दहिवडी, पुढारी वृत्तसेवा : दहिवडी येथील मुळीकवस्ती येथून जिहे कठापूरच्या पाणी पुरवठ्याचे काम करणार्‍या पोकलेन मशीनचा 13 लाख 33 हजार रुपये किंमतीचा ब्रेकर चोरीस गेल्याची तक्रार दहिवडी पोलिस ठाण्यात दाखल झाली होती. तक्रार दाखल होताच दहिवडी पोलिसांनी तपासाची चक्रे गतीमान करत सीसीटीव्ही फुटेज चेक करून चौघा संशयितांना जेरबंद केले. संशयितांकडून चोरीस गेलेल्या पोकलॅन ब्रेकरसह गुन्ह्यात वापरलेला जेसीबी, एक चार चाकी गाडी, ट्रॅक्टर ट्रॉली असा सुमारे 76 लाखांचा मुद्देमाल जप्त करण्यात आला आहे.

रविराज जयप्रकाश गायकवाड (वय 25, रा. दहिवडी), अनिल देवराम राठोड (वय 30, रा. तुपेवाडी दहिवडी), सुजित दिलीप कांबळे (वय 27, रा. ढोकळवाडी पोस्ट विखळे ता. खटाव, हल्ली रा. तुपेवाडी दहिवडी) व अक्षय किसन जाधव (वय 26, रा. चव्हाण वस्ती वावरहिरे ता.माण) अशी पोलिसांनी अटक केलेल्या संशयितांची नावे आहेत.

याबाबत दहिवडी पोलिस ठाण्यातून मिळालेली माहिती अशी, रविवार दि. 23 जुलै रोजी सायंकाळी 5 ते दि. 24 जुलै रोजीचे सकाळी 7 वाजण्याच्या दरम्यान दहिवडी येथील मुळीक वस्ती येथून पोकलेन ब्रेकर चोरी झाल्याची फिर्याद श्रीनिवासराव सूर्यनारायणा रावपल्ली (रा. हैद्राबाद तेलंगणा) यांनी दहिवडी पोलिस ठाण्यात दिली होती.

याबाबतचा गुन्हा दाखल झाल्यानंतर घटनेचे गांभीर्य लक्षात घेऊन सहाय्यक पोलिस निरीक्षक अक्षय सोनवणे व त्यांच्या पथकाने घटनास्थळावरुन जाणार्‍या रोडला व इतर परीसरात असणारे सुमारे 50 पेक्षा जास्त सीसीटीव्ही फुटेजची पाहणी केली. त्यावरुन चोरट्यांची माहिती लक्षात आल्यावर चोरट्यांना त्यांनी ताब्यात घेवून विचारणा केली असता त्यांनी चोरीची कबुली दिली.

पोलिसांनी संशयितांकडून चोरीस गेलेला 13 लाख 33 हजारांचा पोकलेन ब्रेकर व संशयतांनी यांनी गुन्हा करण्यासाठी वापरलेला जेसीबी (क्र. एम एच 11डी.एच 1000), ट्रॉलीसह ट्रॅक्टर (क्र. के.ए 28 टी.ए 6205), चार चाकी (क्र. एमएच 12 क्यु.टी 3964) असा एकुण 76 लाख 33 हजार 400 रुपयांचा मुद्देमाल हस्तगत केला. ही कारवाईत सपोनि अक्षय सोनवणे, हवालदार बापू खांडेकर, धनंजय घाटगे, पोलिस नाईक स्वप्नील म्हामणे, पोलिस रामचंद्र गाढवे, अजिनाथ नरबट, सुहास गाडे, सागर लोखंडे, निलेश कुदळे यांच्या पथकाने केली.

सातारा, पुढारी वृत्तसेवा : सातारा जिल्ह्यात हवामान विभागाने दि. 28 जुलैपर्यंत ऑरेंज अलर्ट दिला होता. मात्र मंगळवारी पुन्हा दि. 26 जुलैपर्यंत रेड अलर्ट दिला आहे. जिल्ह्याच्या पश्चिम भागासह सर्वत्रच मुसळधार पाऊस पडत असल्याने जनजीवन पुर्णत: विस्कळीत झाले आहे. मुसळधार पावसामुळे नदी, ओढे नाल्यांना पुरसदृश्य परिस्थिती निर्माण झाली आहे. कृष्णा नदी काठावरील गावामधील नागरिकांना प्रशासनाने सतर्कतेचा इशारा दिला आहे.

