Nitin Gadkari On Maharashtra Politics:  सभागृहाची क्षमता खूप आहे किती ही लोकं आले तरी बसू शकतात… मात्र मंत्रिमंडळाची क्षमता अशी वाढवता येत नाही… वर्तमान राजकीय परिस्थितीवर केंद्रीय मंत्री नितीन गडकरी यांनी जोरदार टोला लगावला आहे. राजकारणातील असमाधानी लोकांबद्दल बोलताना आपला देश आणि समाज अतृप्त आत्म्यांचा महासागर असा सूचक वक्तव्य हे नितीन गडकरी (Nitin Gadkari) यांनी केले आहे. विद्यापीठ शिक्षण मंचाच्या गुरुपौर्णिमा निमित्त आयोजित कार्यक्रमात गडकरी बोलत होते.

केंद्रीय मंत्री नितीन गडकरी यांनी म्हटले की, समाधान हे मानण्यावर असते. आपल्याला आपली क्षमता आणि पात्रतेपेक्षा जास्त मिळाले आहे असे आपण मान्य केले तर समाधान मिळते. नाहीतर आज सर्वच दुःखी आहे. नगरसेवक दु:खी आहे कारण ते आमदार झाले नाही. आमदार दु:खी आहे की ते मंत्री झाले नाहीत. मंत्री यामुळे दु:खी आहे कारण त्यांना चांगलं खातं मिळालं नाही आणि आता जे मंत्री होणार होते ते यामुळे दु:खी आहे की आता त्यांना संधी मिळते की नाही अशी त्यांना शंका आहे.. कारण आता एवढी गर्दी झाली असल्याचे गडकरी यांनी म्हटले.

नितीन गडकरी एवढ्यावरच थांबले नाही तर गेल्या काही दिवसांपासून मंत्री होऊच अशा आविर्भावात फिरणाऱ्या नेत्यांवरही त्यांनी भाष्य केले. मागील काही दिवस सर्व तयारच होते.. सूट शिवून, घालतो आणि जातो असा त्यांचा तोरा होता. मात्र, आता त्या सुटाचा काय करायचं असा प्रश्न त्यांना पडला आहे. कारण गर्दीच एवढी झाली आहे. या हॉलची क्षमता जास्त आहे, त्यामुळे किती लोकं आले, तरी ते बसू शकतात.. मात्र मंत्रिमंडळाची क्षमता वाढवता येत नाही… त्यामुळे आपला देश आणि समाज दुखी आत्म्यांचा महासागर आहे असे गडकरी मिश्किलपणे म्हणाले.

रविवारी,  राज्यात शिंदे-फडणवीस सरकारमध्ये अजित पवार यांची एन्ट्री झाली. अजित पवारांसह 9 मंत्र्यांचा शपथविधीदेखील पार पडला. अजित पवार यांच्या मंत्रिमंडळ प्रवेशानंतर शिवसेना-शिंदे गटात नाराजी असल्याचे दिसते.  राज्याचा मंत्रिमंडळ बरेच दिवस रखडला होता. अखेर अजित पवार यांच्या नेतृत्वातील गटाने सरकारमध्ये सहभागी होण्याचा निर्णय घेतला. त्यानंतर मंत्रिमंडळ विस्तार झाला. 

राज्याच्या मंत्रिमंडळ विस्तारामध्ये संधी मिळेल अशी भाजप आणि शिंदे गटातील आमदारांना अपेक्षा होती. मात्र, आता शिंदे गटाच्या वाट्याला येणारी मंत्रिपदेदेखील कमी होणार आहेत. त्याच्या परिणामी शिंदे गटातील आमदारांमध्ये अस्वस्थता असल्याची चर्चा आहे. 

