चाफळ; पुढारी वृत्तसेवा :  सध्या लग्नाकरता सर्वत्र मुली पाहण्यासाठी शोधमोहीम सुरू आहे. मात्र आता मुलींकडून भूमिहीन, शेतमजूर, शेतकरी मुलांना नापसंती मिळत आहे. मुलाकडे शेती पाहिजे, मात्र मुलगा शेतकरी नको आहे. परिणामी मुलांच्या पालकांकडून फक्त मुलगी द्या लग्न आम्हीच करू अशी विनवणी केली जात आहे. हे बोलके चित्र शहरी व ग्रामीण भागात पाहवयास मिळत आहे.

पुरुषप्रधान समाजात उपवाराचे पूर्वी पारडे जड असायचे. हुंडा मिळाला नाही किंवा मानपान झाला नाही तर सरळ लग्न मोडण्यापर्यंत मजल असायची. परंतु आता बदलत्या परिस्थितीत मुलींची संख्या घटल्याने मुलांना मुलीं मिळणे कठीण झाले आहे. पूर्वी मुलांच्या शोधासाठी मुलींचे पालक मुलगा मिळेल का म्हणून महिनो महिने नातेवाईकांच्या घरी फिरायचे. मात्र आता परिस्थिती बदलली आहे. खर्च आम्हीच करू म्हणून मुलाचे पालक मुलीसाठी वन वन भटकत आहेत. निसर्गाच्या अवकृपेने व शासनाच्या चुकीच्या धोरणामुळे शेतकर्‍यांची परिस्थिती बिकट झाली आहे. त्यामुळे प्रत्येक पित्याला वाटते की आपली मुलगी चांगल्या घरी नांदावी. सध्या ग्रामीण भागातील मुलींच्या पित्यांची नजर शहरी भागातील मुलांकडे वळली आहे. श्रीमंत असो की गरीब असो, शेतकरी मुलाला मुलगी देण्यास मुलीसह तिचे पालक नकार देत आहेत. त्यामुळे प्रेम प्रकरणांमध्येही वाढ होत आहे. ग्रामीण भागात वास्तव्यास असलेल्या विवाह इच्छुक मुलांना मुलगी मिळणे कठीण झाले आहे.

पूर्वी मुलांचे लग्न लाखो रुपयांची उधळण करून मोठ्या थाटामाटात करत होते. मात्र शेतीच्या कर्जामुळे अल्पखर्चातच लग्न साध्या पद्धतीने केले जात आहे. मुलगी मिळने कठीण झाल्यामुळे बर्‍याच मुलांनी हुंडा दिल्याचे समजत आहे. मुलगी दाखवून लग्न जोडून देणार्‍यांना चांगले दिवस आले आहेत. शेतकरी मुलांना कोणीही मुलगी देण्यास तयार होत नाहीत. मुलींकडून सर्वात प्रथम सरकारी नोकरीवर असलेल्या मुलांना प्राधान्य दिले जात आहे. परंतु काही ठिकाणी सध्या नोकरी सोबत शेती आहे का? असाही प्रश्न पुढे येत आहे. शेतकरी नवरा नको पण शेती हवीच अशी मागणीचा जोर आहे.

फक्त मुलगी द्या, आम्ही संपूर्ण खर्च करू

अनेक गावांत तरुण लग्न करण्याकरता पुढे आले असता मुलगी मिळत नसल्यामुळे त्यांचे वय 35 वर्षांहून अधिक झाले आहे. काही ठिकाणी तुम्हाला पैसे पाहिजे असतील तर आम्ही द्यायला तयार आहोत, लग्नाचा संपूर्ण खर्च आम्हीच करू, फक्त मुलगी द्या, असा निर्णय तरुण घेत आहेत.

