फलटणमध्ये ‘दिवाणी न्यायालय, वरिष्ठ स्तर’चे उद्घाटन न्याय प्रक्रिया होणार सुलभ; ‘फलटण जिल्हा’ निर्मितीकडे महत्त्वाचे पाऊल

फलटण : फलटणच्या प्रशासकीय आणि न्यायालयीन इतिहासात आणखी एक महत्त्वपूर्ण अध्याय जोडला जात आहे. बहुप्रतिक्षित ‘दिवाणी न्यायालय, वरिष्ठ स्तर’ या न्यायालयाची प्रत्यक्ष सुरुवात रविवार, दि. १५ फेब्रुवारी २०२६ रोजी होत असून, यामुळे फलटणच्या न्यायव्यवस्थेला नवे बळ मिळणार आहे.
माढा लोकसभा मतदारसंघाचे माजी खासदार रणजितसिंह नाईक निंबाळकर आणि फलटण-कोरेगाव विधानसभेचे आमदार सचिन पाटील यांच्या सातत्यपूर्ण पाठपुराव्यामुळे हे न्यायालय फलटणसाठी मंजूर झाले होते. त्यांच्या प्रयत्नांचे फलित म्हणून आता न्यायालयाचे प्रत्यक्ष उद्घाटन होत आहे. यामुळे स्थानिक वकिलांसह नागरिकांमध्ये समाधानाची भावना व्यक्त होत आहे.
न्यायमूर्तींच्या उपस्थितीत होणार उद्घाटन सोहळा
विमानतळाशेजारील दिवाणी व फौजदारी न्यायालयाच्या नवीन इमारतीत सकाळी ११.३० वाजता भव्य उद्घाटन सोहळा पार पडणार आहे. मुंबई उच्च न्यायालयाचे न्यायमूर्ती नितीन आर. बोरकर यांच्या हस्ते न्यायालयाचे उद्घाटन होणार आहे.
या सोहळ्यास उच्च न्यायालयाचे न्यायमूर्ती अनिल एल. पानसरे, राजेश एस. पाटील, संजय ए. देशमुख आणि रणजितसिंह राजा भोसले यांची प्रमुख उपस्थिती लाभणार आहे. तसेच सातारा जिल्ह्याचे प्रमुख जिल्हा व सत्र न्यायाधीश अरविंद शं. वाघमारे हेही कार्यक्रमास उपस्थित राहणार आहेत.
नागरिकांना मोठा दिलासा
आजवर वरिष्ठ स्तरावरील दिवाणी प्रकरणांसाठी फलटण व परिसरातील पक्षकारांना सातारा येथे जावे लागत होते. यामुळे वेळ, पैसा आणि श्रमांचा मोठा अपव्यय होत होता. आता हे न्यायालय फलटणमध्येच सुरू होत असल्याने न्याय मिळवणे अधिक सुलभ, जलद आणि खर्चिकदृष्ट्या फायदेशीर ठरणार आहे.
स्थानिक बार असोसिएशनने या निर्णयाचे स्वागत करत समाधान व्यक्त केले आहे.
प्रशासकीय विस्तारामुळे वाढते महत्त्व
नुकतेच फलटणला अप्पर जिल्हाधिकारी कार्यालय मंजूर झाले आहे. त्यानंतर वरिष्ठ स्तर न्यायालयाची सुरुवात होत असल्याने ‘फलटण जिल्हा’ निर्मितीच्या दिशेने हे अत्यंत महत्त्वाचे पाऊल मानले जात आहे.
प्रशासकीय आणि न्यायालयीन यंत्रणेचा विस्तार झाल्याने फलटणचे स्थान राज्याच्या प्रशासकीय नकाशावर अधिक ठळक होत आहे. राजकीय, प्रशासकीय आणि न्यायिक स्तरावर फलटणच्या वाढत्या प्रभावाची ही नोंद असून, भविष्यात स्वतंत्र जिल्हा निर्मितीच्या मागणीला यामुळे अधिक बळ मिळण्याची शक्यता आहे.