Sunday, November 22, 2026
Home Blog Page 22

सातारा जिल्हा बँक निवडणुकीत रणजितसिंह नाईक-निंबाळकर मैदानात; रामराजेंसमोर थेट आव्हान

0
सातारा जिल्हा बँक निवडणुकीत रणजितसिंह नाईक-निंबाळकर मैदानात; रामराजेंसमोर थेट आव्हान

माजी खासदार रणजितसिंह नाईक-निंबाळकर यांचा उमेदवारी अर्ज दाखल; फलटणच्या राजकारणासह संपूर्ण सातारा जिल्ह्याचे लक्ष निवडणुकीकडे

सातारा | प्रतिनिधी : सातारा जिल्हा मध्यवर्ती सहकारी बँकेच्या पंचवार्षिक निवडणुकीची रणधुमाळी आता अधिक रंगतदार होण्याची चिन्हे आहेत. माजी खासदार रणजितसिंह नाईक-निंबाळकर यांनी जिल्हा बँकेच्या निवडणुकीसाठी उमेदवारी अर्ज दाखल केल्याने जिल्ह्यातील राजकीय हालचालींना वेग आला आहे. त्यांच्या उमेदवारीमुळे फलटणसह सातारा जिल्ह्यातील राजकीय समीकरणांकडे सर्वांचे लक्ष लागले आहे.

जिल्हा बँकेच्या निवडणुकीसाठी उमेदवारी अर्ज दाखल करण्याची प्रक्रिया २५ सप्टेंबरपासून सुरू झाली असून २१ संचालक पदांसाठी १ नोव्हेंबर २०२६ रोजी मतदान आणि ३ नोव्हेंबरला मतमोजणी होणार आहे.

रामराजे नाईक-निंबाळकर यांचे आधीच आव्हान

दरम्यान, विधान परिषदेचे माजी सभापती श्रीमंत रामराजे नाईक-निंबाळकर यांनी या निवडणुकीसाठी दोन मतदारसंघांतून उमेदवारी अर्ज दाखल केला आहे. कृषी उत्पादन व प्रक्रिया संस्था तसेच विकास सेवा सोसायटी मतदारसंघातून त्यांनी अर्ज भरल्याची माहिती समोर आली आहे.

विशेष म्हणजे काही दिवसांपूर्वी श्रीमंत  रामराजे नाईक-निंबाळकर यांनी माजी खासदार रणजितसिंह नाईक-निंबाळकर यांच्या उमेदवारीच्या पार्श्वभूमीवर आपली भूमिका जाहीर केली होती. त्यामुळे आता दोन्ही नाईक-निंबाळकर यांच्या राजकीय भूमिकांकडे विशेष लक्ष लागले आहे.

फलटणच्या राजकारणाचे पडसाद जिल्हा बँकेत?

फलटण तालुक्यात गेल्या काही काळापासून रणजितसिंह नाईक-निंबाळकर आणि श्रीमंत रामराजे नाईक-निंबाळकर यांच्यातील राजकीय संघर्ष चर्चेत राहिला आहे. आता जिल्हा बँकेच्या निवडणुकीच्या निमित्ताने या राजकीय स्पर्धेचा प्रभाव सहकार क्षेत्रातील निवडणुकीवर कितपत पडतो, याकडे राजकीय वर्तुळाचे लक्ष आहे.

महायुतीच्या समीकरणांकडेही लक्ष

जिल्हा बँकेच्या निवडणुकीत विविध राजकीय नेत्यांकडून उमेदवारी अर्ज दाखल होत असल्याने महायुतीतील जागावाटप आणि संभाव्य पॅनेलची चर्चा महत्त्वाची ठरणार आहे. भाजपचे आमदार अतुल भोसले यांनीही रामराजे नाईक-निंबाळकर यांच्या मतदारसंघातून अर्ज दाखल केला असून अंतिम उमेदवारीबाबत अद्याप स्पष्टता नसल्याचे त्यांनी सांगितले आहे.

तर मंत्री शिवेंद्रसिंहराजे भोसले यांनी जिल्हा बँकेची निवडणूक विकासाला प्राधान्य देत महायुती म्हणून एकत्र लढण्याबाबत चर्चा सुरू असल्याचे म्हटले आहे.

सातारा जिल्ह्याचे लक्ष

रणजितसिंह नाईक-निंबाळकर यांच्या उमेदवारीमुळे जिल्हा बँकेची निवडणूक अधिक चर्चेत आली आहे. मात्र अंतिम चित्र उमेदवारी अर्जांची छाननी, माघारीची प्रक्रिया आणि पॅनेलची रचना स्पष्ट झाल्यानंतरच समोर येणार आहे. त्यामुळे ही निवडणूक अटीतटीची आणि चुरशीची ठरणार का, कोणत्या मतदारसंघात कोणती राजकीय समीकरणे आकार घेणार, याकडे संपूर्ण सातारा जिल्ह्याचे लक्ष लागले आहे.

सातारा जिल्ह्यात डीजेच्या आवाजावर कडक निर्बंध; व्यक्तींना ₹५० हजार, मंडळांना ₹१ लाख अनामत

0
सातारा जिल्ह्यात डीजेच्या आवाजावर कडक निर्बंध; व्यक्तींना ₹५० हजार, मंडळांना ₹१ लाख अनामत

ध्वनिमर्यादा ओलांडल्यास अनामत रक्कम जप्त; डीजे, लाऊडस्पीकर, ॲम्प्लिफायरही जप्त होणार

सातारा | प्रतिनिधी :
सण-उत्सव आणि मिरवणुकांच्या काळात होणाऱ्या ध्वनिप्रदूषणाला आळा घालण्यासाठी मुंबई उच्च न्यायालयाने कठोर निर्देश दिले आहेत. त्यानुसार ध्वनिक्षेपक वापरणाऱ्या वैयक्तिक आयोजकांकडून ५० हजार रुपये, तर सार्वजनिक मंडळे किंवा संस्थांकडून १ लाख रुपये सुरक्षा अनामत रक्कम घेण्याचे निर्देश देण्यात आले आहेत. नियमांचे उल्लंघन झाल्यास ही रक्कम जप्त करण्याची तरतूद आहे. हे निर्देश महाराष्ट्रातील उत्सव आणि मिरवणुकांसाठी लागू असल्याचे वृत्त आहे.