OBC Students Hostel: राज्यातील ओबीसी विद्यार्थ्यांच्या मागणीसाठी मंत्री अतुल सावे (Atul Save) पुढे सरसावले आहेत. ओबीसी विद्यार्थ्यांसाठी प्राधान्याने वसतीगृहं उपलब्ध करुन द्यावे, असे मंत्री अतुल सावे यांनी म्हटले आहे. इतर मागास प्रर्वगातील मुला-मुलींसाठीच्या (OBC Students) वसतिगृहाच्या अडचणी तातडीने दूर कराव्या, असे निर्देश त्यांनी दिले. या शैक्षणिक वर्षांपासून ओबीसी विद्यार्थ्यांना वसतिगृह उपलब्ध कसे होतील यासाठी पाठपुरावा करावा, असे निर्देश इतर मागास आणि बहुजन कल्याण मंत्री अतुल सावे यांनी दिले.

इतर मागास प्रर्वगातील मुला-मुलींसाठी 36 वसतीगृहे सुरु करण्यासाठी जागा उपलब्ध होत नसेल, तर संबंधित जिल्ह्यातील लोकप्रतिनिधी आणि  जिल्हाधिकाऱ्यांशी समनव्य ठेवून यावर तातडीने मार्ग काढण्याचे निर्देश मंत्री अतुल सावे यांनी दिले. त्यानुसार राज्यात ओबीसी विद्यार्थ्यांसाठी 36 नवीन वसतिगृह उभारले जाणार आहेत.

ओबीसी प्रवर्गातील विद्यार्थ्यांची तात्पुरती सोय व्हावी म्हणून 72 वसतिगृहांसाठी भाड्याने इमारती घेण्याचे निर्देश अतुल सावे यांनी दिले. इतर मागास प्रर्वगातील मुला-मुलींसाठी 72 वसतिगृहं सुरू करण्यासाठी इमारती भाड्याने घेण्यासाठी अडचणी येत असतील, तर त्या दूर कराव्या आणि याबाबत जाहिरात देऊन किंवा निविदा काढून ही प्रक्रिया तातडीने पूर्ण करावी, असे निर्देशदेखील मंत्री अतुल सावे यांनी यावेळी दिले.

मंत्रालयात गुरुवारी (6 जुलै) सहकार आणि  इतर मागास-बहुजन  मंत्री अतुल सावे यांच्या अध्यक्षतेखाली आढावा बैठक आयोजित करण्यात आली होती, या बैठकीत मंत्री अतुल सावे यांनी हे निर्देश दिले. मंत्रालयातील आढावा बैठकीत प्रधान सचिवांना अतुल सावे यांनी आदेश दिले आहेत. यावेळी इतर मागास आणि बहुजन कल्याण विभागाचे प्रधान सचिव सुमंत भांगे, संचालक, प्रादेशिक उपसंचालक आणि सर्व सहाय्यक आयुक्त संबंधित अधिकारी उपस्थित होते.

याशिवाय या बैठकीत यशवंतराव चव्हाण मुक्त वसाहत योजना, वसंतराव नाईक तांडा वस्ती सुधारणा योजना, आश्रमशाळांच्या संच मान्यता, बंद पडलेल्या आश्रमशाळांचा आढावा, वसतीगृह अधिक्षक यांच्या वेतन श्रेणीच्या माहितीचा आणि शिक्षक-शिक्षकेत्तर कर्मचाऱ्यांच्या मागण्या यांचाही आढावा घेण्यात आला. 

धनगर समाजातील गुणवंत विद्यार्थ्यांना नामांकित इंग्रजी माध्यमांच्या शाळेत प्रवेश देणे, धनगर समाजाच्या विकासासाठीच्या विशेष योजना, कन्यादान योजना, मॅट्रीकोत्तर आणि मॅट्रीकपूर्व शिष्यवृत्ती योजनेच्या प्रलंबित प्रकरणांचा जिल्हानिहाय आणि वर्षनिहाय माहितीसह आढावा, इतर मागास बहुजन कल्याण विभागामार्फत राबवण्यात येणाऱ्या इतर योजना याबाबत जिल्हानिहाय आढावाही मंत्री अतुल सावे यांनी बैठकीत घेतला.

हेही वाचा: