बामणोली; पुढारी वृत्तसेवा : सातारकरांची तहान भागवणारा कास तलाव पूर्ण क्षमतेने भरला असून, सोमवारी सांडव्यावरून पाणी वाहू लागले आहे. यामुळे सातारा शहराचा पाणी प्रश्न मिटला आहे. कास तलाव परिसरात गेली काही दिवस संततधार पाऊस सुरू आहे. या पावसामुळे अखेर कास तलाव पूर्ण क्षमतेने भरला आहे. या परिसरात पर्यटन वाढावे, या द़ृष्टिकोनातून सातारा नगरपालिकेने कासच्या सांडव्यावर चांगल्याप्रकारे टप्पे देऊन तेथे पाण्याला भुशी डॅमचा फील दिला आहे.

कास तलाव भरल्याने येथे सातारा जिल्ह्यासह इतर जिल्ह्यातून येणार्‍या पर्यटकांची रेलचेल वाढणार आहे. कास, बामणोली परिसरात पडत असलेल्या संततधार पावसामुळे या भागातील ओढे, नाले दुथडी भरून वाहत आहेत. त्यातच आता कास तलाव भरल्याने या परिसरातील पर्यटन चांगल्या प्रकारे बहरणार आहे. कासच्या सांडव्यावरून पाणी वाहत असल्याने येथे आता पर्यटकांची चांगलीच गर्दी वाढणार आहे. कास पुष्प पठारावरून सांडव्याकडे न जाता पर्यटक घाटाई फाट्यावरून घाटाई मार्गे कास सांडव्याकडे पर्यटनास आले तर ते सोयीस्कर ठरणार आहे.

आता कास परिसरात फिरायला जाणार्‍या पर्यटकांना कास नजीकचा सातार्‍याचा भुशी डॅम, भांबवली वजराई धबधबा, मुनावळेचा केदारेश्वर धबधबा, एकीवचा पाबळ धबधबा, बामणोली, शेंबडी, मुनावळे या पर्यटन स्थळी पावसाळी पर्यटनासाठी जाता येणार आहे.
दरम्यान कास तलाव भरल्याने आता सातारकरांची पाण्याची चिंता वर्षभरासाठी तरी मिटली असून यामुळे सातारकरांनी सुस्कारा सोडला आहे.

हेही वाचा : 

फलटण; पुढारी वृत्तसेवा :  फलटण तालुक्यातील एका गावामध्ये रविवार दि. 23 रोजी दोन शाळकरी मुलींमध्ये झालेल्या भांडणाच्या रागातून एका कुटुंबातील व्यक्तींनी माय-लेकीला मारहाण करून जातीवाचक शिवीगाळ व धक्काबुक्की केल्याची घटना घडली. याप्रकरणी विनयभंगासह ‘पोक्सों’तर्गत चौघांविरुद्ध फलटण ग्रामीण पोलिस ठाण्यात गुन्हा दाखल झाला आहे.

पोलिसांनी दिलेल्या व पीडित महिलेच्या तक्रारीवरून मिळालेली माहिती अशी, फलटण तालुक्यातील संबंधित गावामध्ये पीडित महिला व संशयित दोन्ही कुटुंबे राहण्यास आहेत. या कुटुंबातील दोन अल्पवयीन मुलींमध्ये गावातील वृद्धाश्रमासमोर रविवार दि. 23 रोजी सायंकाळी सातच्या सुमारास भांडण झाले. मुलींच्या भांडणाच्या कारणावरून पालकांमध्ये प्रथम वादावादी झाली. हमरीतुमरीवरून प्रकरण मारहाणीपर्यंत पोहोचले. संशयित व त्यांच्या कुटुंबातील इतर सदस्यांनी सायंकाळी साडेसातच्या सुमारास पीडित महिला व त्यांची अल्पवयीन मुलगी यांना मारहाण व जातीवाचक शिवीगाळ करून पीडित महिलेचा व अल्पवयीन मुलीचा विनयभंग केल्याचे तक्रारीत म्हटले आहे. त्या तक्रारीनुसार फलटण ग्रामीण पोलिस ठाण्यात गुन्हा नोंद झाला आहे. घटनेनंतर गावात तणावपूर्ण वातावरण झाले होते. पोलिसांनी घटनास्थळी धाव घेऊन घटनेची माहिती घेतली. सध्या गावात शांततेचे वातावरण आहे. सातारा जिल्हा पोलिस अधीक्षक समीर शेख, अप्पर पोलिस अधीक्षक बापू बांगर यांच्या मार्गदर्शनाखाली उपविभागीय पोलिस अधिकारी राहुल धस तपास करत आहेत.

