फलटण | प्रतिनिधी फलटण शहरातील सोमवार पेठ येथे पौष पोर्णिमेचे औचित्य साधून लहान मुला-मुलींसाठी संस्कार वर्गाचा शुभारंभ उत्साहात पार पडला. या प्रसंगी थोर समाजसुधारिका सावित्रीमाई फुले यांच्या जयंतीनिमित्त अभिवादन करण्यात आले.
या कार्यक्रमात उपस्थित बालक-बालिकांसाठी सुत्त पठन, वंदना तसेच भगवान बुद्ध आणि डॉ. बाबासाहेब आंबेडकर यांच्या जीवनावर आधारित प्रेरणादायी गोष्टी सांगण्यात आल्या. या उपक्रमाच्या माध्यमातून मुलांमध्ये नैतिक मूल्ये, वैज्ञानिक दृष्टिकोन आणि मानवतावादी विचार रुजविण्याचा प्रयत्न करण्यात आला.
यावेळी बोलताना चंद्रकांत मोहिते यांनी “फक्त शिक्षण नव्हे तर त्यासोबत चांगल्या संस्कारांची जोड मिळाल्यासच भावी पिढी सुसंस्कृत आणि जबाबदार नागरिक बनेल,” असे मत व्यक्त केले.
या संस्कार वर्गाच्या आयोजनासाठी प्रदीप खरात, विशाल शिंदे, किशोर मोरे, शिंदे मावशी यांनी विशेष पुढाकार घेतला. तसेच वाघमारे परिवार, शिंदे परिवार, खरात परिवार यांच्यासह सोमवार पेठ येथील उपासक-उपासिका मोठ्या संख्येने उपस्थित होते.
या उपक्रमामुळे परिसरातील पालक व नागरिकांनी समाधान व्यक्त केले असून, भविष्यातही असे संस्कारात्मक उपक्रम नियमितपणे राबविण्याचा संकल्प आयोजकांनी व्यक्त केला.

मराठी ही केवळ संवादाची नव्हे, तर रोजगाराची भाषा व्हावी – उपमुख्यमंत्री एकनाथ शिंदे

