सातारा ; पुढारी वृत्‍तसेवा गुरुवारी बकरीईद आहे. त्‍या निमित्ताने पश्चिम महाराष्ट्रातील नामांकित बाजार म्हणून ओळखला जाणाऱ्या व महामार्गावरील महत्वपूर्ण असलेल्या पाचवड येथील जनावरांच्या बाजारात बकरी खरेदीसाठी व्यापारी व नागरिकांनी गर्दी केली होती. यामध्ये सर्वसामान्य खरेदीदार यांनी पांच हजार रूपयांपासून पन्नास हजार रुपयांपर्यंत बकऱ्यांच्या वयोमानानुसार किमती ठरल्या, एक वर्षापुढील बकरी 30 ते 40 हजार रुपयांची किंमत होऊन व्यवहार झाले.

कोरोना महामारीत नंतर सुरू झालेल्या या जनावरांच्या बाजारावर रोगराईचे संकट आल्याने आजही इतर गाई, म्हैशी, बैल या जनावरांची खरेदी विक्री व्यवहार होत नसल्याने पांचवडच्या बाजारात ग्राहकांचा उत्स्फूर्त प्रतिसाद मिळत नसल्याची खंत मार्केट कमिटीचे संचालक व व्यापारी संघटनेचे नेते दत्ताशेठ बांदल यांनी पत्रकारांशी बोलताना सांगितले.

वाई तालुक्यातील शेतकरी वर्गाची सूचना स्वीकारून वाई येथे मार्केट कमिटीने दिवसातून दोन वेळा भाजी मंडई सुरू केली. याचाही लाभ शेतकरी बंधू व व्यापाऱ्यांना घेण्याचे आवाहन केले.

हेही वाचा : 

सातारा; पुढारी वृत्तसेवा :  सातारा शहरासह जिल्ह्यात गेल्या दोन दिवसांपासून पावसाळी वातावरण तयार झाले असले तरी मान्सूनचा पाऊस काही जोर पकडेनासा झाला आहे. यामुळे बळीराजाची चिंता मिटेनाशी झाली आहे. सोमवारी सातार्‍यात दिवसभर ऊन- पावसाचा खेळ सुरू होता. मात्र, मुसळधार पावसासाठी बळीराजाचे चातकासारखे वाट पहात आहेत.

शनिवारी जिल्ह्यात सर्वत्र जोरदार पावसाने हजेरी लावली. रविवारीही जिल्ह्यात दिवसभर ढगाळ वातावरण निर्माण झाले होते. अधूनमधून पावसाच्या तुरळक सरी कोसळल्या. सोमवारी मात्र पावसाने पूर्णत: उघडीप दिली असल्याचे चित्र पहावयास मिळाले. सर्वत्रच अधूनमधून ऊन व ढगाळ वातावरण निर्माण झाले होते. जिल्ह्याच्या पश्चिम भागात पावसाच्या हलक्या ते मध्यम स्वरूपाच्या सरी कोसळत होत्या. दिवसभर सातारा शहर व परिसरात ऊन-पावसाचा खेळ सुरू होता. मान्सून पाऊस लागून राहील अशी आशा निर्माण झाली होती. मात्र, सोमवारी ऊन व निरभ्र आकाशामुळे मान्सून पावसाची आशा मावळली. त्यामुळे जिल्ह्यातील नागरिकांचे पुन्हा आभाळाकडे डोळे लागून राहिले आहेत. सोमवारी सकाळी 11 वाजेपर्यंत जिल्ह्यात सातारा 10.9 मि.मी., जावली 15.5 मि.मी., पाटण 16.3 मि.मी., कराड 3.9 मि.मी., कोरेगाव 3.6 मि.मी.,खटाव 1.1 मि.मी., माण 1.1 मि.मी., फलटण 2.2 मि.मी., खंडाळा 8.0 मि.मी., वाई 5.9 मि.मी. आणि महाबळेश्वरमध्ये 63.4 मि.मी. पावसाची नोंद झाली आहे.

