी नागरिकांच्या नळांना तोट्या नसल्याचे निदर्शनास आले आहे. त्यामुळे संबंधित नागरिकांनी आपल्या नळांना तात्काळ योग्य तोट्या बसवून घ्याव्यात. नळातून अनावश्यक पाणी वाहत राहणार नाही तसेच पाण्याचा अपव्यय होणार नाही, याची दक्षता घ्यावी.

‘नळांना तोट्या बसवा, पाण्याचा अपव्यय टाळा’ असा संदेश नगरपरिषद प्रशासनाने दिला आहे. तसेच वाहन धुणे, अंगण व रस्ते धुणे किंवा इतर अनावश्यक कामांसाठी पाण्याचा अतिरिक्त वापर टाळावा, असेही आवाहन करण्यात आले आहे.

पाणीटंचाईच्या परिस्थितीत नागरिकांनी नगरपरिषद प्रशासनास सहकार्य करून उपलब्ध पाण्याचा योग्य पद्धतीने वापर करावा. ‘पाणी गरजेपुरतेच वापरा आणि भविष्यासाठी पाणी वाचवा’ हा संदेश प्रत्येक नागरिकाने आचरणात आणणे गरजेचे आहे.

अकलूज नगरपरिषद प्रशासन नागरिकांना आवश्यक सेवा उपलब्ध करून देण्यासाठी तत्पर असून, सध्याच्या पाणीटंचाईच्या परिस्थितीत नागरिकांचे सहकार्य अत्यंत महत्त्वाचे असल्याचे सांगण्यात आले आहे.

शिवतेजसिंह उदयसिंह मोहिते-पाटील यांच्या मार्गदर्शनाखाली नागरिकांनी पाणी बचतीसाठी पुढाकार घ्यावा, असे आवाहन करण्यात आले आहे.

वाढदिवसाचा आनंद मूकबधिर विद्यार्थ्यांसोबत; विश्वजीत मठपती यांचा  सामाजिक उपक्रम

0
वाढदिवसाचा आनंद मूकबधिर विद्यार्थ्यांसोबत; विश्वजीत मठपती यांचा  सामाजिक उपक्रम

मूकबधिर विद्यालयाच्या विनाअनुदानित वसतिगृहाला जीवनावश्यक वस्तूंची मदत; विद्यार्थ्यांसोबत साधला संवाद

फलटण :- मूकबधिर विद्यार्थ्यांच्या शिक्षण व दैनंदिन गरजांना हातभार लावण्याच्या उद्देशाने विश्वजीत मठपती यांनी आपल्या वाढदिवसानिमित्त सामाजिक बांधिलकी जपत अभिनव उपक्रम राबविला. वाढदिवसाच्या निमित्ताने होणारा अनावश्यक खर्च टाळून त्यांनी मूकबधिर विद्यालयातील विद्यार्थ्यांसाठी चालविण्यात येणाऱ्या विनाअनुदानित वसतिगृहाला विविध जीवनावश्यक वस्तूंचे वाटप केले.

या मदतीमध्ये गहू, तांदूळ, साखर तसेच विद्यार्थ्यांसाठी पार्ले बिस्किटांचा समावेश होता. वसतिगृहातील विद्यार्थ्यांच्या दैनंदिन गरजा लक्षात घेऊन करण्यात आलेल्या या मदतीमुळे विद्यार्थ्यांसह वसतिगृह व्यवस्थापनालाही मोठा आधार मिळाला.

यावेळी विश्वजीत मठपती यांनी विद्यार्थ्यांसोबत वेळ घालवत त्यांच्या शिक्षणाची परिस्थिती, दैनंदिन जीवन आणि त्यांना भेडसावणाऱ्या अडचणी जाणून घेतल्या. विद्यार्थ्यांनीही मठपती यांना वाढदिवसानिमित्त मनःपूर्वक शुभेच्छा देत त्यांच्याप्रती कृतज्ञता व्यक्त केली.

