[ad_1]
नांदेड : रामटेकच्या संस्कृत विद्यापीठातील माजी पंतप्रधान, भारतरत्न पी.व्ही. नरसिंहराव यांच्या पूर्णाकृती पुतळ्याच्या अनावरणात अनास्था दाखविणाऱ्या भाजपाच्या वरिष्ठ नेत्यांच्या हस्ते काँग्रेसचे माजी मुख्यमंत्री वसंतराव नाईक यांच्या येथील पुतळ्याचे उद्घाटन करण्याचा प्रयत्न भाजपाच्या स्थानिक नेत्यांकडून सुरू आहेत.
केंद्रीय गृहमंत्री अमित शहा, राज्याचे मुख्यमंत्री देवेंद्र फडणवीस यांच्यासह भाजपाचे काही प्रमुख नेते येत्या सोमवारी नांदेडमध्ये येत आहेत. शहा आणि अन्य नेत्यांच्या उपस्थितीत होणाऱ्या कार्यक्रमांची आखणी पक्षाचे राज्यसभा सदस्य अशोक चव्हाण यांच्या नेतृत्वासह संपूर्ण नियंत्रणाखाली येथे होत आहे. केंद्रीय गृहमंत्र्यांनी आपल्या दौऱ्यात वसंतराव नाईक यांच्या पुतळ्याच्या अनावरणासाठी वेळ द्यावा, असे त्यांच्या कार्यालयाला कळविण्यात आले होते, पण बुधवारी दुपारी आलेल्या गृहमंत्र्यांच्या दौरा कार्यक्रमात पुतळ्याच्या अनावरणाचा सुस्पष्ट उल्लेख नसल्यामुळे कार्यक्रमाच्या नियोजनाबद्दल मनपा प्रशासनात संभ्रम निर्माण झाला आहे.
रामटेकच्या विद्यापीठातील नरसिंहराव यांच्या पुतळ्याचे अनावरण करण्यास तत्कालीन राज्यपाल भगतसिंह कोश्यारी यांनी सरळसरळ नकार दिला होता. तर विद्यापीठाने विनंती करूनही विदर्भातील सत्ताधारी नेत्यांनी या कार्यक्रमाच्या बाबतीत आस्था दाखविली नव्हती. त्यावरून तेव्हा काँग्रेसमध्ये असलेल्या अशोक चव्हाण यांनी कोश्यारी यांच्याविरुद्ध आक्रमक पवित्रा घेतला होता.
केंद्रीय गृहमंत्र्यांच्या नांदेड दौऱ्यात प्रामुख्याने पक्षाची विभागीय बैठक, पक्षाच्या व्यासपीठावरून होणारी एक जाहीर सभा तसेच दोन वेगवेगळ्या कार्यालयांचे उद्घाटन आणि खा. चव्हाण यांच्या निवासस्थानी भेट इत्यादी बाबींचा समावेश असल्याचे जिल्हा प्रशासनाकडून बुधवारी सांगण्यात आले होते. वसंतराव नाईक यांच्या पूर्णाकृती पुतळ्याची उभारणी नांदेड-वाघाळा मनपाच्या माध्यमातून करण्यात आली. मनपात सध्या प्रशासकीय राजवट आहे. भाजपाच्या स्थानिक नेत्यांनी पुतळ्याच्या अनावरणाचा आग्रह धरला असला, तरी गृहमंत्र्यांच्या दौरा कार्यक्रमात त्याबद्दल स्पष्ट उल्लेख नसल्यामुळे मनपा प्रशासन संभ्रमात असल्याचे दिसून आले.
भाजपाचे कार्यालय अर्धवट
This quiz is AI-generated and for edutainment purposes only.
केंद्रीय गृहमंत्री अमित शहा यांच्या हस्ते भाजपाचे महानगराध्यक्ष अमरनाथ राजूरकर यांच्या तसेच खासदार अजित गोपछडे यांच्या कार्यालयाचे उद्घाटन निश्चित झाल्याचे स्थानिक पातळीवर सांगण्यात आले. त्याचवेळी नांदेडमधील भाजपाच्या नांदेड जिल्हा कार्यालयाचे काम अर्धवट अवस्थेत बंद पडले असल्याचे दिसून आले. काही वर्षांपूर्वी या कार्यालयाचे काम सुरू करण्यात आले. मधल्या काळात प्रवीण साले यांच्यावर बांधकाम करून घेण्याची जबाबदारी सोपविण्यात आली होती. त्यांची मुदत संपल्यानंतर कार्यालय बांधकामाची जबाबदारी कोणाकडे सोपवायची यावरून वाद निर्माण झाला.
[ad_2]
Source link
