बुद्धविचारांचा जागर, समतेचा संकल्प आणि बोधिवृक्षाच्या रोपातून निसर्गसंवर्धनाचा संदेश
समता नगर (विडणी) : विडणी येथील समता नगरात न्यू पंचशील तरुण मित्र मंडळाच्या वतीने बुद्धमूर्ती प्रतिष्ठापना, बुद्ध विहार नामकरण व वर्षावास सांगता समारंभ उत्साहपूर्ण आणि मंगलमय वातावरणात संपन्न झाला. या कार्यक्रमाला विडणीसह फलटण तालुका आणि परिसरातील विविध सामाजिक, धार्मिक, शैक्षणिक क्षेत्रांतील मान्यवर, भारतीय बौद्ध महासभेचे पदाधिकारी, समता सैनिक दलाचे कार्यकर्ते, पत्रकार तसेच बौद्ध उपासक-उपासिका मोठ्या संख्येने उपस्थित होते.
कार्यक्रमात पूज्य भंते कश्यपजी (नालासोपारा, मुंबई) यांच्या हस्ते बुद्धमूर्ती प्रतिष्ठापना विधी पार पडला. सायंकाळी चंक्रमण, बुद्धवंदना आणि धम्मविधींचे आयोजन करण्यात आले होते. वर्षावास सांगता समारंभाच्या निमित्ताने तथागत बुद्धांच्या करुणा, मैत्री, प्रज्ञा, समता आणि बंधुभावाच्या विचारांचे स्मरण करण्यात आले. बुद्ध विहार हे समाजाला विवेकनिष्ठ विचारांची, नैतिक मूल्यांची आणि सामाजिक एकतेची प्रेरणा देणारे केंद्र ठरावे, असा संदेश या कार्यक्रमातून देण्यात आला.
समता सैनिक दलाकडून धम्मसलामी
कार्यक्रमात समता सैनिक दलाच्या वतीने शिस्तबद्ध पद्धतीने धम्मसलामी देण्यात आली. समता सैनिक दलाच्या महाराष्ट्र राज्य संघटक तथा असिस्टंट स्टाफ ऑफिसर आणि पुणे-सातारा जिल्हा प्रभारी आयु. दादासाहेब भोसले यांच्या मार्गदर्शनाखाली समता सैनिक दलाच्या कार्यकर्त्यांनी सहभाग नोंदवला. समता फोर्सच्या कंपनी कमांडर आयुनि अर्चना चव्हाण यांचीही उपस्थिती होती.
बुद्ध विहार परिसरात बोधिवृक्षाचे रोप
या कार्यक्रमाचे आणखी एक महत्त्वपूर्ण वैशिष्ट्य म्हणजे बुद्ध विहाराच्या परिसरात बोधिवृक्षाचे रोप लावण्यात आले. बुद्धांच्या जीवनाशी आणि ज्ञानप्राप्तीशी जोडलेल्या बोधिवृक्षाच्या प्रतीकातून पर्यावरणसंवर्धन, निसर्गाविषयी कृतज्ञता आणि भावी पिढ्यांसाठी हरित परिसर निर्माण करण्याचा संदेश देण्यात आला. बुद्धविचार आणि पर्यावरणजाणीव यांचा सुंदर संगम या उपक्रमातून साधण्यात आला.
मान्यवरांची उपस्थिती
या कार्यक्रमाला विडणी गावचे प्रथम नागरिक आयु. सागर अभंग, उपसरपंच मनीषा नाळे, जिल्हा परिषद सदस्य ज्योती गौतम मोरे, वैशाली संदीप कांबळे, डॉ. किरण शेंडे, डॉ. बाळासाहेब शेंडे, अतुल मोरे, प्रा. हरीश बेडके, प्रा. सागर मदने, ग्रामपंचायत सदस्य कैलास जगताप, आकाश घाडगे, प्रदीप मोरे आणि निलेश नाळे उपस्थित होते.
भारतीय बौद्ध महासभेचे सातारा जिल्हा पूर्व संस्कार सचिव आयु. सोमीनाथ घोरपडे, केंद्रीय शिक्षिका अनुराधा धनसिंग सोनवणे, फलटण तालुका अध्यक्ष आयु. भीमराव लोंढे, खजिनदार राजकुमार रणवरे, तालुका कार्यकारिणीचे सचिन मोहिते व विजय भोसले, फलटण तालुका महिला अध्यक्ष रंजना रणवरे आणि केंद्रीय शिक्षक चंद्रकांत मोहिते यांनीही उपस्थिती नोंदवली.
पत्रकार प्रशांत सोनवणे, महादेव गायकवाड आणि अनमोल जगताप, वंचित बहुजन आघाडीचे आयु. सुभाष गायकवाड, भारतीय बौद्ध महासभेचे माजी पदाधिकारी राजेंद्रकुमार गायकवाड, सतीश कांबळे, माजी संघटक अमोल काकडे, फलटण शाखेचे माजी सल्लागार अॅड. चंद्रशेखर मोरे, विजयकुमार जगताप आणि माजी हिशोब तपासणीस अविनाश जगताप यांचीही उपस्थिती होती.
भारतीय बौद्ध महासभा शाखा फलटणच्या माजी कार्यकारिणीतील माजी अध्यक्ष आयु. महावीर भालेराव, सरचिटणीस आयु. बाबासाहेब जगताप, कोषाध्यक्ष आयु. विठ्ठल निकाळजे, प्रचार-पर्यटन उपाध्यक्ष आयु. रामचंद्र मोरे, संस्कार सचिव आयु. बजरंग गायकवाड आणि संस्कार सचिव अमोल भोसले यांच्यासह विविध क्षेत्रांतील मान्यवर सहभागी झाले.
मूर्तिदानासाठी योगदान देणारे आयु. तुषार मोहिते साहेब काही कारणास्तव कार्यक्रमाला उपस्थित राहू शकले नाहीत. त्यांच्या योगदानाबद्दल आयोजकांनी कृतज्ञता व्यक्त केली.
सामूहिक प्रयत्नांतून धम्मकार्याला बळ
न्यू पंचशील तरुण मित्र मंडळाचे सर्व पदाधिकारी, BBM Family चे सदस्य, भारतीय बौद्ध महासभा शाखा फलटणचे माजी पदाधिकारी, समता नगर तसेच आजूबाजूच्या गावांतील बौद्ध उपासक – उपासिका, बालक-बालिका आणि ग्रामस्थ मोठ्या संख्येने उपस्थित होते. सर्वांच्या सहकार्याने कार्यक्रम यशस्वी झाला.
बुद्धमूर्ती प्रतिष्ठापना, बुद्ध विहार नामकरण, वर्षावासाची सांगता, समता सैनिक दलाची धम्मसलामी आणि बोधिवृक्षाचे रोपण या उपक्रमांतून समता नगरात बुद्धविचार, सामाजिक बांधिलकी आणि पर्यावरणसंवर्धनाची भावना अधिक दृढ करण्याचा संकल्प व्यक्त झाला.
“बुद्धांचा धम्म आचरणात आणणे, बाबासाहेबांचे समतेचे स्वप्न साकारण्यासाठी प्रयत्न करणे आणि समाजात मैत्री व बंधुभाव वाढवणे” हा या कार्यक्रमाचा प्रेरणादायी संदेश ठरला.
