फलटण – उपजिल्हा रुग्णालयातील महिला डॉक्टरच्या आत्महत्याप्रकरणाने संपूर्ण महाराष्ट्र हादरला आहे. या डॉक्टरने आपल्या हातावर लिहून PSI गोपाल बदने याने चारवेळा बलात्कार केल्याचे, तसेच प्रशांत बनकर याने शारीरिक व मानसिक अत्याचार केल्याचे नमूद करत आत्महत्या केली होती.
महिला डॉक्टर राहत असलेल्या घराचा मालक प्रशांत बनकर याला पोलिसांनी पहाटे ४ वाजता अटक केली आहे. तो आपल्या मित्राच्या पुण्यातील एका फार्महाऊसवर लपला होता. पोलिसांनी दोन पथके तयार करून शोधमोहीम हाती घेतल्यानंतर ही कारवाई करण्यात आली.
दरम्यान, या प्रकरणातील दुसरा मुख्य आरोपी PSI गोपाल बदने अजूनही फरार आहे. मुख्यमंत्री देवेंद्र फडणवीस यांच्या आदेशानंतर त्याला निलंबित करण्यात आले असले तरी, पोलिसांना त्याचा मागोवा घेण्यात अद्याप यश आलेले नाही.
या घटनेनंतर महाराष्ट्रासह संपूर्ण देशभरात संतापाची लाट उसळली असून विरोधकांकडून सत्ताधाऱ्यांवर जोरदार टीका होत आहे. पोलीस विभाग आणि आरोग्य विभागावरही अनेक आरोप होत आहेत.
पोलिसांच्या तीन ते चार पथकांकडून गोपाल बदनेच्या शोधासाठी प्रयत्न सुरू आहेत. उद्या, २६ ऑक्टोबर रोजी मुख्यमंत्री देवेंद्र फडणवीस फलटण दौऱ्यावर येणार असून त्यांच्या आगमनापूर्वी गोपाल बदने याला अटक करण्याचे मोठे आव्हान पोलिसांसमोर उभे आहे.
