फलटणचा सुपुत्र आंतरराष्ट्रीय स्तरावर भारतीय संघाचा कर्णधार
पहिल्या साऊथ एशियन सॉफ्ट हॉकी चॅम्पियनशिपसाठी लखन मोरे यांची निवड
फलटण : लखन नंदकुमार मोरे यांची Amateur Soft Hockey Federation of India आयोजित 1st South Asian Soft Hockey Championship 2026 स्पर्धेसाठी भारतीय पुरुष सॉफ्ट हॉकी संघाच्या कर्णधारपदी निवड करण्यात आली आहे. ही स्पर्धा २०, २१ व २२ मे २०२६ रोजी Kathmandu येथे पार पडणार असून भारत, नेपाळ, पाकिस्तान आणि भूतान हे देश सहभागी होणार आहेत.
राजस्थानातील Jaipur येथे दि. १४ मे ते १८ मे दरम्यान आयोजित पाच दिवसीय राष्ट्रीय शिबिरात ऑल इंडिया सॉफ्ट हॉकी फेडरेशनचे वरिष्ठ अधिकारी, प्रशिक्षक व खेळाडू यांच्या उपस्थितीत पुरुष व महिला संघांच्या कर्णधारांची निवड करण्यात आली. त्यामध्ये फलटणच्या लखन मोरे यांनी आपल्या उत्कृष्ट खेळाच्या जोरावर भारतीय संघाचे नेतृत्व करण्याचा मान मिळवला.
लखन मोरे यांचे शालेय शिक्षण यशवंतराव चव्हाण हायस्कूल येथे तर उच्च शिक्षण मुधोजी कॉलेज येथे झाले. शिक्षणासोबतच हॉकीचे धडे घेत त्यांनी मेहनत, जिद्द आणि सातत्याच्या जोरावर आज आंतरराष्ट्रीय स्तरावर झेप घेतली आहे.
फलटण शहर, मंगळवार पेठ, कसबा पेठ तसेच संपूर्ण सातारा जिल्ह्यासाठी हा अभिमानाचा आणि सुवर्ण अक्षरांनी लिहून ठेवावा असा क्षण ठरला आहे. सन २००० पासून यशवंतराव चव्हाण हायस्कूल मैदान, घडसोली मैदान आणि मुधोजी कॉलेजच्या मैदानावर घडलेला हा खेळाडू आज भारताचे प्रतिनिधित्व करत असल्याने क्रीडा क्षेत्रात आनंदाचे वातावरण निर्माण झाले आहे.
लखन मोरे यांच्या या यशाबद्दल शिक्षक, क्रीडा प्रशिक्षक, खेळाडू, संस्थांचे पदाधिकारी तसेच फलटण तालुक्यातील नागरिकांकडून अभिनंदनाचा वर्षाव होत आहे. काठमांडू येथे भारतीय संघ विजयी होऊन परत यावा, अशा शुभेच्छाही व्यक्त करण्यात येत आहेत.
“चक दे इंडिया”च्या घोषणेसह फलटणकरांकडून भारतीय पुरुष व महिला सॉफ्ट हॉकी संघाला मनःपूर्वक शुभेच्छा देण्यात येत आहेत.