सध्याच्या काळात वाढदिवसाच्या निमित्ताने पार्ट्या, अनावश्यक खर्च आणि दिखाव्याला मोठे महत्त्व दिले जाते. मात्र, आपल्या आनंदाचा काही भाग गरजू आणि वंचित घटकांसोबत वाटून घेण्याचा निर्णय घेत विश्वजीत मठपती यांनी सामाजिक संवेदनशीलतेचा आदर्श निर्माण केला आहे. विशेषतः मूकबधिर विद्यार्थ्यांसाठी शासनाची नियमित मदत उपलब्ध नसतानाही त्यांच्या निवास, शिक्षण आणि दैनंदिन गरजा पूर्ण करण्यासाठी सुरू असलेल्या प्रयत्नांना अशा सामाजिक मदतीमुळे निश्चितच बळ मिळते.

‘आपला आनंद इतरांच्या चेहऱ्यावर दिसला, तर त्यापेक्षा मोठा वाढदिवसाचा आनंद कोणता?’ या भावनेतून करण्यात आलेला हा उपक्रम विद्यार्थ्यांच्या चेहऱ्यावर आनंद फुलवणारा ठरला. वाढदिवस साजरा करण्याची ही आगळीवेगळी पद्धत सामाजिक बांधिलकी, सेवाभाव आणि माणुसकीचा संदेश देणारी ठरली.

या उपक्रमावेळी युवा उद्योजक अमर पिसाळ, सुमित मठपती, प्रद्युमन मठपती, स्वप्नील पवार, जीवन पिसाळ, अक्षय जगदाळे, उत्सव वाघमारे, निलेश पवार, अनुज मठपती तसेच विद्यालयातील शिक्षकवर्ग उपस्थित होता.

विद्यार्थ्यांच्या चेहऱ्यावर उमटलेला आनंद, त्यांच्यासोबत झालेला संवाद आणि मिळालेल्या मनःपूर्वक शुभेच्छांमुळे विश्वजीत मठपती यांचा वाढदिवस सामाजिक उपक्रमातून विशेष आणि अविस्मरणीय ठरला. त्यांच्या या उपक्रमाचे उपस्थितांकडून कौतुक करण्यात आले.

जिल्हा बँक निवडणुकीच्या अर्जांची आज छाननी; हरकती आणि पुराव्यांवर ठरणार उमेदवारांचे भवितव्य

0
जिल्हा बँक निवडणुकीच्या अर्जांची आज छाननी; हरकती आणि पुराव्यांवर ठरणार उमेदवारांचे भवितव्य

सातारा | प्रतिनिधी. सातारा जिल्हा मध्यवर्ती सहकारी बँकेच्या निवडणुकीसाठी दाखल करण्यात आलेल्या उमेदवारी अर्जांची आज, ५ ऑक्टोबर रोजी दुपारी १२ वाजता छाननी होणार आहे. जिल्हा बँकेच्या सभागृहात निवडणूक निर्णय अधिकारी यांच्या उपस्थितीत ही प्रक्रिया पार पडणार असून, दाखल झालेल्या अर्जांवर करण्यात आलेल्या हरकती तसेच त्या हरकतींच्या समर्थनार्थ सादर करण्यात आलेल्या कागदपत्रांची तपासणी केली जाणार आहे.

जिल्हा बँकेच्या २१ जागांसाठी मोठ्या संख्येने उमेदवारी अर्ज दाखल झाल्याने छाननी प्रक्रियेला विशेष महत्त्व प्राप्त झाले आहे. उमेदवारांची पात्रता, अर्जातील माहिती, आवश्यक कागदपत्रे तसेच निवडणूक नियमांचे पालन यांची तपासणी या प्रक्रियेत केली जाणार आहे. त्यामुळे कोणते अर्ज वैध ठरतात आणि कोणत्या अर्जांवर आक्षेप घेतला जातो, याकडे जिल्ह्यातील राजकीय वर्तुळाचे लक्ष लागले आहे.

हरकतींसोबत पुरावे सादर करणे महत्त्वाचे

उमेदवारी अर्जावर हरकत नोंदविताना संबंधित हरकतीच्या समर्थनार्थ आवश्यक पुरावे आणि कागदपत्रे सादर करणे महत्त्वाचे असल्याचे निवडणूक प्रशासनाने स्पष्ट केले आहे. त्यामुळे केवळ हरकत नोंदविण्यापेक्षा त्यासोबत सादर होणाऱ्या पुराव्यांना छाननी प्रक्रियेत महत्त्व प्राप्त होणार आहे.

कोणाचे अर्ज वैध, कोणाचे बाद?