ध्वनिप्रदूषणासंदर्भातील न्यायालयीन निर्देशांनुसार नागरिकांना शांतता, विश्रांती आणि झोपेचा अधिकार असून, उत्सव साजरे करताना ध्वनिमर्यादांचे पालन करणे आवश्यक आहे. ध्वनिक्षेपकाला परवानगी देताना आयोजकांकडून नियमांचे पालन करण्याची जबाबदारी निश्चित करण्यासाठी सुरक्षा अनामत घेण्याचे निर्देश देण्यात आले आहेत.

ध्वनिमर्यादेचे उल्लंघन झाल्यास कारवाई

उत्सव किंवा मिरवणुकीत ध्वनीची विहित मर्यादा ओलांडल्यास संबंधित ध्वनियंत्रणा, लाऊडस्पीकर, ॲम्प्लिफायर तसेच अन्य साहित्य जप्त करण्याची कारवाई केली जाऊ शकते. सातारा जिल्ह्यातही उत्सवांच्या पार्श्वभूमीवर नियमांची अंमलबजावणी करण्यासाठी पोलिसांकडून कारवाई करण्यात येत आहे. नुकत्याच सातारा शहरातील विसर्जन मिरवणुकीत नियमभंग करणाऱ्या १५ मंडळांवर कारवाई करून सुमारे २.२५ कोटी रुपयांचे डॉल्बी साहित्य व वाहने जप्त करण्यात आल्याचे वृत्त आहे.

रात्री १० ते सकाळी ६ पर्यंत निर्बंध

ध्वनिप्रदूषणाच्या नियमांनुसार रात्री १० ते सकाळी ६ या कालावधीत ध्वनिक्षेपकाच्या वापरावर कडक निर्बंध आहेत. उत्सवांमध्ये सार्वजनिक रस्ते व मार्गांवर फटाके फोडण्यास तसेच अतितीव्र लेझर लाईट्स आणि बीम्सच्या वापरावरही न्यायालयाने निर्बंध घातले आहेत.

आयोजकांना ‘साउंड लिमिटर’ आणि डेसिबल मीटरची काळजी

ध्वनियंत्रणेचा वापर करताना आवाजाची पातळी तपासण्यासाठी डेसिबल मोजण्याची व्यवस्था ठेवणे आणि ध्वनिमर्यादेचे पालन करणे महत्त्वाचे ठरणार आहे. परवानगीची कागदपत्रे तसेच जबाबदार व्यक्तीचे नाव आणि संपर्क क्रमांक कार्यक्रमस्थळी स्पष्टपणे उपलब्ध ठेवण्याचे निर्देशही देण्यात आले आहेत.

‘अनामत रक्कम ही केवळ औपचारिकता नाही’

अनामत रकमेच्या तरतुदीमुळे ध्वनियंत्रणा वापरणाऱ्या आयोजकांवर नियमांचे पालन करण्याची अतिरिक्त जबाबदारी येणार आहे. नियमभंग झाल्यास आर्थिक अनामत जप्त होण्यासोबतच संबंधित ध्वनियंत्रणा जप्त होण्याची कारवाई होऊ शकते.

डॉ. वैशाली कडुकर, अपर पोलीस अधीक्षक, सातारा यांच्या नावाने दिलेल्या माहितीनुसार जिल्ह्यात आगामी सण-उत्सवांच्या काळात नियमांची काटेकोर अंमलबजावणी केली जाणार असल्याचे नमूद करण्यात आले आहे.

असे आहेत प्रमुख निर्बंध

  • रात्री १० ते सकाळी ६ या वेळेत ध्वनिमर्यादेचे उल्लंघन करण्यास मनाई.
  • सार्वजनिक रस्ते व मार्गांवर फटाके फोडण्यास निर्बंध.
  • अतितीव्र लेझर लाईट्स व बीम्सच्या वापरावर बंदी.
  • ध्वनीची पातळी तपासण्यासाठी डेसिबल मोजण्याची व्यवस्था.
  • ध्वनियंत्रणेचा आवाज मर्यादेत ठेवण्याची जबाबदारी आयोजकांची.
  • नियमभंग झाल्यास सुरक्षा अनामत रक्कम जप्त होऊ शकते.
  • परवानगीची कागदपत्रे कार्यक्रमस्थळी उपलब्ध ठेवणे आवश्यक.
  • नियमभंग झाल्यास डीजे, लाऊडस्पीकर, ॲम्प्लिफायर व संबंधित साहित्य जप्त होऊ शकते.

तालुकास्तरीय शालेय क्रिकेट स्पर्धेत मुधोजी हायस्कूलचा दबदबा; १४, १७ व १९ वर्षांखालील तिन्ही गटांत विजेतेपद

0
तालुकास्तरीय शालेय क्रिकेट स्पर्धेत मुधोजी हायस्कूलचा दबदबा; १४, १७ व १९ वर्षांखालील तिन्ही गटांत विजेतेपद

तिन्ही अंतिम सामन्यांत दमदार विजय; जिल्हास्तरीय स्पर्धेसाठी मुधोजीचे संघ सज्ज

फलटण प्रतिनिधी | दि. ३० सप्टेंबर २०२६ : श्रीमंत शिवाजीराजे इंग्लिश मीडियम स्कूल (सीबीएसई), जाधववाडी यांच्या वतीने अभियांत्रिकी महाविद्यालय, ठाकुरकी येथे आयोजित फलटण तालुकास्तरीय शालेय क्रिकेट स्पर्धेत मुधोजी हायस्कूल व ज्युनिअर कॉलेज, फलटणच्या मुलांच्या संघांनी अभूतपूर्व कामगिरी करत १४, १७ आणि १९ वर्षांखालील तिन्ही गटांत विजेतेपद पटकावले. या कामगिरीमुळे तालुकास्तरीय क्रिकेट स्पर्धेत मुधोजी हायस्कूलचा दबदबा पुन्हा एकदा अधोरेखित झाला आहे.