फलटण ग्रामीण पोलिस स्टेशनच्या हद्दीतील एका गावात दोन मुली खेळत असताना त्यांच्यामध्ये वाद झाला. मुलींच्या वादानंतर त्या ठिकाणी आलेल्या त्यांच्या पालकांमध्येही वादावादी झाली. याबाबत मारहाण, जातीवाचक शिवीगाळ व विनयभंग झाल्याची तक्रार झाली असून योग्य दिशेने तपास चालू आहे. तपासात जे पुरावे हाती येतील ते न्यायालयासमोर सादर करण्यात येतील. या घटनेबाबत कोणीही अफवा पसरवू नये, अन्यथा स्वतंत्रपणे कारवाई करू.
– समीर शेख, जिल्हा पोलिस अधीक्षक, सातारा.

सातारा; पुढारी वृत्तसेवा :  सातारा-कास मार्गावर यवतेश्वर घटातील धोकादायक दरडी महसूल विभाग व सार्वजनिक बांधकाम विभागाने संयुक्त मोहीम राबवून सोमवारी हटवल्या. डोंगरमाथ्यावरील सुमारे 5 टनांहून अधिक वजन असलेल्या दरडींचा सुळका पडून मार्गावर सुमारे 3 फूट खोल खड्डा पडला. जोरदार दणक्यामुळे मार्ग दुभंगला. संरक्षक कठडा तोडून ही दरड दरीमध्ये कोसळली. यवतेश्वरजवळील डोंगरमाथ्यावरील 5-6 दरडी प्रशासनाने सोमवारी हटवल्याने दिलासा मिळाला.

जिल्ह्याच्या पश्चिमेस पावसाची संततधार सुरू आहे. गेल्या दोन-चार वर्षांत या भागात अतिवृष्टी होऊन भूस्खलन, जमीन खचणे, दरडी कोसळणे असे प्रकार वाढले आहेत. विशेष: 2019 साली अतिवृष्टी होऊन महापूर आला होता. त्यानंतर 2021 साली जुलै महिन्यात दोन-तीन दिवस अतिवृष्टी झाल्याने डोंगरमाथ्यावरील कड्यांचे भाग निसटू लागले आहेत. घाट मार्गावरील झीज झालेले मोठमोठे दगड दरडी बनून मार्गावर कोसळत आहेत. घाटातील कामांसाठी ब्लास्टिंग, ब्रेकरचा वापर झाल्याने रस्त्याकडील भाग ठिसूळ होऊन तो मलबा रस्त्यावर येत आहे.

या दरडींचे उच्चाटन करण्यासाठी जिल्हा प्रशासनाने सोमवारी यवतेश्वर घाटात मोहीम राबवली. भर पावसात महसूल विभाग आणि सार्वजनिक बांधकाम विभागाने सांबरवाडी डोंगराच्या बाजूने चढाई केली. पोकलेनच्या 40 फुटी बकेटच्या सहाय्याने दरडी हटवण्याचे काम सकाळी 10 वाजता सुरू झाले. खाणीजवळ कड्याचा सुटत चाललेला सुळका पॉकलेनच्या सहाय्याने खाली दरीत ढकलून देण्यात आला. सुमारे 5 टनाहून अधिक वजन असलेली ही दरड खाली पडून मार्ग सुमारे 3 फूट खोल खचला. दरडीचा दणका इतका प्रचंड होता की त्यामुळे सुमारे 10-15 फूट मार्ग दुभंगला. ही दरड वेगाने खाली येऊन संरक्षक कठडा तोडून दरीत गेली.

सांबरवाडी डोंगर माथ्यावरील इतर दरडीही दरीत ढकलून देण्यात आल्या. मार्गावर पडून राहिलेल्या दरडी जेसीबीच्या साह्याने हटवण्यात आल्या. छोट्या दरडी पॉकलेनच्या सहाय्याने उचलून डोंगरमाथ्यावर व्यवस्थित ठेवण्यात आल्या. दरडींमुळे सातारा-कास या नव्या मार्गाची व संरक्षक भिंतीची काही ठिकाणी दुरवस्था झाली. सार्वजनिक बांधकाम विभागाने तातडीने दुरूस्तीचे कामहाती घेतले आहे. दरडी हटवण्यात येणार असल्याने हा मार्ग दिवसभरासाठी बंद ठेवला होता. त्यामुळे सांबरवाडी, यवतेश्वर, कास तसेच बामणोली परिसरातील नागरिकांना एकीव व इतर पर्यायी मार्गांचा अवलंब करावा लागला. या मोहिमेची प्रशासनाकडून पूर्व कल्पना देण्यात आल्याने नागरिकांची फार गैरसोय झाली नाही. दरम्यान, दूरवस्था झालेला रस्ता सिमेंट काँक्रीटच्या सहाय्याने दुरुस्त करण्यात आला.

हेही वाचा :