सातारा : बारामती विमान दुर्घटनेत उपमुख्यमंत्री अजित पवार (Ajit pawar) यांच्यासह 5 जणांचा दुर्दैवी मृत्यू झाला. अजित दादांच्या रुपाने महाराष्ट्राने मोठा नेता गमावला, तर अजित पवारांचे सुरक्षा रक्षक विदीप जाधव यांचाही या दुर्घटनेत मृत्यू झाला. अजित पवारांच्या अकाली जाण्याने अवघा महाराष्ट्र हळहळला. तर, विदीप जाधव (Vidip Jadhav) यांच्या मृत्यूने जाधव कुटुंबीयांवरही दु:खाचा डोंगर कोसळला आहे. पवार आणि जाधव कुटुंबीय दु:खात असून दोन्ही कुटुंबीयांकडून एकमेकांचे सांत्वन करण्यात आले. अजित दादांच्या पश्चात उपमुख्यमंत्रीपदाची धुरा त्यांच्या पत्नी सुनेत्रा पवार (Sunetra Pawar) यांच्याकडे आली. उपमुख्यमंत्रीपदाची जबाबदारी स्वीकारताच सुनेत्र पवार यांनी कराडमधील प्रितीसंगम म्हणजे स्व. यशवंतराव चव्हाण यांच्या स्मृतीस्थळावर जाऊन दर्शन घेतले. त्यानंतर, दिवंगत विदीप जाधव कुटुंबीयांची भेट घेऊन सांत्वन केले.

दिवंगत उपमुख्यमंत्री अजित पवार यांचे सुरक्षारक्षक विदीप जाधव यांचा बारामती येथे झालेल्या विमान अपघातात दुर्दैवी मृत्यू झाला होता. या दुःखद घटनेनंतर उपमुख्यमंत्री सुनेत्रा अजित पवार यांनी स्वतःचे वैयक्तिक दुःख बाजूला ठेवत विदीप जाधव यांच्या तरडगाव (ता. फलटण) येथील निवासस्थानी भेट देऊन त्यांच्या कुटुंबीयांचे सांत्वन केले. स्वर्गीय विदीप जाधव यांच्या पत्नी व मुलांच्या डोक्यावर मायेने हात फिरवत, “कोणत्याही अडचणीत मी तुमच्या सोबत आहे,” असा शब्द देत त्यांनी जाधव कुटुंबीयांना आधार दिला. या भावस्पर्शी भेटीमुळे परिसरात उपस्थितांचे डोळे पाणावले. पतीच्या निधनाने स्वत:वरही आधीच दु:खाचा डोंगर कोसळलेला असतानाही कर्तव्यपथ सांभात अत्यंत संयम व मायेने जाधव कुटुंबीयांचे दुःख हलके करण्याचा प्रयत्न करत उपमुख्यमंत्री सुनेत्रा पवार यांनी केला. त्यांच्या या कृतीने संवेदनशीलतेचा आदर्श घालून दिल्याची चर्चा होत आहे. 

दरम्यान, आमदार रोहित पवार यांनीही तरडगाव येथे जाऊन जाधव कुटुंबीयांची भेट घेतली होीती. “विदीप जाधव यांनी अजितदादांचे अंगरक्षक म्हणून अनेक वर्षे काम केले होते. दुर्दैवाने दोघांचाही विमान अपघातात मृत्यू झाला. अजितदादांच्या जाण्याने संपूर्ण महाराष्ट्र जसा दुःखात आहे, तसेच विदीप जाधव यांच्या कुटुंबावरही दुःखाचा डोंगर कोसळला आहे. दुःख वाटल्याने कमी होते, म्हणून आज फलटण (तरडगाव) इथं जाधव कुटुंबियांची भेट घेऊन विचारपूस केली आणि या कठीण प्रसंगी आम्ही सर्वजण त्यांच्या कुटुंबासोबत असल्याचा विश्वास त्यांना दिला.”, असे ट्विट रोहित पवार यांनी केले होते. तसेच, आमदार रोहित पवार यांनी विदीप जाधव यांच्या मुलांच्या शिक्षणाची जबाबदारीही स्वीकारली आहे. 

