फलटण :- विडणी येथे पार पडलेल्या भारतीय जनता पार्टीच्या प्रवेश सोहळ्यात आज खऱ्या अर्थाने राजकीय भूकंप पाहायला मिळाला. वडले गावातील सत्ताधारी गटाचे प्रमुख पदाधिकारी आणि कार्यकर्त्यांनी माजी खासदार रणजितसिंह नाईक निंबाळकर यांच्या नेतृत्वावर विश्वास टाकत जाहीरपणे भाजपमध्ये प्रवेश केला. या घडामोडीमुळे आगामी जिल्हा परिषद व पंचायत समिती निवडणुकीत वडले गावात भाजपची स्थिती अत्यंत भक्कम झाली असून विरोधकांचा सुपडा साफ होण्याची चिन्हे स्पष्ट दिसू लागली आहेत.
या प्रवेश सोहळ्यात केवळ सामान्य कार्यकर्तेच नव्हे, तर गावच्या सत्तेची धुरा सांभाळणारे विद्यमान व माजी पदाधिकारी रणजितसिंह नाईक निंबाळकर यांच्या गळाला लागल्याचे चित्र पाहायला मिळाले. यामध्ये वडले ग्रामपंचायतीच्या विद्यमान उपसरपंच सौ. स्वाती पांडुरंग मोरे, पांडुरंग मोरे, प्रबुद्ध मोरे पाटील, माजी उपसरपंच संतोष मोरे, अमोल मोरे, हिरामण मोरे आणि संतोष जगताप यांचा प्रामुख्याने समावेश आहे. यासोबतच ‘मित्र समूह वडले’च्या असंख्य तरुणांनी भाजपचा झेंडा खांद्यावर घेत भाजपप्रती आपली निष्ठा जाहीर केली.
प्रवेशकर्त्यांनी यावेळी आपली भूमिका स्पष्ट करताना सांगितले की, गेल्या काही वर्षांत रामराजे गटाकडून केवळ आश्वासनांची खैरात झाली, मात्र प्रत्यक्षात ठोस आणि विकासाभिमुख कामे ही रणजितसिंह नाईक निंबाळकर यांच्या माध्यमातूनच झाली आहेत. नीरा–देवधरचे पाणी, रस्ते विकासाचे मजबूत जाळे आणि मूलभूत सुविधांची कामे यामुळे वडले गावाच्या विकासाला खरी दिशा मिळाल्याची भावना त्यांनी व्यक्त केली.
वडले गावाचे भविष्य ‘कमळा’सोबतच सुरक्षित असल्याचा ठाम विश्वास व्यक्त करताना माजी उपसरपंच संतोष मोरे आणि विद्यमान उपसरपंच सौ. स्वाती मोरे यांनी रणजितसिंह नाईक निंबाळकर यांच्या नेतृत्वावर आपला संपूर्ण विश्वास असल्याचे सांगितले.
या वेळी बोलताना रणजितसिंह नाईक निंबाळकर यांनी सर्व नवनिर्वाचित सदस्यांचे मनापासून स्वागत केले आणि,
“वडले गावाचा सर्वांगीण विकास ही आता माझी जबाबदारी आहे,” अशी ठाम ग्वाही दिली.
या जाहीर प्रवेशामुळे वडले गावात भाजपची ताकद कित्येक पटीने वाढली असून विरोधकांची अवस्था अक्षरशः ‘धोबीपछाड’ झाल्यासारखी झाली आहे.
रणजितसिंह नाईक निंबाळकरांच्या नेतृत्वावर मोठा विश्वास
