फलटण: विधान परिषदेचे माजी सभापती आणि विद्यमान आमदार श्रीमंत रामराजे नाईक निंबाळकर यांनी आगामी स्थानिक स्वराज्य संस्था निवडणुकांसाठी कंबर कसली असून कार्यकर्त्यांना चार्ज करण्याचा धडाका सुरू केला आहे. फलटण शहरासह तालुक्यातील विविध कार्यक्रमांना हजेरी लावत, गटबाजी करणाऱ्या कार्यकर्त्यांना इशारा देताना ते म्हणाले, “माझे गुडघे जरी काम करत नसले तरी माझं डोकं चांगलं काम करतंय; त्यांना खुर्चीत बसून संपविन!”
रामराजेंच्या या दमदार वक्तव्याने राजकीय वातावरण तापले आहे.
“आयकर धाड टाकली असती तर स्टेटस वाढलं असतं!”
आंदरुड येथे शंभूराज विनायकराव पाटील यांनी आयोजित हुरडा पार्टीत बोलताना रामराजेंनी मिश्कील शैलीत आयकर विभागाच्या कारवाईबाबत भाष्य केले. “आयकर विभागाने माझ्यावर धाड टाकायला हवी होती; धाड टाकली की स्टेटस वाढते!” असा टोला त्यांनी हाणला. काही दिवसांपूर्वी सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांच्या निवासस्थानी आयकर धाड पडली होती, मात्र त्यातून काहीच निष्पन्न झाले नाही, असे संजीवराजेंनी स्पष्ट केले होते.
स्थानिक निवडणुकीत “राजे गट” पूर्ण ताकदीने उतरणार!
तरडगाव येथे झालेल्या कार्यक्रमात रामराजेंनी स्पष्ट केले की, आगामी जिल्हा परिषद, पंचायत समिती आणि नगरपरिषद निवडणुका राजे गटाच्या माध्यमातून संपूर्ण ताकदीने लढवल्या जातील. “कार्यकर्त्यांनी निवडणुकीच्या तयारीला लागावे,” असे निर्देशही त्यांनी दिले.
रामराजेंचा ‘ऍक्टिव्ह मोड’ सुरू!
लोकसभा व विधानसभा निवडणुकीत फारसे सक्रिय न राहिलेले रामराजे आता स्थानिक स्वराज्य संस्थांच्या निवडणुकीसाठी स्वतः प्रचारात उतरणार असल्याची चर्चा आहे. त्यांच्या अॅक्टिव्ह होण्याने फलटण तालुक्यातील राजकीय समीकरणे बदलण्याची शक्यता वर्तवली जात आहे.
राजकारणात या विधानांचा परिणाम काय होईल, हे पाहणे उत्सुकतेचे ठरेल!
