मारूल हवेली; पुढारी वृत्तसेवा :  कराड-पाटण राज्यमार्गावरील विहे येथे क्रूझर जीप विहिरीत पडून झालेल्या अपघातातील चालकाचा मृतदेह बुधवारी सकाळी सापडला. जीप चालक मल्हारपेठ (ता. पाटण) येथील असून पाण्यात बुडून त्याचा मृत्यू झाल्याचा वैद्यकीय अहवाल प्राप्त झाला आहे. दरम्यान, अपघाताचे कारण अद्याप स्पष्ट झाले नसून मल्हारपेठ पोलिस तपास करीत आहेत.

संभाजी कृष्णा पवार (वय 50) असे अपघातात मृत्यू झालेल्या जीपचालकाचे नाव आहे. मंगळवारी संध्याकाळी विहेहून मल्हारपेठला येत असताना क्रूझर जीप विहे जवळील विहिरीत कोसळली होती. त्यानंतर घटनास्थळी पोलिसांनी धाव घेऊन ग्रामस्थांच्या मदतीने बचाव कार्य सुरू केले होते. क्रेनच्या सहाय्याने जीप बाहेर काढल्यानंतर जीपमध्ये कोणी आढळले नव्हते. रात्रीची वेळ त्यात पाऊस सुरू असल्याने उशिरा रात्री बचाव कार्य थांबविले होते. पोलिसांनी दुसर्‍या दिवशी बुधवारी सकाळी पुन्हा बचाव कार्य सुरू केले. यावेळी संभाजी पवार यांचा मृतदेह आढळला.

रस्त्याकडेच्या विहिरी धोकादायक

कराड-पाटण मार्गावरील विहे व निसरे विहीर या ठिकाणावरील विहिरी धोकादायक स्थितीत आहेत. विहिरींना संरक्षक कठडे नसून सुरक्षेच्या द़ृष्टीने कुठल्याही उपाययोजना केलेल्या नाहीत. यापूर्वीही येथे अपघात झाल्याचे बोलले जात आहे. त्यामुळे संबंधितांकडून खबरदारी घेतली जावी, अशी मागणी होत आहे.

परळी; पुढारी वृत्तसेवा : सातार्‍याच्या पश्चिमेकडील परळी खोर्‍यात असलेला केळवली धबधबा ओसंडून वाहू लागला आहे. कधी रिमझिम पाऊस तर कधी दाट धुके अशा आल्हाददायक वातावरणामुळे केळवली धबधबा व परिसर पर्यटकांना आकर्षित करु लागला आहे.

सातारा तालुक्यातील परळी खोर्‍यातील केळवली धबधबा हा पर्यटकांचे आवडते ठिकाण आहे. या ठिकाणी असणारा निसर्ग तसेच टप्प्या-टप्प्याने कोसळणारा हा धबधबा निसर्गप्रेमींना साद घालत असतो. यावर्षी पावसाने ओढ दिल्याने आतापर्यंत हा धबधबा वाहत नव्हता. मात्र गेल्या आठवडाभरापासून या परिसरात पावसाची रिमझिम सुरू असल्याने या धबधब्याने आता कोसळायला सुरुवात केली आहे. त्यामुळे हा धबधबा पाहण्यासाठी पर्यटकांची पावले या परिसरात पडू लागली आहेत.

परळी परिसर निसर्ग सौंदर्याची खाण

सातारा शहरातून बोगद्यातून बाहेर आल्यावर परळीतून पुढे नित्रळ व केळवली असा धबधब्याला जाण्याचा मार्ग आहे. परळी येथूनच एका बाजूला सज्जनगड व समोर दिसणारे केळवली सांडवलीचे विस्तीर्ण पठार त्याचबरोबर उजव्या बाजूला उरमोडी जलाशय असा हा निसर्गाचा अदभूत नजराणा पहायला मिळतो. त्यामुळे आपोआपच या परिसराकडे पयर्र्टकांचे लक्ष वेधले जाते. या परिसरात विविध पशुपक्षी तसेच अनेक औषधी वनस्पती व भात शेतीची खाचरे असल्यामुळे हा परिसर निसर्ग सौंदर्याची खाणच आहे.

सातारा; पुढारी वृत्तसेवा : कोयता नाचवत दहशत निर्माण करून वाहनांची तोडफोड करण्याचा प्रकार सातार्‍यातील मतकर कॉलनीत घडला. खुनाचा गुन्हा दाखल असलेल्या संशयिताने महिलेची छेडही काढली. या घटनेने परिसरात तणावाचे व संतापाचे वातावरण निर्माण झाले आहे. राम तुकाराम दुबळे, (रा. मतकर कॉलनी, गेंडामाळ, सातारा) असे संशयिताचे नाव आहे. ही घटना 27 जूनरोजी रात्री 10 वाजता घडली आहे.

संशयित राम दुबळे हा कोयता नाचवत सातार्‍यातील एका उपनगरात दगड मारत सुटला होता. त्यामुळे परिसरातील नागरिक घरातून बाहेर आले. दगडफेकीच्या प्रकरणातून एका महिलेने संशयिताला जाब विचारताच त्या महिलेला संशयिताने मारहाण केली. संशयिताने महिलेची छेड काढून दमदाटी करत दहशत माजवली. त्यामुळे परिसरात भीतीचे वातावरण निर्माण झाले.

