मारूल हवेली, पुढारी वृत्तसेवा : कराड-पाटण राज्यमार्गावर विहे गावच्या हद्दीतील विहिरीत जीप कोसळल्याने परिसरात एकच खळबळ उडाली. ही घटना मंगळवार, दि. 27 रोजी संध्याकाळी 6 वाजण्याच्या सुमारास घडली. पोलिस यंत्रणेने भर पावसात बचावकार्य सुरू ठेऊन क्रेनच्या मदतीने जीप बाहेर काढली आहे. मात्र, जीपमध्ये कोणीही आढळून आले नसल्याने या घटनेचे गूढ वाढले आहे. रात्री उशिरापर्यंत बचाव कार्य सुरू होते.

अपघातग्रस्त क्रुझर जीप (क्र.एम.एच. 05 ए 6261) ही विहिरीतून बाहेर काढण्यात आली असून, ती मल्हारपेठ येथील असल्याचे प्राथमिक तपासातून पुढे आले आहे.

घटनास्थळावरून व पोलिसांकडून मिळालेल्या माहितीनुसार, मंगळवारी संध्याकाळी सहाच्या सुमारास विहेवरून मल्हारपेठकडे निघालेली गाडी विहे स्मशानभूमी जवळ असलेल्या विहिरीत

कोसळल्याची माहिती मिळताच मल्हारपेठ पोलीस ठाण्याचे सहा.पोलीस निरिक्षक उत्तम भापकर, अजित पाटील व कर्मचार्‍यांनी घटनास्थळी धाव घेतली. विहिर खोल असून पाण्याने भरल्यामुळे नेमकी कोणती गाडी आतमध्ये पडली आहे, याबाबत निश्चित समजून येत नव्हते. त्यामुळे तात्काळ क्रेन बोलावून गाडी बाहेर काढण्यासाठी प्रयत्न सुरू करण्यात आले. रात्रीची वेळ व पडणारा पाऊस यामुळे गाडी बाहेर काढताना अडचणी येत होत्या. त्यातच घटनास्थळी बघ्यांनी मोठी गर्दी केल्याने मार्गावरील वाहतूक काही काळ विस्कळीत झाली होती. वाहतूक सुरळीत करण्यासाठी पोलीस वाहनांना वाट काढून देत होते.

दोन तासाच्या प्रयत्नानंतर रात्री 8:30 वाजण्याच्या सुमारास क्रेनच्या सहाय्याने जीप बाहेर काढण्यात आली. पोलीसांनी जीपमध्ये कोणी आहे काय हे शोधले असता आतमध्ये कोणीही आढळून आले नाही. ही जीप मल्हारपेठ येथील असल्याची प्राथमिक माहिती मिळाली आहे. जीप विहिरीत पडली तेव्हा त्यामध्ये कोण-कोण होते याबाबत स्पष्ट झालेले नाही. जीपचालक किंवा अन्य कोणीही मिळून आले नसून पोलीसांकडून रात्री उशीरापर्यंत बचाव कार्य तसेच अधिक माहिती घेण्याचे काम सुरू होते.

कराड, पुढारी वृत्तसेवा : कोयना धरणांतर्गत विभागासह पाटण तालुक्यात अनेक ठिकाणी मागील तीन दिवसांपासून पावसाला सुरुवात झाली आहे. संततधार, दमदार पाऊस पडत नसला तरी अधूनमधून येणार्‍या पावसाच्या सरींमुळे शेतकरी वर्ग सुखावल्याचे चित्र आहे. धरणांतर्गत कोयना, नवजा, महाबळेश्वर येथेही पाऊस पडत असल्याने धरणातील पाणीसाठ्यात किंचितशी वाढ व्हायला सुरुवात झाली आहे. हा पाऊस असाच सातत्याने पडावा अशी सार्वत्रिक अपेक्षा व्यक्त केली जात आहे.

