फलटण : सध्या महाराष्ट्रात सर्वत्र गणेशोत्सवाची धामधूम सुरु आहे. फलटण शहरासह तालुक्यातही गणरायाच्या आगमनाने उत्साही वातावरण तयार झाले आहे. गणेश मंडळे मोठ्या उत्साहाने उत्सव साजरा करत आहेत. परंतु, यंदाच्या विसर्जन मिरवणुकीत कोणत्याही गणेश मंडळांनी डीजे किंवा कर्णकर्कश आवाज असणाऱ्या साउंड सिस्टीमचा वापर करू नये, असे स्पष्ट आदेश फलटण उपविभागाचे पोलीस उपअधीक्षक राहुल धस यांनी दिले आहेत.
फलटणमधील गणेश उत्सव मंडळांची एक महत्वाची बैठक उपविभागीय पोलीस अधिकारी यांच्या कार्यालयात आयोजित करण्यात आली होती. या बैठकीत धस बोलत होते. त्यांनी गणेश मंडळांच्या प्रतिनिधींशी संवाद साधताना स्पष्टपणे सांगितले की, गणेशोत्सव साजरा करत असताना सर्वांनी कायद्याचे पालन करणे अत्यंत आवश्यक आहे. गणेश मिरवणुकीत कोणत्याही प्रकारचा डीजे किंवा अतिशय मोठा आवाज करणाऱ्या साउंड सिस्टीमचा वापर केला जाणार नाही. यामुळे शांतता आणि कायद्याचे पालन राखणे हे सर्वांचे कर्तव्य आहे.
पोलीस उपअधीक्षक राहुल धस यांनी पुढे सांगितले की, “फलटणमधील गणेश विसर्जन मिरवणूक जल्लोषात साजरी होईल, परंतु ती कायद्याच्या चौकटीत राहूनच होईल. कोणीही डीजे लावल्यास किंवा कर्णकर्कश आवाज असणाऱ्या साउंड सिस्टीमचा वापर केल्यास त्यांच्या विरोधात कायदेशीर कारवाई करण्यात येईल.”
याशिवाय, पोलिसांनी सर्व गणेश मंडळांना हा संदेश दिला आहे की, विसर्जनाच्या वेळी शांतता राखली जावी, लोकांच्या भावना दुखावल्या जाऊ नयेत, आणि कायद्याचे उल्लंघन होणार नाही, याची काळजी प्रत्येकाने घ्यावी. तसेच, पोलिसांनी सुरक्षेसाठी सर्व आवश्यक उपाययोजना केल्या असून, कायदा आणि सुव्यवस्था राखण्यासाठी योग्य त्या पद्धतीने नियोजन केले आहे.
गणेशोत्सवातील धार्मिक भावना सांभाळून, कोणताही अनुचित प्रकार घडू नये याची काळजी प्रशासनाकडून घेतली जात आहे. यासाठी सर्व गणेश मंडळे आणि स्थानिक नागरिकांनी एकत्रितपणे सहकार्य करणे गरजेचे आहे.
