कराड; अमोल चव्हाण : गुन्हेगारी प्रवृत्तीच्या लोकांकडे अवैध पिस्तूल येतात कोठून? याचा तपास आजपर्यंत मुळापर्यंत गेलाच नाही. त्यामुळेच दिवसेंदिवस अवैध पिस्तूल बाळगणार्‍यांची संख्या वाढत आहे. त्यातूनच मग गुन्हेगार लाठीकाठी, चाकू, तलवार यासह धारदार शस्त्रांऐवजी आता अवैध पिस्तूल जवळ बाळगून खटक्यावर बोट ठेवण्याचे आकर्षण त्यांच्यामध्ये वाढू लागले आहे. गुन्हेगारांचा हा बदलता ट्रेंड भविष्यासाठी धोकादायक आहे. याचा विचार करून पोलिसांनी अवैध पिस्तूल येते कुठून? ते पुरवत कोण? उत्पादन कोठे होते? त्याला अर्थ पुरवठा कोण करतो? या सर्व बाबींची माहिती घेऊन त्याच्या मुळावरच घाव घालने गरजेचे आहे. तरच या प्रकरणाला आळा बसेल अन्यथा ‘ये रे माझ्या मागल्या’ या म्हणीप्रमाणे हा प्रकार भविष्यातही असाच सुरू राहील.

जिल्ह्यात सर्वात जास्त कराड उपविभागात अवैध पिस्तूल बाळगणार्‍यांची संख्या असल्याचे आजवर झालेल्या कारवायांवरून स्पष्ट होत आहे. काही दिवसांपूर्वी 26 मार्च रोजी राजमाची ता. कराड येथे झालेली कारवाई तर राज्यातील ग्रामीण भागातील सर्वात मोठी कारवाई होती. सातारा स्थानिक गुन्हे शाखेच्या पथकाने कराड पोलिसांच्या मदतीने दहा जणांना पकडून त्यांच्याकडून 14 पिस्तूल व 20 काडतुसे जप्त केली होती. ही कारवाई खरोखरच गुन्हेगारांवर वचक ठेवणारी होती.

एवढ्या मोठ्या प्रमाणात झालेल्या कारवाईनंतर अवैध पिस्तूल बाळगणार्‍यांवर वचक बसेल असे वाटत होते. कराड शहर व परिसरात त्या दृष्टीने गुन्हेगारांमध्ये वचक बसल्याचे काही प्रमाणात दिसूनही आले. अवैध पिस्तूल जवळ बाळगल्यास पोलीस कारवाई करतात, हा संदेश गुन्हेगारी क्षेत्रात फिरू लागला. त्यामुळे शहरी भागातील अवैध पिस्तूल बाळगणे, त्याची खरेदी-विक्री करण्याचे लोन काही प्रमाणात कमी झाल्याचे दिसत असले तरी ते लोन हळूहळू ग्रामीण भागात पसरू लागले. ही बाब लक्षात येताच पोलिसांनी ग्रामीण भागावर लक्ष केंद्रित केले.

कराडचा पदभार स्वीकारल्यानंतर डीवायएसपी अमोल ठाकूर यांनी प्रथम त्या दृष्टीने माहिती घेण्यास सुरुवात केली. त्यानुसारच त्यांना कराडच्या ग्रामीण भागातून येऊन अवैध पिस्तूल विक्री करण्याच्या उद्देशाने कराड शहरात काही जण फिरत असल्याची माहिती मिळाली. माहितीची खात्री करून त्यांनी पोलिसांचे पथक तयार करून कारवाई करण्याचे आदेश दिले. त्यानुसारच मग शनिवारी पोलिसांनी बस स्थानक परिसरात अवैध पिस्तूल विक्री करण्याच्या उद्देशाने आलेल्या वाघेश्वर मसूर तालुका कराड येथील युवकाला अटक केली. या प्रकरणाचा तपास करत असताना पोलीस आणखीही एक दोघांना ताब्यात घेतील. मात्र भविष्यात अशा स्वरूपाच्या घटना घडणारच नाहीत त्या दृष्टीने डीवायएसपी अमोल ठाकूर काय कारवाई करतात? हे पाहणे महत्त्वाचे आहे.

गुन्हेगारी घटना घडत असताना अनेक वेळेला लाठ्या, काठ्या, चाकू, कोयता, तलवार अशा हत्यारांचा वापर होत होता. परंतु अलीकडे रेकॉर्डवरील गुन्हेगारांसह गुंडांच्या कमरेला पिस्तूल दिसू लागली आहेत. बेकायदा पिस्तूल जवळ बाळगून त्याचा धाक दाखवत अनेक गुन्हेगारी घटना घडत आहेत. अवैध पिस्तूल जवळ बाळगून कराड शहर व परिसरात गुंडांनी हल्ले केल्याचे यापूर्वी अनेक प्रकार घडले आहेत. त्यामुळेच एखादी गुन्हेगारी घटना घडल्यानंतर पोलिस त्याबाबत कारवाया करतात; पण त्याचे पुढे काय होते हे समजत नाही.

‘त्या’प्रकरणाचे पुढे काय झाले?

