कोळकी येथे श्रामणेर शिबिरात धम्म मार्गदर्शन; आचार-विचारांचे पालन करण्याचे आवाहन

कोळकी : येथे आयोजित श्रामणेर शिबिरात समता सैनिक दलाचे असिस्टंट स्टाफ ऑफिसर, सातारा व पुणे जिल्हा प्रभारी तसेच राज्य संघटक आयु. दादासाहेब भोसले यांनी श्रामणेर बांधवांना सखोल धम्म मार्गदर्शन केले. यावेळी त्यांनी बौद्ध धम्माचे आचार, विचार आणि संस्कार पद्धती जीवनात अंगीकारण्याचे महत्त्व पटवून देत धम्म हा केवळ धर्म नसून तो जीवन जगण्याची समतामूलक, विवेकशील आणि करुणामय पद्धती आहे, असे प्रतिपादन केले.

भोसले यांनी आपल्या मार्गदर्शनात सांगितले की, त्रिपिटकाचे अध्ययन अत्यंत महत्त्वाचे असले तरी त्याआधी “बुद्ध आणि त्यांचा धम्म” हा ग्रंथ वाचल्यास बुद्धांच्या शिकवणीचे सुलभ, स्पष्ट आणि व्यवहार्य आकलन होते. बुद्धांनी सांगितलेला मध्यम मार्ग, अष्टांगिक मार्ग, चार आर्यसत्ये आणि प्रतीत्यसमुत्पाद यांसारख्या मूलभूत तत्त्वांचा अभ्यास करून जीवनात विवेक, संयम आणि समता निर्माण करणे आवश्यक आहे. तसेच त्रिसरण व पंचशील हे बौद्ध जीवनाचे आधारस्तंभ असून, त्यांचे केवळ उच्चारण न करता ते आचरणात आणणे हीच खरी धम्मसाधना आहे, असे त्यांनी नमूद केले.

यावेळी भोसले यांनी भूमिपूजन, उद्घाटन, धम्म ध्वजवंदन, जय मंगल अष्टगाथा आणि आशीर्वाद गाथा यांचे पाली भाषेतील उच्चारण करून त्याचा मराठी अर्थ सविस्तर समजावून सांगितला. प्रत्येक विधीमागील तत्त्वज्ञान स्पष्ट करताना त्यांनी सांगितले की, बौद्ध संस्कार पद्धती ही अंधश्रद्धामुक्त, वैज्ञानिक दृष्टिकोनावर आधारित आणि मानवकल्याणाला पूरक आहे. विधी करताना केवळ परंपरा म्हणून नव्हे, तर त्यामागील धम्मार्थ समजून घेत कृती करणे आवश्यक आहे.

तसेच त्यांनी अधोरेखित केले की, बौद्ध धम्मात करुणा, मैत्री, प्रज्ञा आणि समता या मूल्यांना सर्वोच्च स्थान आहे. लोभ, द्वेष आणि मोह यांपासून दूर राहून शील, समाधी आणि प्रज्ञा या त्रिसूत्रीच्या आधारावर व्यक्तिमत्त्व घडविणे गरजेचे आहे. समाजात बंधुता, न्याय आणि समानता प्रस्थापित करण्यासाठी प्रत्येकाने धम्माचा मार्ग स्वीकारून जबाबदारीने वागले पाहिजे, असे त्यांनी सांगितले.

बौद्ध धम्माच्या पद्धतीने विधी करत असताना धम्माच्या तत्त्वांशी विसंगत असे कोणतेही वर्तन करू नये, असे आवाहन त्यांनी केले. अंधश्रद्धा, भेदभाव आणि दिखाऊपणा यांना दूर ठेवून साधेपणा, शिस्त आणि जागरूकता यांवर भर देणे आवश्यक आहे. धम्माचा मार्ग हा ज्ञान, करुणा आणि समतेचा असून, तोच खऱ्या अर्थाने मानवमुक्तीचा मार्ग आहे, असेही त्यांनी प्रतिपादन केले.