105.25 टीएमसी पाणी साठवण क्षमता असलेल्या कोयना धरणात सध्या 10.89 टीएमसी इतका उपलब्ध तर त्यापैकी केवळ 5.89 टीएमसी उपयुक्त साठा शिल्लक आहे. या अत्यल्प पाणीसाठ्यामुळे धरणातील पाण्यावर होणार्‍या वीजनिर्मितीसह सिंचनावरही मर्यादा आहेत. दरम्यान सिंचनासाठी पूर्वेकडे सोडण्यात येणारे पाणी आता पुन्हा सुरू करण्यात आले आहे. धरणातील पाण्यावर पश्चिमेकडे पोफळी, अलोरे व कोयना चौथा टप्पा या तीन टप्प्यातून 1920 मेगॅवॅट वीजनिर्मिती केली जाते. पाण्याअभावी चौथ्या टप्प्यातील वीजनिर्मिती बंद ठेवण्यात आली आहे. सध्या जलपातळी 618.617 मीटरवर असली तरी राज्यातील अन्य प्रकल्पातून उपलब्ध होत असलेली वीज, त्यापटीत कोयनेतून अपेक्षित मागणी नसल्याने व धरणातील पाणीसाठा लक्षात घेता कोयना चौथ्या टप्प्या मार्फत तयार होणारी वीजनिर्मिती मागील काही दिवसांपासून बंद ठेवण्यात आली आहे.

यानंतर धरणात अपेक्षित पाऊस व त्या पटीत पाणीसाठा झाल्यानंतरच चौथ्या टप्प्यातून वीजनिर्मिती पुन्हा सुरू करण्यात येईल. अद्यापही कोयना जलविद्युत प्रकल्पाच्या पोफळी व अलोरे जलविद्युत प्रकल्पातून अपेक्षित व मागणीनुसार टप्प्याटप्प्याने वीजनिर्मिती सुरू आहे. दरम्यान यावर्षी उशिरा का होईना पण आता पावसाला सुरुवात झाली आहे. हा पाऊस यापुढे असाच अखंडित व अपेक्षित पडावा अशा सार्वत्रिक अपेक्षा व्यक्त केल्या जात आहेत. मंगळवारी सायंकाळी पाचपर्यंत 24 तासातील व 1 जूनपासूनचा पाऊस पुढीलप्रमाणे- कोयना 21 ( 257 ) मि. मि. , नवजा – 48( 318 ) मि. मि. , महाबळेश्वर – 86 ( 454 ) मि. मि . नोंद आहे.

सिंचनासाठी पुन्हा पाणी सोडले…

पूर्वेकडे सिंचनासाठी सोडण्यात येणारे पाणी काही काळासाठी बंद करण्यात आले होते. सोमवारपासून पुन्हा सिंचनासाठी पूर्वेकडे धरण पायथा वीजगृहातील दोन जनित्रांद्वारे वीजनिर्मिती करून प्रतिसेकंद 2100 क्युसेक्स पाणी कोयना नदीपात्रात सोडण्यात येत आहे.

सातारा; पुढारी वृत्तसेवा : प्रतापगड पासून काही अंतरावर असणाऱ्या आंबेनळी घाटात दरड कोसळ्याची घटना आज (दि. २७) घडली. या दुर्घटनेमुळे दगड व माती रस्त्यावर आल्याने सर्व वाहतूक ठप्प झाली आहे.

पोलादपूर-महाबळेश्वर मार्गावरील आंबेनळी घाटामध्ये कालिका माता पॉईंट जवळ दरड कोसळल्याची घटना घडली. या दुर्घटनेत आंबेनळी घाट दोन्ही बाजूंकडून वाहतुकीसाठी तात्पुरता बंद करण्यात आलेला आहे. प्रतापगड रेस्क्यू टीम सदस्यांसह स्थानिकांच्या मदतीने दरड हटविण्याचे काम सुरु आहे. मंगळवारी (दि. २७) रात्री १० वाजण्याच्या सुमारास दरड कोसळल्याची प्राथमिक माहिती आहे. दगड व माती हटविल्यानंतर वाहतूक पुर्ववत सुरु होईल अशी माहिती घटनास्थळावरुन मिळत आहे. घटनास्थळावरुन अद्याप कोणतीही जीवितहानी झाल्याची माहिती मिळाली नाही.

पोलादपूर-महाबळेश्वर मार्गावर झालेल्या दुर्घटनेनंतर प्रवाशांनी ताम्हेणी घाटातून जाणाऱ्या मर्गाचा अवलंब करावा अशी माहिती रायगड पोलीस अधीक्षक सोमनाथ घार्गे यांनी दिली आहे.