सातारा; पुढारी वृत्तसेवा :  राष्ट्रवादी काँग्रेसच्या अध्यक्षपदावरून निवृत्त होण्याचा निर्णय मागे घेतल्यानंतर पुन्हा विविध कार्यक्रमांची भिरकीट लावलेले खा. शरद पवार तसेच विरोधी पक्षनेते अजित पवार सोमवारी सातार्‍यात मुक्कामी आहेत. कर्मवीर भाऊराव पाटील यांच्या पुण्यतिथी कार्यक्रमाच्या निमित्ताने त्यांच्या प्रमुख उपस्थितीत दोन दिवस विविध कार्यक्रम पार पडत आहेत. त्यामुळे राजकीय वर्तुळाचे सातार्‍याकडे लक्ष लागून राहिले आहे

राष्ट्रवादीचे सर्वेसर्वा शरद पवार यांच्या राजकीय निवृत्तीच्या अनुषंगाने गेले काही दिवस राज्यातील राजकारण ढवळून निघाले होते. या पार्श्वभूमीवर पवारांच्या दौर्‍याकडे राजकीय वर्तुळाचे लक्ष लागले आहे. खा. शरद पवार यांचे सोमवारी सायंकाळी 5.30 वाजता सातार्‍यात आगमन होत असून त्यानंतर शासकीय विश्रामगृहावर होणार्‍या रयत शिक्षण संस्थेच्या बैठकीस ते उपस्थित राहणार आहेत. मंगळवारी सकाळी कर्मवीर भाऊराव पाटील यांच्या पुण्यतिथी सोहळ्यास त्यांची प्रमुख उपस्थिती राहणार आहे. त्यानंतर रयतमध्ये बैठक होणार असून जकातवाडी येथील कार्यक्रमालाही ते उपस्थित राहणार आहेत. दुपारी 4 वाजता ते बारामतीला रवाना होणार आहेत.

विरोधी पक्षनेते अजित पवार सोमवारी सकाळी 10.30 वाजता कोरेगाव येथे बाजार समितीच्या विजयी मेळाव्यात मार्गदर्शन करणार आहेत. त्यानंतर दुपारी 4 वाजता सातार्‍यात जिल्हा मध्यवर्ती बँकेच्या सभागृहात प्राचार्य डॉ. यशवंत पाटणे यांचा सपत्नीक सत्कार व यशवंत गौरव ग्रंथ प्रकाशन सोहळा त्यांच्या हस्ते पार पडत आहे. सायंकाळी शासकीय विश्रामगृहावर होणार्‍या रयतच्या बैठकीस ते उपस्थित राहतील. मंगळवारी कर्मवीर पुण्यतिथी सोहळ्यासह विविध कार्यक्रमांना ते उपस्थित राहणार आहेत. यावेळी खा. सुप्रिया सुळे यांच्यासह खा. श्रीनिवास पाटील, आ. रामराजे ना. निंबाळकर, आ. दिलीप वळसे-पाटील, आ. शशिकांत शिंदे यांच्यासह राष्ट्रवादीची नेतेमंडळी उपस्थित राहणार आहेत. मंगळवारी सायंकाळी फलटण येथे आ. रामराजे ना. निंबाळकर यांचा अमृतमहोत्सव सोहळा होत असून यावेळी आ. अजित पवार, आ. जयंत पाटील यांची उपस्थिती राहणार आहे.

काँग्रेसचे प्रदेशाध्यक्ष नाना पटोले, आ. विश्वजित कदम हेही सोमवार व मंगळवारी सातार्‍यात आहेत. नाना पटोले सोमवारी सायं. 6 वाजता सातार्‍यात येत आहेत. मंगळवारी कर्मवीर पुण्यतिथी सोहळ्यास ते उपस्थित राहतील. त्यानंतर कार्यक्रम, कार्यकर्त्यांच्या गाठीभेटी अशा विविध कार्यक्रमांना ते हजेरी लावणार आहेत. त्यांच्यासोबत आ. पृथ्वीराज चव्हाण, आ. विश्वजित कदम हेही उपस्थित राहणार आहेत.