खंडाळा येथे समता सैनिक दलाकडून डॉ. बाबासाहेब आंबेडकरांना मानवंदना
खंडाळा येथे समता सैनिक दलाकडून डॉ. बाबासाहेब आंबेडकरांना मानवंदना
खंडाळा : भारतीय बौद्ध महासभा शाखा, खंडाळा तालुक्याच्या वतीने महामानव डॉ. बाबासाहेब आंबेडकर यांच्या १३५ व्या जयंतीनिमित्त भव्य आणि उत्साहपूर्ण कार्यक्रमाचे आयोजन करण्यात आले. कार्यक्रमाची सुरुवात भारतीय बौद्ध महासभा शाखा खंडाळा तालुका पदाधिकारी व समता सैनिक दलाच्या वतीने महामानवांना वंदन करून, बुद्ध वंदना घेऊन तसेच प्रतिमांचे पूजन करून करण्यात आली.
जयंती महोत्सवानिमित्त कार्ले लेणी येथून भीम ज्योतीचे खंडाळा येथे आगमन झाले. या भीम ज्योतीचे उत्स्फूर्त स्वागत करण्यात आले. यावेळी समता सैनिक दलाच्या वतीने मानवंदना देत शिस्तबद्ध परेड करण्यात आली व भीम ज्योतीला मुख्यमंचाजवळ आणण्यात आले.
समता सैनिक दलाचे असिस्टंट स्टाफ ऑफिसर, राज्य संघटक तथा पुणे व सातारा जिल्हा प्रभारी आयु. दादासाहेब भोसले यांच्या नेतृत्वाखाली केंद्रीय मेजर संपत भोसले, केंद्रीय मेजर पिराजी सातपुते, समता फोर्सच्या कंपनी कमांडर आयु. अर्चना चव्हाण, प्लॅटून कमांडर महेंद्र सोनवणे, युनिट लीडर निलेश मोरे यांच्यासह अनेक पदाधिकारी उपस्थित होते.
मुख्यमंचाजवळ महामानवांना वंदन करून बुद्ध धम्माच्या धम्मध्वजाला समता सैनिक दलाच्या वतीने सलामी देण्यात आली. उपस्थितांना भीम जयंतीच्या मंगलमय शुभेच्छाही देण्यात आल्या.
यावेळी अहिरे गावचे सुपुत्र तथा पुणे पश्चिम विभागाचे संरक्षण उपाध्यक्ष व सिनियर डिव्हिजन ऑफिसर आयु. राजेंद्र बडेकर यांनी समता सैनिक दलासाठी ढोल, ड्रम व मोठी पितळी झांज भेट स्वरूपात प्रदान केली.
या जयंती महोत्सवात विविध सांस्कृतिक व क्रीडा स्पर्धांचे आयोजन करण्यात आले होते. त्यामध्ये संगीत खुर्ची, गायन स्पर्धा व इतर उपक्रमांचा समावेश होता.
संपूर्ण कार्यक्रमाचे आयोजन भारतीय बौद्ध महासभा शाखा खंडाळा तालुक्याचे अध्यक्ष आयु. संजय जाधव, सरचिटणीस डॉ. विलास खरात, कोषाध्यक्ष कांतीलाल खुंटे, प्रचार व पर्यटन उपाध्यक्ष युवराज खुंटे, सचिव राजेंद्र खुंटे तसेच सर्व तालुका पदाधिकाऱ्यांनी केले.
कार्यक्रमास मोठ्या संख्येने बौद्ध उपासक-उपासिका, महिला, युवक, बालक – बालिका उपस्थित राहून जयंती महोत्सव उत्साहात साजरा करण्यात आला.