हेही वाचा

Video: भाजपने पुन्हा शब्द फिरवला, आधी म्हणाले नवाब मलिकांमुळे युती नाही; मुंबई महापालिकेत अमित साटमांचा यु-टर्न

आणखी वाचा

Deputy Chief Minister Sunetra Pawar: उपमुख्यमंत्री सुनेत्रा अजित पवार यांनी आज (2 फेब्रुवारी) कराड येथील प्रितीसंगमावर महाराष्ट्राचे शिल्पकार, पहिले मुख्यमंत्री स्व. यशवंतराव चव्हाण यांच्या समाधी स्थळी पुष्पचक्र अर्पण करून अभिवादन केले. सुनेत्रा पवार यांनी उपमुख्यमंत्रीपदाची शपथ घेतल्यानंतर प्रथमच कराडमध्ये येत यशवंतराव चव्हाण यांच्या समाधीचे दर्शन घेऊन पुष्पचक्र अर्पण केले. दिवंगत उपमुख्यमंत्री अजित पवार यांचे आणि स्व. यशवंतराव चव्हाण यांच्या समाधीस्थळाचे नातं अत्यंत जिव्हाळ्याचे होते. ते वारंवार कराडमध्ये यशवंतराव चव्हाण त्यांच्या समाधीचे दर्शन घेऊन अभिवादन करत होते. त्यांची आठवण यावेळी उपस्थितांना झाली. यावेळी मदत व पुनर्वसन मंत्री मकरंद पाटील, राज्य महिला आयोगाच्या अध्यक्ष रूपाली चाकणकर, खासदार सुनील तटकरे, खासदार नितीन पाटील, माजी खासदार श्रीनिवास पाटील, माजी आमदार बाळासाहेब पाटील, जिल्हाधिकारी संतोष पाटील, पोलीस अधीक्षक तुषार दोशी, कराडचे नगराध्यक्ष राजेंद्रसिंह यादव यांच्यासह विविध संस्थांचे पदाधिकारी उपस्थित होते. 

शपथविधीनंतर सुनेत्रा पवार काय म्हणाल्या?

दरम्यान, शपथविधीनंतर सुनेत्रा पवार म्हणाल्या की, दादांच्या अकाली निधनाने केवळ माझ्या वैयक्तिक आयुष्यावरच नाही, तर महाराष्ट्राच्या हृदयावर दुःखाचा डोंगर कोसळला आहे. तथापि, त्यांनी मला दिलेली कर्तव्यनिष्ठा, संघर्षाची ताकद आणि जनतेप्रती असलेली प्रामाणिक बांधिलकी हेच माझे खरे आधारस्तंभ आहेत त्यांनी स्पष्ट केले की, अजित दादांनी आपले आयुष्य शेतकरी, कष्टकरी, महिला आणि तरुणांना अस्तित्वाचा मंत्र देण्यासाठी वेचले. हा वारसा पुढे नेताना मी शिव, शाहू, फुले, आंबेडकर यांच्या विचारसरणीवर अढळ निष्ठा ठेवून काम करेन, असे त्यांनी सांगितले. महाराष्ट्रातील जनतेचे आभार मानताना त्या म्हणाल्या की, या कठीण काळात महाराष्ट्रातील जनतेने दिलेले प्रेम, विश्वास आणि पाठिंबा हीच माझी सर्वात मोठी शक्ती आहे. तुमच्या विश्वासाच्या जोरावर मी दादांचे विचार जिवंत ठेवून नवीन आशा आणि ऊर्जेने पुढे जात राहीन.

मी माझ्या पूर्ण क्षमतेने काम करेन

पंतप्रधान नरेंद्र मोदींबद्दल बोलताना त्या म्हणाल्या, पंतप्रधान नरेंद्र मोदींच्या ‘विकसित भारत 2047’ ला बळकटी देण्यासाठी आणि केंद्रीय गृहमंत्री अमित शहा यांच्या मार्गदर्शनाखाली आमचे सरकार महाराष्ट्राचा सर्वांगीण विकास साधण्यासाठी सज्ज आहे. नवीन ऊर्जेने आणि आशेने, माझ्यावर टाकलेल्या विश्वासास पात्र ठरण्यासाठी मी माझ्या पूर्ण क्षमतेने काम करेन. सुनेत्रा पवार यांच्याकडे उत्पादन शुल्क, क्रीडा आणि युवक कल्याण या विभागांची जबाबदारी सोपवण्यात आली आहे. 

