सातारा; पुढारी वृत्तसेवा : राज्य शासनाच्या वतीने क्रीडा क्षेत्रात उल्लेखनीय कार्य करणार्‍या खेळाडूंसह क्रीडा मार्गदर्शक, संघटक यांना शिवछत्रपती पुरस्काराने सन्मानित केले जाते. जिल्ह्यातील कारी (ता. सातारा) येथील प्रतीक्षा मोरे हिला मल्लखांब तर पाचवड (ता. वाई)च्या स्नेहल मांढरे हिला आर्चरी या क्रीडा प्रकारासाठी शिवछत्रपती पुरस्कार जाहीर झाला आहे.

मल्लखांबमध्ये उत्तुंग कामगिरी करणार्‍या कारी ता. सातारा येथील प्रतिक्षा लक्ष्मण मोरे हिला सन 2019-20 चा मल्लखांब खेळासाठी शिवछत्रपती पुरस्कार मिळाला आहे. तिचे शिक्षण बी.ए.अर्थशास्त्र झाले असून आई-वडील शेतकरी आहेत. ती समर्थ मल्लखांब संघ, कारी या संस्थेची खेळाडू आहे. तिला प्रशिक्षक म्हणून शिवछत्रपती पुरस्कार विजेत्या माया मोहिते, विश्वतेज मोहिते यांनी मार्गदर्शन केले. तिने पहिली जागतिक मल्लखांब अजिंक्यपद स्पर्धा 2018-19 साली खेळली आहे. आजपर्यंत तिने वैयक्तिक 3 रौप्यपदके व 1 सांघिक सुवर्णपदक पटकावले आहे. तसेच 6 राष्ट्रीय स्पर्धांमध्ये सहभाग घेतला असून यांमध्ये 7 सुवर्णपदके 4 रौप्यपदके पटकावली आहेत.

आर्चरी खेळात उत्तुंग कामगिरी करणार्‍या स्नेहल विष्णू मांढरेलाही 2019-20 चा शिवछत्रपती पुरस्कार जाहीर झाला आहे. स्नेहलने वाई येथे चंद्रकांत भिसे यांच्या मार्गदर्शनाखाली आर्चरीचे प्रशिक्षण घेतले. आजारपणामुळे ती काही काळ खेळापासून दूरावली गेली होती. परंतु, तिने जिद्दीने आजारावर मात करत खेळातील नैपुण्य सिद्ध केले. स्नेहल मांढरेने विश्वकरंडक तिरंदाजी स्पर्धेत कंपाऊंडच्या वरिष्ठ संघासाठी कामगिरी बजावली आहे. या दोन्ही शिवछत्रपती पुरस्कार जाहीर झालेल्यांचे सातारा जिल्ह्यातील क्रीडा क्षेत्रातून अभिनंदन होत आहे.

शिरवळ; पुढारी वृत्तसेवा :  शिरवळ (ता. खंडाळा) येथे एका शाळेच्या परिसरात दोन शालेय विद्यार्थ्यांवर एका विद्यार्थ्याने कोयत्याने हल्ला केला. एक दिवसापूर्वी झालेल्या भांडणातून हा प्रकार घडला. एका विद्यार्थ्यावर 7 ते 8 वार झाले आहेत तर मित्राला वाचवण्यासाठी गेलेल्या दुसर्‍या मित्राचे बोट छाटले आहे. या घटनेमुळे शिरवळमध्ये खळबळ उडाली आहे.