या स्पर्धेत मुधोजी हायस्कूल, श्रीमंत शिवाजीराजे इंग्लिश मीडियम स्कूल (सीबीएसई व एसएससी), व्ही. जे. इंटरनॅशनल स्कूल, फरंदवाडी तसेच मालोजीराजे शेती विद्यालय यांसह तालुक्यातील विविध संघांनी सहभाग घेतला.

१४ वर्षांखालील गटात १० धावांनी विजय

१४ वर्षांखालील गटातील अंतिम सामना मुधोजी हायस्कूल आणि श्रीमंत शिवाजीराजे इंग्लिश मीडियम स्कूल (सीबीएसई), जाधववाडी यांच्यात झाला. नाणेफेक जिंकून मुधोजी हायस्कूलने प्रथम फलंदाजी करण्याचा निर्णय घेतला. निर्धारित ५ षटकांत मुधोजीने ३ गड्यांच्या मोबदल्यात ४४ धावा केल्या.

सिद्धेश घनवटने १२, हर्षदीप चौहान व रागवीर पवार यांनी प्रत्येकी ११, तर वैष्णव भोसलेने २ धावांचे योगदान दिले.

४५ धावांचे आव्हान घेऊन मैदानात उतरलेल्या श्रीमंत शिवाजीराजे इंग्लिश मीडियम स्कूलच्या संघाला मुधोजीच्या अचूक गोलंदाजी व उत्कृष्ट क्षेत्ररक्षणामुळे ५ षटकांत ३४ धावाच करता आल्या. हर्षदीप चौहानने २, वैष्णव भोसलेने १ बळी घेतला, तर सिद्धेश घनवटने एक खेळाडू धावचित केला. मुधोजीने हा सामना १० धावांनी जिंकत विजेतेपद पटकावले.

१७ वर्षांखालील गटात ८ धावांनी बाजी

१७ वर्षांखालील गटाच्या अंतिम सामन्यात मुधोजी हायस्कूल व ज्युनिअर कॉलेज विरुद्ध व्ही. जे. इंटरनॅशनल स्कूल असा सामना रंगला. नाणेफेक जिंकून व्ही. जे. इंटरनॅशनल स्कूलने प्रथम गोलंदाजी करण्याचा निर्णय घेतला.

मुधोजीच्या संघाने प्रथम फलंदाजी करताना ५ षटकांत २ गड्यांच्या मोबदल्यात ४६ धावा केल्या. इंद्रजीत गुंजवटेने १२, सुजय बोडकेने ११, हासिम राजा शहाने ६ आणि मयुरेश कुंभारने ६ धावांचे योगदान दिले.

४७ धावांच्या लक्ष्याचा पाठलाग करताना व्ही. जे. इंटरनॅशनल स्कूलचा संघ ५ षटकांत ३९ धावांपर्यंतच मजल मारू शकला. त्यामुळे मुधोजी हायस्कूल व ज्युनिअर कॉलेजने हा सामना ८ धावांनी जिंकत १७ वर्षांखालील गटाचे विजेतेपद मिळवले.

१९ वर्षांखालील गटात ६२ धावांचा दणदणीत विजय

१९ वर्षांखालील गटात मुधोजी हायस्कूल व ज्युनिअर कॉलेजच्या संघाने फलंदाजीत आक्रमक खेळाचे प्रदर्शन करत निर्धारित ५ षटकांत बिनबाद १०७ धावा उभारल्या.

या धावांचा पाठलाग करताना मालोजीराजे शेती विद्यालय, फलटण संघाला ३ गड्यांच्या मोबदल्यात केवळ ४५ धावा करता आल्या. परिणामी मुधोजी हायस्कूलने हा सामना तब्बल ६२ धावांनी जिंकत १९ वर्षांखालील गटाचेही विजेतेपद आपल्या नावे केले.

या सामन्यात श्रवण खाडेने नाबाद ४२ धावा, तर विनायक दळवीने नाबाद २७ धावा करत संघाच्या मोठ्या धावसंख्येत महत्त्वपूर्ण योगदान दिले.

पंच व क्रीडा पदाधिकाऱ्यांची उपस्थिती

स्पर्धेप्रसंगी फलटण तालुका क्रीडा संघटनेचे उपाध्यक्ष तायप्पा शेंडगे, उत्तमराव घोरपडे, अमोल नाळे, सुजीत जमदाडे, शिवलिंग सावंत, संजय गोफणे, सूरज ढेंबरे, अमित काळे, महेश निंबाळकर, अमर कोकरे व सोमनाथ चौधरी उपस्थित होते.

सामन्यांचे पंच म्हणून ज्येष्ठ क्रिकेट पंच संजय गायकवाड, रवींद्र दळवी, अमोल नाळे व रोहन निकम यांनी काम पाहिले.

