फलटण, ५ फेब्रुवारी: माता रमाई जयंतीनिमित्त एक विशेष कार्यक्रमाचे आयोजन फलटण येथील पंचशील चौक, मंगळवार पेठ येथे करण्यात आले आहे. या कार्यक्रमात प्रसिद्ध सिने अभिनेत्री प्रियांका उबाळे यांच्या सादरीकरणात माता रमाई यांच्या जीवनावर आधारित एकपात्री नाटक सायंकाळी ६ वाजता सादर करण्यात येणार आहे.
माता रमाई जयंती महोत्सव समितीच्या वतीने सर्व समाजबांधवांना या कार्यक्रमाचा लाभ घेण्याचे आवाहन करण्यात आले आहे. हा कार्यक्रम माता रमाईंच्या संघर्षमय जीवनाचा आणि त्यांच्या बाबासाहेब आंबेडकर यांच्या जीवनावर झालेल्या प्रभावाचा उजाळा देणारा ठरणार आहे.
माता रमाई: एक संघर्षशील स्त्रीचा आदर्श
माता रमाई, म्हणजेच रमाबाई आंबेडकर, यांचा जन्म ७ फेब्रुवारी १८९८ रोजी महाराष्ट्रातील दाभोळ या छोट्याशा गावात एका गरीब दलित कुटुंबात झाला. आपल्या आयुष्यात अनेक आर्थिक आणि सामाजिक अडचणींना सामोरे जात त्यांनी डॉ. बाबासाहेब आंबेडकर यांच्या शिक्षण आणि सामाजिक न्यायासाठीच्या लढ्यात मोलाचा पाठिंबा दिला.
डॉ. आंबेडकर परदेशात उच्च शिक्षणासाठी असताना रमाईने अनेक आर्थिक संकटांना तोंड दिले, मात्र त्यांच्या ध्येयाच्या मार्गात कधीही अडथळा निर्माण केला नाही. डॉक्टररेट ऑफ सायन्सेस ही जगातील सर्वोच्च पदवी मिळवण्यासाठी बाबासाहेबांना जेव्हा परिश्रम घ्यावे लागले, तेव्हा त्यांच्या मागे उभी राहणारी प्रेरणास्थान होती ती माता रमाईच.
त्यांचे जीवन हे त्याग, सहनशीलता आणि धैर्य यांचे प्रतीक आहे. बाबासाहेबांच्या विचारांना पाठिंबा देताना त्यांनी स्वतःचा संघर्ष समाजासाठी अर्पण केला.
