[ad_1]
सातारा /नागठाणे, पुढारी वृत्तसेवा : बोरगाव पोलिस ठाण्याच्या हद्दीत गंभीर गुन्हे दाखल असलेल्या साहिल शिकलगार या टोळीवर संघटित गुन्हेगारी अंतर्गत (मोक्का) कारवाई करण्यात आली आहे. टोळीमध्ये एकूण चौघांचा समावेश असून, पोलिस अधीक्षक समीर शेख यांच्या कारवाईने गुन्हेगारीवर नियंत्रण येण्यास मदत होणार आहे.
साहिल रुस्तुम शिकलगार, भरत संजय मोहिते, अमित ऊर्फ कन्हैया सुनील साळुंखे, आशिष बन्सीराम साळुंखे (सर्व रा. नागठाणे, ता. जि. सातारा) अशी टोळीतील संशयितांची नावे आहेत.
संशयित टोळीवर बोरगाव पोलिस ठाण्यात गंभीर गुन्हा दाखल आहे. त्यांनी एकाला कोयत्याने, पट्ट्याने, हाताने व लाथाबुक्याने तोंडावर, पाठीवर व अंगावर गंभीर मारहाण करून तक्रारदार यांच्याकडील 25 हजार रुपयांची रक्कम चोरली होती. बोरगाव पोलिस ठाण्यात गुन्हा दाखल झाल्यानंतर पोलिसांच्या तपासामध्ये संशयितांनी टोळीची दहशत निर्माण करून आर्थिक व इतर फायद्याकरिता संघटितपणे गुन्हा केल्याचे निष्पन्न झाल्याने सपोनि रवींद्र तेलतुंबडे यांनी टोळी विरुद्ध दाखल असलेल्या गुन्ह्यांची माहिती संकलित केली.
यामध्ये जुलुम, जबरदस्ती करून हिंसाचाराची धमकी देत तसेच अन्य अवैध मार्गाने दहशतीच्या बळाचा वापर करून गंभीर स्वरुपाचे कृत्ये केली असल्याने संशयितांविरुध्द महाराष्ट्र संघटीत गुन्हेगारी नियंत्रण अधिनियमान्वये (मोक्का) कारवाईसाठी पोलिस अधीक्षक समीर शेख यांच्याकडे प्रस्ताव पाठवण्यात आला. सातार्‍यातून कोल्हापूर परिक्षेत्र कार्यालयात पाठवला असता मोक्काच्या प्रस्तावाला मान्यता देण्यात आली. या गुन्ह्याचा पुढील तपास सातारचे डीवायएसपी किरणकुमार सुर्यवंशी करत आहेत.
दरम्यान, नोव्हेंबर 2022 पासून आतापर्यंत 7 मोक्का प्रस्तावामध्ये 105 जणांविरुध्द मोक्का कायद्यांतर्गत कारवाई केली आहे. तसेच 19 जणांना हद्दपार व एकावर एमपीडीए कायद्यान्वये स्थानबद्ध करण्यात आले आहे. भविष्यातही अशाच प्रकारे गुन्हेगारांवर प्रतिबंधात्मक कारवाई केली जाणार आहे.
[ad_2]
Source link
