फलटण : फलटण शहर व तालुक्यातील आगामी नगरपालिका निवडणुकीच्या पार्श्वभूमीवर काँग्रेसने निवडणूक प्रक्रियेतील त्रुटींवर आक्षेप घेतला आहे. प्रारूप प्रभाग रचना जाहीर केल्यानंतर दाखल करण्यात आलेल्या आक्षेपांवर अद्याप निवडणूक शाखेने कोणतेही उत्तर दिलेले नाही. त्याचप्रमाणे सदोष मतदार यादीवर दाखल करण्यात आलेल्या हरकतींमुळे काही प्रभागांतील मतदार संख्येत बदल होण्याची शक्यता निर्माण झाली आहे.
या पार्श्वभूमीवर, मतदार यादी अंतिम होण्याआधी जाहीर केलेल्या आरक्षण प्रक्रियेत अनियमितता होण्याची शक्यता नाकारता येत नाही. त्यामुळे आरक्षण सोडत पुन्हा एकदा मतदार यादी निश्चित झाल्यानंतरच घेण्यात यावे, अशी मागणी फलटण तालुका राष्ट्रीय काँग्रेसचे अध्यक्ष श्री. महेंद्र सुर्यवंशी (बेडके) व शहर काँग्रेस अध्यक्ष श्री. पंकज पवार यांनी मुख्याधिकारी श्री. निखिल जाधव यांच्याकडे निवेदनाद्वारे केली.
या वेळी जिल्हा युवक काँग्रेसचे सरचिटणीस श्री. गंगाराम रणदिवे, काँग्रेसचे पदाधिकारी श्री. धनंजय गोरे, श्री. सुधीर शिंदे यांचीही उपस्थिती होती.
