लोणंद; शशिकांत जाधव : सातारा जिल्ह्यातील खंडाळा तालुक्यातील सुखेड व बोरी गावात मंगळवारी सुमारे ३०० महिलांनी एकमेकींना वाजत-गाजत शिव्यांची लाखोली वाहिली. पाऊण तास दोन्ही गावातील महिलांनी डफडे, ताशा, शिंग या वाद्यांच्या निनादात एकमेकींना शिव्या घालून, बोरीच्या बाराची परंपरा कायम ठेवली. यावेळी दोन्ही गावांतील ग्रामस्थांनी तोबा गर्दी केली होती. (Satara News)

सुखेड व बोरी या गावातील महिला अनेक वर्षांपासून नागपंचमीच्या दुसर्‍या दिवशी दुपारी बारानंतर दोन्ही गावाच्या दरम्यान जाणार्‍या ओढ्याच्या काठाला येऊन शिव्यांची लाखोली वाहत बोरीचा बार घालतात. यावर्षी बोरीचा बार कसा होणार याची उत्सुकता सर्वांनाच होती. दुपारी १२ च्या सुमारास प्रथमत: सुखेड गावातील महिला डफडे, ताशा, शिंग या वाद्यांसह ओढयाच्या तीरावर येऊन हातवारे व टाळ्या वाजवत बार घालू लागल्या. त्यावेळीच बोरी गावातील काही उपस्थित महिलांनीही हातवारे करत बार घालण्यास सुरुवात केली. त्यानंतर बोरी गावातील महिला वाजत गाजत येऊन बोरीचा बार घालू लागल्या.

दोन्ही बाजुच्या माहिलांनी एकमेकांना हातवारे करीत शिव्यांची लाखोली वाहत बोरीचा बार घालण्यास सुरुवात केली. ओढ्यामध्ये धोम-बलकवडीचे पाणी सोडण्यात आले होते. बार घालणार्‍या महिलांबरोबरोबरच बघ्यांना आवरताना पोलीस, ग्रामस्थ यांची मोठी धांदल उडत होती. बार घालणार्‍या महिला हातवारे करत शिव्यांची लाखोली वाहत होत्या. यावेळी डफडे, शिंग, तुतारीचा आवाज जसा वाढत जाईल तसा महिलांचा उत्साह वाढून टाळ्या वाजवून त्या एकमेंकींना आव्हान देत होत्या. त्यातच बघ्यांची गर्दी ही महिलांना चिथावणी देत होती. बोरीच्या बारात आबालवृद्धांसह सुमारे ३०० च्यावर महिला सहभागी झाल्या होत्या. सुमारे पाऊण तास पाण्यात उभे राहून बोरीचा बार घालणार्‍या महिलांना मागे ढकलत नेऊन ग्रामस्थ व पोलिस बार कमी वेळ होण्याचा प्रयत्न करत होते. (Satara News)

हेही वाचा : 

शिरवळ, पुढारी वृत्तसेवा : पुणे-बेंगलोर राष्ट्रीय महामार्गावरील शिरवळ गावच्या हद्दीत शिरवळ पोलिस आणि स्थानिक गुन्हे अन्वेषण (एलसीबी) च्या पथकाने वेश्या व्यवसाय सुरू असणार्‍या गोकुळ लॉजवर मंगळवारी छापा टाकला. यामध्ये दोन पीडित महिला, चालक महिला व हॉटेल मालक अशा चौघांना ताब्यात घेतले आहे. याप्रकरणी रात्री उशिरापर्यंत गुन्हा दाखल झाला नव्हता.

स्थानिक गुन्हे अन्वेषण (एलसीबी) विभागाला गोकुळ लॉजवर वेश्या व्यवसाय सुरू असल्याची माहिती मिळाली. याची खात्री करण्यासाठी एलसीबीच्या पथकाने लॉजवर एक बनावट ग्राहक पाठवले. या ग्राहकाकरवी लॉजमध्ये सुरू असलेल्या वेश्या व्यवसायाची विस्तृत माहिती मिळवल्यानंतर मंगळवारी दुपारी एलसीबी आणि शिरवळ पोलिसांनी हा छापा टाकला.

पोलिसांनी छापा टाकल्यानंतर लॉजमध्ये एकच कल्लोळ उडाला. पोलिस आले म्हटल्यावर अनेकांनी आपला गाशा गुंडाळून जाण्याचा प्रयत्न केला. मात्र, पोलिसांनी कुणालाही जागचे हलू दिले नाही. या कारवाईत पोलिसांनी चौघांना ताब्यात घेतले आहे. यामध्ये दोन पीडित महिला, चालक महिला आणि गोकुळ लॉजचा मालक अशा चौघांचा समावेश आहे. लॉजवर छापा टाकल्याची माहिती पसरल्यानंतर शिरवळमध्ये चौका चौकात चर्चा सुरू होत्या.

एलसीबीने छापा टाकून संशयितांना पकडल्याने शिरवळमधील वेश्या व्यवसायाचा पर्दाफाश झाला आहे. किती वर्षांपासून लॉजवर वेश्या व्यवसाय सुरू होता? यामध्ये आणखी कोणा-कोणाचा सहभाग आहे? वेश्या व्यवसायासाठी मुली व महिला कोणाकडून येत होत्या? आणखी पीडित महिला आहेत का? असे सवाल या कारवाईमुळे उपस्थित केले जात आहेत.