फलटण : फलटण औद्योगिक क्षेत्राच्या सर्वांगीण विकासासाठी महाराष्ट्र औद्योगिक विकास महामंडळाने (एमआयडीसी) सुरवडी, नांदळ व ढवळेवाडी गावांच्या सीमेवरील सुमारे १८८.०३ हेक्टर जमीन संपादित केली आहे. हे औद्योगिक क्षेत्र पुण्यापासून ८७ किमी तर फलटणपासून १४ किमी अंतरावर महाड–पंढरपूर राज्य महामार्ग क्रमांक ७० वर वसलेले आहे.
फलटण एमआयडीसीतील मुख्य रस्त्याच्या रुंदीकरणासाठी उद्योगमंत्री उदय सामंत यांनी १० कोटी रुपयांच्या कामास तत्वतः मान्यता दिली असून, आचारसंहिता संपल्यानंतर निविदा प्रक्रिया पूर्ण केली जाणार आहे.
सुरुवातीला एमआयडीसीने या औद्योगिक क्षेत्रात १०० हेक्टरवर सेझ (SEZ) विकसित केले होते, तर उर्वरित ८८ हेक्टरवर जनरल इंजिनिअरिंग झोन आहे. त्यापैकी आता ५० हेक्टर क्षेत्र सेझमधून वगळून जनरल इंजिनिअरिंग झोनमध्ये समाविष्ट करण्यात आले आहे. या क्षेत्रात मेसर्स कमिन्स इंडिया लिमिटेड यांना एकूण ५ भूखंडांचे वाटप करण्यात आले असून सर्व युनिट्स सध्या उत्पादनात आहेत.
एमआयडीसीने एकूण २६७ भूखंडांचा लेआउट तयार केला असून, त्यापैकी १४१ भूखंडांचे वाटप झाले आहे. यातील ११ भूखंडधारकांनी प्रत्यक्ष उत्पादन सुरू केले आहे. पाणीपुरवठ्यासाठी ४ एमएलडी क्षमतेचा जलवाहिनी प्रकल्प तसेच लोणंद ते फलटण २३ किमी लांबीची ४५० मिमी व्यासाची जलवाहिनी कार्यान्वित करण्यात आली आहे.
औद्योगिक क्षेत्राला जोडणारा ७.५० मीटर रुंदीचा १.९५ किमी लांबीचा मुख्य रस्ता २०१२–१३ मध्ये बांधण्यात आला होता. २०१९–२० मध्ये या रस्त्याचे अंतिम डांबरीकरण करण्यात आले. मात्र, हा रस्ता महाड–पंढरपूर महामार्गाशी जोडलेला असल्याने तसेच कमिन्ससारख्या मोठ्या उद्योगांच्या जड वाहनांची मोठ्या प्रमाणावर वाहतूक आणि स्थानिक ग्रामस्थांचा वापर लक्षात घेता, अपघातांचा धोका वाढला आहे.
याच पार्श्वभूमीवर कमिन्स इंडिया लिमिटेडने २१ मार्च २०२२ रोजी रस्ता रुंदीकरणाची मागणी केली होती. त्यानुसार आता हा रस्ता दोन पदरीवरून चार पदरी, म्हणजेच ७.५० मीटरवरून ११ मीटर रुंदीचा करण्यात येणार आहे. यामध्ये डीबीएम, बीएम आणि बीसी थरांचे डांबरीकरण, तसेच साइन बोर्ड, थर्मोप्लास्टिक स्ट्रिप्स व झेब्रा क्रॉसिंग यांसारख्या रस्ते सुरक्षेच्या सुविधांचा समावेश असेल.
या कामासाठी पीडब्ल्यूडी एसएसआर २०२२–२३ नुसार ७२८.०९ लाख रुपये (निव्वळ) आणि ८३७.३१ लाख रुपये (एकूण) खर्चाचा प्रस्ताव तयार करण्यात आला आहे. रस्ता रुंदीकरणामुळे औद्योगिक वाहतूक अधिक सुरक्षित आणि सुरळीत होण्यास मदत होणार आहे.

फलटण :- स्व. अजितदादा पवार यांचे अंगरक्षक स्व. विदीप जाधव यांच्या अकाली निधनामुळे तरडगाव गावावर शोककळा पसरली आहे. या दुःखद प्रसंगी श्रीमंत रामराजे नाईक निंबाळकर यांनी जाधव कुटुंबीयांच्या निवासस्थानी भेट देत कुटुंबाचे सांत्वन केले.
यावेळी स्व. विदीप जाधव यांना पुष्पहार अर्पण करून अभिवादन करण्यात आले. ही घटना अत्यंत दुर्दैवी असून या दुःखात राजे कुटुंब पूर्णपणे सहभागी असल्याची भावना रामराजे नाईक निंबाळकर यांनी व्यक्त केली. तसेच भविष्यात जाधव कुटुंबाच्या पाठीशी सदैव उभे राहण्याचे आश्वासन त्यांनी दिले.
या भेटीवेळी जाधव कुटुंबातील सर्व सदस्य उपस्थित होते. परिसरात शोकमय वातावरण होते.

