फलटण : सफाई कामगार कॉलनी येथे राहणाऱ्या वयोवृद्ध महिलेचा तेथील काही टवाळखोर मुलांकडून त्रास दिला जात आहे. सिंधू साळवे असे वयोवृद्ध महिलेचे नाव असून गेल्या महिन्याभरापासून त्यांना मानसिक आणि शारीरिक त्रासाला सामोरे जावे लागत आहे.
साळवे यांच्या घराशेजारी दिवस रात्र खेळल्या जाणाऱ्या क्रिकेटच्या गोंधळामुळे, मोठमोठ्या फटाक्यांच्या आवाजामुळे त्यांची एका कानाची शिर बंद झाली असून त्यामुळे त्यांना बहिरेपणा आला आहे. साळवे यांनी अनेक वेळा मुलांना घराजवळ न खेळण्याचा सल्ला दिला बऱ्याच वेळा समजून सांगितले. मुलांसोबत वाद देखील झाले पण याचा मुलांवर काही परिणाम झाला नाही. या उलट टवाळखोर मुलांनी त्यांच्यापेक्षा लहान मुलांना हाताशी धरून साळवे यांना आणखी जास्त त्रास द्यायला सुरुवात केली.
साळवे यांनी समाजातील काही लोकांना बोलवून मुलांना समजून सांगण्याची विनंती केली. काही दिवस शांत बसून या मुलांनी पुन्हा पहिल्या पेक्षा जास्त त्रास द्यायला सुरुवात केली. रात्री अपरात्री घरावर मोठे मोठे दगड टाकणे, दरवाजा वर जोर जोरात लाथा मारणे, घरात अंधारात घुसून धिंगाना घालणे, काही बोलले तर घरी जाऊन आई वडीलांना त्यांच्या बद्दल खोटी माहिती देऊन भांडण करण्यासाठी पाठविणे, अश्लील हाव भाव करणे. त्यांना पाहून थुंकणे, लाईट गेल्यानंतर घरामध्ये माती टाकणे, त्याच्या अंगावर माती टाकणे रात्रीच्या वेळी अंथरुणावर, अंगावर, तोंडावर माती – कचरा टाकणे असे प्रकार घडत आहेत किंवा घडवून आणले जात आहेत.
या सर्व त्रासाला कंटाळून साळवे यांनी तिथून निघून जावे अशी परिस्थिती आज त्यांच्यावर आली आहे. साळवे यांनी वेळोवेळी सांगून देखील समाजातील कार्यकर्त्यांनी त्यांची दखल घेतली नाही. उलट त्या टवाळखोरी करणाऱ्या मुलांचे आई वडील सातत्याने त्यांच्यासोबत भांडण करत आहेत. त्यामुळे साळवे यांनी ज्येष्ठांसाठी काम करणाऱ्या संस्थांच्या माध्यमातून तक्रार करण्याचा निर्णय घेतला आहे.