या शिबिरात श्रामणेर बांधवांनी उत्साहाने सहभाग घेतला असून, मार्गदर्शनाचा लाभ घेत धम्म आचरणाची प्रेरणा मिळाल्याची भावना त्यांनी व्यक्त केली.दिनांक 28 एप्रिल 2026 ते 7 मे 2026 या कालावधीत सुरु असणाऱ्या शिबिरामुळे धम्माबद्दलची समज अधिक दृढ झाली असून, भविष्यात धम्माच्या मूल्यांनुसार जीवन जगण्याचा संकल्प त्यांनी केला.

फलटण : वडगाव निंबाळकर पोलीस ठाण्याच्या हद्दीत काही दिवसांपूर्वी १३ वर्षीय अल्पवयीन मुलीवर तिच्याच नात्यातील व्यक्तीने अत्याचार केल्याची गंभीर घटना समोर आली होती. या अत्याचारामुळे संबंधित मुलगी गर्भवती राहिल्याचे स्पष्ट झाल्यानंतर हे प्रकरण अधिकच गंभीर बनले.
दरम्यान, आरोपीला नातेवाईकांनी मारहाण करून पोलिसांच्या ताब्यात दिले होते. पोलिसांनी त्याला अटक केल्यानंतर त्याने पोलीस कोठडीत गळफास घेऊन आत्महत्या केल्याची घटना घडली होती. या घटनेनंतर पोलिसांनी तपास अधिक तीव्र केला होता.
तपासादरम्यान फलटण येथील ‘श्री सेवा मॅटर्निटी होम’ येथे संबंधित अल्पवयीन मुलीचा बेकायदेशीर गर्भपात करण्यात आल्याचा संशय पोलिसांना आला आहे. या प्रकरणात डॉक्टर योगेश नरुटे यांच्यावर कायद्याचे उल्लंघन करून गर्भपात केल्याचा आरोप करण्यात आला आहे.
या प्रकरणात पिंटू धुमाळ याने संबंधित मुलीला रुग्णालयात आणल्याची माहिती समोर आली असून, पोलिसांनी पुढील तपासासाठी डॉक्टर योगेश नरुटे यांना ताब्यात घेतले आहे.
या घटनेमुळे परिसरात खळबळ उडाली असून, अवैध गर्भपात व लिंगनिश्चितीच्या कथित रॅकेटबाबतही चर्चांना उधाण आले आहे. यापूर्वीही अशा प्रकारच्या तक्रारी झाल्याचे स्थानिक पातळीवर बोलले जात असून, पोलिसांकडून सखोल चौकशी सुरू आहे.
सामाजिक संघटना व नागरिकांकडून या प्रकारांवर कठोर कारवाई करून अशा बेकायदेशीर कृत्यांना आळा घालण्याची मागणी होत आहे.

फलटण :- फलटण तालुक्यातील निरा उजवा कालव्यात घडलेली एक धक्कादायक घटना सध्या सर्वत्र चर्चेचा विषय बनली आहे. राजे गटाचे निष्ठावंत व प्रामाणिक कार्यकर्ते श्री. गोविंद दिलीपराव बोडरे उर्फ बंडू यांनी आपल्या अद्वितीय धाडसाने दोन नागरिकांचे प्राण वाचवून मानवतेचा आदर्श घालून दिला आहे.
मिळालेल्या माहितीनुसार, कालव्यातून जात असलेली एक चारचाकी गाडी अचानक पाण्यात बुडू लागली. परिस्थिती अत्यंत गंभीर बनली होती आणि मदतीसाठी वेळ फारच कमी होता. अशा बिकट प्रसंगी क्षणाचाही विलंब न करता बंडू बोडरे यांनी स्वतःचा जीव धोक्यात घालत थेट कालव्यात उडी घेतली.
प्रसंगावधान राखत त्यांनी कौशल्याने गाडीत अडकलेल्या दोघांना बाहेर काढले आणि स्वतः पोहत त्यांना सुरक्षित किनाऱ्यावर आणले. त्यांच्या या धाडसी कृतीमुळे दोन निष्पाप जीव वाचले.
या शौर्यपूर्ण कामगिरीमुळे परिसरात बोडरे यांच्यावर कौतुकाचा वर्षाव होत आहे. सातारा जिल्हा परिषदेच्या बरड गटाच्या सदस्या सौ. वैशाली संदीप कांबळे यांनी त्यांचे विशेष अभिनंदन करत कृतज्ञता व्यक्त केली.
याशिवाय, मा. श्री. मारुती सांगळे (संचालक, श्रीराम सहकारी साखर कारखाना, फलटण), श्री. संदीप कांबळे (केंद्रप्रमुख, महाराष्ट्र कामगार कल्याण मंडळ, सातारा), तसेच उदय बागाव आणि अमोल बागाव यांनीही बोडरे यांच्या धाडसाचे कौतुक करून त्यांना शुभेच्छा दिल्या.
ही घटना नागरिकांमध्ये धैर्य, तत्परता आणि माणुसकीचा संदेश देणारी ठरली आहे.