विजेत्या संघांचे अभिनंदन

मुधोजी हायस्कूलच्या तिन्ही संघांनी मिळवलेल्या या उल्लेखनीय यशाबद्दल महाराष्ट्र विधान परिषदेचे माजी सभापती श्रीमंत रामराजे नाईक-निंबाळकर, माजी आमदार दीपक चव्हाण, फलटण कृषी उत्पन्न बाजार समितीचे चेअरमन श्रीमंत रघुनाथराजे नाईक-निंबाळकर, महाराष्ट्र खो-खो असोसिएशनचे माजी अध्यक्ष श्रीमंत संजीवराजे नाईक-निंबाळकर, फलटण एज्युकेशन सोसायटीचे प्रशासन अधिकारी अरविंद निकम, प्राचार्य वसंतराव शेडगे, उपप्राचार्य ए. वाय. ननावरे, ज्युनिअर कॉलेजचे उपप्राचार्य सोमनाथ माने, पर्यवेक्षक आर. बी. निंबाळकर, विजय लोंढे पाटील, सौ. पूजा पाटील, फ.ए.सो. क्रीडा समितीचे चेअरमन शिवाजीराव घोरपडे तसेच शाळा व्यवस्थापन समितीच्या सदस्यांनी सर्व विजेत्या खेळाडू व मार्गदर्शकांचे अभिनंदन केले.

तिन्ही गटांत तालुकास्तरीय विजेतेपद मिळवल्याने मुधोजी हायस्कूलचे संघ आता जिल्हास्तरीय स्पर्धेसाठी सज्ज झाले असून, या पुढील स्पर्धेतही दमदार कामगिरी करण्यासाठी खेळाडूंना शुभेच्छा देण्यात आल्या.

सेवा हीच परमधर्म’; मा. अनिल बोबडे यांच्या सेवानिवृत्ती सोहळ्याचे आयोजन

0
सेवा हीच परमधर्म’; मा. अनिल बोबडे यांच्या सेवानिवृत्ती सोहळ्याचे आयोजन

भारतीय सेनेतील २६ वर्षांच्या राष्ट्रसेवेचा गौरव; १ ऑक्टोबर रोजी फलटण येथे सन्मान सोहळा

फलटण | प्रतिनिधी :भारतीय सेनेच्या छत्रछायेखाली राष्ट्रसेवेचे व्रत निष्ठेने पूर्ण करत तब्बल २६ वर्षे देशसेवा बजावणारे मा. अनिल बोबडे, Nb Sub, Maratha Light Infantry यांच्या सेवानिवृत्ती निमित्त विशेष सत्कार व शुभेच्छा समारंभाचे आयोजन करण्यात आले आहे.

मा. अनिल बोबडे यांनी सन २००० ते २०२६ या प्रदीर्घ सेवा कालावधीत भारतीय सेनेत विविध जबाबदाऱ्या यशस्वीपणे सांभाळत देशसेवेत मोलाचे योगदान दिले. शिस्त, कर्तव्यनिष्ठा, समर्पण आणि राष्ट्रप्रेम या मूल्यांना केंद्रस्थानी ठेवून त्यांनी बजावलेली सेवा युवा पिढीसाठी प्रेरणादायी ठरणारी आहे.

‘सेवा हीच परमधर्म’ या भावनेतून देशासाठी कर्तव्य बजावणाऱ्या अनिल बोबडे यांच्या सेवानिवृत्तीच्या निमित्ताने त्यांच्या प्रदीर्घ सेवेचा गौरव करण्यात येणार आहे. ‘देशसेवेत खरी जीवनाची कमाई!’ या भावनेतून आयोजित या सोहळ्यात त्यांचा विशेष सत्कार करून पुढील आयुष्यासाठी आरोग्य, आनंद आणि यशाच्या शुभेच्छा देण्यात येणार आहेत.

सेवानिवृत्ती समारंभाचे तपशील

  • नाव : मा. अनिल बोबडे
  • पद : Nb Sub, Maratha Light Infantry
  • सेवा कालावधी : २००० ते २०२६
  • दिनांक : १ ऑक्टोबर २०२६, गुरुवार
  • वेळ : सायंकाळी ६.०० वाजता
  • स्थळ : फलटण, जि. सातारा

भारतीय सेनेतील प्रदीर्घ आणि अभिमानास्पद सेवेनंतर नव्या पर्वात प्रवेश करणाऱ्या मा. अनिल बोबडे यांना त्यांच्या पुढील वाटचालीसाठी साहस Times न्यूज पोर्टल तर्फे मनःपूर्वक शुभेच्छा व्यक्त करण्यात येत आहेत.

मुधोजी हायस्कूलच्या महिला हॉकी संघाचा नेहरू कपमध्ये दणदणीत विजय; दिल्लीतील राष्ट्रीय स्पर्धेसाठी पात्रता

0
मुधोजी हायस्कूलच्या महिला हॉकी संघाचा नेहरू कपमध्ये दणदणीत विजय; दिल्लीतील राष्ट्रीय स्पर्धेसाठी पात्रता

फलटण, प्रतिनिधी : फलटण येथील मधोजी हायस्कूल व जुनिअर कॉलेजच्या १७ वर्षांखालील महिला हॉकी संघाने नेहरू कप हॉकी स्पर्धेत विजेतेपद पटकावत ऐतिहासिक कामगिरी केली आहे. या शानदार विजयामुळे संघाची दिल्ली येथे होणाऱ्या राष्ट्रीय स्तरावरील नेहरू कप हॉकी स्पर्धेसाठी निवड झाली आहे.

मुधोजी हायस्कूलच्या महिला खेळाडूंनी संपूर्ण स्पर्धेत उत्कृष्ट खेळाचे प्रदर्शन करत आपल्या संघाची गुणवत्ता आणि जिद्द सिद्ध केली. संघातील खेळाडूंनी सांघिक भावना, उत्तम नियोजन, सातत्यपूर्ण सराव आणि प्रशिक्षकांचे मार्गदर्शन यांच्या जोरावर प्रतिस्पर्धी संघांवर मात करत विजेतेपदावर आपले नाव कोरले.

या यशामुळे फलटणसह सातारा जिल्ह्याच्या क्रीडा क्षेत्रात अभिमानाची भर पडली असून महाराष्ट्राच्या हॉकी क्षेत्रासाठीही ही आनंदाची आणि गौरवास्पद बाब मानली जात आहे. ग्रामीण भागातील विद्यार्थिनींनी आपल्या मेहनतीच्या जोरावर राज्यस्तरावर उल्लेखनीय कामगिरी करत आता राष्ट्रीय स्पर्धेचे तिकीट मिळवले आहे.