जिल्ह्यासाठी हवामान विभागाने दि. 28 जुलैपर्यंत ऑरेंज अलर्ट दिला होता. मात्र मंगळवारी पुन्हा दि. 26 जुलैपर्यंत रेड अलर्ट दिला आहे. मंगळवारी सकाळपासूनच शहर परिसरासह जिल्ह्याच्या पश्चिम भागात मुसळधार पावसाच्या सरी कोसळत आहेत. दिवसभर ढगाळ वातावरण निर्माण झाले असून अधूनमधून जोरदार वारे वहात होते. त्यामुळे हवेत गारठा निर्माण झाला होता. मुसळधार पावसामुळे पश्चिम भागातील नदी, नाले, ओढे दुथडी भरुन वाहत आहेत. त्यामुळे ओढे नाल्यांना पुरसदृश्य परिस्थिती निर्माण झाली आहे. धरणाच्या पाणी पातळीतही झपाट्याने वाढ होत आहे. डोंगरदर्‍यामध्ये छोटे मोठे धबधबे प्रवाहीत झाले आहेत. त्यामुळे पावसाळी पर्यटनासाठी पश्चिम भागात पर्यटकांची गर्दी वाढू लागली आहे. पावसामुळे भात लागणीची कामे युध्दपातळीवर सुरू आहेत. मुसळधार पावसाने पश्चिम भागातील घाट रस्ता व डोंगरदर्‍यामध्ये दरडी पडण्याचे प्रकार सुरु आहेत. प्रशासनामार्फत या दरडी त्वरित हटवण्यात येत आहेत.

धोम बलकवडी धरणाच्या पाणलोट क्षेत्रात पावसाचे प्रमाण वाढत असून धरणामध्ये पाण्याची आवक 4 हजार 500 क्युसेक्स होत आहे. त्यामुळे धरणातून पाण्याचा विसर्ग दुपारी 3 वाजल्यापासून वाढवण्यात आला आहे. 3 हजार 500 क्युसेक्स पाणी धोम धरणामध्ये सोडण्यात येत आहे. बलकवडी धरणाखालील बलकवडी, परतवडी, कोंढवली, नांदवणे, वयगाव, दह्याट, बोरगाव या गावातील नागरिकांना नदीपात्रात न जाण्याच्या सूचना दिल्या असून धरण प्रशासनाने कृष्णा नदी काठावरील गावांमधील सर्व नागरिकांना सतर्क राहण्याचे आदेश दिले आहेत.

कुडाळी मध्यम प्रकल्प असलेल्या महू धरण पाणलोट क्षेत्रातही पावसाची संततधार कायम आहे. त्यामुळे महू धरणाच्या पाणीसाठ्यामध्ये वाढ झाली आहे. त्यामुळे प्रकल्पाच्या सांडव्यावरून विसर्ग सुरू होवू शकतो. कुडाळी नदी काठावरील नागरिकांनी नदीपात्रामध्ये प्रवेश करु नये. तसेच पुलावरून पाणी वाहत असताना पूल ओलांडू नये. सातारा तालुक्यातील ठोसेघर पासून 3 किलोमीटर असलेल्या मालोबा लघु पाटबंधारे प्रकल्प पूर्ण क्षमतेने भरला असून धरणाच्या सांडव्यावरून पाणी वाहत आहे.

महाबळेश्वरला 93.1 मि.मी. पाऊस

सातारा जिल्ह्यात मंगळवारी सकाळी 10.30 वाजेपर्यंत पडलेल्या पावसाची तालुकानिहाय आकडेवारी पुढीलप्रमाणे सातारा 24.9 मि. मी., जावली 37.7 मि. मी., पाटण 40.9 मि. मी., कराड 9.0 मि. मी., कोरेगाव 8.0 मि. मी., खटाव 5.6 मि. मी., माण 1.3 मि. मी., फलटण 0.5 मि. मी., खंडाळा 2.8 मि. मी., वाई 15.9 मि. मी., महाबळेश्वर 93.1 मि. मी. पावसाची नोंद झाली आहे.