फलटण (प्रतिनिधी) : आगामी निवडणुकांच्या पार्श्वभूमीवर फलटण-कोरेगाव विधानसभा मतदारसंघात शिवसेना (शिंदे गट) आपली संघटनात्मक ताकद वाढवण्यासाठी आक्रमक पावले उचलत आहे. मतदारसंघातील प्रत्येक वाडी-वस्ती आणि गावागावात पक्षाचा भगवा फडकवण्यासाठी येत्या काळात १०० नवीन शाखा सुरू करण्याचे उद्दिष्ट ठेवण्यात आले असल्याची माहिती श्रीमंत संजीवराजे नाईक निंबाळकर यांनी दिली.
या संदर्भात आयोजित पत्रकार परिषदेत ते बोलत होते. यावेळी डबल महाराष्ट्र केसरी पैलवान चंद्रहार पाटील, हिंदकेसरी पैलवान संतोष आबा वेताळ, पंचायत समितीचे उपसभापती अमोल सस्ते, विराज खराडे, पिंटू नाना इवरे, अमित पवार यांसह अनेक मान्यवर उपस्थित होते.
मतदार याद्यांमध्ये पारदर्शकतेवर भर
संजीवराजे नाईक निंबाळकर यांनी सांगितले की, सध्या शासन स्तरावर मतदार याद्या अद्ययावत करण्याचे काम सुरू असून या प्रक्रियेत कोणतीही त्रुटी राहू नये यासाठी पक्षाकडून विशेष लक्ष दिले जात आहे. फलटण-कोरेगाव मतदारसंघासाठी विराज खराडे यांची ‘बीएलए-१’ (BLA-1) म्हणून नियुक्ती करण्यात आली असून त्यांना ‘बीएलए-२’ नियुक्त करण्याचे अधिकार देण्यात आले आहेत. पात्र मतदारांची नावे यादीत राहावीत आणि अपात्र नावे वगळली जावीत, हेच पक्षाचे प्रमुख धोरण असल्याचे त्यांनी स्पष्ट केले.
तरुणांसाठी नवी संधी
पक्ष विस्तार आणि संघटन बळकटीसाठी ११ मे ते १७ मे दरम्यान फलटण तालुक्यात १०० शाखांचे उद्घाटन करण्यात येणार आहे. या शाखांद्वारे तळागाळातील नागरिकांचे प्रश्न सोडवण्यासाठी कार्यकर्ते सक्रिय राहतील. विशेषतः तरुणांना राजकारण आणि समाजकारणात सहभागी होण्याची मोठी संधी उपलब्ध होणार असल्याचे त्यांनी नमूद केले. तसेच उपमुख्यमंत्री एकनाथ शिंदे यांच्या नेतृत्वाखालील विकासकामांची माहिती घराघरात पोहोचवण्यात या शाखा महत्त्वाची भूमिका बजावतील, असा विश्वास त्यांनी व्यक्त केला.
दरम्यान, कोळकी येथील अनंत मंगल कार्यालयात झालेल्या मेळाव्यास फलटण तालुक्यातील शिवसेनेचे पदाधिकारी, कार्यकर्ते आणि ग्रामस्थ मोठ्या संख्येने उपस्थित होते. यावेळी चंद्रहार पाटील यांनी माढा लोकसभा मतदारसंघात पक्षवाढीसाठी सर्वांनी जोमाने काम करण्याचे आवाहन केले.