फलटण : फलटण तालुक्यातील उपजिल्हा रुग्णालयातील महिला डॉक्टरच्या आत्महत्येने संपूर्ण महाराष्ट्र हादरले. डॉक्टरने आत्महत्येपूर्वी लिहिलेल्या नोटमध्ये पोलीस उपनिरीक्षक गोपाळ बदने यांनी तिच्यावर चार वेळा अत्याचार केले असल्याचा उल्लेख केला होता. या प्रकरणी पोलीस अधिकाऱ्याला निलंबित करण्यात आले आणि गोपाळ बदने व प्रशांत बनकर या दोघांना अटक करण्यात आली होती.
गोपाळ बदने बडतर्फ
कोल्हापूर परिक्षेत्राचे विशेष पोलीस महानिरीक्षक सुनील फुलारे यांनी गोपाळ बदने याला पोलीस दलातून बडतर्फ करण्याचा आदेश दिला. आदेशानुसार, त्याने पदावर असताना नैतिक अधःपतन, बेफिकिरी, अधिकाराचा दुरुपयोग केला आणि समाजात असुरक्षिततेची भावना निर्माण केली. त्यामुळे त्याला शासकीय सेवेतून काढणे आवश्यक ठरले. या आदेशाची अंमलबजावणी चार नोव्हेंबरपासून झाली आहे.
खाते अंतर्गत चौकशीत धक्कादायक माहिती
पोलीस निरीक्षक घनश्याम सोनवणे यांच्या नेतृत्वाखाली केलेल्या खाते अंतर्गत चौकशीत गोपाळ बदनेविरुद्ध गंभीर माहिती समोर आली. चौकशी अहवाल 72 तासांत पोलीस अधीक्षक तुषार दोशी यांच्याकडे सादर करण्यात आला.
गोपाल बदने विरोधातील तक्रारी
पोलीस खात्यात आल्यापासून गोपाळ बदनेविरुद्ध अनेक तक्रारी आल्या. विविध भागांमध्ये त्याविरोधात आंदोलन झाले. तो सर्वसामान्यांसोबतच अधिकाऱ्यांसोबतही गैरवर्तन करत होता. फलटण मधील डॉक्टर महिला आत्महत्येमुळे समाजामध्ये पोलीस दलाची प्रतिमा मलीन झाली आणि पोलीसांवर अविश्वास निर्माण झाला. खाते अंतर्गत चौकशीत दोषी ठरल्यानंतर त्याला पोलीस खात्यातून बडतर्फ करण्यात आले.