घटनास्थळावरून मिळालेली माहिती अशी, वार करणारा संशयित व ज्याच्यावर वार झाले तो या दोघांमध्ये गुरुवारी काही कारणामुळे वाद झाला होता. यावरून संशयिताने दगडाने त्याला मारण्याचा प्रयत्न केला. मात्र, पालक व शिक्षकांनी मध्यस्थी केल्याने पुढील अनर्थ टळला. या वादाचा राग मनात धरून संशयित हा सकाळीच आईला शाळेत जातो, असे सांगून घराबाहेर पडला. शाळेत तो कोयता घेवून आला होता. हा कोयता त्याने एकाला दाखवलाही होता. शाळा सुटताच काही कळायच्या आतच त्याच्यावर संशयिताने वाद झालेल्या विद्यार्थ्यावर वार केले. हे वार त्याच्या हातावर, पायावर, खांद्यावर झाले. दरम्यान, आपल्या मित्रावर हल्ला होत आहे हे बघून पुढे आलेल्या आणखी एका शालेय विद्यार्थ्यांवर देखील संशयित मुलाने कोयत्याने हल्ला केला. या हल्ल्यात त्याचे बोट छाटले गेले. या हल्ल्यात दोन्ही शालेय विद्यार्थी गंभीर जखमी झाले. यातील एकावर पुणे येथील खासगी रुग्णालयात उपचार सुरू असून दुसर्‍यावर शिरवळ येथील खासगी रुग्णालयात उपचारासाठी दाखल करण्यात आले आहे.

नुकतीच शाळा सुटलेली असल्यामुळे शाळेतील मुलांची रस्त्याने गर्दी होती. त्यामुळे बघणार्‍यांना काही समजण्याच्या आतच हा प्रकार रस्त्यावरच घडला. परिसरातील स्थानिक मदतीला धावेपर्यंत हल्लेखोर मुलगा हल्ला करून तिथून पळून गेला होता. यावेळी घटनास्थळी मोठ्या प्रमाणात गर्दी झाली होती. शिरवळ पोलिसांनी तात्काळ घटनास्थळी धाव घेतली. ज्यांच्यावर वार झाले त्यांच्याकडून मिळालेल्या माहितीवरून पोलिसांनी संशयित मुलाला अटक केली आहे. रात्री उशिरापर्यंत या घटनेची नोंद करण्याचे काम सुरू होते.

चार दिवसांपूर्वीच घेतले होता प्रवेश
हल्ला करणार्‍या अल्पवयीन मुलाने नुकतेच शिरवळ येथील शाळेत चारच दिवसांपूर्वी प्रवेश घेतला होता. त्याने चारच दिवस शाळेला हजेरी लावली होती. शुक्रवारी सकाळी शाळेत जातो म्हणून आईला सांगून घराबाहेर पडलेला मुलगा शाळेत न जाता मित्रावर दबा धरून शाळेच्या परिसरातच दिवसभर बसला होता. गुरुवारच्या झालेल्या वादाचे इतक्या भयानक घटनेत पर्यवसान होईल, याचा विचारही कुणी केला नव्हता.

वाई; पुढारी वृत्तसेवा :  माजी मंत्री स्व. मदनराव पिसाळ यांचे नातू विजयसिंह पिसाळ यांनी राष्ट्रवादी काँग्रेस पक्षाचे अध्यक्ष शरद पवार यांच्यासोबतच राहण्याचा निर्णय घेतला आहे. मदनआप्पांच्या नातवानेच आ. मकरंद पाटील यांच्याविरोधात बंड केल्याने वाई मतदारसंघात खळबळ उडाली आहे. दरम्यान, मदनआप्पांच्या घरात दुफळी झाल्याचे निदर्शनास आले आहे.

माजी मंत्री मदनअप्पा पिसाळ यांचे चिरंजीव व वाई तालुका सुतगिरणीचे चेअरमन शशिकांत पिसाळ उपमुख्यमंत्री अजित पवार यांच्यात गटात आहेत. त्यांची पत्नी व माजी जिल्हा परिषद अध्यक्षा अरुणादेवी पिसाळ यांची भूमिका मात्र आजही गुलदस्त्यात आहे. असे असताना त्यांचे चिरंजीव व मदनअप्पांचे नातू विजयसिंह पिसाळ यांनी शुक्रवारी पत्रकार परिषद घेऊन आपण शरद पवार यांच्यासोबत असल्याचे जाहीर केले. लवकरच शरद पवारांच्या उपस्थितीत वाईत भव्य मेळावा?घेणार असल्याचे त्यांनी सांगितले.