जिल्हा बँकेच्या निवडणुकीत विविध मतदारसंघांतून अनेक इच्छुकांनी उमेदवारी अर्ज दाखल केले आहेत. त्यामुळे आजच्या छाननीनंतर निवडणुकीच्या रिंगणातील उमेदवारांची संख्या किती राहणार, याचे चित्र स्पष्ट होणार आहे. विशेषतः ज्या उमेदवारांच्या अर्जावर हरकती दाखल करण्यात आल्या आहेत, त्यांच्या अर्जांबाबत निवडणूक निर्णय अधिकारी कोणता निर्णय घेतात, याकडे सर्वांचे लक्ष आहे.

फलटणच्या राजकीय समीकरणांकडेही लक्ष

दरम्यान, फलटण तालुक्यातील उमेदवारांच्या अर्जांची छाननीही चर्चेचा विषय ठरणार आहे. रामराजे नाईक-निंबाळकर आणि रणजितसिंह नाईक-निंबाळकर यांच्याशी संबंधित राजकीय गटांच्या भूमिकेकडेही जिल्ह्याचे लक्ष लागले आहे. छाननीनंतर उमेदवारांचे चित्र बदलल्यास त्याचा आगामी निवडणुकीतील राजकीय समीकरणांवर परिणाम होण्याची शक्यता व्यक्त केली जात आहे.

माघारीनंतर अंतिम लढतीचे चित्र स्पष्ट होणार

छाननीची प्रक्रिया पूर्ण झाल्यानंतर वैध उमेदवारांची यादी स्पष्ट होईल. त्यानंतर उमेदवारी अर्ज मागे घेण्याच्या टप्प्यात कोण माघार घेतात आणि कोण निवडणुकीच्या मैदानात कायम राहतात, यावर अंतिम लढतींचे स्वरूप निश्चित होणार आहे.

त्यामुळे आजची छाननी ही केवळ उमेदवारी अर्जांची प्रशासकीय प्रक्रिया न राहता, सातारा जिल्हा मध्यवर्ती सहकारी बँकेच्या निवडणुकीतील पुढील राजकीय हालचालींची दिशा ठरवणारा महत्त्वाचा टप्पा ठरणार आहे.

मुधोजी हायस्कूलच्या Hindustan FC Under-13 संघाचे फुटबॉलमध्ये शानदार यश; सातारा जिल्हास्तरीय स्पर्धेत प्रथम क्रमांक

0
मुधोजी हायस्कूलच्या Hindustan FC Under-13 संघाचे फुटबॉलमध्ये शानदार यश; सातारा जिल्हास्तरीय स्पर्धेत प्रथम क्रमांक

सातारा : Satara District Football Association तर्फे सातारा येथे आयोजित करण्यात आलेल्या Sub-Junior Boys Football Tournament 2026-27 स्पर्धेत Hindustan FC Under-13 संघाने उत्कृष्ट खेळाचे प्रदर्शन करत प्रथम क्रमांक पटकावला. या शानदार कामगिरीबद्दल विजेत्या संघातील खेळाडू, प्रशिक्षक व मार्गदर्शकांचे सर्व स्तरातून अभिनंदन होत आहे.

या स्पर्धेत Hindustan FC Under-13 संघाने सुरुवातीपासूनच दमदार खेळ करत प्रतिस्पर्धी संघांवर वर्चस्व राखले. संघातील खेळाडूंनी सांघिक भावना, उत्कृष्ट पासिंग, आक्रमक खेळ तसेच बचावफळीतील भक्कम कामगिरीच्या जोरावर विजेतेपदावर आपले नाव कोरले.

मुधोजी हायस्कूलच्या या अभूतपूर्व क्रीडा कामगिरीबद्दल आणि विभागस्तरीय स्पर्धेसाठी झालेल्या निवडीबद्दल महाराष्ट्र विधान परिषदेचे माजी सभापती श्रीमंत रामराजे नाईक-निंबाळकर, माजी आमदार दीपक चव्हाण, फलटण कृषी उत्पन्न बाजार समितीचे चेअरमन श्रीमंत रघुनाथराजे नाईक-निंबाळकर, महाराष्ट्र खो-खो असोसिएशनचे माजी अध्यक्ष श्रीमंत संजीवराजे नाईक-निंबाळकर यांनी विजेत्या खेळाडूंचे व मार्गदर्शकांचे अभिनंदन केले.