इतर महत्वाच्या बातम्या

आणखी वाचा

Sunetra Pawar at Satara: राज्याचे दिवंगत उपमुख्यमंत्री अजित पवार यांच्या राजकीय आयुष्यात कायम शीर्षस्थानी राहिलेल्या यशवंतराव चव्हाण यांच्या विचारांचा वसा आता त्यांच्या पत्नी आणि राज्याच्या नवनिर्वाचित उपमुख्यमंत्री सुनेत्रा पवार (Sunetra Pawar) यांच्याकडून पुढे चालवला जाताना दिसत आहे. सुनेत्रा पवार या सोमवारी सातारा आणि फलटणचा (Phaltan news) दौरा करणार आहेत. यावेळी सुनेत्रा पवार कराडच्या प्रीतीसंगम येथील यशवंतराव चव्हाण (Yashwantrao Chavan) यांच्या समाधीची दर्शन घेतील. अजित पवार यांच्या राजकीय जीवनात यशवंतराव चव्हाण यांचे समाधीस्थळ आणि त्यांचे विचार नेहमीच महत्त्वाचे राहिले. अजित पवार (Ajit Pawar) यांनी अनेकदा आयुष्यातील महत्त्वाच्या क्षणी कराडच्या प्रीतीसंगम येथील यशवंतराव चव्हाण यांच्या समाधीचे दर्शन घेतले होते. आपल्या भाषणांमधून ते अनेकदा आपले राजकारण आणि समाजकारण हे यशवंतराव चव्हाणांच्या विचारसरणीचे असल्याचे सांगायचे. त्यांच्या निधनानंतर आता सुनेत्रा पवारही हाच वसा पुढे नेताना दिसत आहेत. 

उपमुख्यमंत्री सुनेत्रा पवार आज कराड येथे यशवंतराव चव्हाण यांच्या स्मृतीला अभिवादन करण्यासाठी जाणार आहेत.  सकाळी 10  वाजता कराड येथील प्रितीसंगम बाग येथे त्यांचे आगमन होईल. त्यानंतर स्वर्गीय यशवंतरावजी चव्हाण साहेब यांच्या समाधीस्थळी जाऊन पुष्पमाला अर्पण करत त्यांना आदरांजली वाहतील.  यानंतर दुपारी 11  वाजता उपमुख्यमंत्री श्रीमती सुनेत्रा अजितदादा पवार मोटारीने फलटणकडे रवाना होतील. दुपारी 1 वाजता त्या कै. विदीप जाधव यांच्या निवासस्थानी (लोणंद, तरडगाव, ता. फलटण) कुटुंबीयांची सांत्वनपर भेट घेतली व त्यांच्या दुःखात सहभागी होणार आहेत. अजित पवार यांच्या विमानाचा बारामतीमध्ये अपघात झाला तेव्हा सुरक्षारक्षक विदीप जाधव हे त्यांच्यासोबत विमानात होते. विमान कोसळल्यानंतर विदीप जाधव यांचाही मृत्यू झाला होता. कालच शरद पवार गटाचे आमदार रोहित पवार यांनी विदीप जाधव यांच्या कुटुंबीयांची भेट घेतली होती. यावेळी रोहित पवार यांनी विदीप जाधव यांच्या मुलांच्या शिक्षणाची जबाबदारी उचलणार असल्याची घोषणा केली होती. त्यानंतर आज सुनेत्रा पवार या विदीप जाधव यांच्या कुटुंबीयांना भेटणार आहेत. यानंतर सुनेत्रा पवार पुन्हा बारामतीत परतणार आहेत. 

Sunetra Pawar: सुनेत्रा पवार राज्याच्या पहिल्या उपमुख्यमंत्री

अजित पवार यांच्या विमानाचा 28 जानेवारीला बारामती येथे अपघात झाला होता. विमान खाली कोसळल्यानंतर प्रचंड स्फोट होऊन अजित पवार यांच्यासह विमानातील पाच जणांचा जागीच मृत्यू झाला होता. अजित पवार यांच्या निधनामुळे राष्ट्रवादी काँग्रेस आणि महाराष्ट्राच्या राजकारणात पोकळी निर्माण झाली होती. राष्ट्रवादी काँग्रेसमध्ये निर्नायकी परिस्थिती निर्माण झाली होती. या पार्श्वभूमीवर सुनेत्रा पवार यांनी अजित पवार यांच्या निधनाच्या तिसऱ्याच दिवशी म्हणजे 31 जानेवारीला उपमुख्यमंत्रीपदाची शपथ घेतली होती. अजित पवार यांच्याकडील अर्थ खाते सुनेत्रा पवार यांना देण्यात आले नसले तरी क्रीडा, राज्य उत्पादन शुल्क आणि अल्पसंख्याक विकास या तीन खात्यांचे मंत्रीपद सुनेत्रा पवार यांना देण्यात आले होते. 

आणखी वाचा

विमान अपघातावेळी ‘धुकं नव्हतं तर तिथं धोका’ होता, अजितदादांचा 100 टक्के घात झालाय; आमदार अमोल मिटकरींनी व्यक्त केली शंका, म्हणाले, जोपर्यंत..

आणखी वाचा