विजयसिंह पिसाळ म्हणाले, राष्ट्रवादी काँग्रेस पक्षाच्या स्थापनेपासून माजी मंत्री स्व.मदनराव पिसाळ आप्पा हे खा. शरद पवार यांच्यासोबत होते. आमच्या कुटुंबावर व वाई-खंडाळा-महाबळेश्वर तालुक्यावर शरद पवारांनी भरभरून प्रेम केले व ताकद दिली आहे. स्व. आप्पांनी शरद पवार यांच्या मार्गदर्शनाखाली वीस वर्षे वाई मतदार संघाचे प्रतिनिधित्व केले. त्यांची निष्ठा पाहून शरद पवार यांनी आप्पांना मंत्री हे पद सुद्धा दिले. या कालखंडा दरम्यान शरद पवार यांच्या पाठिंब्यांच्या जोरावर नागेवाडी धरण तसेच सहकारी सूतगिरणीची उभारणी केली. खंडाळा तालुका सुजलाम सुफलाम करण्यात महत्वाची भूमिका निभावली. यामुळे बावधन आणि आसपासच्या गावातील जमीन ओलिताखाली आली. स्व. आप्पांच्या माघारी वडीलकीचा हात शरद पवार यांनी आमच्या कुटुंबाच्या डोक्यावर ठेवला. पिसाळ कुटुंबाची निष्ठा पाहून सौ. अरुणादेवी पिसाळ यांना जि. प.चे अध्यक्ष पद दिले. आमच्या सारख्या सामान्य कुटुंबाला एवढं मोठं केलंत, प्रेम दिलंत, आपुलकी दिली, आदर दिला मग आणखी काय हवं असतं, असेही विजयसिंह पिसाळ यांनी सांगितले.

आमच्या कुटुंबाने कधीही सत्तेसाठी राजकारण केले नाही किंवा निष्ठेशी तडजोड केली नाही. आम्ही सदैव शरद पवार यांच्या विचारांसोबतच चालत आलो आहोत. सातारा जिल्ह्याचे राजकारण हे यशवंत विचारांचे राजकारण असून या विचारांपासून आम्ही दूर जाऊ शकत नाही. तत्त्व व निष्ठा याबाबत आम्ही कधीही तडजोड करू शकत नाही. त्यामुळे आम्ही शरद पवारांसोबत आणि स्व. आप्पांनी आणि तात्यांनी दाखवलेल्या वाटेवरच आम्ही राहणार आहोत, असेही विजयसिंह म्हणाले.विजयसिंह पिसाळ यांनी आ. मकरंद पाटील यांच्याविरोधात घेतलेली जाहीर भूमिका त्यांचे आ. मकरंद पाटील यांच्या विरोधात बंड मानले जात आहे.

मदनअप्पा व लक्ष्मणतात्यांनी माझ्या निर्णयाचे स्वागतच केले असते…

स्व. मदनराव आप्पांनी रुजवलेल्या विकास व वैचारिक वटवृक्षाच्या मुळ्या या मतदारसंघात कार्यकर्त्यांच्या, अबालवृद्धांच्या रुपाने रुजलेल्या आहेत. या भाग्यविधात्याच्या वटवृक्षाची सावली पुन्हा तालुक्यात पसरावी हीच प्रत्येक सर्वसामान्य लोकांची मनापासूनची इच्छा आहे. त्यासाठी आम्ही पुन्हा लढू आणि जिंकू. मला एवढी खात्री आहे की आज जर आपल्या सर्वांमध्ये स्व.मदनआप्पा आणि स्व. लक्ष्मणतात्या असते तर त्यांनी सुद्धा माझ्या निर्णयाचे स्वागतच केले असते, असेही विजयसिंह पिसाळ म्हणाले.