या विजयानंतर मधोजी हायस्कूल व जुनिअर कॉलेजच्या खेळाडूंचे, प्रशिक्षकांचे, क्रीडा शिक्षकांचे तसेच संघाच्या यशासाठी प्रत्यक्ष-अप्रत्यक्ष योगदान देणाऱ्या सर्वांचे विधान परिषदचे मा सभापती विद्येमान आमदार श्रीमंत रामराजे निंबाळकर , कृषी उत्पन्न बाजार समिती सभापती रघुनाथराजे नाईक निंबाळकर सातारा जिल्हा परिषदचे मा अध्यक्ष संजीवराजे नाईक निंबाळकर तसेच फलटण कोरगाव विधान सभेचे मा आमदार दिपक यांनी सर्वाचे कौतुक करून अभिनंदन केले आहे. तसेच दिल्ली येथे होणाऱ्या राष्ट्रीय स्पर्धेतही या संघाकडून दमदार कामगिरीची अपेक्षा व्यक्त केली जात आहे.

मुधोजी हायस्कूल व जुनिअर कॉलेजच्या महिला हॉकी संघातील सर्व खेळाडू, प्रशिक्षक आणि मार्गदर्शकांचे तसेच सातारा जिल्ह्यातील आणि महाराष्ट्रातील सर्व हॉकीप्रेमींचे मनःपूर्वक अभिनंदन! राष्ट्रीय स्पर्धेसाठी संघाला हार्दिक शुभेच्छा.

आदर्कीचे बाळासाहेब कासार आज भाजपमध्ये प्रवेश करणार; रणजितदादांच्या नेतृत्वाखाली  फलटणमध्ये राजकीय समीकरणांना वेग

0
आदर्कीचे बाळासाहेब कासार आज भाजपमध्ये प्रवेश करणार; रणजितदादांच्या नेतृत्वाखाली  फलटणमध्ये राजकीय समीकरणांना वेग

सजाई गार्डन येथे प्रवेश सोहळा; पश्चिम भागात भाजपला संघटनात्मक बळकटी मिळण्याची शक्यता

फलटण | प्रतिनिधी :फलटण तालुक्यातील आदर्की बुद्रुक येथील बाळासाहेब श्रीरंग कासार  हे आज माजी खासदार रणजितसिंह नाईक निंबाळकर यांच्या नेतृत्वाखाली भारतीय जनता पक्षात जाहीर प्रवेश करणार आहेत. फलटण येथील सजाई गार्डन येथे होणाऱ्या या प्रवेश सोहळ्याकडे तालुक्यातील राजकीय वर्तुळाचे लक्ष लागले आहे.

बाळासाहेब कासार हे आदर्की बुद्रुक परिसरातील परिचित व्यक्तिमत्त्व असून, त्यांच्या भाजप प्रवेशामुळे पश्चिम फलटण तालुक्यातील पक्षाच्या संघटनात्मक हालचालींना चालना मिळण्याची शक्यता व्यक्त होत आहे. त्यांच्या प्रवेशामुळे आदर्की तसेच पश्चिम भागातील स्थानिक पातळीवरील राजकीय समीकरणांवर परिणाम होण्याची चर्चा सुरू झाली आहे.

रणजितसिंह नाईक निंबाळकर यांच्या नेतृत्वाखाली भाजपमध्ये प्रवेश करण्याचा निर्णय घेतल्याने कासार समर्थक व त्यांच्या संपर्कातील कार्यकर्त्यांमध्येही उत्सुकता निर्माण झाली आहे. प्रवेश सोहळ्याला भाजपचे पदाधिकारी, कार्यकर्ते तसेच परिसरातील समर्थक उपस्थित राहण्याची शक्यता आहे.

फलटण तालुक्यात आगामी काळात स्थानिक स्वराज्य संस्थांच्या राजकारणाच्या पार्श्वभूमीवर विविध राजकीय घडामोडींना वेग येत असताना बाळासाहेब कासार यांचा भाजप प्रवेश महत्त्वाचा मानला जात आहे. पश्चिम भागात पक्षाची संघटनात्मक उपस्थिती वाढविण्यासाठी हा प्रवेश उपयुक्त ठरणार असल्याची चर्चा भाजप कार्यकर्त्यांमध्ये आहे.

दरम्यान, आज सजाई गार्डन येथे होणाऱ्या प्रवेश सोहळ्यात बाळासाहेब कासार यांच्यासोबत आणखी कोणते कार्यकर्ते किंवा समर्थक भाजपमध्ये प्रवेश करणार, याकडेही राजकीय वर्तुळाचे लक्ष लागले आहे.

जिल्हास्तरीय कुस्ती स्पर्धेत पृथ्वीराज मारकडचा दणदणीत विजय; विभागीय स्पर्धेत करणार पुणे जिल्ह्याचे नेतृत्व

0
जिल्हास्तरीय कुस्ती स्पर्धेत पृथ्वीराज मारकडचा दणदणीत विजय; विभागीय स्पर्धेत करणार पुणे जिल्ह्याचे नेतृत्व

🏆 जिल्हास्तरीय कुस्ती स्पर्धेत पृथ्वीराज मारकडचा दणदणीत विजय; विभागीय स्पर्धेत करणार पुणे जिल्ह्याचे नेतृत्व

बोराटवाडी | प्रतिनिधी : क्रीडा व युवक संचालनालय, महाराष्ट्र राज्य, पुणे, जिल्हा क्रीडा परिषद, क्रीडा अधिकारी कार्यालय पुणे आणि पुणे जिल्हा कुस्तीगीर तालीम संघ यांच्या संयुक्त विद्यमाने आयोजित जिल्हास्तरीय कुस्ती स्पर्धेत श्री शिवाजी एज्युकेशन सोसायटी, बावडा संचलित लोकनेते शहाजीराव पाटील माध्यमिक व उच्च माध्यमिक विद्यालय, बोराटवाडी येथील विद्यार्थी पृथ्वीराज हनुमंत मारकड याने उल्लेखनीय कामगिरी करत प्रथम क्रमांक पटकावला.