कराड तालुक्यातील राजमाची येथे एकाच वेळी कारवाई करून दहा संशयतांना ताब्यात घेत त्यांच्याकडून 14 अवैध पिस्तूल व वीस काडतुसे जप्त केली होती. त्यानंतर या प्रकरणाच्या मुळापर्यंत जाणार असल्याचे पोलीस अधीक्षक समीर शेख यांनी सांगितले होते. त्यानुसार तपास करत असताना पोलिस पिस्तूल बनवत असलेल्या मध्यप्रदेशातील ठिकाणापर्यंत पोहोचले. अवैध पिस्तूल पुरवणार्‍याची माहिती मिळवली. परंतु तो सापडत नाही, त्याचा शोध सुरू आहे, एवढेच पोलिसांकडून सांगितले जात आहे. त्यामुळे या प्रकरणाची कारवाईही थांबली की काय? त्याचे पुढे काय झाले? असा प्रश्न सर्वसामान्यांना पडला आहे.

सातारा; पुढारी वृत्तसेवा :  माझ्यावर महाराष्ट्र विधानसभेच्या विरोधी पक्षनेतेपदाची जबाबदारी आहे. पक्षाचे विविध दौरे, पक्षीय अधिवेशने व कार्यक्रमाच्या निमित्ताने राज्यभर फिरत असून, मी माझी जबाबदारी पार पाडतच आहे. माझ्या कामाची पद्धत आणि राष्ट्रीय राजकारणातील कामाची पद्धत यात बराच फरक आहे. मला
केंद्रातल्या राष्ट्रीय राजकारणात रस नसून, राज्यात काम करणार असल्याची स्पष्टोक्ती विरोधी पक्षनेते आ. अजित पवार यांनी दिली.

दरम्यान, सातारा लोकसभेला कोण उमेदवार हे इतक्यात सांगता येणार नाही. अनेक उमेदवार आमच्यासमोर आहेत. कोणी गेले म्हणून पक्ष संपत नाही. जिल्ह्यातील काही ठिकाणी नवीन नेतृत्व उभे करू. कारण महाविकास आघाडीचे जागा वाटप व्हायचे आहे. मात्र, महाविकास आघाडीचा उमेदवारच येथून विजय होईल, असे अजितदादांनी सांगितले.

शासकीय विश्रामगृह येथे पत्रकार परिषदेत बोलत होते. आ. अजित दादा म्हणाले, माझ्यावर महाराष्ट्रातील विरोधी पक्षनेत्याची जबाबदारी आहे. ज्यांचे जास्त आमदार त्या पक्षाचा विरोधी पक्षनेता असतो. विरोधी पक्षनेतेपदाचे कामकाज मी करतोय. जाणीवपूर्वक माझ्याबाबत नाराजीच्या बातम्या येत आहेत. बातम्यांचे खंडण करायचे व काय झाले हे सांगण्यातच माझा जास्त वेळ जात आहे.
भाकरी फिरवण्याबाबत उपमुख्यमंत्री ना. देवेंद्र फडणवीसांनी केलेल्या टीकेबाबत आ. अजितदादा म्हणाले, त्यांना काय म्हणायचे हा त्यांचा प्रश्न आहे. राष्ट्रवादीला काय करायचे आहे ते राष्ट्रवादीची कार्यकारिणी, कार्यकर्ते, लोकप्रतिनिधी ठरवतील. पवार साहेब पुन्हा काहीही बोलले नाहीत. हा प्रश्न पक्षांतर्गत आहे. भाजपने काय करावे हा त्यांचा प्रश्न आहे. आमची आणि त्यांची विचारधारा वेगळी आहे. विरोधकांकडून होत असलेल्या फोडाफोडीच्या राजकारणावर ते म्हणाले, प्रत्येकजण आपला पक्ष वाढवण्याचे काम करतो. सरकार असते त्या पक्षात अनेकजण जातात. सातार्‍यातील काही आमदार भाजपमध्ये गेले, सरकार आल्यावर तुम्हाला मंत्री, पालकमंत्री करू अशा आणाभाका सांगून त्यांना गळाला लावले जाते.

भाजपचे सोडून गेलेले नेते तुमच्या संपर्कात आहेत काय? असे विचारले असता अजित पवार म्हणाले, मी उपमुख्यमंत्री असताना कुणी काही काम घेवून आले तर पक्षाच्या नजरेतून न पाहता प्रत्येकाचे काम करण्याचा प्रयत्न केला. आम्ही काय एकमेकाचे दुष्मन नाही. 16 आमदार अपात्र होवूनही आमदारांचे संख्याबळ सत्ताधार्‍यांकडे असल्याने सरकार कोसळणार नाही. याबाबत विधानसभा अध्यक्षांसमोर सुनावणी आहे. एखाद्या आमदाराने मुदत मागितली तर सुनावणीलाच वर्ष जाईल. पक्षांतर बंदी कायद्यानुसार काय निर्णय द्यायचा याबाबत विधानसभेचे अध्यक्षच अधिकारवाणीने सांगू शकतील, असेही आ. अजित पवार म्हणाले.

औरंगजेबाच्या उदात्तीकरणावर बोलताना अजितदादा म्हणाले, या प्रकरणातील मास्टरमाईंड शोधला पाहिजे. महाविकास आघाडीच्या काळात अशा घटना घडल्या नाहीत मग हे सरकार आल्यानंतर आताच कशा घडत आहेत? यातून जातीय द्वेष पसरवण्याचे काम केले जात आहे.