सातारा; पुढारी वृत्तसेवा : जिल्ह्याच्या पश्चिम भागात महाबळेश्वर तालुक्यात सोळशी येथे 6.5 टीएमसीचे धरण बांधले जाणार आहे. जलसंपदा विभागाच्या सातारा पाटबंधारे प्रकल्प मंडळाकडून सोळशी धरणाचा सर्व्हे सुरू असून दीड महिन्यांत प्राथमिक सर्व्हे करून पूर्व संभाव्यता अहवाल (पीएफआर) राज्य शासनास सादर केला जाणार आहे.

सातार्‍याच्या पश्चिम भागात मोठे, मध्यम पाणी प्रकल्प आहेत. बहुतांश धरणांची कामे होत आली आहेत. मात्र, तरीही जिल्ह्याचा दुष्काळ संपलेला नाही. या टंचाईवर मात करण्यासाठी जिल्ह्याच्या पश्चिम भागात पाणी प्रकल्पासाठी बर्‍याच साईट्स आहेत. महाबळेश्वर तालुक्यात सोळशी गावाजवळ पाणी प्रकल्पासाठी एक महत्त्वाची साईट्स सातारा पाटबंधारे प्रकल्प मंडळाने शोधली आहे. हा प्रकल्प झाल्यास यासाठी खर्चाच्या तुलनेत याठिकाणी मोठा पाणीसाठा निर्माण होऊ शकतो, हे स्पष्ट झाल्यानंतर या धरणासाठी आवश्यक इतर बाबींची पूर्तता करण्याचे काम सुरू झाले. मुख्यमंत्री एकनाथ शिंदे यांनी हा प्रकल्प पूर्णत्त्वाला जावा यासाठी लक्ष घातले. जलसंपदा विभागाला सूचना केल्या. त्यानंतर सोळशी धरणाच्या प्रकल्पाच्या प्राथमिक सर्व्हेचे काम सुरू झाले. हे काम दीड महिन्यांत पूर्ण होणार आहे. त्यानंतर या पाणी प्रकल्पासाठी पूर्व संभाव्यता अहवाल (पीएफआर) राज्य शासनास सादर करून त्यास मंजुरी घेतली जाणार आहे. पाणी उपलब्धता प्रमाणपत्रासाठी नाशिक येथील जल विज्ञान विभागाची परवानगी मिळाल्यानंतर या पाणीप्रकल्पाचे विस्तृत सर्व्हेक्षण होईल.

या सर्व्हेक्षणात प्रकल्पाच्या अनुषंगाने सर्व बाबींचा विचार करून त्याचा अहवाल तयार करण्यात येईल. हा विस्तृत प्रकल्प अहवाल (डीपीआर) शासनास मंजुरीसाठी पाठवला जाणार आहे. ही सर्व प्रक्रिया शक्य तितक्या गतीने व्हावी, यासाठी मुख्यमंत्री आग्रही आहेत. नियोजित सोळशी प्रकल्पात सुमारे 6.5 टीएमसी पाणीसाठा निर्माण होऊ शकतो. त्यासाठी सुमारे 3 हजार कोटींचा खर्च अपेक्षित आहे. सोळशी धरणाची माहिती मुख्यमंत्री ना. एकनाथ शिंदे यांनी नुकतीच जिल्हा दौर्‍यावर असताना घेतली. प्राथमिक सर्व्हे पूर्ण झाल्यानंतर त्यापुढील पूर्व संभाव्यता अहवालास मंजुरी देण्याचे आश्वासन मुख्यमंत्र्यांनी दिले आहे. यावेळी जलसंपदा विभागाचे अव्वर मुख्य सचिव दिपक कपूर, जलजीवन मिशनचे सचिव अमित सैनी, पुनर्वसन विभागाचे प्रधान सचिव असीम गुप्ता, पाटबंधारे विभागाचे अधीक्षक अभियंता जयंत शिंदे, कार्यकारी अभियंता अमर काशिद आदि उपस्थित होते.