पृथ्वीराज मारकड याने १९ वर्षे वयोगटातील ग्रीक-रोमन कुस्ती प्रकाराच्या ६० किलो वजनी गटात दमदार खेळाचे प्रदर्शन करत जिल्हास्तरावर अव्वल स्थान मिळविले. या यशामुळे त्याची आगामी विभागीय कुस्ती स्पर्धेसाठी पुणे जिल्ह्याचे प्रतिनिधित्व करण्यासाठी निवड झाली आहे.

पृथ्वीराज याला विद्यालयाचे क्रीडा शिक्षक श्री. सदाशिव सावंत यांचे मार्गदर्शन लाभले. नियमित सराव, मेहनत आणि योग्य मार्गदर्शनाच्या जोरावर त्याने हे यश संपादन केले.

त्याच्या या यशाबद्दल विद्यालयाचे प्राचार्य चंद्रकांत कोकाटे यांनी माहिती दिली व अभिनंदन केले. तसेच माजी सहकार मंत्री हर्षवर्धन पाटील, नीरा-भीमा सहकारी साखर कारखान्याचे संचालक उदयसिंह पाटील, संस्थेचे उपाध्यक्ष मनोजराव पाटील, माजी सचिव किरणराव पाटील, खजिनदार उमेश सूर्यवंशी, संस्थेचे संचालक मंडळ, ग्रामस्थ, पालक आणि विद्यालयातील शिक्षकवृंद यांनी पृथ्वीराजचे कौतुक करून विभागीय स्पर्धेसाठी शुभेच्छा दिल्या.

पृथ्वीराजच्या या यशामुळे बोराटवाडी विद्यालयाच्या क्रीडा क्षेत्रातील कामगिरीत आणखी एक मानाचा तुरा रोवला असून, विभागीय स्पर्धेतही तो दमदार कामगिरी करेल, अशी अपेक्षा व्यक्त होत आहे.

श्रीराम कारखान्याची ७१ वी वार्षिक सभा उत्साहात; २०२६-२७ गळीत हंगामासाठी सभासदांनी एकजुटीचा निर्धार

0
श्रीराम कारखान्याची ७१ वी वार्षिक सभा उत्साहात; २०२६-२७ गळीत हंगामासाठी सभासदांनी एकजुटीचा निर्धार

श्रीमंत रामराजे नाईक निंबाळकर यांच्या अभिनंदनाचा ठराव मंजूर; कारखान्याच्या आर्थिक बळकटीसाठी सभासदांनी भांडवली सहभाग वाढवण्याचे आवाहन

फलटण प्रतिनिधी : श्रीराम सहकारी साखर कारखाना लि., फलटणची ७१ वी वार्षिक सर्वसाधारण सभा कारखाना कार्यस्थळावर सभासदांच्या उत्स्फूर्त सहभागात आणि खेळीमेळीच्या वातावरणात पार पडली. कारखान्याच्या आगामी २०२६-२७ गळीत हंगामाच्या पार्श्वभूमीवर झालेल्या या सभेला विशेष महत्त्व प्राप्त झाले. कारखान्याच्या अडचणीच्या काळात हंगाम सुरू करण्यासाठी योगदान दिल्याबद्दल विधान परिषदेचे माजी सभापती आमदार श्रीमंत रामराजे नाईक निंबाळकर यांच्या अभिनंदनाचा ठराव सभेत एकमताने मंजूर करण्यात आला.

हा ठराव जिल्हा परिषदेचे माजी सदस्य दत्ता बापू अनपट यांनी मांडला, तर फलटण दूध संघाचे चेअरमन धनंजय पवार यांनी त्यास अनुमोदन दिले. उपस्थित सभासदांनी हात वर करून ठरावाला समर्थन दिले. त्यानंतर टाळ्यांच्या कडकडाटात श्रीमंत रामराजे नाईक निंबाळकर यांचा हार, श्रीफळ व शाल देऊन सभासदांच्या वतीने सत्कार करण्यात आला.

यशाचे श्रेय सभासद व शेतकऱ्यांना

अभिनंदनाचा ठराव स्वीकारताना श्रीमंत रामराजे नाईक निंबाळकर यांनी कारखाना पुन्हा गळीत हंगामासाठी सज्ज होत असल्याचे श्रेय सभासद आणि शेतकरी बांधवांच्या सहकार्याला दिले. कारखान्याच्या अडचणीच्या काळात सभासदांनी दिलेला प्रतिसाद महत्त्वाचा ठरल्याचे त्यांनी नमूद केले.

यावेळी त्यांनी कारखान्याच्या अडचणींच्या काळात राजकारणामुळे कारखाना बंद पडण्याची परिस्थिती निर्माण करण्याचा प्रयत्न झाल्याचा आरोप केला. मात्र, सभासदांनी आपल्या आवाहनाला सकारात्मक प्रतिसाद देत कारखान्याच्या नक्त मूल्यामध्ये वाढ होण्यास सहकार्य केल्याने आगामी गळीत हंगाम सुरू करण्याचा मार्ग मोकळा झाल्याचे त्यांनी सांगितले.

‘कारखाना काही व्यक्तींचा नव्हे, सभासद शेतकऱ्यांचा’

कारखान्याचे भवितव्य मजबूत करण्यासाठी सभासदांनी अधिक सक्रिय सहभाग घेण्याची गरज रामराजे नाईक निंबाळकर यांनी व्यक्त केली. सहकारी तत्त्वावर उभ्या असलेल्या या संस्थेला आर्थिकदृष्ट्या सक्षम करण्यासाठी उर्वरित सभासदांनी नवीन शेअर्स घेऊन भांडवली सहभाग वाढवावा, असे आवाहन त्यांनी केले.