फलटण : सुरवडी गणात वंचित बहुजन आघाडीचे रणजित मोहितेंचा भावनिक प्रचार दौरा; ‘ही लढाई सत्तेसाठी नाही, तर माणसाच्या सन्मानासाठी’
निवडणुकीच्या रणधुमाळीत वंचित बहुजन आघाडीचे पंचायत समिती सुरवडी गण येथील उमेदवार रणजित मोहिते यांनी मतदारांशी थेट संवाद साधत प्रभावी आणि भावनिक प्रचार दौरा केला. घराघरांत जाऊन त्यांनी नागरिकांशी संवाद साधत स्वतःची ओळख करून दिली तसेच वंचित बहुजन आघाडीचे विचार आणि पक्षाचे चिन्ह मतदारांसमोर मांडले.
या प्रचार दौऱ्यात रणजित मोहिते यांनी सर्व कष्टकरी, शोषित, वंचित, गरीब आणि सामान्य घटकांचे प्रश्न हाच आपल्या लढ्याचा केंद्रबिंदू असल्याचे ठामपणे सांगितले. ग्रामस्थांच्या समस्या ऐकून घेत “सत्तेच्या खुर्चीसाठी नव्हे, तर माणसाच्या सन्मानासाठी ही निवडणूक लढवली जात आहे,” असा भावनिक संदेश देत त्यांनी मतदारांच्या मनाला हात घातला.
या दौऱ्यात वंचित बहुजन आघाडीचे सहकारी, पदाधिकारी आणि कार्यकर्ते मोठ्या उत्साहात सहभागी झाले होते. घोषणाबाजी, जनसंवाद आणि संघटनेची ताकद या माध्यमातून परिसरात सकारात्मक वातावरण निर्माण झाले. नागरिकांनीही उमेदवाराला भरभरून प्रतिसाद देत आपल्या अपेक्षा मांडल्या.
सुरवडी गणात सामाजिक न्याय, समानता आणि सामान्य माणसाचा आवाज बुलंद करण्यासाठी रणजित मोहितेंचा प्रचार दौरा चर्चेचा विषय ठरत असून, वंचित बहुजन आघाडीची उपस्थिती अधिक ठळक होताना दिसत आहे.

फलटण :- फलटण तालुक्यातील तरडगाव येथील स्व. विदीप जाधव यांच्या कुटुंबियांसाठी आमदार रोहित पवार हे आधारवड ठरले आहेत. माजी उपमुख्यमंत्री स्व. अजितदादा पवार यांच्या सोबत झालेल्या अपघातात अंगरक्षक म्हणून कर्तव्य बजावत असताना विदीप जाधव यांचे दुर्दैवी निधन झाले होते. त्यांच्या पश्चात पत्नी व दोन लहान मुले – कु. नेत्रा व अद्विक – असा परिवार आहे.
या घटनेनंतर अनेक राजकीय नेतेमंडळींनी केवळ सांत्वनपर भेटी दिल्या. मात्र प्रत्यक्ष जबाबदारी उचलण्याचे धाडस आमदार रोहित पवार यांनी दाखवले. त्यांनी स्व. विदीप जाधव यांच्या दोन्ही मुलांच्या शिक्षणाची संपूर्ण जबाबदारी स्वतः स्वीकारली असून, त्यांच्या उज्ज्वल भविष्यासाठी आवश्यक ते सर्व सहकार्य करण्याची ग्वाही दिली आहे.
आमदार रोहित पवार यांनी तरडगाव येथे जाधव कुटुंबियांची भेट घेऊन त्यांचे सांत्वन केले. या वेळी त्यांनी “विदीप जाधव यांनी कर्तव्य बजावताना आपले प्राण गमावले. त्यांच्या कुटुंबियांच्या पाठीशी उभे राहणे ही आपली नैतिक जबाबदारी आहे. नेत्रा आणि अद्विक यांच्या शिक्षणात कोणतीही अडचण येऊ देणार नाही,” असा शब्द दिला.
या निर्णयामुळे जाधव कुटुंबियांच्या डोळ्यातून अश्रू तरळले. कठीण काळात कुणीतरी खंबीरपणे पाठीशी उभे राहिल्याने कुटुंबियांनी आमदार रोहित पवार यांचे मनापासून आभार मानले. “नेते फक्त आश्वासने देतात, पण रोहित पवार यांनी कृतीतून दाखवून दिले,” अशी भावना कुटुंबियांनी व्यक्त केली.
फलटण तालुक्यात या निर्णयाचे सर्वत्र कौतुक होत असून, सामाजिक जाणिवेचे आणि माणुसकीचे दर्शन घडवणारा हा निर्णय असल्याची प्रतिक्रिया नागरिकांतून उमटत आहे. राजकारण केवळ सत्तेसाठी नसून समाजासाठीही असते, हे आमदार रोहित पवार यांनी पुन्हा एकदा सिद्ध करून दाखवले आहे.