यावेळी फ.ए.सो. क्रीडा समितीचे चेअरमन शिवाजीराव घोरपडे, फलटण एज्युकेशन सोसायटीच्या नियामक मंडळाचे सदस्य, प्रशासन अधिकारी अरविंद निकम, तपासणी अधिकारी दिलीप राजगुडा, सुधीर अहिवळे, प्राचार्य वसंतराव शेडगे, उपप्राचार्य ए. वाय. ननावरे, ज्युनिअर कॉलेज उपप्राचार्य सोमनाथ माने, पर्यवेक्षक आर. बी. निंबाळकर, विजय पाटील, सौ. पूजा पाटील, क्रीडा मार्गदर्शक तसेच क्रीडाप्रेमींनी विजेत्या संघाचे विशेष अभिनंदन करून पुढील विभागस्तरीय स्पर्धेसाठी शुभेच्छा दिल्या.

Hindustan FC Under-13 संघाचे हे यश फलटणच्या क्रीडा क्षेत्रासाठी अभिमानाची बाब असून, विभागस्तरीय स्पर्धेतही संघाने अशीच दमदार कामगिरी करावी, अशा शुभेच्छा सर्व स्तरांतून व्यक्त होत आहेत.

महादेव गायकवाड यांची राष्ट्रवादी काँग्रेस शरद पवार पक्षाच्या सामाजिक न्याय विभागाच्या फलटण तालुकाध्यक्षपदी निवड

0
महादेव गायकवाड यांची राष्ट्रवादी काँग्रेस शरद पवार पक्षाच्या सामाजिक न्याय विभागाच्या फलटण तालुकाध्यक्षपदी निवड

फलटण : राष्ट्रवादी काँग्रेस शरद पवार पक्षाच्या सामाजिक न्याय विभागाच्या फलटण तालुका अध्यक्षपदी श्री. महादेव गायकवाड यांची निवड करण्यात आली. पक्षाच्या संघटनात्मक बांधणीच्या पार्श्वभूमीवर ही नियुक्ती करण्यात आली असून, त्यांच्या निवडीचे पक्षातील पदाधिकारी व कार्यकर्त्यांकडून स्वागत करण्यात आले.

या निवडीचे अधिकृत पदाचे पत्र पक्षाचे जिल्हाध्यक्ष तथा माजी सहकार मंत्री बाळासाहेब पाटील यांच्या हस्ते श्री. महादेव गायकवाड यांना प्रदान करण्यात आले. यावेळी बाळासाहेब पाटील यांच्या हस्ते गायकवाड यांचा सत्कार करून त्यांना पुढील कार्यासाठी शुभेच्छा देण्यात आल्या.

सामाजिक न्याय विभागाच्या माध्यमातून समाजातील विविध घटकांशी संवाद साधणे, त्यांच्या प्रश्नांकडे लक्ष वेधणे तसेच पक्षाची भूमिका आणि संघटनात्मक कार्य अधिक व्यापक करण्याची जबाबदारी श्री. महादेव गायकवाड यांच्यावर राहणार आहे.

या नियुक्तीप्रसंगी राष्ट्रवादी काँग्रेस शरद पवार पक्षाचे प्रदेश सरचिटणीस श्री. राजाभाऊ निकम तसेच शहराध्यक्ष अमीर भाई शेख यांच्यासह पक्षाचे पदाधिकारी व कार्यकर्ते उपस्थित होते.

महादेव गायकवाड यांच्या नियुक्तीमुळे फलटण तालुक्यात सामाजिक न्याय विभागाचे संघटनात्मक काम अधिक सक्रिय होण्याची अपेक्षा व्यक्त करण्यात आली. नियुक्तीनंतर गायकवाड यांनी पक्षाने सोपविलेली जबाबदारी प्रामाणिकपणे पार पाडण्याचा निर्धार व्यक्त केला.

