Crime Story: महिलांविरोधातील अत्याचार आणि गुन्ह्यांमध्ये सातत्याने वाढ होताना दिसत आहे. यापूर्वीही देशात अशा काही घटना घडल्या आहेत ज्यामुळं संपूर्ण देशभरात खळबळ माजली होती. त्यातीलच एक प्रकरण म्हणजे सायनाइड किलर (Cyanide Killer). या घटनेने संपूर्ण भारतात एकच दहशत पसरली होती. 20 नववधूंचा जीव घेणाऱ्या या विकृत आरोपीचं पुढं काय झालं आणि हे नेमकं प्रकरण काय आहे? जाणून घेऊया.
सायनाइट मोहन ज्याचं खरं नाव मोहन कुमार आहे. कुख्यात भारतीय सीरियल किलर म्हणून तो कुप्रसिद्ध होता. पीडितांना सायनाइड विष देऊन त्यांची हत्या करायचा त्यामुळं मोहन कुमार याचं नाव सायनाइड मोहन म्हणजे सायनाइड किलर असंही ठेवण्यात आलं. मोहनने 2003 ते 2009 च्या दरम्यान कर्नाटकात 20 महिलांची हत्या केली. महिलांच्या हत्येनंतर तो त्यांचे दागिने घेऊन पसार व्हायचा. याच पद्धतीने त्याने 20 महिलांचा बळी घेतला.
असा रचायचा हत्येचा कट
मोहन 20 ते 30 वर्ष वयाच्या अविवाहित मुलींना जाळ्यात ओढायचा आणि त्यांना प्रेमाची वचने देऊन विश्वास मिळवायचा. त्यानंतर मुलींशी लग्नदेखील करायचा. लग्न केल्यानंतर त्या मुलींना शहरापासून दूर घेऊन जायचा. त्यानंतर एखाद्या हॉटेलमध्ये बनावट कादगपत्रे दाखवून थांबायचा. मोहन कुमार मुलींना दरवेळी त्याचे नाव वेगळे सांगायचे.
मुलींसोबत एक रात्र हॉटेलमध्ये थांबायचा. मुलींसोबत शारीरिक संबंध ठेवल्यानंतर दुसऱ्या दिवशी तो त्यांना गर्भनिरोधक गोळी द्यायचा. मात्र त्या गोळ्यांमध्ये सायनाइड विष असायचे. ती गोळी खावून मुलीचा लगेचच मृत्यू व्हायचा. मुलीचा मृत्य झालाय की नाही याची खातरजमा करुनच तो लॉजवर परतायचा आणि सर्व पुरावे नष्ट करायचा.
मोहन मुलींचा जीव घेतल्यानंतर त्यांचे दागिने आणि सर्व सामान घेऊन घटनास्थळाहून फरार व्हायचा. सायनाइड मोहनने कमीत कमी 20 तरुणींची हत्या केली होती. असं म्हणतात की, पीडितांची संख्या यापेक्षा अधिक असू शकते. सुनंदा नावाच्या महिलेच्या मृत्यूनंतर नराधम मोहनचा खरा चेहरा जगासमोर आला.
कर्नाटक पोलिसांनी राबवलेल्या मोहिमेनंतर 2009मध्ये मोहनला अखेर अटक करण्यात आली. त्याच्या अटकेनंतर त्याच्या क्रुरतेचा खरा चेहरा समोर आला आहे. त्यानंतर अनेक पीडितेची ओळखदेखील पटली. खटला सुरू असताना पीडितांची ओळख, फॉरेन्सिक रिपोर्ट आणि साक्षीदार यासारखे पुरावेदेखील मांडण्यात आले. त्यामुळं त्याचा गुन्हादेखील सिद्ध होऊ शकला.
17 डिसेंबर 2013 रोजी सायनाइड मोहनला कर्नाटकातील मंगळुरूच्या सत्र न्यायालयाने अनेक महिलांवर बलात्कार, हत्या आणि दरोडेखोर यासारख्या गुन्हांसाठी दोषी ठरवण्यात आला. त्याच्या गुन्ह्यासाठी मोहन सायनाइडला मृत्यूदंडाची शिक्षा सुनावण्यात आली. मात्र त्यानंतर स्वतः मोहननेच कर्नाटक उच्च न्यायालयात निर्णयाविरोधात धाव घेतली. मात्र त्याची याचिका फेटाळण्यात आली.
