साठे गावाचा आदर्श उपक्रम : मिंडवस्ती शाळेतील विद्यार्थ्यांना ५० हजारांच्या स्पोर्ट ड्रेस व कबड्डी किटचे वाटप
साठे (ता फलटण ) – साठे गावातील सर्व ग्रामस्थांच्या आर्थिक सहकार्यातून मिंडवस्ती (साठेफाटा) येथील जिल्हा परिषद प्राथमिक शाळेतील इयत्ता पहिली ते सातवीच्या सर्व विद्यार्थ्यांना सुमारे ५०,००० रुपयांच्या स्पोर्ट ड्रेस व कबड्डी स्पोर्ट किटचे वितरण उत्साहात करण्यात आले.
या उपक्रमासाठी गावातील माजी डि.वाय.एसपी शिवाजी मुळीक यांनी १०,००० रुपयांची देणगी दिली. तसेच अमोल शिंदे (५,००० रुपये), कै. संदिप खटके यांच्या स्मरणार्थ आदर्श खटके (४,००० रुपये – कबड्डी स्पोर्ट ड्रेस किट), आणि चंद्रकांत जगताप (२,००० रुपये) यांनी आर्थिक मदत केली. याशिवाय साठे गावातील आजी-माजी राजकीय पदाधिकारी, ग्रामस्थ, पालक व शिक्षकवृंद यांनीही उत्स्फूर्त सहकार्य केले.
या आर्थिक पाठबळातून विद्यार्थ्यांना अंदाजे ४५,००० रुपयांचे स्पोर्ट ड्रेस आणि ४,००० रुपयांचे कबड्डी स्पोर्ट किट प्रदान करण्यात आले.
कार्यक्रम प्रसंगी साठे गावच्या माजी सरपंच शर्मिला माने मॅडम, विद्यमान सरपंच निलम खांडेकर मॅडम, बाबासो धायगुडे, शाळा व्यवस्थापन समितीचे माजी अध्यक्ष संदिप मिंड, उपाध्यक्षा पल्लवी धायगुडे मॅडम, तसेच ऋषिकेश खटके आदी मान्यवर प्रमुख उपस्थित होते.
मान्यवरांनी विद्यार्थ्यांना खेळाचे महत्त्व पटवून देत, नियमित सराव व शिस्त यांद्वारे जिल्हा व राज्य स्तरावर यश मिळवण्याचे आवाहन केले. या उपक्रमामुळे विद्यार्थ्यांमध्ये खेळाबद्दल उत्साह वाढला असून ग्रामस्थांच्या एकजुटीचे उत्कृष्ट उदाहरण पुन्हा एकदा समोर आले आहे.
गावकऱ्यांच्या सहकार्यामुळे ग्रामीण भागातील विद्यार्थ्यांना दर्जेदार क्रीडा साहित्य उपलब्ध झाल्याने पालक व शिक्षकवर्गाने समाधान व्यक्त केले.