मुधोजी हायस्कूलचा फुटबॉलमध्ये विजयी जल्लोष; जिल्हास्तरीय स्पर्धेत पटकावले अजिंक्यपद

0
मुधोजी हायस्कूलचा फुटबॉलमध्ये विजयी जल्लोष; जिल्हास्तरीय स्पर्धेत पटकावले अजिंक्यपद

फलटण : सातारा येथील छत्रपती श्री शाहू स्टेडियमवर २८ सप्टेंबर २०२६ रोजी पार पडलेल्या जिल्हास्तरीय शालेय फुटबॉल स्पर्धेत फलटणच्या मुधोजी हायस्कूल व ज्युनिअर कॉलेजच्या १९ वर्षांखालील मुलांच्या संघाने दमदार कामगिरी करत जिल्ह्याचे विजेतेपद मिळवले. या शानदार विजयामुळे मुधोजीच्या संघाची गडहिंग्लज येथे होणाऱ्या विभागस्तरीय शालेय फुटबॉल स्पर्धेसाठी निवड झाली आहे.

स्पर्धेच्या पहिल्याच सामन्यात मुधोजीच्या खेळाडूंनी आक्रमक आणि नियोजनबद्ध खेळाचे दर्शन घडवत वाई तालुक्याच्या संघावर ३-० अशी मात केली. या विजयामुळे संघाने स्पर्धेत आपली विजयी वाटचाल सुरू केली.

उपांत्य फेरीत मुधोजीसमोर पाचगणी तालुक्याचे कडवे आव्हान होते. अत्यंत अटीतटीच्या झालेल्या या सामन्यात दोन्ही संघांनी उत्कृष्ट खेळ केला. अखेर मुधोजीच्या खेळाडूंनी संयम राखत ४-३ असा रोमांचक विजय मिळवून अंतिम फेरी गाठली.

अंतिम सामन्यात कराड तालुक्याच्या बलाढ्य संघाशी मुधोजीच्या संघाची लढत झाली. सुरुवातीपासूनच आक्रमक खेळ करत मुधोजीच्या खेळाडूंनी सामन्यावर पकड निर्माण केली. गोल करण्याच्या संधींचा योग्य फायदा घेत अखेर ५-३ असा विजय मिळवत मुधोजी हायस्कूलने जिल्हास्तरीय फुटबॉल स्पर्धेच्या विजेतेपदावर आपले नाव कोरले.

या यशामुळे मुधोजी हायस्कूलच्या क्रीडा क्षेत्रातील भक्कम परंपरेत आणखी एका मानाचा तुरा रोवला गेला आहे. आता गडहिंग्लज येथे होणाऱ्या विभागस्तरीय स्पर्धेत मुधोजीचा संघ सातारा जिल्ह्याचे प्रतिनिधित्व करणार असून, या स्पर्धेकडून क्रीडाप्रेमींच्या अपेक्षा उंचावल्या आहेत.

मुधोजी हायस्कूलच्या या उल्लेखनीय कामगिरीबद्दल महाराष्ट्र विधान परिषदेचे माजी सभापती श्रीमंत रामराजे नाईक-निंबाळकर, माजी आमदार दीपक चव्हाण, फलटण कृषी उत्पन्न बाजार समितीचे चेअरमन श्रीमंत रघुनाथराजे नाईक-निंबाळकर, महाराष्ट्र खो-खो असोसिएशनचे माजी अध्यक्ष श्रीमंत संजीवराजे नाईक-निंबाळकर, फ.ए.सो. क्रीडा समितीचे चेअरमन शिवाजीराव घोरपडे, फलटण एज्युकेशन सोसायटीच्या नियामक मंडळाचे सदस्य, प्रशासन अधिकारी अरविंद निकम, तपासणी अधिकारी दिलीप राजगुडा, सुधीर अहिवळे, प्राचार्य वसंतराव शेडगे, उपप्राचार्य ए. वाय. ननावरे, ज्युनिअर कॉलेजचे उपप्राचार्य सोमनाथ माने, पर्यवेक्षक आर. बी. निंबाळकर, विजय पाटील, सौ. पूजा पाटील, क्रीडा मार्गदर्शक तसेच सर्व क्रीडाप्रेमींनी विजेत्या खेळाडू व मार्गदर्शकांचे अभिनंदन केले.

गडहिंग्लज येथे होणाऱ्या विभागस्तरीय स्पर्धेसाठी मुधोजीच्या संघाला सर्व स्तरांतून शुभेच्छा देण्यात येत असून, विभागीय स्तरावरही संघाने चमकदार कामगिरी करावी, अशी अपेक्षा व्यक्त होत आहे.