सातारा : मराठी भाषा ही आपल्या संस्कृतीचा आत्मा, अस्मिता आणि अभिमान आहे. मराठी टिकली तरच आपले अस्तित्व टिकेल, याची जाणीव प्रत्येक मराठी माणसाने ठेवली पाहिजे. मराठी ही केवळ संवादापुरती मर्यादित न राहता अर्थार्जन व रोजगाराची भाषा झाली पाहिजे, असे ठाम प्रतिपादन उपमुख्यमंत्री एकनाथ शिंदे यांनी केले. सातारा येथे झालेल्या ९९ व्या अखिल भारतीय मराठी साहित्य संमेलनाच्या समारोप कार्यक्रमात ते बोलत होते.
उपमुख्यमंत्री शिंदे म्हणाले की, मराठी भाषेचे वैभव, दरारा आणि दिमाख जपणे हे केवळ कर्तव्य नसून पवित्र जबाबदारी आहे. या साहित्य संमेलनासाठी शासनाने ३ कोटी रुपयांचा निधी उपलब्ध करून दिला असून, भविष्यातही अशा संमेलनांना निधी कमी पडू दिला जाणार नाही, अशी ग्वाही त्यांनी दिली.
मराठी साहित्याचा ‘महाकुंभ’ साताऱ्यात
१ ते ४ जानेवारीदरम्यान सातारा येथे ९९ वे अखिल भारतीय मराठी साहित्य संमेलन पार पडले. समारोप कार्यक्रमास ज्ञानपीठ पुरस्कार सन्मानित ज्येष्ठ साहित्यिक रघुवीर चौधरी प्रमुख पाहुणे म्हणून उपस्थित होते. यावेळी उद्योग व मराठी भाषा मंत्री उदय सामंत, पालकमंत्री शंभूराज देसाई, सार्वजनिक बांधकाम मंत्री व स्वागताध्यक्ष श्रीमंत छत्रपती शिवेंद्रसिंहराजे भोसले, रोजगार हमी योजना मंत्री भरत गोगावले, संमेलनाध्यक्ष विश्वास पाटील यांच्यासह अनेक मान्यवर उपस्थित होते.
छत्रपती शिवाजी महाराजांच्या स्वराज्याची पायाभरणी झालेल्या साताऱ्याच्या पवित्र भूमीत हे संमेलन होणे ही अभिमानाची बाब असल्याचे सांगत उपमुख्यमंत्री शिंदे म्हणाले, “हे संमेलन केवळ साहित्यिक कार्यक्रम नसून मराठी भाषेच्या समृद्ध परंपरेचा, सांस्कृतिक आत्मविश्वासाचा आणि विचारस्वातंत्र्याचा उत्सव आहे. मराठी भाषेच्या सर्व प्रवाहांचा हा संगम आहे.”
हिंदी भाषेची सक्ती नाही – मराठीला प्राधान्य
महाराष्ट्रात हिंदी भाषेची सक्ती अजीबात होणार नाही, असा ठाम शब्द उपमुख्यमंत्र्यांनी दिला. मराठी भाषेचा सन्मान वाढवण्यासाठी राज्यातील सर्व एसटी बसस्थानकांच्या आवारात मराठी ललित पुस्तकांच्या विक्रीसाठी ५० टक्के सवलतीचे स्टॉल उपलब्ध करून दिले जातील. लेखन व प्रकाशन व्यवसायावरील कर कमी करण्यासाठीही प्रयत्न केले जातील, असे त्यांनी सांगितले.
शंभराव्या संमेलनासाठी मोठे निर्णय
मराठी भाषा मंत्री उदय सामंत यांनी सांगितले की, येणारे शंभरावे साहित्य संमेलन ऐतिहासिक ठरेल. यानिमित्ताने महत्त्वाचे निर्णय घेण्यात आले आहेत. शंभर संमेलनाध्यक्षांसाठी ग. दि. माडगूळकर यांच्या नावाने सन्मान निधी देण्यात येईल, तर पुढील संमेलनाध्यक्षांसाठी महादजी शिंदे यांच्या नावाने सन्मान निधी दिला जाईल. तर्कतीर्थ लक्ष्मणशास्त्री जोशी यांचे स्मारक सातारा येथे उभारण्यासाठी एमआयडीसीत दीड एकर जमीन देण्यात येणार आहे.
स्व. यशवंतराव चव्हाण यांच्या नावाने अनुवाद समिती पुन्हा सुरू करण्यात येणार असून, ग्रामीण साहित्याचे विविध भाषांमध्ये भाषांतर करून प्रकाशनासाठी शासन निधी उपलब्ध करून देईल, असेही त्यांनी स्पष्ट केले. पुण्यातील साहित्य परिषदेच्या इमारतीसाठी १ कोटी रुपयांचा निधी देण्याचे पत्रही यावेळी प्रदान करण्यात आले.
संमेलन साताऱ्याच्या वैभवात भर घालणारे – विश्वास पाटील
संमेलनाध्यक्ष विश्वास पाटील यांनी सांगितले की, हे संमेलन साताऱ्याच्या वैभवात भर टाकणारे ठरले. मराठी भाषेतील रसग्रहण, अलंकार आणि विनोद नव्या पिढीपर्यंत पोहोचवण्यासाठी जाणीवपूर्वक प्रयत्न करणे आवश्यक असल्याचे त्यांनी नमूद केले. सोशल मीडियामुळे वाढणारी असहिष्णुता चिंताजनक असल्याचे सांगत, मराठी भाषेच्या सांस्कृतिक अस्तित्वासाठी लढा सुरूच राहील, अशी ग्वाही त्यांनी दिली.
शंभरावे संमेलन पुण्यात
भारतीय मराठी साहित्य महामंडळाचे अध्यक्ष प्रा. मिलिंद जोशी यांनी सांगितले की, शंभरावे अखिल भारतीय मराठी साहित्य संमेलन पुण्यात होणार असून, पहिले संमेलनही पुण्यातच झाले होते. त्यामुळे एक ऐतिहासिक वर्तुळ पूर्ण होणार आहे. या निमित्ताने दुबईतही विशेष साहित्य संमेलन होणार असल्याची माहिती त्यांनी दिली.
समारोप कार्यक्रमात संमेलनाला मोलाची मदत करणाऱ्या मान्यवरांचा सत्कार करण्यात आला. प्रास्ताविक कार्याध्यक्ष विनोद कुलकर्णी यांनी केले, सूत्रसंचालन स्नेहल दामले यांनी केले, तर विविध ठराव सुनिताराजे पवार यांनी मांडले.

फलटण, दि. ४ : फलटण शहर व तालुक्यातील पत्रकारांच्या वतीने पत्रकार दिनानिमित्त प्रतिवर्षीप्रमाणे यंदाही माजी आमदार, अखिल भारतीय मराठी पत्रकार परिषदेचे माजी अध्यक्ष व शिवसंदेशकार कै. कॉ. हरिभाऊ निंबाळकर स्मृती चषक क्रिकेट स्पर्धेचे आयोजन करण्यात आले आहे. ही स्पर्धा दि. ७ व ८ जानेवारी रोजी माजी आमदार श्रीमंत शिवाजीराजे क्रीडा संकुल (घडसोली मैदान), फलटण येथे पार पडणार आहे.
या स्पर्धेत दरवर्षीप्रमाणे विविध शासकीय व निमशासकीय कार्यालयांतील अधिकारी व कर्मचाऱ्यांचे संघ सहभागी होणार आहेत. अत्यंत उत्साही, आनंदी आणि खेळकर वातावरणात या स्पर्धा नेहमीच यशस्वीपणे पार पडत असून, यंदाही तसाच उत्साह पाहायला मिळेल, असा विश्वास आयोजकांनी व्यक्त केला आहे.
स्पर्धेचे उद्घाटन मान्यवरांच्या हस्ते समारंभपूर्वक करण्यात येणार असून, त्यानंतर फलटण शहर व तालुक्यातील ज्येष्ठ पत्रकार आणि राजकीय नेते यांच्या संघांमध्ये प्रदर्शनीय सामना रंगणार आहे. त्यानंतर अधिकारी व कर्मचाऱ्यांच्या संघांमध्ये नियमानुसार साखळी व अंतिम सामने खेळवले जाणार आहेत.
फलटण शहर व तालुक्यातील क्रिकेटप्रेमींनी दोन्ही दिवस या स्पर्धांचा आनंद घेण्यासाठी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.