फलटण: जागतिक महिला दिनाचे औचित्य साधत फलटण येथील श्रीमंत शिवाजीराजे इंग्लिश मीडियम स्कूल (SSC) येथे विद्यार्थिनींसाठी विशेष स्वसंरक्षण (Self-Defense) प्रशिक्षण शिबिराचे आयोजन करण्यात आले. कमिन्स इंडिया फाऊंडेशन आणि इको सर्क्युलर इंडिया फाउंडेशन यांच्या संयुक्त विद्यमाने सामाजिक बांधिलकीच्या भावनेतून हा उपक्रम राबविण्यात आला.
आजच्या बदलत्या सामाजिक परिस्थितीत मुलींना स्वतःच्या सुरक्षेसाठी शारीरिक आणि मानसिकदृष्ट्या सक्षम बनवणे अत्यंत गरजेचे झाले आहे. याच उद्देशाने आयोजित करण्यात आलेल्या या एकदिवसीय प्रशिक्षण सत्रात शाळेतील इयत्ता पाचवी ते बारावीपर्यंतच्या विद्यार्थिनींनी उत्स्फूर्त सहभाग नोंदवला.
या प्रशिक्षणासाठी कराटे तज्ज्ञ प्रिया शेडगे यांनी विद्यार्थिनींना मार्गदर्शन केले. त्यांनी मुलींना विविध स्वसंरक्षण तंत्रांची माहिती देत प्रत्यक्ष प्रात्यक्षिकांद्वारे आपत्कालीन परिस्थितीत स्वतःचा बचाव कसा करावा याचे प्रशिक्षण दिले. प्रशिक्षण सत्राचे स्वरूप अत्यंत व्यावहारिक ठेवण्यात आले होते.
या शिबिरात विद्यार्थिनींना सोपी पण प्रभावी स्वसंरक्षण तंत्रे शिकवण्यात आली. तसेच अचानक उद्भवणाऱ्या संकटाच्या प्रसंगी घाबरून न जाता धैर्याने परिस्थितीचा सामना कसा करावा, याचे मार्गदर्शनही करण्यात आले. शारीरिक हालचालींबरोबरच मानसिक ताकद आणि आत्मविश्वास वाढवण्यावरही विशेष भर देण्यात आला.
या संपूर्ण उपक्रमाचे नियोजन व तांत्रिक बाबींची जबाबदारी कमिन्स इंडिया फाऊंडेशन आणि इको सर्क्युलर इंडिया फाउंडेशन यांनी पार पाडली. अशा प्रकारच्या प्रशिक्षणांमुळे मुलींमध्ये सुरक्षिततेची जाणीव वाढून त्यांचा आत्मविश्वास बळकट होईल, असा विश्वास आयोजकांनी व्यक्त केला.
कार्यक्रमाच्या शेवटी प्रशिक्षक प्रिया शेडगे यांचा सन्मान करण्यात आला. तसेच या उपक्रमात सहकार्य करणाऱ्या सर्वांचे आभार मानून कार्यक्रमाची सांगता करण्यात आली.
फलटणमध्ये विद्यार्थिनींसाठी स्वसंरक्षण प्रशिक्षण शिबिर; जागतिक महिला दिनानिमित्त उपक्रम