परिसरातील आणखी एका नागरिकाने संशयिताला जाब विचारण्याचा प्रयत्न करताच संशयिताने त्यांनाही शिवीगाळ करत घरात घुसून साहित्याची तोडफोड केली. त्यामुळे परिसर हादरुन गेला. संशयित एवढ्यावरच थांबला नाही. त्याने बाहेर येवून उभ्या असलेल्या जीप, टेम्पो, कार या वाहनांना लक्ष्य करत तोडफोड केली. सुमारे अर्धा तास संपूर्ण परिसराला संशयिताने वेठीस धरले. ‘माझ्या विरोधात कोणी तक्रार करायची नाही. तक्रार कोणी केली तर गाठ माझ्याशी आहे,’ असे म्हणून संशयित तेथून पसार झाला. या घटनेनंतर संबंधित महिलेने शाहूपुरी पोलिसांना घडलेल्या घटनेची माहिती दिली. महिलेच्या तक्रारीवरुन पोलिसांनी संशयिताविरुध्द गुन्हा दाखल केला. पोलिसांनी घटनास्थळी पाहणी करत पंचनामा केला. संशयिताची माहिती घेऊन त्याला पकडण्यासाठी प्रयत्न केला. मात्र, तो पसार झाला असून पोलिस त्याचा शोध घेत आहेत.

सातारा पुढारी वृत्तसेवा : सातारा जिल्ह्यातील आंबेनळी घाटात मेटतळे नजीक मध्यरात्री दरड कोसळली. रस्ता वाहतूकीसाठी खुला करण्याचे काम युद्धपातळीवर सुरु आहे,

माहितीनुसार, गेले काही दिवस कोसळणाऱ्या धुवाधार पाऊस सुरु आहे. या पावसाने महाबळेश्वर – प्रतापगड मुख्य रस्त्यावर आंबेनळी घाटामध्ये मेटतळे गावानजीक बुधवारी (दि.२७) मध्यरात्री दरड कोसळली. माती व दगड रस्त्यावर आल्याने वाहतूक ठप्प झाली आहे.  आज सकाळी (दि.२९) सार्वजनिक बांधकाम विभागाच्यावतीने जेसिबीच्या सहाय्याने दरड हटविण्याचे काम सुरु होते दरड हटविलानंतर वाहतूक पुर्ववत सुरु होणार आहे.

हेही वाचा 

बामणोली; पुढारी वृत्तसेवा :  जागतिक वारसा स्थळ असलेल्या कास पुष्प पठारावर असणारी जैवविविधता व विविध प्रजातींच्या फुलांचे संवर्धन व संरक्षण करण्यासाठी सातारा वनविभाग व कास पठार कार्यकारी समितीच्या वतीने आता तंगुसाच्या जाळीचे कुंपण बसविण्यात येणार आहे.

काही दिवसांपूर्वी पावसाने सुरुवात केल्याने कास परिसरात फिरायला जाणारे पर्यटक वाढले. फुलांच्या संवर्धनासाठी घालण्यात आलेल्या तारेच्या जाळीचे कुंपण काढल्याने फिरायला गेलेले पर्यटक कास पठारावर जेथे फुले येतात त्या भागात सैरावैरा फिरू लागले होते. याबाबत दै. पुढारीने आवाज उठवल्यानंतर कास पठार कार्यकारी समिती व उप वन संरक्षक महादेव मोहिते यांच्या उपस्थितीत हंगाम नियोजनाबाबत झालेल्या बैठकीत तंगुसाचे कुंपण बसवण्याचा निर्णय घेण्यात आला.

ही माहिती समितीचे उपाध्यक्ष दत्तात्रय किर्दत यांनी दिली. कास पुष्प पठारावर रस्त्याच्या बाजूला साधारणपणे चार ते सहा किलोमीटर लांब व चार मीटर उंच असे हे तंगसाच्या जाळीचे कुंपण लवकरच बसवण्यात येणार आहे. यासाठी सुमारे आठ ते दहा लाख रुपये खर्च केला जाणार आहे. केवळ हंगाम कालावधीपुरते मर्यादित हे कुंपण दरवर्षी घातले जाणार आहे.

महाबळेश्वर; पुढारी वृत्तसेवा :  महाबळेश्वर व परिसरात गेले काही दिवस संततधार पाऊस पडत असून या पावसाने मंगळवारी रात्री अंबेनळी घाटात किल्ले प्रतापगड -पोलादपूर मार्गावर कालिका माता पॉईंट नजीक दरड कोसळली. त्यामुळे या मार्गावरील वाहतूक ठप्प झाली होती.

 रात्री प्रतापगड रेस्क्यू टीम सदस्यांसह स्थानिकांच्या मदतीने दरड हटविण्याचे काम सुरु होते. मात्र, बुधवारी सकाळी पुन्हा छोटीशी दरड कोसळली. अखेर जेसीबीने ही दरड हटवून दुपारी वाहतूक पुर्ववत करण्यात आली. यावेळी पोलादपूर पोलिसांसह तहसीलदार व बांधकाम विभागाचे पथक उपस्थित होते. दरड कोसळल्याने या रस्त्यावर मोठ्या भेगा पडल्याचे चित्र होते तसेच रस्त्याकडेचे संरक्षक कठडेही कोसळले होते. सध्या अवजड वाहने या मार्गावरून जाणे धोकादायक असून घाटाचा वापर टाळून पर्यायी मार्गाचा अवलंब करण्याचे आवाहन प्रशासनाकडून करण्यात आले आहे.