धुळे जिल्ह्यातील साक्री तालुक्यात काही दिवसांपूर्वी घडलेल्या दुहेरी हत्याकांडाची घटना ताजी असतानाच आणखी एका दुहेरी हत्याकांडाने संपूर्ण जिल्हा हादरला आहे. साक्री तालुक्यातील वर्धाने-उभरांडी शिवारात दोन जणांचे मृतदेह आढळून आल्याने परिसरात मोठी खळबळ उडाली असून या प्रकरणामागे भोंदूगिरीचा संशय व्यक्त केला जात आहे. पोलिसांनी या प्रकरणी एका भोंदूला ताब्यात घेतल्याची माहिती समोर आली आहे.
मिळालेल्या माहितीनुसार, दि. १६ फेब्रुवारी २०२६ रोजी सकाळी भडगाव-वर्धाने टेंबे फाट्याजवळ एका विवाहित महिलेचा मृतदेह आढळून आला. मृत महिलेच्या अंगावर एमएच १८ सीएफ ८१५१ क्रमांकाची अॅक्सेस १२५ दुचाकी टाकण्यात आली होती. महिलेच्या तोंडाला रुमाल बांधलेला असल्याने प्रथमदर्शनी हा अपघात असल्याचा पोलिसांना संशय आला.
घटनास्थळी पोहोचलेल्या पोलिसांनी तात्काळ महिलेची ओळख पटवली. मृत महिलेचे नाव जयश्री रजनीकांत काकुस्ते (वय २५) असून त्या कासारे येथील रहिवासी होत्या. त्या बचत गटामार्फत बजाज फायनान्स कलेक्शनचे काम करत असल्याची माहिती समोर आली. घटनेपूर्वी रात्री त्यांचे पतीशी संभाषण झाल्याचेही समजते. या घटनेमुळे काकुस्ते कुटुंबीयांवर दुःखाचा डोंगर कोसळला.
घटनास्थळी महिलेचा मोबाईल आणि पर्स सापडल्याने हा प्रकार लुटमारीचा नसल्याचे पोलिसांनी स्पष्ट केले. पोलिसांनी तातडीने तपास सुरू करत योगेश भैय्या बापू खैरनार (रा. जैताणे) याला ताब्यात घेतले. चौकशीदरम्यान संशयिताने गुन्ह्याची कबुली दिल्यानंतर या प्रकरणाला वेगळे वळण मिळाले.
संशयिताच्या म्हणण्यानुसार, एक व्यक्ती संबंधित महिलेचा खून करत असल्याचे त्याच्या निदर्शनास आले. महिलेचा जीव वाचविण्याच्या प्रयत्नात त्या व्यक्तीचा त्याच्याकडून खून झाल्याचा दावा करण्यात आला. त्यानंतर पोलिसांनी तपासाची सूत्रे वेगाने फिरवत उमरांडी-जैताणे गोशाळा मठाजवळील टेकडी परिसरात शोधमोहीम राबवली.
पोलिस अधिकारी मयूर भामरे व त्यांच्या पथकाने घटनास्थळी जाऊन तपास केला असता निर्जन ठिकाणी पुरलेला एका तरुणाचा मृतदेह हस्तगत करण्यात आला. मृत तरुणाची ओळख अक्षय सोनवणे (रा. भांडणे) अशी पटली.
दरम्यान, भोंदू संशयिताकडून मिळणाऱ्या उडवाउडवीच्या उत्तरांमुळे पोलिसांचा संशय अधिकच बळावला. विवाहितेच्या तोंडाला बांधलेला रुमाल, घटनास्थळी सापडलेली पर्स आणि दुचाकी यामुळे तपासाला गती मिळाली.
या गंभीर प्रकरणात एसीपी अजय देवरे यांनी स्वतः लक्ष घालत तपासाची सूत्रे हातात घेतली होती. फॉरेन्सिक टीम, एलसीबी, डॉग स्कॉड आणि निजामपूर पोलिसांच्या संयुक्त कारवाईतून हे दुहेरी हत्याकांड उघडकीस आले.