कारखाना हा काही मोजक्या व्यक्तींची संस्था नसून सभासद शेतकऱ्यांच्या मालकीची सहकारी संस्था आहे. त्यामुळे अडचणीच्या काळात प्रत्येक सभासदाने आपली जबाबदारी ओळखून कारखान्याच्या पाठीशी उभे राहणे आवश्यक असल्याचे त्यांनी स्पष्ट केले.

आगामी गळीत हंगामासाठी सभासदांमध्ये उत्साह

मागील काळात कारखान्यासमोर निर्माण झालेल्या विविध अडचणींवर मात करून आता कारखाना आगामी गळीत हंगामासाठी सज्ज होत असल्याने सभासदांमध्ये उत्साहाचे वातावरण पाहायला मिळाले. कारखान्याची आर्थिक स्थिती अधिक सक्षम करण्यासाठी सभासदांचा सहभाग, सहकार्य आणि भांडवली योगदान भविष्यात निर्णायक ठरणार असल्याचे सभेत अधोरेखित करण्यात आले.

कारखान्याच्या कामकाजाचा आढावा

सभेच्या प्रारंभी कारखान्याचे चेअरमन डॉ. बाळासाहेब शेंडे यांनी प्रास्ताविक करत कारखान्याच्या कामकाजाची माहिती सभासदांसमोर मांडली. श्रीमंत संजीवराजे नाईक निंबाळकर यांनी कारखान्याच्या सद्यस्थितीचा तसेच कामकाजाचा आढावा घेतला. कार्यकारी संचालक चंद्रकांत तळेकर यांनी सभासदांसमोर कारखान्याचा ताळेबंद सादर केला.

सभेतील चर्चेदरम्यान कारखान्याच्या आर्थिक स्थितीबरोबरच आगामी गळीत हंगाम, सभासदांचा सहभाग आणि संस्थेच्या भविष्यातील वाटचालीबाबत विविध मुद्द्यांवर चर्चा झाली.

मान्यवरांची उपस्थिती

सभेला माजी आमदार दीपक चव्हाण, कृषी उत्पन्न बाजार समितीचे चेअरमन श्रीमंत रघुनाथराजे नाईक निंबाळकर, जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, नगरसेवक श्रीमंत अनिकेतराजे नाईक निंबाळकर, फलटण पंचायत समितीचे माजी सभापती श्रीमंत विश्वजीतराजे नाईक निंबाळकर, श्रीराम कारखान्याचे चेअरमन डॉ. बाळासाहेब शेंडे, व्हाईस चेअरमन नितीन शाहूराज भोसले, फलटण दूध संघाचे चेअरमन धनंजय पवार, सातारा जिल्हा परिषद सदस्य गिरीश बनकर, वैशालीताई कांबळे, ज्योतीताई मोरे, दत्ता बापू अनपट, श्रीराम बाजारचे चेअरमन जितेंद्र पवार, कृषी उत्पन्न बाजार समितीचे व्हाईस चेअरमन भगवानराव होळकर, पंचायत समिती सदस्य गणेश तांबे, माजी नगराध्यक्ष पांडुरंग गुंजवटे, फलटण काँग्रेस कमिटीचे अध्यक्ष महेंद्र सूर्यवंशी बेडके, शेतकरी संघटनेचे जिल्हाध्यक्ष धनंजय महामुलकर, तालुकाध्यक्ष नितीन यादव, तसेच प्रमोद गाडे, विश्वासदादा गावडे, तानाजी गावडे, परशुराम तावरे, अशोक शिंदे, बाळासाहेब खलाटे, बबनराव घोरपडे यांच्यासह कारखान्याचे संचालक, अधिकारी, कर्मचारी, सभासद आणि शेतकरी मोठ्या संख्येने उपस्थित होते.

सभेच्या निमित्ताने श्रीराम कारखान्याच्या आगामी गळीत हंगामाबाबत सभासदांमध्ये सकारात्मक व उत्साही वातावरण दिसून आले. सभेचे सूत्रसंचालन संचालक संतोष खटके यांनी केले, तर आभार सुखदेव बेलदार यांनी मानले.


स्वर्गीय यशवंतराव चव्हाण बालक्रीडा स्पर्धेत परतवडी जिल्हा परिषद शाळेचे घवघवीत यश

0
स्वर्गीय यशवंतराव चव्हाण बालक्रीडा स्पर्धेत परतवडी जिल्हा परिषद शाळेचे घवघवीत यश

पायल बापूराव मोहितेची धावणे, लांब उडी, गोळाफेक व थाळीफेकमध्ये चमकदार कामगिरी; विद्यार्थ्यांनी पटकावले अनेक प्रथम, द्वितीय व तृतीय क्रमांक

तोंडले | प्रतिनिधी : स्वर्गीय यशवंतराव चव्हाण बालक्रीडा स्पर्धा सोमवार, दि. २८ सप्टेंबर २०२६ रोजी तोंडले केंद्राच्या स्पर्धा भैरवनाथ विद्यालय, तोंडले येथे उत्साहपूर्ण वातावरणात पार पडल्या. या केंद्रस्तरीय स्पर्धेत जिल्हा परिषद प्राथमिक शाळा, परतवडीच्या विद्यार्थ्यांनी विविध क्रीडा प्रकारांत उल्लेखनीय कामगिरी करत शाळेच्या शिरपेचात मानाचा तुरा खोवला.

वैयक्तिक क्रीडा प्रकारातील यश

लहान गट मुली :

  • ६०० मीटर धावणे – सनाया संतोष मोहिते – द्वितीय क्रमांक

मोठा गट मुली :

  • १०० मीटर धावणे – पायल बापूराव मोहिते – प्रथम क्रमांक
  • २०० मीटर धावणे – पायल मारुती जाधव – प्रथम क्रमांक
  • ४०० मीटर धावणे – प्रगती शिवाजी मोहिते – तृतीय क्रमांक
  • ६०० मीटर धावणे – पायल बापूराव मोहिते – प्रथम क्रमांक
  • ८०० मीटर धावणे – पायल मारुती जाधव – प्रथम क्रमांक

मोठा गट मुले :

  • १०० मीटर धावणे – तेजस दिलीप जाधव – प्रथम क्रमांक
  • २०० मीटर धावणे – तन्मय गणेश नामदास – द्वितीय क्रमांक
  • २०० मीटर धावणे – विवेकानंद रोहिदास मोहिते – तृतीय क्रमांक
  • ४०० मीटर धावणे – शिवम मारुती जाधव – प्रथम क्रमांक
  • ६०० मीटर धावणे – तोफिक करीम फौजदार – प्रथम क्रमांक
  • ८०० मीटर धावणे – फिरोज करीम फौजदार – प्रथम क्रमांक

मैदानी क्रीडा प्रकारातही विद्यार्थ्यांची दमदार कामगिरी

लांब उडी – मोठा गट मुली :
पायल बापूराव मोहिते – प्रथम क्रमांक
पायल मारुती जाधव – द्वितीय क्रमांक

लांब उडी – मोठा गट मुले :
तेजस दिलीप जाधव – प्रथम क्रमांक
शिवम मारुती जाधव – द्वितीय क्रमांक

गोळाफेक – मोठा गट मुली :
पायल बापूराव मोहिते – प्रथम क्रमांक
पायल मारुती जाधव – द्वितीय क्रमांक

गोळाफेक – मोठा गट मुले :
सुयश शिवाजी मोहिते – प्रथम क्रमांक

थाळीफेक – मोठा गट मुली :
पायल बापूराव मोहिते – प्रथम क्रमांक
पायल मारुती जाधव – द्वितीय क्रमांक

थाळीफेक – मोठा गट मुले :
तन्मय गणेश नामदास – प्रथम क्रमांक
सुयश शिवाजी मोहिते – द्वितीय क्रमांक

परतवडी शाळेच्या विद्यार्थ्यांनी विविध क्रीडा प्रकारांत मिळवलेल्या या यशामुळे शाळेच्या क्रीडा क्षेत्रातील कामगिरीला नवी झळाळी मिळाली आहे. विद्यार्थ्यांच्या या यशामागे त्यांची मेहनत, सातत्य, क्रीडा सराव तसेच शिक्षकांचे मार्गदर्शन महत्त्वाचे ठरले.

या यशाबद्दल गटशिक्षणाधिकारी मा. पिसे साहेब, विस्ताराधिकारी गंबरे साहेब, केंद्रप्रमुख झणझणे मॅडम, मुख्याध्यापिका साळवे मॅडम, उपशिक्षिका पवार मॅडम, विषय शिक्षक सुस्तरफोड सर तसेच ग्रामस्थांनी व पालकांनी सर्व यशस्वी विद्यार्थ्यांचे अभिनंदन केले.

विद्यार्थ्यांनी भविष्यातही अशाच प्रकारे क्रीडा क्षेत्रात यशाची वाटचाल सुरू ठेवावी आणि शाळेचे तसेच गावाचे नाव उज्ज्वल करावे, अशा शुभेच्छा यावेळी देण्यात आल्या.

मध्यरात्री घरात घुसून दोन वयोवृद्ध महिलांची हत्या; शेरेवाडीतील दुहेरी हत्याकांडाने बारामती हादरली

0
मध्यरात्री घरात घुसून दोन वयोवृद्ध महिलांची हत्या; शेरेवाडीतील दुहेरी हत्याकांडाने बारामती हादरली

बारामती : प्रतिनिधी. बारामती तालुक्यातील बाबुर्डी परिसरातील शेरेवाडी येथे मध्यरात्री घरात घुसून दोन वयोवृद्ध महिलांची धारदार शस्त्राने हत्या करण्यात आल्याची धक्कादायक घटना समोर आली आहे. या दुहेरी हत्याकांडामुळे परिसरात मोठी खळबळ उडाली असून नागरिकांमध्ये भीतीचे वातावरण निर्माण झाले आहे.

या घटनेत कृष्णाबाई लडकत (वय ६३) आणि इंदुमती लडकत (वय ७५) या दोघींचा मृत्यू झाला आहे. प्राथमिक माहितीनुसार, दोन्ही महिला रात्री घरात झोपलेल्या असताना अज्ञात व्यक्तीने घरात प्रवेश करून त्यांच्यावर हल्ला केल्याचे समोर आले आहे.

घटनेची माहिती मिळताच पोलिसांनी घटनास्थळी धाव घेतली. परिसराची पाहणी करून तपास सुरू करण्यात आला आहे. हत्येमागील नेमके कारण अद्याप स्पष्ट झालेले नसून पोलिसांकडून विविध शक्यता तपासल्या जात आहेत.

दरम्यान, घरातील कपाट उघडे असल्याचे तसेच काही दागिने गायब असल्याचे वृत्त आहे. त्यामुळे चोरीच्या उद्देशाने हा हल्ला झाला असावा, असा प्राथमिक अंदाज व्यक्त केला जात आहे. मात्र, हत्येचे नेमके कारण आणि घटनेमागील आरोपी कोण आहेत, हे पोलिस तपासानंतरच स्पष्ट होणार आहे.

या दुहेरी हत्याकांडामुळे शेरेवाडी परिसरात चिंतेचे वातावरण निर्माण झाले आहे. पोलिसांनी आरोपींचा शोध घेण्यासाठी तपासाची चक्रे वेगाने फिरवली असून परिसरातील परिस्थितीवरही लक्ष ठेवण्यात येत आहे.

या प्रकरणातील पुढील तपास आणि पोलिसांकडून मिळणारी अधिकृत माहिती महत्त्वाची ठरणार आहे.